Read bassa AYIZAYA 47 Bible Online

AYIZAYA 47 - bassa bible

AYIZAYA 47

¹AGWANGWAMA hiɛŋ, Oo gabụ ụshɛpwụ Babulon, bɛzhɛngwa ni idwɛtwɛ ɛtɛ bu, gɛga nu upwupwutu na cɛnjɛ. Oo gabụ Kaldia na shɛ gana yɛu-yo-o. Bɛ shɛ la gana usapa, ụshɛpwụ ata aa lasụ sụ, bu zasa ya tu'waba tu tulombwo lombwo, keeni uraiŋ ubiye tiya o. Bujama abɛ shɛ ya hwuwayɛ go!

²Shapɛ inɛnɛ! Naka inɛkɛ! Ushigo owowo ata ebu urigeni ụpɛshɛka bụ! Rufwugo tugwuno ta ata tụ bụ te embi ti biye! Sugo ipete bu na azuba, to urugono ivwunɛ bu o; maa keshi ohwulwo.[155]

³Atwa zhɛ ma bụ kwụba mohondo; ɛɛ zhɛ a kwụba ezuye na ụbụ shɛ. N zhɛ ma nda itɛpwɛ, i zasa bụtụ be elele eri ma n lakana o.[156]

⁴Bụtụ ata bi Tijilo bi Isrɛl, ubwa utu gwube; bɛɛ ti jwɛ eti benengeni, AGWANGWAMA na Hwuri Kpaaŋ ɛɛ hiɛŋ izeci ibwɛ!

⁵AGWANGWAMA hiɛŋ Babulon, Gɛga saiiŋ ne tishi; a zha shɛ ɛ bi hiɛŋ ya maa bɛ shɛ agwuma-o-o cɛnjɛ cɛnjɛ-ta-tugwama o!

⁶N 'yajɛ isɛbwɛ na atwa mi; N njɛ shɛ aŋ ya atwa mi o. Ngee suji aŋ Ngee hi peni, hiɛ kwụbɛ shɛ inyɛmɛnyɛmɛ ya aba o; okwo atwa na inganjɛ, hiɛ njɛ aŋ amiaụŋ.

⁷Bi ge heŋshi maa bi zhɛ ba sha agwuma-o-o cɛnjɛ cɛnjɛ-ta-tugwama unyizo-nom; bi teyinji shi ya ijɛ na amɛ bụ, gana na ijɛ zhɛ ya kwunanga o.

⁸Hwulaga, gabụ na bo lubo amɛ-olom, Gabụ na bi heŋshi maa bi bini, i zasa ya iyi bu to. Bu meme gembicinji gana Agwatana, ɛbi hiɛŋ maa i zasa bụtụ ta shɛ ya gana bu o. Bi heŋshi maa bu zha shɛ ba sha ya bululo kwukwuŋ. Kwo kaa maa miaụŋ mụ bụ mu zha shɛ mo 'wo.

⁹Ama na aka fwalaa, ijɛ iyebi zhɛ mo bu jitono jitoo ko gba. Okwo ta ba nda tishino tụ bụ, bwolo bu zhɛ bo 'wo ta miaụŋ mụ bụ hwɛɛ.

¹⁰No tugworozwo tụ bụ tɛnda, ebi heŋshi maa i zasa ya iyi bu to; ebi heŋshi maa i zasa bụtụ ubu kwụbɛ o. Ti'inta tụ bụ keeni iyi bu tumapa i bu inzhɛnjɛ, iwɛbɛ po ɛbi mɛmɛ hiɛŋ, Gamba n shɛ Agwatana, i zasa bụtụ shɛ ya gana mi o.

¹¹Shɛbara shi zhɛ sho bu jitono, tishino tụ bụ ti eri shi to ngwuricingo iŋ o. Ufwu zhɛ ma bu nda; ufwu na ebu wetegeni shi okwo ụwalabụ ubwa kwukwuŋ!

¹²Swaka tuwa tụ bụ, te tishino tụ bụ, tu nlayɛ mụ bụ hwɛɛ; iyi nɛ aba nda ta taa na tuwaŋnɛ tụ bụ. Nekeshi i mo bu mbiyono; okwo noko ba ala maa zweni atwa i'ime bu inyɛsɛ.

¹³Okwo ta a bu pana shihaŋsa, bu zasa waa ukpahiŋ o. Ga atwa ata bu shihaŋsa zhajɛ maa e bi bicinji, aba shɛ atwa ata o soso mkpasu, a na a manga ozhibu azuba a na mo bu mbiso[157] iyi nɛ zhɛ ya nda caakwụ.

¹⁴Ɛ zhɛ a sha gana ti'enyi, ibɛ po ulwa zhɛ wo hwoŋzhingo aŋ! A zha shɛ a ala maa e meme bicinji, ulwa ata zhɛ wo hwulo vwengenji, ụ shɛ shɛ kaa ulwa u tụhwatụ o.

¹⁵Iyi ibiye nɛ kiri ee eri ma hi ndana ta, atwa ata shihaŋsa aba zhagana la hwayɛ taa te e bi meci. Ɛ zhɛ ma bu ganga o hwulo geri na ɛɛ zhɛ, i zasa bu na zhɛ ba vwa maa mo bu bicingo.