Read bassa AYIZAYA 45 Bible Online

AYIZAYA 45 - bassa bible

AYIZAYA 45

¹AGWANGWAMA na teri Sairos maa ya tugwama, Ngaa untanganɛ u'ala ubwa ubiye, maa Ma lasatagwụ edenji nu umbe ubwa; bu tumwanɛ bu maa lashaga shɛgwuma ukpahiŋ aba; AGWANGWAMA zhɛ a kapashangana bụ shidubo sha ashɛpwụ wụtụ a'wụtụ. AGWANGWAMA hiɛŋ Sairos,

²Gamba ni ikɛnyi mi N zhɛ ma bu hangana uhwaŋna, maa Ma nangwacanga nshama[145] N zhɛ ma bwarataga shidubo shɛ ɛtumburɛ Ma kwusataga imbele ɛtɛ ya ashɛmbɛrɛ.

³N zhɛ ma bu pana i'wɛŋnɛ ɛtɛ banɛ ne tishi, keeni uduciya ata namɛ no ofwo tusweci; nazhɛ ɛbi zhɛ ba mapa maa Gamba n shɛ AGWANGWAMA, sasana maa Agwatana ata Isrɛl ubu suyanɛ ni izeci bu.

⁴Gamba m bi teri maa mbiyeni yɛu mi ge Isrɛl ugondu, aba shɛ atwa ata mi Ngee teri. M bi peni ụjɛrụma ụ'wụtụ[146] tebiye, okwo te bu m mepi shi bata.

⁵Gamba n shɛ AGWANGWAMA; Agwatana anya elele zasaba ya o. N zhɛ ma bu pana ikɛnyi ɛtɛ utakashɛ ibɛ ubu to, okwo te bu m mepi shi bata.

⁶N njɛ ijɛ iwɛ maa bụtụ be elele na namɛ nu uce unyizo te kwune nu uwaŋna-banụ tutu i ci uwaŋna-twonuo mepi maa Gamba kiri n shɛ AGWANGWAMA, maa i zasa Agwatana anya ta namba ya o.

⁷Gamba n karɛ uhioko-uhwaŋna te tishi hwɛɛ. Gamba mɛ zhɛ ne tuwebiye keeni abara ne ebe. Gamba AGWANGWAMA n njɛ ijɛ hwɛɛ.

⁸N zhɛ ma hi tumwananɛ tiririri maa ti ngbe na tụla gana eshilo ga cɛnjɛ tu unyizo tu kapɛshɛngwa maa ubino unshɛ. Nazhɛ tumama 'yaga ne tiririri ti zhɛ tu na saba na cɛnjɛ; Gamba AGWANGWAMA N nduwa ijɛ.

⁹Bụtụ na ba twa ifelu[147] ne bikeri bu bwa zhɛ ba nda hwuŋ adangboo, keeni ikwɛshɛ nɛ oo mo na cɛnjɛ-ti-'i'wɛŋnɛ ta bụtụ na mo iŋ[148] nɛ shɛ gana mu na mụ vwɛ. Cɛnjɛ-ti'i'wɛŋnɛ suu ti eri to hoŋtono bumo-bi-ikwɛshɛ ɛtɛ maa, Imbe nɛ kwuŋ aba maa? Ikwɛshɛ suu eri yɛ hiɛŋ bumo bi ibɛ maa, Bi 'yeshi tuma o?

¹⁰Bụtụ na hiɛŋ bino bwa, ofubo imbe kwu abɛ 'yajɛɛ? Kwo kaa bishi bwa maa, Imbe nɛ kwu ebi mecii? Bụtụ ata zhɛ ba nda hwuŋ adangboo!

¹¹AGWANGWAMA na shɛ Bụtụ ata bi Tijilo bi Isrɛl, na kaa njɛ bụ, hiɛŋ, Bi eri suu bu mo n hoŋtono[149] iwɛ miaụŋ mi mi? Kwo kaa maa m peni-unu iwɛ ugondu na Ngaa shɛ ma nda ni i'ɛlɛ mi iwɛ geri be eshe?

¹²Gamba n karɛ cɛnjɛ tu unyizo, Ngaa karɛ bụtụgwụmwa maa nama na tuba. Nu ukpahiŋ mu Ngee berishiji azuba; Ngaa untanganɛ uwaŋna, nu upiana tu mkpasu hwɛɛ.

¹³Gamba ni ikɛnyi mi N ishicinjɛ Sairos maa nda iyi ne tiririri ti mi maa ụrɛcɛnga kaa iyi nɛ Ngee heŋshi keeni maa nangangana iyi. N zhɛ ma ndarɛshɛnga uhwaŋna elele na baa ta. Bi zhɛ ba maanana ụshɛpwụ ata mu ụ'wụtụ, ubwa shɛ Jɛrusalɛm, maa bɛ bɛnjɛ atwa ata mi aa 'imɛ la; i zasa bụtụ njɛ bụ ụgwụ kwo kaa peni bu ukwuribi ugworo maa nda ijɛ o. AGWANGWAMA na Hwuri Kpaaŋ ubwa jɛmɛ.

¹⁴AGWANGWAMA hiɛŋ Isrɛl, Uduciya Ijipti hwɛɛ tu una Itiopia zhɛ wa sha unaa bụ, atwa ata njɛsanjɛ, a na namɛ ni Siba zhɛ a sha ajama bụ[150] ɛ zhɛ ma bụ 'wa na ashɛnjɛ na obu to aŋ. Ɛ zhɛ mo bu kwuzono a duma nu unu aba, ɛ hiɛŋ, Agwatana na namɛ na bụ, ubwa kiri shɛ Agwatana; binya zasaba ya namɛ swooŋ nu bwa o.

¹⁵Oo Agwatana Isrɛl, na bo bicingo atwa ubwa, iwɛ-tɛkana gabụ bɛ shɛ Agwatana na mama intana.

¹⁶Ezuye zhɛ a sha atwa elele na a nda tuwa; ụpụrụsa kaa zhɛ wa ima aŋ hwɛɛ aba.

¹⁷Ama AGWANGWAMA bicinji atwa Isrɛl nu ubino unyizo-nom, ezuye kwo kaa ụpụrụsa zha shɛ wa sha atwa ubwa kwukwuŋ unyizo-nom.

¹⁸AGWANGWAMA na karɛ azuba ubwa shɛ Agwatana! Ubwa karɛ cɛnjɛ tu unyizo, ubwa njɛ uŋ tebiye wee ilegeji. Bɛ njɛ shɛ uŋ osombo, semi ofwo na maa atwa nama. Ubwa gatata hiɛŋ, Gamba kiri n shɛ AGWANGWAMA, Agwatana anya elele zasaba ya o.

¹⁹N jɛmɛ shɛ n-ndumwa ne tusweci o, N sweci shi du kaa tuhaŋsa ti mi ne tishi o. N hiaŋ shɛ maa ga atwa Isrɛl n dwelekeci no osombo. Gamba n shɛ AGWANGWAMA, iwɛ-tɛkana Ama duma; Gamba ma nda maa atwa mepi iyi nɛ teni cɛŋ.

²⁰AGWANGWAMA hiɛŋ, Ahiɛba edenji, ulwa ma urubwo uko, hwɛɛ hiŋ na hi benengeni ulayɛ cɛnjɛ ta ata. Atwa na o rungo na tuwa ta aba tu na aa njɛ ni i'wɛ'wɛ, a nda adua no ofwo azhɛba na eri shi o bicingo aŋ; i zasa iyi elele nɛ kaa atwa ata mepi o!

²¹Zhajɛ ma hiɛ njɛ ukara no ofwo ajɛmɛ-ụshɛrɛya. Ga atwa na aa suyanɛ ukara twa maa e heŋshi. Gaaba kwuŋ jɛmɛ la iwɛ iyi nɛ tɛ zhɛ ya ndaa? Shɛ Gamba na n shɛ AGWANGWAMA suu? Agwatana anya kaa zasaba namɛ swooŋ ne mi o, Agwatana tiririri na o bicingo atwa ubwa Ngaa shɛ. Agwatana anya elele zasaba ya o.

²²Ahiɛba atwa unyizo kpaaŋ, zhajɛ ma no ofwo mi maa hi bini. Gamba kiri n shɛ Agwatana, binya zasaba ya o.

²³Unu mu tishilo ụ shɛ una tɛkana, i zasa iyi elele nɛ zhɛ ye sheyingo uŋ o. N shiri-unu gom na bụtụ gana na Ngaa shɛ: Bụtụ be elele zhɛ mo n kwuzono, bo shilo-unu maa bi zhɛ meme zucinje no ofwo mi.

²⁴Ɛ zhɛ a duma iwe mi, ɛ hiɛŋ, Tedure na AGWANGWAMA kiri tiririri keeni ikɛnyi namɛ, ama ụpụrụsa zhɛ wa sha atwa na mo n imo.

²⁵AGWANGWAMA kiri ubwa zhɛ ba pana ajalalo Isrɛl tiririri keeni tugombicingo.