Read bassa LIVAI 19 Bible Online

LIVAI 19 - bassa bible

LIVAI 19

¹Nazhɛ AGWANGWAMA hiɛŋ Moses,

²Hiɛŋ tu'ulwatagwụ ta atwa Isrɛl hwɛ hwɛɛ maa, Sha ma atwa tijilo, iwɛnɛ tu Gamba AGWANGWAMA na shɛ Agwatana hiŋ shɛ bụtụ bi tijilo.

³Ga bụtụ be elele hiŋ na muna bino bwa keeni bishi bwa ụjɛrụma. No shiyono ma du Ijitɛ-ụhinjanụ mi eshe, Gamba AGWANGWAMA na shɛ Agwatana hiŋ na.

⁴Ta yinga ma maa hi na zhɛba ntatanuwaŋ o, ta 'yaga ma kaa du tuwa te elele o: Gamba AGWANGWAMA na shɛ Agwatana hiŋ na.

⁵Aka na ahia pana AGWANGWAMA ụrụpɛ wa amɛ-olom, pana uŋ ma nu uhwaŋna na teni cɛŋ iwɛ maa ụrụpɛ ata zhe.

⁶Ya ma usunda ata oo to ụrụpɛ nụ ụjita ata oo to uŋ gbaa, kwo kaa iyi tuholo. Una we elele ta vwɛ ya tutu ụjita ụtatụ, ge hwoŋzhinji uŋ nu ulwa.

⁷Yaa shɛ aa yɛ uŋ okwo cwɛŋ nụ ụjita ata ụtatụ, asha ụ shɛ iyi-tupwaŋ, asha ụrụpɛ ata zha shɛ wa zha ya o.

⁸Bụtụ be elele na kaa yɛ uŋ, ubwa zhɛ ba 'waŋna tijama tu bwa, iwɛnɛ ti bee heshigeni iyi tijilo ya AGWANGWAMA. Ge becinji kaa bụtụ ata na ashashɛ atwa ubwa.

⁹Aka na ohio gwubo iyimɛyɛ ne shihilo shi hiŋ, to gwubo iŋ ma tutu tugwungwu tu ntuma mi hiŋ o. Ta nda ma ya kaa du tumwata ti bɛ na aba na te ehi dwowo.

¹⁰Ta nda ma ya tumwata tu ntuma ma shifwafwa shi hiŋ o, ta zanga ma ya kaa du tụ'walụ ta shifwafwa shi hiŋ tu na ta 'waŋtatangwụ o. Ganga ma ya inɛ ɛtɛ iwɛ bukofwo keeni iwɛ bụlashɛ: Gamba AGWANGWAMA na shɛ Agwatana hiŋ na.

¹¹To zundo ma izunde o, ta nda ma iyi tukata o, to momo dwotwogonu ma ụzagwụ o.

¹²Ta ta ma izeci mi ni iwɛ tɛgadaga maa hi heshigeni izeci ya Agwatana hiŋ o. Gamba AGWANGWAMA na.

¹³Ta lashɛga ule na uyebi bu gɛ zhɛ wa ya o, to zundo okwo iyi ibwɛ o. Kede utashɛ yɛu-ugondu nɛ ebi peni ụgwụ nama ni i'ɛlɛ bụ tutu iyi heri o.

¹⁴Ta twaga akwụrụ o, to shilo kaa iyi udukwutwa nu umbe wo olubo, ama na sụma Agwatana bụ inyɛsɛ: Gamba AGWANGWAMA na.

¹⁵Ta duma ma ụshɛrɛya u tu'ubo; ta zanga ma okofwo kwo kaa maa tuswoswoswo tu nama na bụtụ na 'yajɛ iyi na bụtụ na zasa iyi o, ama duma ma ụshɛrɛya uyebi hiŋ ne tishiriri.

¹⁶Ta na zhaga ma beye bana na ashashɛ atwa hiŋ maa hi na nda tɛsharuwa o. Ta na nda ma kaa iyi nɛ eri yo tocingo uraiŋ[22] uyebi hiŋ ụdamụ o: Gamba AGWANGWAMA na.

¹⁷Ta ta yɛu-bino bu ni i'ime na amɛ na amɛ bụ o, ama vwɛ uyebi bu uvwi, shibwonu gabụ bi zhɛ ba 'waŋna tụwụma tu bwa.

¹⁸Ta nda itɛpwɛ iyi iwɛ o, ta untangana kaa du iyi nɛ miaụŋ ma atwa bụ ma bụ nda na amɛ bụ o. Ama lubo uyebi bu gana ukanyi bụ: Gamba AGWANGWAMA na.

¹⁹Untangana ma shikpogo shi mi. To lonono ma iyimabiga hiŋ maa i na mata udenji unya o. Ta bila ma kaa izɛgwu tuswoswoswo iyebi nu ntuma mi hiŋ o. To urugono ma tugwuno tu na aa nɛ ni ihwehwe tuswoswoswo iyebi o.

²⁰Yaa shɛ bụtụ bu ko weci ne biyikwo na shɛ bujama, bu naa na kaa binya bụtụ ga na zha adalụ ubwa, tobwolo e ge te seeneni shi yɛu ɛtɛ yo o maa mama 'yaga o, ge peni aŋ ulwapɛ. A zha shɛ tuba a kwụna aŋ o, iwɛnɛ ti yɛu ɛtɛ yo o ga ta mama zasa.

²¹Ama ge butubwenyi ata 'waŋnanɛ AGWANGWAMA udagba iwɛ ụrụpɛ tụwụma ti ikɛnyi ibwɛ, no odubo udulo tu'ulwa.

²²Go bunongbo to bu ụrụpɛ nu udagba ata nu umbe AGWANGWAMA, iwɛ iwɛwɛ ɛtɛ baa njɛ. Ɛ zhɛ a gangana bụ iwɛwɛ ɛtɛ baa njɛ.

²³Aka na ehi teni hwuŋ cɛnjɛ ta ata ti Kenan, ahiɛ bɛrɛ i'wɛ'wɛ i tuswoswoswo nɛ aa ya kpaaŋ, asha mapa ma maa hi jirimi tụ'walụ ti bɛ tiya, uuwa i ci shiywa shɛ tatụ, a zha shɛ a ya tụ kwukwuŋ.

²⁴Hiɛ shɛ hie suje tụ'walụ ti ibɛ kpaaŋ nu uywa uneshi maa hiɛ njɛ tụ tijilo tụ ụrụpɛ wa ashɛtwa AGWANGWAMA.

²⁵Ama nu uywa utana, ya ma ya tụ'walụ ti ibɛ, iwɛ maa ihi 'weleni duwa duwa. Gamba AGWANGWAMA na shɛ Agwatana hiŋ na.

²⁶Ta ya ma usunda we elele na mehieŋ mu ta namɛ nu bwa o. Ta 'yaga ma ashɛjɛ, kwo kaa ekwupenyi o.

²⁷Ta 'nyanga ma ukekere o, ta 'nyanga ma apadụ tizholu tu nzhokwu mi hiŋ o.

²⁸Ta shɛlanga ma tu'waba ti hiŋ iyi-hwoo iwɛ ụkwụla bụtụ na 'wi o. Ta ta ma i'nyɛtɛ ɛtɛ ɛɛ hiɛŋ udagarɛya o: Gamba AGWANGWAMA na.

²⁹To gbozhigo yɛu bu yo o maa sha buwɛle o, iwɛ aka na ahiɛba na hiɛ jɛjɛ na cɛnjɛ ta ata ɛhi zhɛ hi na 'watatagwụ tuwa ta aba, maa tupwaŋ tɛnda tu bala na cɛnjɛ ta ata o.

³⁰Untangana ma Ijitɛ-ụhinjanụ mu, maa kaa hi mụnɛ ohwolu mi tijilo ụjɛrụma. Gamba AGWANGWAMA na.

³¹Ta zhagana ma shirizhonu o, kwo kaa ozhikwoto. Ta dwalakaka aŋ ma, maa e hi heshigeni o. Gamba AGWANGWAMA na shɛ Agwatana hiŋ na.

³²Na muna ma atwa na inganjɛ ụjɛrụma, maa hi na pana iyɛri ụjɛrụma. Na sụma Agwatana bụ inyɛsɛ: Gamba AGWANGWAMA na.

³³Ta nda ma bugaiŋ na ba nda ụlashɛ na cɛnjɛ ti hiŋ tawɛ tawɛ o.

³⁴Ga bugaiŋ na ba nda ụlashɛ no ofwo hiŋ ihi shanɛ gana yɛu umamata na cɛnjɛ ti hiŋ. No lubo bu ma gana na ohi momo lubonu. Teyinje ma maa hiɛ shɛwa la du agaiŋ na cɛnjɛ ti Ijipti: Gamba AGWANGWAMA na shɛ Agwatana hiŋ na.

³⁵Ta nda ma orugwusu nụ ụshɛrɛya tụdụma o, okwo ne bimenji bụ ụnjɛswa iyi, kwo kaa na bu na bu uzhinono iyi, kwo kaa na bu na bu ugombo iyi o.

³⁶'Yaga ma timenji te tishiriri. Te bimenji bu uzhinono bi tishiriri, keeni bimenji bu ugombo iyi bi tishiriri. Gamba AGWANGWAMA na shɛ Agwatana hiŋ na ihi bɛcinjɛ na cɛnjɛ ti Ijipti na.

³⁷No shiyono ma shikpogo shi mi keeni andwa mi kpaaŋ eshe maa hi na nda aŋ. Gamba AGWANGWAMA na.