Read bassa AYIZAYA 61 Bible Online

AYIZAYA 61 - bassa bible

AYIZAYA 61

¹AGWANGWAMA Mokondo m peteni Mpiala mu bwa. Bu n dudugeni manɛbɛ, maa Ma anangana okofwo[197] anabarɛ ebiye, baa n tumwanɛ maa Ma nɛnga atwa na shɛmɛ sha aba shɛ hashɛganụ, maa Ma anangana atwa na namɛ na tijama tutufwurungo ta aba, keeni tibɛcinjɛ[198] ta ajama na zweni nu umwono-tishi.

²Maa Ma ananga iwɛ uywa iwɛ-tumapa ya AGWANGWAMA, iwɛ ụjita na Agwatana tu zhɛ a nda itɛpwɛ, maa Ma ingatanga atwa na a ta-ụkwụla hwɛɛ.

³Maa Ma pana atwa na a ta-ụkwụla nu Zayon udara ụ tụlasụ, tụlụkpashɛ ta ma'alụ, maa e peni aŋ manɛbɛ mu unyasa, maa e genji ya ụkwụla-tụta. Maa pana aŋ otogwo na pilanụ maa e genji ya amɛ-tụhaŋtụ. Ɛ zhɛ na suyana aŋ maa ekpekpeshi tiririri, gana i'wɛ'wɛ nɛ AGWANGWAMA bɛrɛ ni ikɛnyi ibwɛ. Ɛ zhɛ na pana bụ ụjɛrụma hwɛɛ aba.

⁴Ɛ zhɛ a maanana ashɛpwụ ata hwuŋzwotongwu la cala cala, ɛɛ zhɛ ɛ ishicinjɛ shisombo sha ala shɛ ngwụshɛ, ɛɛ zhɛ a nangangana ashɛpwụ ata hwuŋzwotongwowo la, iwɛ awaŋnɛ ofwugwo.

⁵Ahiɛba atwa mi, agaiŋ zhɛ na hi ndana ugondu. Atwa cɛnjɛ ti nya aba zhɛ a sha a'iywa-agwụdụ hiŋ. Ɛ zhɛ na hwaŋ ntuma mi hiŋ, o no vwolo ntuma mi hiŋ ma shifwafwa.

⁶Ɛ zhɛ mɛ hi hiɛŋ onongbo AGWANGWAMA, Miaụŋ-mu-ugondu ma Agwatana tu. Nu uduciya we edenji ɛhi zhɛ hi na ya iyi. Hi zhɛ hi na busa iwɛnɛ tu waa shɛ unee hiŋ.

⁷Ezuye nụ ụpụrụsa na ihiɛ shɛ la hwuwowu ya. Hi zhɛ hia nama ya na cɛnjɛ ti hiŋ, Uduciya hiŋ[199] zhɛ wa kaana ugombo kpalụ yebi; Unyasa hi zhɛ wa nama unyizo-nom.

⁸AGWANGWAMA hiɛŋ, Mo lubo ụshɛrɛya u tishiriri, Omo imo orugwusu[200] keeni undwa tubwada. N zhɛ ma pana atwa mi ule wa aba na tɛcara; Ma twa-unu unyizo-nom na aba.

⁹Ajalalo aba zhɛ a bana urishi na ashashɛ atwa elele a na shɛ edenji. Bụtụ be elele na kwụbɛ aŋ bi zhɛ ba mapa maa atwa na Ngee peni uwebiye ta.

¹⁰Jɛrusalɛm hiɛŋ, Ma nda unyasa duwa duwa na AGWANGWAMA, ohwulu mi a bwada unyasa na Agwatana mi. Iwɛnɛ po ubwa n urigeni ubino gana i'wɛŋnɛ i tu'urugono, bee n urigeni tiririri gana utogwo, gana bwolo biyikwo bu ufwo na mɛmɛ njɛ tisemberi, kwo kaa gana biyikwo bu ufwo na meme urigeni i'wɛŋnɛ nɛ zhanganjɛ.

¹¹Gana na ti izɛgwu yɛ unshɛ, yaa waŋna ni itimɛ nɛ aa bɛrɛ iŋ, gobwonu du AGWANGWAMA Mokondo zhɛ a nda maa tiririri keeni udumanga namana edenji elele kpaaŋ.