Read bassa AYIZAYA 5 Bible Online

AYIZAYA 5 - bassa bible

AYIZAYA 5

¹N zhɛ ma zungangana bụtụ ata Ngee lubi azunga iwɛ itimɛ ibwɛ ya afwafwa: Biyejilo mi bu ko namba la jwe itimɛ ya afwafwa ni ishɛmɛ nɛ cɛnjɛ ti 'yajɛ ugwungwu.

²Tu baa hwɛŋ itimɛ ɛtɛ, bee tenji atayɛ ibɛ baa 'wɛŋ; Baa bɛrɛ izɛgwu ya afwafwa nɛ zhɛmɛ uhwuri inɛ vwɛ. Baa njɛ ashɛkpa maa bi'iywa na patana, Bee hini u'ibwa iwɛ tụ'walụ ta afwafwa tiniso. Baa 'yacɛ ya maa tụ'walụ ta afwafwa ata tɛ nɛ, ama afwafwa ata 'weri ya tụ'walụ tụ wɛ.

³Ibɛ po biyejilo ata mi hiɛŋ, Ahiɛba atwa na namɛ nu Jɛrusalɛm keeni Juda, jaja ma ụshɛrɛya mu atuba na ni itimɛ gɛ mi ya afwafwa.

⁴I 'yajɛ suu iyi elele nɛ ta vwɛ Ngaa ndanɛ shɛ itimɛ gɛ mi? Iwembe tuba po itimɛ gɛ 'weri ya tụ'walụ ta afwafwa tụ wɛ; yaa shɛ shɛ tụ'walụ ti biye tu na Ngaa ga nda ashɛlatụ tubaa?

⁵Me ci ba mo hi mbiso iyi nɛ Ngɛɛ zhɛ ma nda itimɛ gɛ mi ya afwafwa. N zhɛ mo mushongo ikepi ibɛ, Mo hwuŋzo du uba ata go rongonu iŋ, maa iyimabiga teni maa i yɛ iyi elelel nɛ namɛ ni itimɛ gɛ maa e rikeci iŋ du.

⁶N zhɛ ma ganga iŋ maa i unci; N zha shɛ ma jajaga a'walụ aba a na zhɛshɛ o; N zha shɛ kaa du mo vwolo aŋ o. Go tu'unto keeni tuka ti leshegeji iŋ; N zhɛ ma pana odomu tụla unu maa kede eshilo ngbeni iŋ o.

⁷Ihwɛ Isrɛl ibɛ shɛ itimɛ ɛtɛ ya afwafwa ya AGWANGWAMA na Hwuri Kpaaŋ; atwa Juda aba tuba shɛ afwafwa ata baa bɛrɛ. Bu ga ngbaracɛ aŋ maa ɛ zhɛ na duma ụshɛrɛya u tishiriri; ama mehieŋ ya oo dudwogo. Bu ga ngbaracɛ aŋ maa ɛ zhɛ na nda iyi ne tiririri, ama n'ungwa mi tiriri ya ma nama.

⁸Ahiɛba na hio sotulongonu shimwono na shɛ nya, keeni ntuma tusotulongonu na mi nya mu na ahi ga 'yagawa, uuwa i ci aka na ohwolu zha shɛ a nama ya maa anya atwa nama. Hi zhɛ hia nda hwuŋ adangboo! Ahiɛba kiri hi zhɛ hia nama ya na cɛnjɛ ta ata.

⁹N hwụjɛ ta AGWANGWAMA na Hwuri Kpaaŋ hiɛŋ, Shimwono shɛ ga shɛ 'wụtụ 'wụtụ, shɛ na shɛ pilanụ, shi zhɛ sha sha bohondo.

¹⁰Afwafwa ata aa bɛrɛ ni itimɛ ɛtɛ i ci gana ogwu kpakụ-nu-dupu zalụ hweehwe[14] a zha shɛ ɛ bɛcinjɛ kaa meni mụ tụ'walụ mi shini okwo ihilwe uwapa ike gba o[15] izɛgwu ɛtɛ ya agbamgbamụ ofwugwo[16] aa bɛrɛ, i zha shɛ ya mata hwuŋ maa i shini okwo ikwureni ike gba o.

¹¹Ahiɛba na hiɛ ishijɛ nu uvwungwa dididi, maa hi kwuni mayaga tuswa, tutu ụrụmɛ, maa mayaga na hi ngba, hi zhɛ hia nda hwuŋ adangboo!

¹²Ahiɛba na hia 'yaga shiduma, to shikoko, te egwoje, ta akpasana hwɛɛ, ta mayaga, na tụlagwụ tu nsono mi hiŋ. Ama hi eshiciji shi kaa iyi nɛ AGWANGWAMA a nda, kwo kaa maa hiɛ kwụbɛ ugondu i'ɛlɛ ibwɛ o.

¹³Iwɛbɛ po ahiɛba atwa mi, ɛ zhɛ ma hi 'wananga maa hiɛ shɛ ajama, iwɛnɛ ehi eshiciji shi iyi elele. A'yagajɛ hiŋ zhɛ o 'wo imunɛ, ama i'uyɛ tuba zhɛ ya kwụna atwa vwɛ hiŋ.

¹⁴Imunɛ ya aba gwụmɛ nhwaŋ-me-e'uye, ibɛ po e'uye heŋpishinji unu kpahaaŋ, ibɛ shɛgwuma shi Jɛrusalɛm[17] keeni ofwugwo wa atwa ata 'waŋ ni ibɛ.

¹⁵Ɛ zhɛ a nda bụtụ be elele ụpụrụsa, ɛɛ zhɛ e zucinje du atwa elele na a busa.

¹⁶Ama AGWANGWAMA na Hwuri Kpaaŋ mbiseni ugombo ubwa ni iyi nɛ baa njɛ te teni cɛŋ, bɛɛ bɛcinjɛ du tijilo tu bwa nụ ụshɛrɛya wa atwa ubwa na baa jɛmɛ ne tishiriri.

¹⁷No shisombo sha ashɛpwụ ata a'wụtụ ibɛ miaụŋ-ma-agwụdụ mi zhɛ mo gwushigo ambɛ tiya, oywoywo iyweywe[18] zhɛ o gwushigo du ofwo tiyaga.

¹⁸Atwa na a mbacɛ iyi iwɛ na tukata gana ihwehwe, a na a mbacɛ iwɛwɛ gana maa nu uhwohwo na shɛ ungbakwo, ɛ zhɛ a nda hwuŋ adangbaoo!

¹⁹Hi hiɛŋ re ga AGWANGWAMA shanɛ ikɛnyi maa nda iyi nɛ bɛɛ hiɛŋ bi zhɛ ba nda, maa ta kwụba. Ga Bụtụ ata bi Tijilo bi Isrɛl njɛ iyi nɛ baa imanganjɛ maa ta kwụba iyi nɛ namɛ na amɛ ubwa.

²⁰Atwa na hiɛŋ, Iyi iwɛ ibɛ shɛ iyi ibiye, iyi ibiye tuba ibɛ shɛ iyi iwɛ, a na sheyinji tishi nu uhioko-uhwaŋna, ee sheyinji uhioko-uwhaŋna ne tishi, a na sheyinji iyi ụgagwụ nụ ụlatụ, ee sheyinji iyi ụlatụ nụ ụgagwụ, ɛ zhɛ a nda hwuŋ adangboo!

²¹Atwa na heŋshi na shɛmɛ sha aba maa a incɛ duwa, a na kaa heŋshi na tụkwụba ta aba maa aba mepi iyi tebiye, ɛ zhɛ a nda hwuŋ adangboo!

²²Atwa na beni urishi na mayaga mo mbono tuswa, a na 'yajɛ ikɛnyi, a na kaa zasa inyɛsɛ na mayaga tihiŋtotongo, ɛ zhɛ a nda hwuŋ adangboo!

²³Ama iwɛ ukwuribi ugworo kiri ohio lono maa bụtụ na n-ndumwa-wụmɛ benengeni, hi leni shi maa hi dumanganɛ bụtụ na n-ndumwa mɛ zhɛmɛ ụshɛrɛya u tishiriri o.

²⁴Iwɛbɛ po ɛhi zhɛ hia sha gana ti'enyi tu na bụratụ bu ulwa bo songo keeni gana ambɛ hwoo a na kwukwushi nu ulwa, gana ata du tini ta aba ti zhɛ to fwoso, tusumbo ta aba ti zhɛ ta hila gana ubwodolo; iwɛnɛ te hi jineci n-ndumwa ma AGWANGWAMA na Hwuri Kpaaŋ, na shɛ Bụtụ bi Tijilo bi Isrɛl.

²⁵Iwɛbɛ po AGWANGWAMA a nda isɛbwɛ na atwa ubwa, bee heŋpi u'ala ubwa maa pana aŋ ulwapɛ. Nshama mi zhɛ ma nda bulama, ibɛ po n'wo ma atwa na 'wi mi zhɛ mo tulogono ne ekpekiti gana aswala. Okwo ti yaa shɛ gana ata, isɛbwɛ ya AGWANGWAMA i to hwuwowu su o, bi tɛ zhɛ ba haŋpa waa u'ala ubwa maa pana aŋ ulwapɛ.

²⁶AGWANGWAMA zhɛ a suyana edenji ni igɛrigɛ nɛ bee shepirigeni aŋ na azuba. Bo hwulogono aŋ ubi maa a bananjɛ na akwunanga cɛnjɛ tu unyizo. Ibɛ po ɛɛ zhɛ e puseji kakayɛ, ni izɛlɛgwu!

²⁷I zasa kaa bụtụ be elele na amɛ aba lukwumi; i zasa kaa bụtụ twa okwo udukwutwa na amɛ aba o. E weci shi malabụ, e te shi kaa okwo ozhilwo. Okwo umazhɛya embi aba kaa rofwugwo su; okwo umanga ubida aba kaa dwa sụ o.

²⁸A'inla aba latụmanjɛ, aa tɛtaganɛ kaa itɛ ya aba hwɛɛ. Ogwogwozwo idɛkwɛ ya aba hwetegeni gana a'urungwa, ikɛgbɛ ihɛŋtu ya aba ujasa yo rungo gana ujipo.

²⁹Ejeshi aba o ngwulo gana izeci nɛ kwụnɛ usunda o mbombilo uŋ no ofwo na maa kede bụtụ be elele leshiji uŋ nu unu aba o.

³⁰Ụjita ata ci hwuŋ, ɛ zhɛ no ngwulono Isrɛl gana itekwu. Kwụba de u'una ga! U namɛ ne tishi keeni tiriri! Tishi tu na tɛ shɛ gana odomu[19] tu tweri uhioko-uhwaŋna.