Read bassa LIVAI 16 Bible Online

LIVAI 16 - bassa bible

LIVAI 16

¹Nazhɛ AGWANGWAMA jɛmɛ n-ndumwa no Moses, na aba tu'wo tu miaụŋ-me-eyi mu Aron mi yebi, na aka na ta a shɛkanɛ AGWANGWAMA ulwa ata shɛ shɛ una tijilo.

²Ibɛ po AGWANGWAMA hiɛŋ Moses, Mbiso batagwụ bụ ga Aron maa kede i shɛ aka elele boo tono no ohwolu tijilo, a na ibɛgɛlɛ tugwuno jilanɛ odubo, nu umbe tu'urugono ti Ikpɛtɛ ɛtɛ Unu-tutwa o, iwɛ aka na bɛɛ zhɛ bo 'wo. Iwɛnɛ po N zhɛ mi ne hikeni nu udomu na azuba tu'urugono ti Ikpɛtɛ ɛtɛ.

³Ama gana ga Aron zhɛ no tono ohwolu ata tijilo na: ga bu na 'waŋna yɛu buna be eyi iwɛ ụrụpɛ iwɛwɛ, keeni udagba uko iwɛ ụrụpɛ tuhwoŋzhingo.

⁴Go hwuŋtono idikɛ ilinɛn tijilo, maa hwuŋtono uwereci ilinɛn, maa umpo embi ubwa umazhɛya ilinɛn, maa pala ureweni ilinɛn. Ijɛ ibɛ shɛ i'wɛŋnɛ tu'urugono i tijilo. Ga dula meni, nazhɛ hwuŋtongono iŋ.

⁵Ga lashɛga epi eyebi na atwa Isrɛl kpaaŋ kpaaŋ iwɛ ụrụpɛ iwɛwɛ, keeni udagba uko iwɛ ụrụpɛ tuhwoŋzhingo.

⁶Ga ga Aron shepi yɛu buna ata be eyi maa ta ụrụpɛ iwɛ iwɛwɛ ikɛnyi ibwɛ, maa ta du ụrụpɛ tugangana iwɛ ikɛnyi ibwɛ, ti iwɛ ihwɛ ibwɛ.

⁷Nazhɛ bɛɛ zhɛ bo sugo iyweywe ɛtɛ iyebi bo tulono iŋ nu umbe AGWANGWAMA no odubo udulo tu'ulwa.

⁸Ga ga Aron 'wɛŋ icɛcɛ iwɛ iyweywe ɛtɛ iyebi, icɛcɛ ike i shɛ iwɛ AGWANGWAMA, icɛcɛ iyebi i shɛ iwɛ biywoywo na ɛɛ zhɛ a kala.

⁹Ga ga Aron to ụrụpɛ iwɛwɛ no ofwo AGWANGWAMA no biywoywo ata icɛcɛ yɛ.

¹⁰Ga shɛkana AGWANGWAMA biywoywo ata icɛcɛ yɛ iwɛ tukala buumwa buumwa, nazhɛ bɛɛ zhɛ ba kala bụ nụ ụshɛka azazɛl[18] iwɛ maa sugo iwɛwɛ nɛ atwa ata njɛ.

¹¹Ga ga Aron kwụnɛ yɛu buna ata be eyi maa ta ụrụpɛ iwɛ tugangana ti iwɛwɛ ibwɛ keeni iwɛ atwa ihwɛ ibwɛ.

¹²Ga shapa ujejebi maa shidingo akanga ulwa, na bɛɛ pɛshinjɛ nu utukwu-ụrụpɛ ata namɛ nu umbe AGWANGWAMA nu bwa keeni iturɛre nɛ ee nishi tebiye maa shidingo iŋ ni i'ɛlɛ iyebi. Ga shapa iŋ maa tono na amɛ ohwolu ata tijilo me tijilo a na ibɛgɛlɛ jilanɛ,

¹³maa patana iturɛre ɛtɛ nu ulwa ata namɛ nu umbe AGWANGWAMA, iwɛ maa nshikwo mi iturɛre ɛtɛ mu ubi ajɛjɛ ata inyɛmɛnyɛmɛ[19] na patanɛ ni Ikpɛtɛ ɛtɛ Unu-tutwa, iwɛ maa kede 'wo.

¹⁴Ga sala mehieŋ mi yɛu ɛtɛ buna be eyi, na buvwa bwa, maa zhizhongo mu na azuba tu'urugono ta ajɛjɛ ata inyɛmɛnyɛmɛ, maa zhizhongo du mu ko nu umbe Ikpɛtɛ ɛtɛ Unu-tutwa kpalụ cenje na buvwa bwa.

¹⁵Nazhɛ bɛɛ zhɛ ba kwụna ya biywoywo ata bụ ụrụpɛ iwɛwɛ, bu gata ga shɛ iwɛ atwa ata, maa shapa mehieŋ mu bwa maa tono na amɛ ohwolu ata tijilo me tijilo, maa nda mehieŋ ma ata gana ebe baa ga njɛ mehieŋ mi yɛu ebe buna be eyi, no tizhizhongo ta muba na azuba tu'urugono ti Ikpɛtɛ ɛtɛ keeni nu umbe Ikpɛtɛ ɛtɛ Unu-tutwa.

¹⁶Gana ata bɛɛ zhɛ ba nda iwɛ maa ohwolu ata tijilo nama rụmbɛɛ, iwɛ tuhashɛganụ ta atwa Isrɛl keeni iwɛ andwa aba tubwada kpaaŋ. Gabata du kaa bɛɛ zhɛ ba nda iwɛ udulo ata ụ tu'ulwatagwụ unaa na namɛ na ashashɛ aba iwɛ tuhashɛganụ ta aba.

¹⁷I zasa bụtụ be elele shɛ ba nama nu udulo ata tu'ulwatagwụ na aka na tu ga Aron zhɛ bo tono maa nda ohwolu ata tijilo maa a nama shɛshɛshɛ o, uuwa i ci aka na baa banɛ, baa mama njɛ shɛshɛshɛ, ti iwɛ ihwɛ ibwɛ keeni iwɛ tu'ulwa ti Isrɛl hwɛ hwɛɛ.

¹⁸Nazhɛ bɛɛ zhɛ ba banɛ maa zha nu utukwu-ụrụpɛ ata namɛ nu umbe AGWANGWAMA maa nda uŋ shɛshɛshɛ, maa sala du mehieŋ mi yɛu buna ata be eyi keeni mehieŋ mo biywoywo ata, maa nda mụ na shihiuaŋ shu utukwu-ụrụpɛ tutu rungwutwonu.

¹⁹Go zhizhongo du mehieŋ ma ata mu ko na azuba utukwu ata ụrụpɛ kpalụ cenje na buvwa bwa, maa nda uŋ shɛshɛshɛ, maa kaa nda uŋ tijilo iwɛ tuhashɛganụ ta atwa Isrɛl.

²⁰Aka na tu baa kwunanjɛ ofwo ata tijilo tɛnda shɛshɛshɛ, keeni udulo ata tu'ulwa keeni utukwu-ụrụpɛ, nazhɛ bɛɛ zhɛ ba shɛkana ya biywoywo ata ta shɛ buumwa.

²¹Ga ga Aron petengeni i'ɛlɛ ibwɛ iyebi nu uhiuhiu biywoywo ata ta shɛ buumwa, maa lono-unu iyi iwɛ ye elele nɛ atwa Isrɛl njɛ nu bwa, ta andwa aba tubwada kpaaŋ, ti iwɛwɛ nɛ aa nda kpaaŋ. Ga patana iŋ nu uhiuhiu biywoywo ata, maa bụtụ na ee teri keri bu maa hwulo nụ ụshɛka.

²²Nazhɛ bɛɛ zhɛ bo lonono biywoywo ata maa 'waŋna iyi iwɛ ya aba kpaaŋ nu uhiuhiu ubwa maa zha na cɛnjɛ tu na bụtụ zasaba. Bụtụ ata tuba ubwa zhɛ ba karɛ biywoywo ata nụ ụshɛka ata.

²³Nazhɛ ga Aron zhɛ ba zha bo tono nu udulo ata ụ tu'ulwatagwụ maa hwucoko i'wɛŋnɛ ɛtɛ ilinɛn bee ge urigeni, na aka na ti bee ge teni no ofwo ata tijilo me tijilo maa tileni iŋ apata.

²⁴Bɛ shɛ kaa ba dula meni no ofwo ata tijilo, maa urugono ya i'wɛŋnɛ ibwɛ, maa zhajɛ maa ta ụrụpɛ tuhwoŋzhingo iwɛ ikɛnyi ibwɛ keeni ụrụpɛ tuhwoŋzhingo iwɛ atwa ata, maa sugo iwɛwɛ ikɛnyi ibwɛ keeni iwɛwɛ ya atwa ata du.

²⁵Go hwoŋzhingo manɛbɛ mu usunda ata ụrụpɛ iwɛwɛ, na azuba utukwu-ụrụpɛ.

²⁶Ga bụtụ ata na keri biywoywo ata nụ ụshɛka ata bụtụ zasaba, nyashɛnjɛ tugwuno tu bwa, maa dula meni, na aba ibɛ nazhɛ bɛɛ zhɛ bo tono nu ugba tu'ulwa.

²⁷Nazhɛ ɛɛ zhɛ a shapa yɛu ɛtɛ buna be eyi, na shɛ iwɛ ụrụpɛ iwɛwɛ keeni biywoywo ata bụ ụrụpɛ iwɛwɛ, anaa na ee suji mehieŋ ma aba oo to ụrụpɛ iwɛ maa a njɛ ofwo tijilo shɛshɛshɛ. Ɛ zhɛ o sugo aŋ maa e becinji no tupohondo tu ugba tu'ulwa. Ɛ zhɛ o hwoŋzhingo aŋ, ti i'wɛbɛ ya aba, tu usunda wa aba, te tuwiŋ ta aba nu ulwa.

²⁸Ga bụtụ ata hwoŋzhinji iŋ, nyashɛnjɛ tugwuno tu bwa, maa dula meni, na aba ibɛ nazhɛ bɛɛ zhɛ bo tono nu ugba tu'ulwa.

²⁹Ijɛ kaa zhɛ ya sha okpogo hiŋ unyizo-nom, maa nụ ụjita umpwa, nu upiana ata ucenje,[20] hiɛ shɛ hia nda ezumi,[21] maa kede hiɛ njɛ ugondu we elele o, okwo umamata, kwo kaa bugaiŋ na ba nda ụlashɛ na ashashɛ hiŋ.

³⁰Nụ ụjita ata, ibɛ ɛɛ zhɛ a ta ụrụpɛ iwe hiŋ, maa a hiɛ njɛ shɛshɛshɛ, maa hi beni ni iwɛwɛ ye elele, maa hi nama shɛshɛshɛ nu umbe AGWANGWAMA.

³¹Ga ụjita ata u hi shanɛ ụjita ụhinjanụ ụ'wụtụ, hiɛ shɛ hia nda ezumi; hiɛ shɛ shɛ hia nda kaa ugondu we elele o, i shɛ kaa okpogo unyizo-nom.

³²Bunongbo na kaa ee dudugeni manɛbɛ, na kaa ee shiri swooŋ maa tono ohwolu bishi bwa, ubwa zhɛ ba ta ụrụpɛ ata iwɛwɛ tugangana, bɛ shɛ kaa bo urugono i'wɛŋnɛ ilinɛn tijilo.

³³Ubwa du zhɛ ba ta ụrụpɛ iwɛ ohwolu tijilo, ubwa kaa du zhɛ ba ta ụrụpɛ iwɛ udulo tu'ulwatagwụ keeni iwɛ utukwu-ụrụpɛ, ubwa kaa du zhɛ ba ta ụrụpɛ iwɛ onongbo keeni iwɛ atwa Isrɛl hwɛɛ.

³⁴Inɛ gɛ kaa zhɛ ma hi shana okpogo unyizo-nom, maa ga a na ta ụrụpɛ tugangana iwɛ atwa Isrɛl kpalụ ko gba nu uywa, iwɛ iwɛwɛ ye elele nɛ aa njɛ. Go Moses kaa njɛ ga gana na ta AGWANGWAMA peni bu unu.