Read bassa LIVAI 1 Bible Online

LIVAI 1 - bassa bible

LIVAI 1

¹Ibɛ AGWANGWAMA suyanɛ Moses, baa jɛmɛ n-ndumwa nu bwa nu udulo tu'ulwatagwụ, bɛɛ hiɛŋ,

²Duma n-ndumwa mu ga pa atwa Isrɛl, hiɛŋ aŋ, Aka na ta bụtụ be elele na amɛ hiŋ zhɛ ba 'waŋnanɛ AGWANGWAMA iyi ụrụpɛ, ge iyi ụrụpɛ ata hiŋ i shɛ iyimabiga, inɛ kwo kaa agwụdụ.[1]

³Yaa shɛ ụrụpɛ ubwa ụ shɛ ụrụpɛ tuhwoŋzhingo na shɛ buna, asha ga shɛ buna be eyi na zasa tụsụnyasụ. Ga shapɛ bụ no odubo udulo tu'ulwatagwụ, maa AGWANGWAMA leshiji uŋ.

⁴Ga patana u'ala ubwa nu uhiuhiu iyi ụrụpɛ ata tuhwoŋzhingo, nazhɛ Ngɛɛ zhɛ ma lashɛga iŋ maa Ma gangana bụ i'wɛwɛ ibwɛ.

⁵Nazhɛ bɛɛ zhɛ ba kwụna buna ata be eyi nu umbe AGWANGWAMA, nazhɛ miaụŋ-me-eyi mu Aron bunongbo, mi zhɛ ma shapa mehieŋ ma ata, a 'waŋ mụ nu uvwi utukwu-ụrụpɛ ata namɛ no odubo udulo tu'ulwatagwụ tutu rungwutwonu.

⁶Ga fwuta buna ata bụ ụrụpɛ tuhwoŋzhingo maa sashanga bụ.

⁷Ga miaụŋ ma ata mu Aron bunongbo, mu shanɛ ulwa nu utukwu-ụrụpɛ, maa e setengeni i'wɛ'wɛ shiriri nu ulwa ata.

⁸Ga miaụŋ mu Aron mu na mɛ shɛ onongbo mi petengeni usunda ata ee seshenji shiriri ni ihiŋhiŋ i'wɛ'wɛ ɛtɛ patanganɛ nu utukwu ata ụrụpɛ, ibɛ shɛ uhiuhiu ubwa keeni manɛbɛ mu bwa.

⁹Ama ga nyashɛnga i'wɛŋnɛ ya amɛ ubwa keeni akatakpa ubwa ne meni. Go bunongbo ata peteni iŋ nu utukwu-ụrụpɛ hwɛɛ maa hwoŋzhingo iŋ, i shɛ ụrụpɛ tuhwoŋzhingo na dure nu ulwa, na shanɛ AGWANGWAMA ụhiụŋ ụlatụ.

¹⁰Yaa shɛ iyi ụrụpɛ ata tuhwoŋzhingo i shɛ agwụdụ kwo kaa iyweywe, asha ga shɛ inɛɛ nɛ shɛ butubwenyi nɛ zasa tụsụnyasụ abụ 'waŋnɛ.

¹¹Ga kwụnɛ bụ tuzuba tu utukwu-ụrụpɛ nu umbe AGWANGWAMA, ga miaụŋ mu Aron mu na mɛ shɛ onongbo mu 'wɛŋ mehieŋ mu bwa nu uvwi utukwu ata ụrụpɛ tutu rungwutwonu.

¹²Ga bụtụ ata seshenji bu, nazhɛ bunongbo zhɛ ba shamana usunda ata keeni manɛbɛ mu bwa ni ihiŋhiŋ i'wɛ'wɛ ɛtɛ satanganɛ nu ulwa ata utukwu-ụrụpɛ.

¹³Ama ga nyashɛnga i'wɛŋnɛ ibwɛ ya amɛ keeni akatakpa ubwa ne meni. Go bunongbo ata suji iŋ maa hwoŋzhingo iŋ nu utukwu-ụrụpɛ hwɛɛ. Ụ shɛ ụrụpɛ tuhwoŋzhingo na shanɛ AGWANGWAMA ụhiụŋ ụlatụ.

¹⁴Yaa shɛ na shanụnụ bụtụ zhɛ ba pana AGWANGWAMA ụrụpɛ tuhwoŋzhingo, asha ga shɛ ikwucime kwo kaa biywoywo bu ulukwukwu baa 'waŋnɛ.

¹⁵Go bunongbo shepi bu maa mushingo uhiuhiu ubwa, maa hwoŋzhingo bu nu utukwu-ụrụpɛ. Go pilo mehieŋ mu bwa nu utukwu-ụrụpɛ.

¹⁶Ga shapa ihiɛhiɛjɛ ibwɛ ti iyimɛyɛ ibɛ maa 'waŋ na bu'aŋbụ bu utukwu-ụrụpɛ geri bu uwaŋna-banụ, no ofwo ata aa 'waŋ ma'alụ.

¹⁷Ga dwatwaga shitutu shɛ bwa, ama kede dwatwaga hwɛ hwɛɛ o. Go bunongbo ata hwoŋzhinji bu nu utukwu-ụrụpɛ, ni ihiŋhiŋ i'wɛ'wɛ ɛtɛ patanganɛ nu ulwa ata. Ụ shɛ ụrụpɛ tuhwoŋzhingo na dure nu ulwa, ụ shanɛ AGWANGWAMA ụhiụŋ ụlatụ.