Read bassa LIVAI 10 Bible Online

LIVAI 10 - bassa bible

LIVAI 10

¹Ga Nadab na Abihu miaụŋ-me-eyi mu Aron, bụtụ bụtụ aba shepi ujebi ubwa ulwa tutala, aa tarɛ ulwa na shɛ shɛ una tijilo na aba, ee peteni iturɛre na aba, aa shɛkanɛ AGWANGWAMA ulwa ata unaa na bee peni shi aŋ kaa unu ubwa.

²Ibɛ po ulwa banɛ na agba AGWANGWAMA eshigiri, woo hwoŋzhinji aŋ, ee 'wi nu umbe AGWANGWAMA apata.

³Nazhɛ go Moses hiɛŋ Aron, Iwɛ gɛ AGWANGWAMA jɛmɛ na, bɛɛ hiɛŋ, N zhɛ mo mbisono tijilo ti mi na ashashɛ atwa na gwumwonu ne mi, ɛ zhɛ kaa ma m pana ụjɛrụma ne eshe atwa ga kpaaŋ. Ga Aron dumanɛ shɛ iwɛ ye elele kwukwuŋ.

⁴Nazhɛ go Moses suyanɛ Mishaɛl, nɛ Ɛlzafan, a na shɛ miaụŋ-me-eyi mu Uziɛl (a na shɛ nkwonyi mo bino) Aron, bɛɛ hiɛŋ aŋ, Kaanɛ ma izhɛ maa hi suji n'wo mu miaụŋ-mo-bino hiŋ hi becinji mu no ohwolu ga tijilo maa hi zhe no tupohondo tu ugba tu'ulwatagwụ tu ga.

⁵Aa kaanɛ ga izhɛ, ee suji aŋ, tu n-nduka ma aba, ee beni nu ugba tu'ulwatagwụ, gana na tu go Moses hiɛŋ aŋ.

⁶Go Moses hiɛŋ Aron, ne Eliaza keeni Itama, miaụŋ-me-eyi mu Aron, Ta 'nyanga ma tukpala o,[10] ta ta ma ụkwụla o, ta nda ma kaa du ụcɛnjɛ o, shibwonu hi zhɛ hio 'wo. AGWANGWAMA kaa du zhɛ ba nda isɛbwɛ na tu'ulwa tu ga kpaaŋ. Ama ga miaụŋ-mo-bino hiŋ mu na mɛ shɛ atwa Isrɛl hwɛɛ mɛ cwɛ-u'wo iwɛ ulwa wa AGWANGWAMA na hwoŋni.

⁷Ta bana ma kaa okwo no odubo udulo tu'ulwatagwụ o, shibwonu hi zhɛ hio 'wo. Iwɛnɛ po o hi dudugwonuo manɛbɛ ma AGWANGWAMA. Aa njɛ ga gana na tu go Moses mbishi aŋ.

⁸Nazhɛ AGWANGWAMA jɛmɛ n-ndumwa na Aron, bɛɛ hiɛŋ,

⁹Tu gabụ, ta miaụŋ mụ bụ me eyi, ta na swa ma meni mụ tụ'walụ ta afwafwa o, ta mayaga, na aka na ɛhi zhɛ nu udulo tu'ulwatagwụ o, shibwonu hi zhɛ hio 'wo. I shɛ okpogo unyizo-nom tutu rungwutwonu awaŋnɛ hiŋ hwɛɛ.

¹⁰Na manga maa na mapa tuswoswoswo ti iyi tijilo ni iyi nɛ shɛ inɛ yo ohondo keeni tuswoswoswo ti iyi nɛ hashɛganụ sụ ni iyi nɛ hashɛganụ.

¹¹Ahiɛba kaa hi zhɛ hio mbisogono atwa Isrɛl shikpogo shɛ ga AGWANGWAMA peni aŋ tedure no Moses kpaaŋ.

¹²Nazhɛ go Moses mbishi Aron ne Eliaza keeni Itama, miaụŋ mu Aron mu na mu ta vwɛ, bɛɛ hiɛŋ, Shapa ma ijɛ ɛtɛ ụrụpɛ tiya i vwɛ keeni ụrụpɛ ata ee peni AGWANGWAMA tedure nu ulwa maa hiɛ yɛ iŋ uzawa Ifucingɛ, na bụ'aŋbụ bu utukwu-ụrụpɛ, iwɛnɛ ti yaa shɛ iyi tijilo me tijilo.

¹³Ya iŋ ma no ofwo tijilo, iwɛnɛ ti yaa shɛ urobwo bu keeni una miaụŋ mụ bụ du, inɛɛ nɛ banɛ nu ụrụpɛ na ee peni AGWANGWAMA tedure nu ulwa, gana ee m peni-unu ibɛ ta.

¹⁴Ama ya ma ukosobu ata ee vwurenji keeni i'unte ɛtɛ ee peni AGWANGWAMA no ofwo elele na hashɛganụ sụ, tụ gabụ, ta miaụŋ mụ bụ me eyi keeni miaụŋ mụ bụ mo o mu na mu namɛ na bụ. Gabụ ee peni iŋ maa i shɛ urubwo bu, ta miaụŋ mụ bụ. Ibɛ shɛ inɛɛ nɛ banɛ na arụpɛ amɛ-olom atwa Isrɛl.

¹⁵Ga a shapɛ i'unte ɛtɛ keeni ukosobu ata ee vwurenji, medenji manɛbɛ ma arụpɛ ata ee peni AGWANGWAMA tedure nu ulwa, maa a shɛkanɛ iŋ AGWANGWAMA. Inɛ ɛtɛ kaa ibɛ zhɛ ya sha inɛ bụ, keeni miaụŋ mụ bụ mu na mu namɛ na bụ, maa i shɛ urobwo bu unyizo-nom, gana na ta AGWANGWAMA peni-unu ibɛ.

¹⁶Aka na go Moses hweyigeni iwɛ biywoywo ata bụ ụrụpɛ iwɛwɛ tebiye tebiye, tobwolo bu hwoŋnuo cebe! Baa 'yajɛ isɛbwɛ ne Eliaza keeni Itama a na shɛ miaụŋ mu Aron mu na mụ vwɛ, bɛɛ hiɛŋ aŋ,

¹⁷Iwembe po ahiɛ yɛ shɛ iyi ụrụpɛ ata iwɛwɛ no ohwolu ata tijiloo? Gana na ti yaa shɛ iyi tijilo me tijilo, e hi peni iŋ kaa maa hi 'waŋna ulwapɛ tu'ulwatagwụ tu ga kpaaŋ maa kaa hi to ụrụpɛ maa AGWANGWAMA gengeni aŋ iwɛwɛ ya aba.

¹⁸E tecinji shi kaa mehieŋ mi ibɛ na amɛ ohwolu ata tijilo. I ga shɛ kaa tilɛɛ maa hiɛ yɛ iŋ no ohwolu ata tijilo, gana na ti Ngee hi peni-unu ibɛ.

¹⁹Ama ga Aron hiɛŋ Moses, Hioko, hwayɛ ga ibɛ ee peni AGWANGWAMA ụrụpɛ wa aba iwɛwɛ keeni ụrụpɛ wa aba tuhwoŋzhingo. Gamba na kaa iwɛ gɛ te vwuteni! Yaa shɛ Ngaa nga yɛ iyi ụrụpɛ ata iwɛwɛ hwayɛ ga, i gɛ zhɛ ya kwulana AGWANGWAMA hŋ?

²⁰Aka na go Moses hwụjɛ iŋ, nazhɛ amɛ ubwa lemi suu.