Read bassa AYIZAYA 63 Bible Online

AYIZAYA 63 - bassa bible

AYIZAYA 63

¹Gaaba na kwuŋ banɛ nu Bozra[206] na shɛ ụshɛpwụ ata ụ'wụtụ namɛ ni Idomm? Gaaba na kwuŋ hwuŋteni i'wɛŋnɛ ishenje be ci[207] nu ukpahiŋ keeni ikɛnyii? Ubwa shɛ Gamba na n 'yajɛ ukpahiŋ maa Mo bicingo, Gamba ta me ci maa Ma ananga tụlasụ ti mi.

²Iwembe kwuŋ po tugwuno tụ bụ ti shenjemi gana bụtụ na bo pilo tụ'walụ ta afwafwa no onunuu?[208]

³Nazhɛ AGWANGWAMA jishijɛ, bɛɛ hiɛŋ, Gamba m piri edenji gana tụ'walụ ta afwafwa, i zasa bụtụ zhajɛ maa mo mbiyono. M piri aŋ ni isɛbwɛ mi, iwɛbɛ po mehieŋ ma aba mi tegeni tugwuno ti mi.

⁴N heŋshi maa aka ci ya maa Me gwube atwa mi. Aka du ci ya maa Ma pana atwa i'ime aba ulwapɛ.

⁵I n dama aka na Ngaa mbiyanganɛ, Ngaa kwụbɛ maa i zasa bụtụ namba maa mo mbiyono. Ama ni isɛbwɛ mi, Ngee meme shi Ngaa lasụ atwa i'ime mi Ngooko.

⁶Ni isɛbwɛ mi Ngee piri edenji, Ngee bwereteji aŋ. Ngaa 'wɛŋ mehieŋ ma aba na cɛnjɛ.

⁷N zhɛ ma duma iwɛ tulubo ta Agwatana tu na tu ngwuri shi kwukwuŋ; Ma shɛtana bụ iwɛ iyi elele nɛ baa tu ndanɛ hwɛɛ. Bi peni atwa Isrɛl uwebiye iwɛ inyɛmɛnyɛmɛ ibwɛ keeni tulubo tu bwa tụ 'wụtụ.

⁸AGWANGWAMA hiɛŋ, Atwa mi aa shɛ; a zha shɛ ma n halakaka o. Iwɛbɛ po bee bicinji aŋ.

⁹Ụbaụta we elele[209] aa njɛ, bɛ njɛ du na aba. Butumwa-ba-azuba na namɛ na agba ubwa, ubwa bicinji aŋ. No tulubo tu bwa keeni uwanyi ubwa bee gwube aŋ. Ubwa bo shiyono aŋ la eshe cala.

¹⁰Ama e teni bu tigezhe ee heshigeni amɛ Mpiala mu bwa mi Tijilo. Iwɛbɛ po AGWANGWAMA shɛ bụtụ aba bi i'ime bee jeshi aŋ.

¹¹Nazhɛ ee teyinje aka na koshikwo, na aka Moses yɛu-ugondu[210] ya AGWANGWAMA, ee unseni, ɛɛ hiɛŋ, Cee kwuŋ bụtụ ala bicinji a'yagajɛ atwa ubwa ni itekwu ɛtɛ namɛɛ? Cee kwuŋ bụtụ ata peni aŋ la Mpiala mu bwa mi Tijilo namɛɛ?

¹²Cee kwuŋ bụtụ ala njɛ la iyi i'wɛtɛ 'wɛtwɛ nu ukpahiŋ ubwa tedure no Moses, bu gata to la itekwu ɛtɛ, baa 'yagajɛ atwa ubwa ee keshi, maa bana urishi unyizo-nom namɛ yaa?

¹³Bu gata 'yagajɛ aŋ la no ofwo na ileji, ee zhe tahaŋnụ ni ivwunɛ gana idɛkwɛ, oo rungo nụ ụshɛka a twa sụ kaa udukwutwa o.

¹⁴Gana na oo sugo inɛ na cɛnjɛ tu na ti 'yajɛ ugwungwu, gana ata du AGWANGWAMA peni atwa ubwa ụhinjanụ[211] tedure nu Mpiala mu bwa. Bi 'yagajɛ atwa ubwa, ibɛ po aa mụnɛ izeci ibwɛ ụjɛrụma.

¹⁵AGWANGWAMA, utu mbiyanɛ kaa, ta bu namɛ taa na azuba, no ofwo ata bu tijilo a na 'yajɛ ụjɛrụma. Imbe kwuŋ po iwɛ tu ibi te shi yaa? Cee ukpahiŋ bụ namɛɛ? Cee tulubo nu uwanyi bụ namɛɛ? Ta tu kwụnana rishe o[212]

¹⁶Gabụ bɛ shɛ bishi tu, okwo to ogwunukwoshi tu ga Abraham ne Jekob e ti mepi shi, ee ti eshiciji shi, ama oo AGWANGWAMA gabụ bɛ shɛ bishi tu, gabụ kaa bu me tu gwube cala cala aka elele iwɛ izeci bu.

¹⁷Iwembe kwuŋ po ebi leni maa ta ina ta ganga uhwaŋna bụụ? Iwembe kwuŋ po obu to shɛmɛ shi tu tɛshɛshɛpana uuwa atụ vwụrɛ atụ bụ sụmɛ shɛ ya inyɛsɛɛ? Gwure iwɛ atwa na ma bu ndana yibwa iyi, iwɛ atwa ata a na shɛ atwa bụ aka elele.

¹⁸Atwa bụ tijilo aba 'yajɛ la ohwolu ata bụ tijilo na aka ticwɛŋ, nazhɛ atwa tu i'ime rikeci ohwolu ata bụ tijilo[213]

¹⁹Bɛ tɛ njɛ gana maa bu ta tu untanganɛ shɛ la kwukwuŋ, gana maa tu ta shɛ shɛ la ya atwa bụ.[214]