Read bassa AYIZAYA 52 Bible Online

AYIZAYA 52 - bassa bible

AYIZAYA 52

¹Oo gabụ Zayon, zhinjɛ, zhinjɛ, mama 'imɛ maa 'yaga ikɛnyi! Oo gabụ Jɛrusalɛm, ụshɛpwụ ga u tijilo, meme urigeni otogwo bu a na pilanụ. Atwa na jeji shi teleyi keeni atwa na zasa shɛshɛshɛ, zha shɛ e teni ya na amɛ bụ kwukwuŋ.

²Oo gabụ Jɛrusalɛm, meme bweceji maa benengeni! Ishijɛ na cɛnjɛ, bibizo upwupwutu ata bu maa gɛga ya ni idwɛtwɛ bu[170] Ahiɛba ajama Zayon, dwatwaga ma ashɛnjɛ ata ee hi umpi.

³AGWANGWAMA hiɛŋ, E hi senji la arahaŋ, ɛ zhɛ du me hi gwube zawa ukwuribi elele.

⁴AGWANGWAMA Mokondo hiɛŋ, Aka na ehi zhe la Ijipti, ahiɛ shɛ agaiŋ, tuhaŋsa ti hiŋ ti ikɛnyi hiŋ yaa shɛ la nazhɛ ehi zhe. Ama atwa Asiria a hiɛ 'imɛ ni iji, i zasa kaa iyi elele aa cɛpɛ iwɛ hiŋ o.

⁵AGWANGWAMA hiɛŋ, Iyi nɛ Ngaa hwụjɛ na, e suji atwa mi[171] arahaŋ, atwa na kaa untanganɛ aŋ a nda aŋ asada[172] AGWANGWAMA jɛmɛ. A uranjɛ izeci mi n-ndumwa mụ wɛ tudumangana tutu ụrụmɛ.

⁶Iwɛbɛ po atwa mi zhɛ a mapa izeci mi. Aka na aka ata ci hwuŋ, ɛ zhɛ a mapa maa Gamba n shɛ AGWANGWAMA, maa Gamba du n jɛmɛ n-ndumwa na aba.

⁷Hioko ma, gana na ti yaa pilanụ tebiye maa a kwụbɛ butumwa na 'waŋnɛ anabarɛ ebiye amɛ-olom, bo mburusonu! Baa anangana Zayon, bɛɛ hiɛŋ, Agwatana bụ ubwa shɛ Agwuma!

⁸Shɛlaga, atwa bụ a na a 'yacɛ ụshɛpwụ ata, a ugaga n'ungwa mu unyasa! Iwɛnɛ ee eri a kwụba tugwure ta AGWANGWAMA nu Zayon ne eshe aba!

⁹Ahiɛba shisombo shi Jɛrusalɛm, Zwono ma nu n'ungwa mu unyasa na a zunga zhiaaŋ! Iwɛnɛ po AGWANGWAMA gwube Jɛrusalɛm, Baa ingatanjɛ kaa atwa ubwa.

¹⁰AGWANGWAMA mbiswonuo ukpahiŋ ubwa u tijilo ne eshe edenji elele kpaaŋ; ibɛ po cɛnjɛ tu unyizo hwɛ hwɛɛ ti zhɛ ta kwụba ubino wa Agwatana tu.

¹¹Banɛ ma! Banɛ ma apata! Hwɛɛ hiŋ na hi 'waŋnɛ iyi uhwugwa ya AGWANGWAMA. To tumongono ma iyi nɛ zasa shɛshɛshɛ o. Banɛ ma apata ne tijilo.

¹²Hiɛ shɛ shɛ hia banɛ ni izɛlɛgwu na aka ga o; shɛ ti'ina kaa ɛhi zhɛ hia ina o. Ama AGWANGWAMA na shɛ Agwatana hiŋ ubwa zhɛ mo hi hwulono umbe, Agwatana Isrɛl, ubwa kaa zhɛ ma hiɛ ngbaraka ne ekwunyi hiŋ.

¹³AGWANGWAMA hiɛŋ, Ugondu zhɛ wa 'yagana yɛu mi ugondu eshe. Ɛ zhɛ a muna bụ ụjɛrụma duwa o gombicingo bu te zeci tebiye.

¹⁴Bi zhɛ ba dama atwa ofwugwo aka na ta a kwụbɛ bụ[173] usubwa ubwa sheyinji harɛ baa sụbɛ shɛ ya bụtụgwụmwa.

¹⁵Ama bi zhɛ ba dama edenji ofwugwo hwuwayɛ go, tudama tu bwa ti zhɛ ta ima shɛgwuma[174] a zha shɛ a ala okwo n-ndumwa. Ɛ zhɛ a kwụba iyi nɛ ee te mbishi shi aŋ la, ɛɛ zhɛ o eshicigo iyi nɛ aa ta hwụjɛ shɛ la.