Read bassa AYIZAYA 58 Bible Online

AYIZAYA 58 - bassa bible

AYIZAYA 58

¹AGWANGWAMA hiɛŋ, Ugana gana elele na ebi eri, ta munanana rụhwụŋ o! Ugana duwa gana ukakacɛ! Mbiso atwa mi Isrɛl tigezhe ta aba keeni iwɛwɛ ya aba!

²A ma n zhɛba iyi-heri, ɛɛ hiɛŋ i kwụlanɛ aŋ maa e mepi ihwɛŋnɛ mi maa a untangana kaa andwa mi. Ɛɛ hiɛŋ a jala maa ma pana aŋ andwa tishiriri, maa a 'yaga amɛ-olom ta a ma n zhɛba.

³Atwa ata heŋteni iheŋtene, ɛɛ hiɛŋ, Iwembe po bwa atɛ shɛ tu na nda ezumi ta AGWANGWAMA utu mbiyanɛ shɛɛ? Iwembe po bwa atɛ shɛ tu na ya imunɛ ti bee peni shi abashɛ tuu? AGWANGWAMA hiɛŋ aŋ, Na aka ata ahia nda ezumi gbaa, ibɛ du ahia ndaanana iyi nɛ ihi kwulanganɛ[190] hi na nda anjɛ-ugondu hiŋ umungwuta.

⁴Ezumi na ahia nda a shɛ na abwagara, hi no 'wogo, hi na twatwagwụ ifelu keeni okwu na wumanjɛ tumomo tonu. Hi heŋshi suu maa ezumi tɛnda nu uhwaŋna gana ga zhɛ a nda maa Ma hwuga adua hiŋ na azuba?

⁵Aka na ahia nda ezumi uwaŋna uko, hi na mama pana ụbaụta; hia ta bizhiri gana ambɛ na ubwo, hia bala tuzuzu keeni ma'alụ maa hi wotogo. Shɛ iyi nɛ suu ɛhi hiɛŋ ezumi ta? Hi heŋshi ree maa amɛ mi zhɛ o lomo ni ibɛ?

⁶Ezumi na Ama jala na: bwacaga ma ashɛnjɛ ata ehi to atwa ata ahia nda umungwuta, keeni tijama ta ata tu zasa ririri tupatana atwa. Ganga ma atwa ata ahia nda umungwuta maa e hwuri arahaŋ.

⁷Na pana ma atwa na imunɛ gwụmɛ iyimɛyɛ, hi no lonono okofwo a na zasa nhwaŋ maa a nama nu nhwaŋ mi hiŋ. Na pana ma atwa na zasa iyi tu'urugono tugwuno, ta na laka ma maa hi no mbiyono atwa hiŋ o.

⁸Nazhɛ tulubo ti mi ti zhɛ tu ma hi ta gana usaka, nazhɛ du andala hiŋ zhɛ o 'wo kakayɛ. Nazhɛ tiririri ti hiŋ ti zhɛ[191] ta nama ne hiŋ aka elele. Nazhɛ ụjɛrụma wa AGWANGWAMA kaa zhɛ ma hiɛ jɛlanɛ geri elele.

⁹Yaa shɛ ahiɛ njɛ adua, nazhɛ Ngɛɛ zhɛ mɛ hi jishijɛ. Ti yaa shɛ ehi genji atwa umungwuta tɛnda, ehi genji amiaụŋ tɛnda hwɛɛ, keeni n-ndumwa mụ wɛ tụdụmanga kpaaŋ,

¹⁰Yaa shɛ ahia pana atwa na imunɛ gwụmɛ iyimɛyɛ, ahia pana du kaa atwa na ukekeshi to iyi nɛ aa jala, nazhɛ tishi tu na ti hi rungwutwonu ti zhɛ ta sha uhioko-uhwaŋna na wa ta raawụụ gana uwaŋna.

¹¹N zhɛ mu na hi 'yaka aka elele, mu na hi pana iyi ibiye elele. N zhɛ ma hi ta ikɛnyi maa hi nama lapiya. Hi zhɛ hia sha gana itimɛ nɛ 'yajɛ meni tebiye, gana umɛzhinjɛ meni na hwuŋ shɛ kwukwuŋ.

¹²Atwa hiŋ zhɛ a maanana iyi nɛ hwuŋzwotongwu la cala, ɛɛ zhɛ a maanana iŋ nu ukoshilo ala ụngwụshɛ. Ɛ zhɛ ma hi mapa maa ahiɛba hiɛ shɛ atwa na meeneni uba na hwuŋzwo la, a na meeneni du to shimwono sha ata shi hwuŋzwotongwu la.

¹³AGWANGWAMA hiɛŋ, Yaa shɛ ahiɛ njɛ Ụjita-ụhinjanụ tijilo, ahiɛ njɛ shɛ iyi nɛ shɛ inee hiŋ nụ ụjita ata; yaa shɛ ahiɛ njɛ ụjita u tijilo iyi tandụ, ahiɛ mụnɛ uŋ ụjɛrụma maa hi genji tahaŋnụ tizha, tu ugondu tɛnda, ehi genji n-ndumwa mo ohondo tụdụmanga nu bwa,

¹⁴nazhɛ ɛhi zhɛ hia kwụba unyasa na nambana bụtụ na ma n ndana ugondu. N zhɛ ma nda maa ahiɛ mụnɛ du ụjɛrụma nu unyizo hwɛɛ, nazhɛ ɛhi zhɛ hia ya tuwebiye ta cɛnjɛ ta ata Ngee peni la ugwunukwoshi hiŋ ge Jekob. Gamba AGWANGWAMA N jɛmɛ.