Read bassa AYIZAYA 6 Bible Online

AYIZAYA 6 - bassa bible

AYIZAYA 6

¹Nu uywa na agwuma Uzia 'wi, nu uywa ata Ngaa kwụbɛ AGWANGWAMA tu baa jɛjɛ ni idwɛtwɛ ibwɛ nɛ zeci, i gembi tebiye, izhɛmi utogwo ubwa rungwutwonu umwono Agwatana.

²Iyi-uumwa nɛ yo gorogo gana ulwa shikekeni yoo rungwutwonu bu, inɛ inɛ 'yajɛ apiambɛ ecihiŋ, inɛ inɛ urigeni ụpɛshɛka ibɛ na apiambɛ eyebi, inɛ inɛ urigeni ɛvwɛvwɛjɛ ibɛ na apiambɛ eyebi, inɛ inɛ ya hila na apiambɛ eyebi.

³Aa mama suyaganụ, ɛɛ hiɛŋ: Tijilo, tijilo, tijilo, AGWANGWAMA na Hwuri Kpaaŋ shɛ tijilo! Ụjɛrụma ubwa kaa shini unyizo hwɛ hwɛɛ.

⁴Ukpahiŋ rụhwụŋ ra aba njɛ akpa umwono Agwatana bulama hwɛɛ, tu ukoshilo ubwa njɛ bulama, nazhɛ nshikwo mi shini umwono ata Agwatana.

⁵Ngɛɛ hiɛŋ, N zhɛ ma nda adangboo! Iwɛnɛ tu n-ndumwa mu unu mu mu zasa shɛshɛshɛ; Ngaa namɛ du kaa na ashashɛ atwa na n-ndumwa mu unu aba mu zasa shɛshɛshɛ. Ngaa kwụbɛ kaa sasana Agwuma, na shɛ AGWANGWAMA na Hwuri Kpaaŋ!

⁶Nazhɛ iyi-uumwa ɛtɛ ike hirɛ yaa zhajɛ pi mi, yaa 'waŋnɛ ukanga ulwa na yɛɛ pɛshinjɛ nu utukwu-ụrụpɛ na apashɛ.

⁷Yee n sepi ukanga ata ulwa ni ihwumbwe, nazhɛ yɛɛ hiɛŋ, Hioko, ijɛ timengeni ihwumbwe bu, hwuwayɛ go e suji tụwụma tụ bụ, ee bi gengeni kaa du iwɛwɛ bu.

⁸Nazhɛ Ngaa hwụjɛ rụhwụŋ ra Agwangwama, ti rɛɛ hiɛŋ, Gaaba Ngɛɛ zhɛ ma tumwana utumwaa? Gaaba zhɛ ba sha butumwa tuu? Nazhɛ Ngɛɛ jishijɛ, Ngɛɛ hiɛŋ, Gamba na, N tumwanɛ!

⁹Nazhɛ bɛɛ n hiɛŋ, Zhaga mbiso atwa ga, hiɛŋ aŋ: Tɛshɛlaga ahia shɛlaga nom, hi eshiciji shi, tu ngbaraka ahia ngbaraka kwakwa, hiɛ kwụbɛ shɛ kaa o.

¹⁰Nazhɛ bɛɛ n hiɛŋ, Nda maa kede shɛmɛ sha atwa ga shi mepi iyi elele o, nda aŋ shɛkwụrụ, maa njɛ aŋ sholubo, iwɛ maa kede a kwụbɛ uhwaŋna o, maa kede a hwụjɛ iwɛ, maa kede du kaa e eshiciji o, shibwonu ɛ zhɛ a kwụba ne eshe aba, ɛɛ zhɛ a hwuga na shɛcɛbɛ sha aba, ɛɛ zhɛ o eshicigo na shɛmɛ sha aba, ɛɛ zhɛ a zhɛmanana.

¹¹Nazhɛ Ngee heŋteni bu, Ngɛɛ hiɛŋ, Agwangwama, i ci aka gana naa kwuŋ ijɛ zhɛ ya sha gana gaa? Bɛɛ jishijɛ, bɛɛ hiɛŋ, Uuwa i ci aka na ashɛpwụ ga a'wụtụ a'wụtụ a shɛ shisombo, shimwono sha ata shɛ zasa ya atwa zweni na shɛba, cɛnjɛ ta ata hwɛɛ tɛ shɛ osombo taa zasa ya uhwara.

¹²N zhɛ ma bacɛnga atwa ata maa e suji aŋ taa dụlụ na tijama, maa ma nda cɛnjɛ tu ga osombo hwɛɛ.

¹³Okwo oo dwotwogonu atwa ata orubwo umpwa, okwo orubwo vwɛ hwɛɛ zasaba, okwo yaa shɛ urubwo uko vwɛ na cɛnjɛ ta ata, ɛ zhɛ a kwụna aŋ waa; ɛ zhɛ a sha gana ukwudungwuru ụ'wụ'wụ ukpekpeshi na ee ri, na kwuneneni tusaba. Ukwudungwuru ga u kwuneneni bana tusaba ụ shɛ tukwuno tu na atwa tijilo kwuneneni tunama na cɛnjɛ ta aba.