Read bassa AYIZAYA 50 Bible Online

AYIZAYA 50 - bassa bible

AYIZAYA 50

¹AGWANGWAMA hiɛŋ, M bu becinji suu gana bụtụ na becinji biyikwo bwa? Bi heŋshi suu maa M bu senji na tijama gana bụtụ na senji miaụŋ mu bwa maa mɛ shɛ ajama? Awo, iwɛ iwɛwɛ bu upo ee bi genji maa shɛ bijama; iwɛ undwa bu tubwada upo ee bi becinji.

²Iwembe kwuŋ po bụtụ be elele zasaba aka na Ngee zhe no ofwo aba maa Mo bicingo aaŋ? Iwembe kwuŋ po ee leni shi aka na Ngaa suyanɛ aaŋ? N zasa suu ukpahiŋ na waŋnɛ maa me gwube bụtụ? Okwo N zasa suu ikɛnyi maa mo lashɛga bụtụ? N eri ma hwuŋcɛnga itekwu tedure nu unu mu tupana ubaba, maa Ma nda maa erefu a shɛ ụshɛka, iwɛ maa usunda na zweni nu bwa u 'wi i'uyɛ iwɛnɛ meni mu zasaba.

³N eri ma nda maa tụla tɛ shɛ tishi gana maa ta ta-ụkwụla iwɛ bụtụ na 'wi.

⁴AGWANGWAMA Mokondo ubwa m peni bụratụ bi iyi tusokokono, iwɛ maa Ma mapa n-ndumwa mu na maa mu na ta atwa na lwegeji ikɛnyi. Ubwa mɛ n zhingicinjɛ nu uvwungwa we elele, bɛɛ kɛpishinjɛ kaa acɛbɛ mi maa Mu na shɛlaga iyi nɛ bɛɛ zhɛ mo m mbisogono.

⁵AGWANGWAMA Mokondo kepishinji acɛbɛ mi, N te shi tigezhe o, N genji shi bu du kaa maa Mo gwulo.

⁶M peni atwa na mo n dubo aba mi. N lakanɛ shɛ aŋ kaa tutwa tu na aa ma n twagaga o, N lakanɛ shɛ aŋ du kaa aka na to o mushongo tizholu ti mi o, oo mo zwogono du mecemi nụ ụpɛshɛka.

⁷Iwɛnɛ ta AGWANGWAMA Mokondo mo m mbiyono, ibɛ po ụpụrụsa zha shɛ ma n sha. Iwɛbɛ po Ngaa ngbaracɛ ofwo na Ngɛɛ zhɛ ririri. M mepi kaa maa ezuye zha shɛ ma n sha o.

⁸Bụtụ na zhɛ ma m pana n-ndumwa-zhɛ, kaa gwumwongonu ciiŋ ciiŋ. Gaaba te eri ma n shana iwɛɛ? Mizha tu momo ponu agba; gaaba shɛ ya busukakanɛ mii? Asha ga kaanɛ izhɛ pi mi!

⁹AGWANGWAMA Mokondo ni ikɛnyi ibwɛ ubwa ma n lashaga gaaba te eri ma m pana ya n-ndumwa-tụwụmaa? Ɛ zhɛ a inga hwɛɛ aba gana tugwuno; a'nyasụ zhɛ a ya aŋ.

¹⁰Ahiɛba na hia sụma AGWANGWAMA inyɛsɛ, a na kaa hia hwuga-unu yɛu ibwɛ ugondu, uhwaŋna na ehi to eri wa 'yaga tishi gom, iwɛnɛ tu uhioko-uhwaŋna zasaba, ama tuba patana ma AGWANGWAMA rishe; datana ma Agwatana hiŋ.

¹¹Ahiɛba na hia sapa ulwa hwɛɛ hiŋ, ahiɛ mama jalakanɛ shɛmwa shɛ ulwa shɛ na sho gorogo; Zhaga no rungo ma nu uhioko-uhwaŋna ulwa ata hiŋ, keeni tugorogo ta shɛmwa shɛ ulwa ata ehi buci. Iyi nɛ ɛhi zhɛ hia lashɛga ni i'ɛlɛ mi nɛ; hi zhɛ hio wotogo na amɛ-tụhaŋtụ a'wụtụ.