Read bassa AYIZAYA 66 Bible Online

AYIZAYA 66 - bassa bible

AYIZAYA 66

¹AGWANGWAMA hiɛŋ, Azuba aba shɛ idwɛtwɛ mi, cɛnjɛ tu unyizo tɛ shɛ udusa we ɛvwɛvwɛjɛ mi. Umwono imbe ɛhi tɛ zhɛ hi ma manaa? Ofwo gana naa Ngee te eri ma namaa?

²AGWANGWAMA hiɛŋ, Gamba ni ikɛnyi mi n njɛ ijɛ hwɛɛ, nazhɛ yaa namɛ.[219] Amɛ mi o lomo na atwa na meme zucinje, a na jɛshɛrɛjɛ-shihaŋsa, a na ma n sụma inyɛsɛ anaa na kaa a zhɛgɛdana n-ndumwa mi mi.

³Bụtụ be elele na ba shɛla buna be eyi, bɛ shɛ gana bụtụ na ba kwụna bụtụgwụmwa, bụtụ be elele na to ụrụpɛ ni yɛu-ụgwụdụ, bɛ shɛ gana bụtụ na bo pingo i'ilu uwɛwɛ; ta bụtụ na to ụrụpɛ tiya no mihiuŋ, bɛ shɛ gana bụtụ na ba pana ụrụpɛ ne mehieŋ mu nkomu; kwo kaa bụtụ na bo hwoŋzhingo iturɛre nu ụrụpɛ titeyinje, bɛ shɛ gana bụtụ na bo zhemonjino ntatanuwaŋ. I kwụlanɛ aŋ maa e teri ihwɛŋnɛ ikɛnyi aba maa a na nda unyasa ni iyi-tupwaŋ tɛnda.

⁴Iwɛbɛ po Ngɛɛ zhɛ ma kalanɛ aŋ du abara ne ebe a gata a nda maa inyɛsɛ shɛ aŋ, iwɛnɛ ti yaa zasa bụtụ be elele na leni ụhiɛŋshɛ na Ama suyana aŋ, i zasa kaa bụtụ be elele na shɛlajɛ aka na Ama njɛ n-ndumwa o. A nda iyi iwɛ ne eshe mi, ee teri maa a na nda iyi nɛ i n kwụlanɛ shɛ.

⁵Shɛlaga ma maa hiɛ hwụjɛ iyi nɛ AGWANGWAMA hiɛŋ, ahiɛba na hia sụma bụ inyɛsɛ, hia hwuga kaa unu ubwa: Bi hiɛŋ, Iwɛnɛ ahiɛ shɛ atwa mi tɛcara, atwa hiŋ ikɛnyi hiŋ zhɛ mo hi imo, ɛɛ zhɛ ma hiɛ bacɛnga iwɛ izeci mi. Ɛ zhɛ na hi nda asada, ɛ hiɛŋ, Ga AGWANGWAMA mbiseni ụjɛrụma ubwa maa me hi bicingo, iwɛ maa ta kwụba ta hia bwada unyasa. Ama ụpụrụsa tuba zhɛ wa ima aŋ ni ikɛnyi aba!

⁶Shɛlaga Ma! Rundu ra ata ru tutaawụụ ru namɛ nu ụshɛpwụ, rundu ra ata ru namɛ nu umwono wa Agwatana, rɛ shɛ rundu ra AGWANGWAMA na a tupana atwa i'ime ibwɛ itɛpwɛ!

⁷Ụshɛpwụ mu tijilo ụ shɛ gana biyikwo na meci yɛu-ye-eyi eshigiri u zawa ụngwụ tumata, yɛu ɛtɛ 'waŋ uzawa tulumongwu.

⁸I 'yajɛ kwukwuŋ bụtụ kwụbwa kwo kaa hwugwa iyi gɛnɛ go hŋ? Hi hwugwa kwukwuŋ te e meci u'una jitoo ko gba hŋ? Hi hwugwa kwukwuŋ te e meci udenji gunu ata hŋ? Ama kaa Zayon njɛ shɛ tulumongwu te ilegeji kwukwuŋ nazhɛ wee meci miaụŋ mu bwa me eyi o.

⁹AGWANGWAMA hiɛŋ, Gamba ebe ma nda maa e meci yɛu kakayɛ, Gamba suu ya ma laka tumata? Agwatana bu hiɛŋ, Gamba ebe ma nda maa yɛu 'waŋ, Gamba suu ya ma kapa igwune tumata?

¹⁰Bwada ma unyasa nu Jɛrusalɛm, bwada ma unyasa nu ubwa, hwɛɛ hiŋ na hio lubo ụshɛpwụ ga ụ'wụtụ! Bwada ma unyasa nu bwa hwuwayɛ go, hwɛɛ hiŋ na hi towo la ụkwụla iwɛ ubwa.

¹¹Maa hi togotogwu na ti'ingatanga tu bwa maa ti hi gembi, gana yɛu nɛ yo subo agba bino bwa, maa hi bɛcinjɛ ụjɛrụma ata ubwa ụ'wụtụ, maa hiɛ yɛ tɛzhɛmana tu bwa.

¹²AGWANGWAMA hiɛŋ, N zhɛ ma nda maa tɛzhɛmana ti hiŋ tɛ shɛ unyizo-nom; uduciya we edenji zhɛ wɛ fwunjɛ maa u hi zhaganɛ gana urefu na zhagajɛ na u hwuŋ shɛ ya. Hi zhɛ hia sha gana yɛu nɛ bino bi ibɛ bo lubo tebiye baa nɛnga, bee shepi iŋ baa 'waŋnɛ[220] baa ndana iŋ tụlagwụ no unto mu bwa.

¹³N zhɛ ma hi ingatanga nu Jɛrusalɛm, gana na bino bi yɛu ba ingatanga yɛu ibwɛ.

¹⁴Aka na ahiɛ kwụbɛ ti ijɛ ya nda hwuŋ, amɛ hiŋ zhɛ o lomo; i zhɛ ma hi hiɛcɛnga u'waba maa hi 'yaga unyasa, o'umpwo hiŋ zhɛ na saba gana ambɛ o lom. Nazhɛ ɛhi zhɛ hia mapa maa, Gamba AGWANGWAMA mo mbiyono atwa na shɛ miaụŋ mi mi mu ugondu. Atwa i'ime mi aba Ngɛɛ zhɛ ma nda ya isɛbwɛ na aba.

¹⁵AGWANGWAMA zhɛ a zhajɛ nu ulwa. Bi zhɛ bɛ sucɛ ujipo na shɛ gana ihɛŋtu ibwɛ ujasa maa pana atwa na baa 'yajɛ isɛbwɛ na aba ulwapɛ ni isɛbwɛ ibwɛ ti'ishijɛ.

¹⁶Nu ulwa keeni utokwobi bɛɛ zhɛ ba pana atwa unyizo hwɛɛ a na n-ndumwa mụ wụmɛ ulwapɛ. Bɛɛ zhɛ ba kwụna kaa atwa ofwugwo.

¹⁷AGWANGWAMA hiɛŋ, Ukwunanga wa atwa na mama nyashɛnga shɛshɛshɛ maa a zhɛbɛ tuwa gwumwongonu ya, a na o ipo ne shihilo sha adatụ aba[221] a na a ya usunda nkomu, to shokwuzo keeni iyi-tupwaŋ ye elele.

¹⁸M mepi[222] iyi nɛ aa haŋsa keeni iyi nɛ aa nda. Gamba ta me ci[223] maa mo sotulonu edenji ata hwɛɛ keeni rɛjɛmɛ re elele. Aka na aa ulwa, ɛ zhɛ a mapa iyi nɛ Ngee eri ma nda nu ukpahiŋ mu, ɛɛ zhɛ a kwụba ụjɛrụma mu.

¹⁹Ɛ zhɛ a mapa maa Gamba m peni aŋ ulwapɛ. Ama N zhɛ ma waŋpana atwa oko na amɛ aba maa Ma tumwana aŋ taa dụlụ na cɛnjɛ ta adakwụ urefu tu na tu ta hwụjɛ shɛ urishi mu, a na ta kwụbɛ shɛ du kaa ụjɛrụma mu keeni ukpahiŋ mu. N zhɛ ma tumwana aŋ nu Tashish, ti Libiya[224] ti Lidia na 'yajɛ egwoni ekeri-a'inla, tu Tubal, ti Grik.[225] Na ashashɛ edenji ga ɛɛ zhɛ a ananga ụjɛrụma mu.

²⁰Ɛ zhɛ e jicinje miaụŋ-mo-bino hiŋ ta a banɛ na ashashɛ edenji ata, maa a n 'waŋnanɛ aŋ gana iyi ụrụpɛ. Ɛ zhɛ e suje aŋ ni ishɛmɛ mi tijilo Jɛrusalɛm, ɛɛ zhɛ e suje aŋ ni idɛkwɛ, nu nzhinyacɛ hwɛɛ, tu nruhondo hwɛɛ, ti ihɛŋtu ujasa hwɛɛ gana na ta atwa Isrɛl a 'waŋnɛ iyi ụrụpɛ tiya nu umwono wa Agwatana ni iyi uhwugwa nɛ namɛ shɛshɛshɛ.

²¹AGWANGWAMA hiɛŋ, N zhɛ ma nda atwa oko onongbo na amɛ aba, atwa oko zhɛ a sha Alivai.

²²Gana na ta cɛnjɛ tu unyizo tu ufwo na azuba ofwo zhɛ ilogogo nu ukpahiŋ mu, gobwonu du ajalalo hiŋ keeni izeci hiŋ zhɛ ye ilogogo.

²³Atwa na zhɛ a banɛ ne edenji elele zhɛ a zhajɛ nu Jɛrusalɛm maa a n zhɛbɛ na aka isene upiana ufwo we elele, nụ Ụjita-ụhinjanụ we elele, AGWANGWAMA jɛmɛ.

²⁴Gana na te e hwuri, ɛ zhɛ a kwụba n'wo ma atwa na n teni tigezhe. Eshishi na zhɛ na ya aŋ zha shɛ o 'wo, ulwa na kaa zhɛ no hwoŋzhingo aŋ zha shɛ wo 'wogo. Ofwo ata zhɛ a shana bụtụgwụmwa be elele ofwo inyizhi.