Read bassa AYIZAYA 62 Bible Online

AYIZAYA 62 - bassa bible

AYIZAYA 62

¹N zhɛ ma dumana iwɛ maa Ma ta Jɛrusalɛm ikɛnyi; N zha shɛ ma nama saiiŋ iwɛ Jɛrusalɛm o, uuwa i ci aka na tiririri tu bwa ta ta gana usaka, ubino ubwa kaa wa ta gana ulopu na wa ta raawụụ nụ ụjita.

²Gabụ Jɛrusalɛm, edenji zhɛ a kwụba ta ba lasụ! Shɛgwuma she elele shi zhɛ sha kwụba ụjɛrụma bụ. Ɛ zhɛ na bu suyana ni izeci ifwo, Ibɛ shɛ izeci ɛtɛ AGWANGWAMA ubu po ni ikɛnyi ibwɛ.

³Bi zhɛ ba shana AGWANGWAMA gana udara na pilanụ. Ɛbi zhɛ ba shana Agwatana bụ gana ukata tugwama.

⁴A zha shɛ ma bu suyana ya maa bụtụ na ee jineci o.[201] A zha shɛ kaa a suyana ya cɛnjɛ tụ bụ maa osombo.[202] Ama ɛ zhɛ ma bu suyana maa, Unyasa mu[203] namɛ na amɛ ubwa. Ɛ zhɛ kaa du a suyana cɛnjɛ tụ bụ maa, cɛnjɛ tu na ti 'yajɛ bwolo.[204] Iwɛnɛ po AGWANGWAMA 'yajɛ ya unyasa na bụ. Ubwa kaa zhɛ ba sha gana bwolo baa cɛnjɛ tụ bụ.

⁵Bụtụ na ubu karɛ[205] ubwa zhɛ ma bu zana gana usemberi na zeni biyikwo bwa na ta shɛ usapa, gana na to bwolo bu ufwo ba nda unyasa ne biyikwo bwa bu ufwo, gobwonu du Agwatana zhɛ na nda unyasa na bụ.

⁶Gabụ Jɛrusalɛm, N shikecenji a'iywa nu uba bụ; A zha shɛ a nama saiiŋ, tụ ụjita tu uwaŋna o. Ɛ zhɛ ne teyingeni AGWANGWAMA iwɛ onu ubwa tishilo. A shɛ shɛ o lonono bu maa ta ụhinjanụ o.

⁷A shɛ shɛ kaa a pana bụ ụhinjanụ o, semi aka na ti bee gwuricinje Jɛrusalɛm, Baa njɛ uŋ ụshɛpwụ ụ'wụtụ na unyizo hwɛ hwɛɛ wa shɛtana.

⁸AGWANGWAMA shiri-unu ụ'wụtụ, bɛɛ hiɛŋ, Bi zhɛ ba nda iŋ nu ukpahiŋ ubwa: Atwa i'ime bu zha shɛ a ya ya iyimɛyɛ bụ o. Agaiŋ kaa zha shɛ a swa ya meni mụ bụ ma afwafwa o.

⁹Ama ahiɛba na hiɛ bɛrɛ la iyimɛyɛ ɛtɛ, ahiɛba hi jweeneni iŋ. Ahiɛba hi zhɛ hia ya iŋ hia shɛtana AGWANGWAMA; Ahiɛba na hi bweri la hi cweeneni du afwafwa ata. Ahiɛba du hi zhɛ hia swa meni ma aba nu kpogwu wo ohwolu ata mi tijilo.

¹⁰Ahiɛba atwa Jɛrusalɛm, bana ma no tupohondo tụ ụshɛpwụ maa hi hengeni atwa hiŋ na e ci ujiyo uhwaŋna! Hangana aŋ ma uhwaŋna kpotoo, mushongo ma atayɛ! Shikicingono aŋ ma igɛrigɛ maa edenji mepi.

¹¹Maa AGWANGWAMA a anangana cɛnjɛ tu unyizo kpaaŋ maa: Mbiso ma atwa Jɛrusalɛm, Maa AGWANGWAMA e ci ba maa mo hi bicingo, Hioko titeni tu bwa tu namɛ nu bwa, tutupana tu bwa kaa tu namɛ nu umbe ubwa.

¹²Ɛ zhɛ mɛ hi hiɛŋ, Atwa Tijilo Agwatana. Atwa na AGWANGWAMA gwube. Ɛ zhɛ ɛ hiɛŋ Jɛrusalɛm maa Ụshɛpwụ Ụ'wụtụ na Agwatana Lubi, Ụshɛpwụ Na Agwatana Jineci shi ya.