Read bassa LIVAI 2 Bible Online

LIVAI 2 - bassa bible

LIVAI 2

¹Yaa shɛ bụtụ be elele zhɛ ba pana AGWANGWAMA ụrụpɛ ni iyi izɛgwu, asha ga nacɛ iŋ tugwo maa i shɛ mihiuŋ mi tilee lee. Go zwono mu manɛbɛ, maa patana mụ iturɛre frankinsɛns,

²maa shapa mụ no ofwo miaụŋ-me-eyi mu Aron mu na mɛ shɛ onongbo. Ga sala mihiuŋ ma ata mi tilee lee keeni manɛbɛ mi ibɛ te shini ukwoto u'ala medenji iturɛre ɛtɛ frankinsɛns ibɛ hwɛɛ. Go bunogbo ata hwoŋzhinji iŋ nu utukwu-ụrụpɛ maa ụ shɛ titeyinje tụ ụrụpɛ na dure nu ulwa, ụ shanɛ AGWANGWAMA ụhiụŋ ụlatụ.

³Tuvwa ti iyimɛyɛ ɛtɛ ụrụpɛ tɛ shɛ inɛ Aron keeni miaụŋ mu bwa me eyi, i shɛ ụpadụ ụrụpɛ tijilo me tijilo nɛ ee peni AGWANGWAMA tedure nu ulwa.

⁴Yaa shɛ ụrụpɛ ata shɛ una iyimɛyɛ nɛ oo to na apitwa, asha ga shɛ akara na zasa Ifucingɛ, anaa na aa njɛ ne mihiuŋ mi tilee lee mu na ee hiŋtetenji na manɛbɛ ma buta, kwo kaa agbagbada na zasa Ifucingɛ anaa na aa shananjɛ manɛbɛ ma buta.

⁵Yaa shɛ kaa ụrụpɛ bụtụ ụ shɛ una iyimɛyɛ nɛ oo to nu ujebi u tugbadaa, asha ga shɛ ne mihiuŋ mi tilee lee mu na mu zasa Ifucingɛ, mu na ee hiŋtetenji na manɛbɛ ma buta.

⁶Hwuŋzorongo aŋ wuŋzu wuŋzu maa zweni aŋ manɛbɛ ma buta. Ụ shɛ ụrụpɛ iyimɛyɛ.

⁷Yaa shɛ kaa ụrụpɛ bụtụ ụ shɛ iyimɛyɛ nɛ oo shitogo ni ikwɛshɛ, asha ga shɛ ne mihiuŋ mi tilee lee keeni manɛbɛ ma buta.

⁸Gabụ kaa bɛ shɛ ba shapɛ ụrụpɛ ata ubwa iyimɛyɛ unaa na aa njɛ ni ijɛ hwɛɛ no ofwo AGWANGWAMA. Aka na ta a shɛkanɛ iŋ bunongbo, ubwa zhɛ ba shapa ya iyimɛyɛ ɛtɛ nu utukwu-ụrụpɛ.

⁹Bunongbo ata ubwa zhɛ ba muna ụrụpɛ ata iyimɛyɛ na shɛ una titeyinje maa hwoŋzhingo uŋ nu utukwu-ụrụpɛ, ụ shɛ ụrụpɛ na oo to tedure nu ulwa. Ụ shanɛ AGWANGWAMA ụhiụŋ ụlatụ.

¹⁰Tuvwa ti iyimɛyɛ ɛtɛ ụrụpɛ tɛ shɛ inɛ Aron keeni miaụŋ mu bwa me eyi, ụ shɛ ụpadụ ụrụpɛ tijilo me tijilo na ee peni AGWANGWAMA tedure nu ulwa.

¹¹Kede e zweni Ifucingɛ nu ụrụpɛ iyimɛyɛ nɛ ɛhi zhɛ hia 'waŋnanɛ AGWANGWAMA o. Hiɛ shɛ shɛ hio hwoŋzhingo kaa Ifucingɛ kwo kaa iswɛ nụ ụrụpɛ we elele na ɛhi zhɛ hia pana AGWANGWAMA tedure nu ulwa o.

¹²Na 'waŋnanɛ ma AGWANGWAMA upwaŋ tụ'walụ ti hiiŋ, ama hi zha shɛ tuba hio hwoŋzhingo uŋ nu utukwu-ụrụpɛ gana maa ụ shɛ ụrụpɛ ụhiụŋ ụlatụ o.

¹³No zwono ma manɛ na arụpɛ iyimɛyɛ hiŋ elele. To lono ma maa manɛ mu unu hiŋ tutwa na Agwatana mụ vwụnjɛ nụ ụrụpɛ hiŋ iyimɛyɛ o, na madanga ma manɛ na arụpɛ hiŋ kpaaŋ.

¹⁴Yaa shɛ ɛhi zhɛ hia pana AGWANGWAMA upwaŋ ụ tụ'walụ ti hiiŋ, asha ga shɛ akaraba ofwo a na ee neci kwo kaa anaa na ee nyeshi nu ulwa.

¹⁵Shananga aŋ manɛbɛ ma buta na azuba keeni iturɛre frankinsɛns. Ụ shɛ ụrụpɛ tiya.

¹⁶Go bunongbo hwoŋzhinji ụpadụ iyi ụrụpɛ ata ubwa u titeyinje tu bwa, na shɛ akaraba na ee neci keeni manɛbɛ ma buta medenji iturɛre frankinsɛns ubwa hwɛɛ. Ụ shɛ ụrụpɛ na ee peni AGWANGWAMA tedure nu ulwa.