Read bassa AYIZAYA 44 Bible Online

AYIZAYA 44 - bassa bible

AYIZAYA 44

¹AGWANGWAMA hiɛŋ, Oo ɛ-yɛu mi ugondu ge Jekob, gabụ ge Isrɛl na Ngee teri,

²Gamba n shɛ AGWANGWAMA na ɛbɛ njɛ, Ngoo bu mo taa ni igwune tumata, Ngɛɛ zhɛ kaa mo bu mbiyono. N hiɛŋ, Oo gabụ ge Jekob na shɛ yɛu mi ugondu, ta nda inyɛsɛ o; keeni Jɛrusalɛm na Ngee teri.

³N zhɛ ma 'waŋ meni na cɛnjɛ tu na i'uyɛ gwụmɛ. Ma nda maa ohwulwo na fwunga na cɛnjɛ tu hwoo. N zhɛ mo dudugono ajalalo hiŋ Mpiala mi mi; maa ma pana atwa hiŋ a na ihi 'wa ne ekwunyi uwebiye mu.

⁴Ɛ zhɛ na saba gana ambɛ[136] na oo zwogono meni tebiye, gana i'wɛ'wɛ ɛtɛ ɛɛ hiɛŋ popula[137] nɛ shikekeni nu uhwulwo na meni ma fwunga.

⁵Bụtụ na zhɛ bɛ hiɛŋ, N shɛ bụtụ ba AGWANGWAMA. Bụtụ ye zhɛ na mama suyana ni izeci Jekob. Ɛ zhɛ a zhajɛ o togwu na atwa Isrɛl. Bụtụ binya zhɛ ba 'nyata nu ụragbamụ ubwa, bɛɛ hiɛŋ, Bụtụ ba AGWANGWAMA Ngaa shɛ, bu na mama suyana maa bɛ shɛ bụtụ bu ko na amɛ atwa Isrɛl.

⁶AGWANGWAMA na shɛ Agwatana Isrɛl, na kaa be gwube aŋ, na shɛ AGWANGWAMA na Hwuri Kpaaŋ, ubwa hiɛŋ, Gamba n shɛ umozhigo keeni ukwunanga. I zasa Agwatana anya ta namba ya namɛ swooŋ ne mi o.

⁷I ta 'yajɛ suu binya bụtụ na shɛ gana mi? Asha ga duma iŋ; ga duma kpataa, ga zhajɛ nu umbe mu. Gaaba kwuŋ eri ba duma ijɛ ndanjɛ bana[138] te kwune nu umozhigo[139] tutu i ci ukwunangaa?

⁸Atwa mi, ta nda ma inyɛsɛ o! Hi mepi maa te kwune na aka atwa angwụshɛ tutu i ci aka ga, N jɛmɛ la iyi nɛ zhɛ ya ndangana, ahiɛba hiɛ shɛ eseyida mi. I ta 'yajɛ suu agwatana oko ukpahiŋ[140] ta namba Ngaa ta hwụjɛ[141] shɛ iwɛ ubwa?

⁹Atwa elele na a nda ntatanuwaŋ, a shɛ atwa tusashɛ, ntatanuwaŋ ma ata ma aba aa nda kaa mɛ shɛ iyi tɛgadaga. Atwa na a zhɛba ntatanuwaŋ ma ata, a shɛ sholubo keeni ogbodu, ụpụrụsa kaa zhɛ wa sha aŋ tilɛɛ.

¹⁰I zhɛshɛ maa bụtụ shepi ụshɛmbɛrɛ maa nda tuwa kwo kaa itɛtɛnuwɛŋ nɛ ɛɛ zhɛ na zhɛba gana Agwatana o!

¹¹Ɛ zhɛ a ngbaraka atwa na a zhɛba iŋ cwɛŋ bana. Atwa na a ma tuwa ta ata a shɛ bụtụgwụmwa. Ga a zhajɛ maa o sotulonu maa e menji aŋ, uriri kaa zhɛ wa ima aŋ, ụpụrụsa zhɛ wa sha aŋ.

¹²Bụlụma ba shapa ụshɛmbɛrɛ[142] bo shiyono nu ulwa maa nda iyi nu bwa. Ba shapa ụshamụ nu u'ala ata ubwa ukpahiŋ, bo dubo uŋ maa ụ shɛ gana na baa jala. Tu baa nda ugondu ata, ti imunɛ ti i'uyɛ ya gwuma bụ, bo lukwumo du.

¹³Bishebi bi i'wɛ'wɛ ba manganga ụ'wụ'wụ, ba nda uŋ useyida nụ ụhwụla, nazhɛ ba shaba ụŋ ni i'wɛŋnɛ ibwɛ ugondu; ya suba ya bụtụgwụmwa. Gana na bụtụgwụmwa shɛ gom ibɛ baa nda iŋ maa i pilanụ tebiye maa shikicingo iŋ nu umwono ubwa[143]

¹⁴Bi eri bɛ jwɛ osobu maa nda uhwara, kwo kaa bɛ jwɛ ukpekpeshi kwo kaa ugwugwa nu uwapa; kwo kaa ba shɛla usobu ata ba 'yaka maa eshilo no ngbono uŋ maa u waŋnɛ.

¹⁵Nụ ụ'wụ'wụ ebe bụtụ ba hwatụ, ubwa baa shapa baa shabanana tuwa. Ba shapa geri bu ko bu na hwatụ, bu na nda te tiyikwo, ba shapa geri ta vwɛ ba nda tuwa maa bu na zhɛba tụ.

¹⁶Ni i'wɛ'wɛ ɛtɛ ike ibɛ baa shana ulwa, boo nyoso usunda, baa ya, baa hwuga ụlatụ. Ubwa baa hwatụ harɛ bɛ hiɛŋ, Ihiiŋ, mpiala mu go mu m beni; kaayɛ, ulwa go zhɛmɛ.

¹⁷Nazhɛ ba shapa ụ'wụ'wụ ata ta vwɛ ba shaba ya tuwa, bu no kwuzono tu, bu na zhɛba tụ. Bu na nda adua no ofwo tuba, bɛ hiɛŋ, Gabụ bɛ shɛ ụzhɛba mu, m bicinji!

¹⁸Atwa gana ga zasa iyi elele ee mepi maa e eshiciji iyi nɛ aa nda o. Ubwa uteji shishe sha aba maa kede a kwụbɛ uhwaŋna o, ta shihaŋsa sha aba maa kede e eshiciji iwɛ-tɛkana o.

¹⁹Bishebi ba tuwa jɛjɛ shɛ maa haŋsa kwo kaa maa eshicigo maa ụ'wụ'wụ ga Ama shana ulwa, Ama nda tiyikwo na tɛmbɛrɛ tu bwa, Omo nyoso tu usunda mu, Ama ya. Tuvwa tu ụ'wụ'wụ ata na Ngee shebi tuwa. Uzhibi ụ'wụ'wụ ata na Omo kwuzono!

²⁰Bụtụ ga ba ya ma'alụ, tuhalakaka tu na ee helekeci bu, tɛ inzhɛnjɛ bụ, bi eri shi kaa momo bicingo ya o. Ubwa kaa zha shɛ bo lono maa tuwa ta ata baa 'waŋnɛ ni i'ɛlɛ ibwɛ tɛ shɛ iyi ụzagwụ o.

²¹AGWANGWAMA hiɛŋ, Gabụ ge Jekob, ne teyinje maa yɛu mi ugondu abɛ shɛ. Gamba m bu karɛ maa shɛ yɛu mi ugondu, isɛbwɛ bu zha shɛ mo n 'wo kwukwuŋ.

²²N sugwo undwa bụ tubwada na shɛ gana udomu na inshi, keeni iwɛwɛ bu nɛ shɛ gana uzhikwozhikwo na inshi. Gwure no ofwo mi, Gamba m bu gwubwo.

²³Oo gabụ azuba, zunga azunga unyasa! Ugana ma, oo ahiɛba ogodo unyizo a na ileji tebiye. Oo ahiɛba nshama, kala ma n'ungwa mu unyasa na azunga taawụụ, ta ahiɛba i'wɛ'wɛ uwapa keeni i'wɛ'wɛ elele! AGWANGWAMA gwubwo atwa Jekob, atwa Isrɛl kaa zhɛ a pana bụ ụjɛrụma.

²⁴Gamba n shɛ AGWANGWAMA na karɛ iyi elele kpaaŋ, Gamba Ngooko m berishiji azuba. Aka na Ngaa njɛ cɛnjɛ tu unyizo[144] ga, gaaba namba la ne mii?

²⁵N njɛ ashɛjɛ shɛlagwụ, Ngee gereteji iyi nɛ atwa shihaŋsa a kwụba. Ngaa lacɛ n-ndumwa ma atwa ti'inta, Ngee mbiseni maa ti'inta ta aba tɛ shɛ ụlagwụ.

²⁶Ubwa shikicinji n-ndumwa mu na yɛu ibwɛ ugondu jɛmɛ dimi, iwɛ iyi nɛ ye ci geri be eshe. Baa ụrɛcɛnjɛ kaa iyi nɛ atumwa ubwa dumwa la iwɛ geri be eshe. Bee mbishi atwa Jɛrusalɛm, bɛɛ hiɛŋ, Atwa tɛ zhɛ a namanana nu bwa, ɛɛ tɛ zhɛ a maanana du ashɛpwụ Juda.

²⁷Tedure nu unu mu tupana Ngaa hwụŋcɛnjɛ meni mo ofwo ata ileji. N zhɛ kaa ma hwụŋcɛnga erefu bu.

²⁸Ubwa hiɛŋ Sairos, Gabụ bi zhɛ bu ma untanganana ofwo; gabụ kaa bi zhɛ ba ụrɛcɛnga iyi nɛ Ama jala maa i njɛ. Gabụ du bi zhɛ bɛ hiɛŋ ge e meeneni Jɛrusalɛm maa e shileneni ukoshilo umwono wa Agwatana.