Read bassa AYIZAYA 7 Bible Online

AYIZAYA 7 - bassa bible

AYIZAYA 7

¹Aka na tu ga Ahaz yɛu-ye-eyi Jotam bujalụ Uzia yɛ tugwama tu Juda, ibɛ ujasa layɛ, ge Rezin agwuma Siria, na Pika yɛu-ye-eyi Remalia agwuma Isrɛl sukakanɛ Jɛrusalɛm nu ujasa, ama e eri shi maa e leshiji uŋ o.[20]

²Aka na te e mbishi atwa ihwɛ Devid, ɛɛ hiɛŋ, Asiria twa-unu na atwa Isrɛl, ee suteni ba no[21] tugwungwu ti Isrɛl, ibɛ po inyɛsɛ shɛ bụ ta atwa ubwa hwɛɛ, harɛ aa zhɛgɛda gana i'wɛ'wɛ uwapa nɛ mpiala mo zhingoto.

³Nazhɛ AGWANGWAMA hiɛŋ Ayizaya, Zhaga ma no ofwo agwuma Ahaz ni yɛu bu ye eyi ga Shia-jeshub.[22] Hi zhɛ hia twa nu bwa ne ehilo ata anɛ-tugwuno a nda ugondu, nu ukporo ata meni mɛ fwunjɛ mo zwo nu ukwokwo ata namɛ tuzuba.

⁴Hiɛŋ bụ ga mama nda hinjɛ, ga nama saiiŋ, kede inyɛsɛ shɛ bụ o, kede kaa ohwulu horukono bu o. Iwɛnɛ po isɛbwɛ ya agwuma ge Rezin na atwa ubwa Siria na agwuma Pika hwuri shi ulwa tɛngwuzhɛ ti yebi tu na ta nda nshikwo.

⁵Atwa Siria na atwa Ifrem keeni yɛu Remalia hwɛɛ, heŋshi maa abụ kwụnɛ.

⁶Ɛ hiɛŋ, ɛ zhɛ a tafwulaga Juda, o zwono aŋ inyɛsɛ maa tubogwu tu layɛ na ashashɛ aba, atwa atwa suji urubwo aba, maa tuba e mungicinji yɛu-ye-eyi Tebɛl ni idwɛtwɛ maa sha agwuma aba.

⁷Ama iyi nɛ AGWANGWAMA na Hwuri Kpaaŋ jɛmɛ na, bi hiɛŋ, I zha shɛ ya 'yaga eshe o, i zha shɛ kaa yɛ sɛ o.

⁸Iwɛnɛ po Damaskos ubwa shɛ uhiu cɛnjɛ ti Siria, agwuma ge Rezin kaa ubwa shɛ uhiu Damaskos. Na amɛ shiywa dupu-ne-eshe-umpwa-na-shɛba-shɛ-ta, (65) ɛ zhɛ a bwarataga atwa Ifrem rukwu rukwu, a zha shɛ a vwa u waŋnɛ maa a shɛ ya u'una o.

⁹Samaria kaa ubwa shɛ uhiu cɛnjɛ ti Ifrem. Yaa shɛ rishe rụ bụ tɛtɛtana ru zasa ikɛnyi, asha bi eri shi bo shikono dimi o.

¹⁰AGWANGWAMA tumwananɛ Ahaz utumwa unya, bɛɛ hiɛŋ,

¹¹Lụpa AGWANGWAMA na shɛ Agwatana bụ maa ma bu pana useyida na zhɛ wa banɛ taa na amɛ e'uye na iri kwo kaa taa na azuba na zeci.

¹²Ga Ahaz jishijɛ, bɛɛ hiɛŋ, N zha shɛ ma lụpa useyida elele o. N zha shɛ kaa du ma manga AGWANGWAMA o.

¹³Iwɛbɛ po ga Ayizaya hiɛŋ bụ, Hwuwayɛ go, shɛlaga, gabụ na bɛ shɛ bụtụ bi ihwɛ Devid. I shɛ iyi iwɛ maa lukwucinji atwa na 'imɛ-isɛbwɛ, bi zhɛ suu du bo lukwucingo Agwatana mi ni isɛbwɛ ibwɛ ti'ima?

¹⁴AGWANGWAMA ni ikɛnyi ibwɛ zhɛ ma hi pana yibwa useyida. Yɛu-yo-o nɛ te mepi shi butubwenyi[23] zhɛ ya la ofubo, yɛɛ zhɛ ya mata yɛu-ye-yi, yɛɛ zhɛ ya pa iŋ izeci ti ga Imanuɛl[24]

¹⁵Yaa shɛ yɛu ɛtɛ waŋnɛ, bee mepi ta a laka iyi iwɛ maa tala iyi ibiye, bi zhɛ na ya manɛbɛ-manyɛshɛ keeni iswɛ[25]

¹⁶Cɛnjɛ ta shɛgwuma shɛ ga shi yebi shi mo hi zwono inyɛsɛ ti zhɛ ta sha osombo nazhɛ aka ata yɛu ɛtɛ zhɛ ya laka iyi iwɛ maa tala iyi ibiye i ci.

¹⁷AGWANGWAMA zhɛ ma bu pana ụbaụta na gembi, te kwune na aka na cɛnjɛ-ta-tugwama ti Ifrem tu bogwu na cɛnjɛ tu Juda, ụbaụta na u ci gana ata u ta zasaba la kwukwuŋ, ubwa zhɛ ba pana atwa bụ ụbaụta, hwɛɛ tu umwamwa bishi bu. Ubwa zhɛ bɛ zɛrijɛ agwuma Siria.

¹⁸Aka ata ci hwuŋ, ubi tuhwulo ubwa zhɛ wa sha useyida na AGWANGWAMA zhɛ na suyana atwa Ijipti, nazhɛ ɛɛ zhɛ e gezheji wuu gana ishi a kashajɛ ahwacɛ urefu Nayɛl, atwa Siria zhɛ a banɛ na cɛnjɛ ta aba gana iswɛ.

¹⁹Ɛ zhɛ a swakaka no olomu, ta apangwụ keeni aparatayɛ, ɛ zhɛ a nama no okokoto tɛka, to olomu meni keeni ehilo elele.

²⁰Aka ata ci hwuŋ AGWANGWAMA zhɛ ɛ kɛshicinjɛ agwuma Siria na 'yebi u'nyanga taa nu Yufretis! Ibɛ bɛɛ zhɛ ma hi 'nyanga tizholu, bu ma hi 'nyanga tukpala hwɛɛ, te tihiŋzhe ti ivwunɛ hiŋ, ta tu'waba ti hiŋ hwɛɛ.

²¹Aka ata ci hwuŋ, okwo yaa shɛ yɛu buna ike gba keeni iyweywe iyebi bụtụ 'yajɛ,

²²i zhɛ ya 'yaga mosubo mu na mi gembi bu. Tumwata tu na tu vwɛ ti zhɛ ta 'yaga manɛbɛ-manyɛshɛ maa a na ya, keeni iswɛ maa a na ya.

²³Aka ata ci hwuŋ, ntuma ma afwafwa mu na mɛ zhɛmanjɛ, mu na afwafwa shikekeni na muba i ci ecilo akpakwụ-a-ta, (1,000) mu na kaa du ulumo mu ba eri wo to azụrụfa ɛshɛkɛl akpakwụ-a-ta, mi zhɛ mo unto na ambɛ keeni esepi.

²⁴U'una ata zhɛ wa 'yaga tu'unto, te esepi zhɛ ɛ unshɛ nu bwa, harɛ atwa zhɛ na zha tijala apata ni itɛ ya aba keeni a'inla.

²⁵Nshama mu na aa hwaŋ la afwafwa mi zhɛ mo unto ne esepi, i zasa bụtụ zhɛ ba ala maa tono apata ya o. I zhɛ ya sha ofwo na inɛ na agwụdụ a yaga.