Read bassa AYIZAYA 49 Bible Online

AYIZAYA 49 - bassa bible

AYIZAYA 49

¹Ahiɛba edenji na namɛ na adakwụ urefu, ta ahiɛba atwa na dụlụmanjɛ, shɛlaga ma! AGWANGWAMA n suyanɛ nazhɛ ee m meci, ubwa m po izeci taa na aka tumata ti mi.

²Ubwa njɛ maa ga n-ndumwa mi mi mu lacɛmɛ gana utokwobi, baa n intanɛ nu uhwuŋnu i'ɛlɛ ibwɛ, Ubwa n njɛ gana bi'intwa bi i'ilɛ nɛ ee jwe, ee cimbeni maa e keri.

³Bɛɛ n hiɛŋ, E-Isrɛl, yɛu mi ugondu abɛ shɛ, iwɛ bu po atwa zhɛ ma m pana ụjɛrụma.

⁴N ngɛ hiɛŋ N nduwa ugondu, ama kaa u n zasana ule we elele o! N njɛ ugondu nu ukpahiŋ mu, ama kaa tɛgadaga yaa shɛ, i zasa ule we elele o. AGWANGWAMA Ngɛɛ zhɛ ma tɛtana-rishe, maa ma n lashaga; Agwatana kaa zhɛ ma n tụpa utashɛ iyi nɛ Ngaa njɛ.

⁵AGWANGWAMA ubwa m mo, nazhɛ ee m meci; baa n njɛ yɛu ibwɛ ugondu maa Me gwuricinje atwa Jekob, maa Mo sotulononu bu atwa Isrɛl a na garatagwụ. AGWANGWAMA ubwa ma m pana ụjɛrụma; no olugwo Agwatana kaa ikɛnyi mi ya banɛ.

⁶AGWANGWAMA n hiɛŋ, Ita twa sụ ta bɛ shɛ yɛu mi ugondu o, maa ishicinjɛ ụlamụ Jekob; kwo kaa maa gwuricinje atwa Isrɛl a na benengeni o. Ama N zhɛ ma bụ nda du uhioko-uhwaŋna we edenji, iwɛ maa e bicinji atwa unyizo hwɛ hwɛɛ.

⁷Bụtụ ata bi Tijilo, na shɛ Bugwubi ba atwa Isrɛl hiɛŋ, Bụtụ ata edenji ngbaracɛ fufurɛnjɛ, na kaa du edenji a nda inyizhi ubwa, na shɛ yɛu-ugondu shɛgwuma: Shɛgwuma shi zhɛ sha kwụba te e bi genji, nazhɛ ɛɛ zhɛ ɛ ishijɛ maa a bu mụnɛ ụjɛrụma; miaụŋ ma tugwama mi zhɛ ma kwụba iŋ, ɛɛ zhɛ o kwuzongo a bu muna ụjɛrụma. Ijɛ zhɛ ya nda iwɛnɛ ta AGWANGWAMA twolwo yɛu ibwɛ ugondu. Bụtụ ata bi Tijilo bi Isrɛl kaa zhɛ ba nda iyi nɛ bee shileji-onu ibɛ.[162]

⁸AGWANGWAMA mbishi atwa ubwa, bɛɛ hiɛŋ, Yaa shɛ aka ci maa Me hi bicingo, N zhɛ mo hi mbisono iwɛ nɛ Ngee hi mepeni, Mɛ jishijɛ kaa n'ungwa me timbiyono mu na ahia kala. N zhɛ ma hi ngbaraka, maa Ma hiɛ jɛlanɛ; iwɛbɛ po Ngɛɛ zhɛ ma twa-unu na atwa kpaaŋ tedure ne hiŋ. N zhɛ mo lono maa hi nama sasana na cɛnjɛ tu ga ti hiŋ tu ga shɛ osombo.

⁹N zhɛ mɛ hiɛŋ atwa na aa ga 'imɛ na tijama maa, Hwulo ma arahaŋ! Mɛ hiɛŋ atwa na zweni ne tishi, Banɛ ma hi zhɛ nu uhioko-uhwaŋna! Ɛ zhɛ na ya iyimɛyɛ tɛ ɛ zhɛ ni ihwɛŋnɛ gana agwụdụ na a yaga nu nshama mu na mu namɛ ngbala ngbala.

¹⁰Imunɛ, ti i'uyɛ zha shɛ ya gwuma aŋ kwukwuŋ. Uwaŋna, no oholobwo ụshɛka zha shɛ o ilo aŋ ya o, iwɛnɛ po bụtụ na bo hioko inyɛmɛnyɛmɛ ya aba ubwa zhɛ ba 'yagaga aŋ. Bi zhɛ ba 'yagaga aŋ no ofwo mɛzhinjɛ meni.

¹¹N zhɛ ma kala uhwaŋna ụ'wụtụ nu nshama Ma imangana atwa mi uhwaŋna maa e zhe tahaŋnụ.

¹²Hioko, atwa oko zhɛ a bananjɛ ta dụlụmanjɛ, ɛ zhɛ a banɛ tuta, a banɛ tuzuba, a banɛ na cɛnjɛ ta Aswan[163] tu na tu namɛ tuzuba.

¹³Oo ga azuba jwɛ azunga! Go unyizo uganɛ n'ungwa mu unyasa! Ga nshama mu bwadụ na azunga! AGWANGWAMA zhɛ a ingatanga atwa ubwa; bɛɛ zhɛ ba nda uwanyɛ wa atwa ubwa a na a nda ụbaụta.

¹⁴Ama atwa Zayon hiɛŋ, AGWANGWAMA iti jineci! Iwɛ tu 'wi bu isɛbwɛ.

¹⁵Iwɛbɛ po AGWANGWAMA jishijɛ, bɛɛ hiɛŋ, Isɛbwɛ yɛu shenje nɛ to subo suu eri yo 'wo bino bi ibɛ? Bi zha shɛ suu ba kwụba inyɛmɛnyɛmɛ yɛu ɛtɛ bee meci? Okwo yaa shɛ isɛbwɛ yɛu eri yo 'wo bino bi ibɛ, ama isɛbwɛ hiŋ tuba eri shi mo n 'wo kwukwuŋ.

¹⁶Hioko, N 'nyotwo iwɛ bụ na abwabwasụ i'ɛlɛ mi, uba bụ kaa namɛ nu umbe mu tutu unyizo-nom.

¹⁷Atwa na zhɛ ma bu maanana, zhɛ a 'yaga izɛlɛgwu[164] o hwulo atwa na mo bu hwuŋzo, atwa na kaa ma bụ nda osombo, zhɛ a ishɛga a bu ganga.

¹⁸Mbiyangana maa kwụbɛ iyi nɛ ya ndangana! Atwa bụ a ulwa ba kpaaŋ, e ci ba ujiyo pụ bụ! AGWANGWAMA hiɛŋ, M momo to gom, gabụ bi zhɛ bo urugono aŋ gana iyi tisemberi. Ɛbi zhɛ ba la aŋ ne embi gana na yɛu-yo-o nɛ zhɛ tụmbụla ya busa iwɛ ikwɛmbɛ ibwɛ.

¹⁹Okwo te e bu hwuŋzhi la abɛ shɛ osombo, ama cɛnjɛ tụ bụ ti tileni bohondo; bi zha shɛ ba twa ya atwa na e ci maa a nama na bụ o. Ibɛ po ɛɛ zhɛ o unzo tuba atwa na ge bu hwuŋzetenji la taa dụlụ.

²⁰Nazhɛ atwa bu na ee meci na aka ti'ima[165] zhɛ mɛ bi hiɛŋ jitoo ko, Cɛnjɛ tu ga tu twa sụ ya o, ta jala ohwolu maa ta kaana shimwono tuma maa ta nama!

²¹Nazhɛ ɛbi zhɛ bu mɛmɛ hiɛŋ, Gaaba kwuŋ m metenji miaụŋ mu ga hwɛɛɛ? Miaụŋ mi mi mu uwo la, M meci shi la kaa mi nya o. E m becinji la, aa n 'imɛ na tijama, gaaba kwuŋ ya wɛŋnicinjɛ miaụŋ mu gaa? Ngooko gba la kaa n vwɛ ya. Cee tuba mu na ga miaụŋ mu banɛ yaa?

²²AGWANGWAMA Mokondo hiɛŋ atwa ubwa, Hioko ma, N zhɛ ma suyana edenji nu u'ala, Ngɛɛ zhɛ ma ishɛcɛnganɛ atwamwa igɛrigɛ mi; nazhɛ ɛɛ zhɛ me hi jicingeni miaụŋ mi hiŋ me eyi na mu na mo o no shitutu sha aba.

²³Shɛgwuma shi zhɛ shɛ ma bu shana gana eshi bu, shɛgwuma-sho-o shi zhɛ shɛ ma bu shana gana ono bu. Ɛ zhɛ mo bu kwuzono, a ta ntuno ma aba na cɛnjɛ; ɛ zhɛ o songo upwupwutu wɛ ɛvwɛvwɛjɛ bụ. Nazhɛ ɛbi zhɛ ba mapa maa Gamba n shɛ AGWANGWAMA. Ezuye kaa zha shɛ a sha atwa elele na ma n 'yaka kwukwuŋ.

²⁴Gaaba eri bo sugo i'wɛŋnɛ bijeshi bu ukpahiiŋ? Gaaba eri ba lashɛga bujama bu umwono-tishi ni i'ɛlɛ ụhwada na 'imɛ bụụ?

²⁵Ama gana AGWANGWAMA jishijɛ na, bɛɛ hiɛŋ, Iyi nɛ zhɛ ya nda gom na. Ɛ zhɛ a lashɛga bujama bu umwono-tishi ni i'ɛlɛ bijeshi bu ukpahiŋ, ɛɛ zhɛ a lashɛga du i'wɛŋnɛ ni i'ɛlɛ ụhwada[166] na 'yajɛ iŋ. N zhɛ ma jasa bụtụ be elele na ma bụ jasa; maa Mo bicingo miaụŋ mụ bụ.

²⁶N zhɛ ma nda atwa na ma bụ nda umungwuta maa a yɛ usunda tu'waba ti ikɛnyi aba; ɛ zhɛ a swa mehieŋ ma aba mi ikɛnyi aba maa mu na ngba aŋ gana mayaga. Nazhɛ bụtụgwụmwa be elele zhɛ ba mapa maa Gamba n shɛ AGWANGWAMA, ne Bibicinji bu na me bu gwube. Ɛ zhɛ a mapa maa Gamba n shɛ Bụtụ ata bi Jekob bu ukpahiŋ.