Read bassa LIVAI 21 Bible Online

LIVAI 21 - bassa bible

LIVAI 21

¹Nazhɛ AGWANGWAMA hiɛŋ Moses, Duma iwɛ no onongbo, aba shɛ miaụŋ-me-eyi mu Aron, mbiso aŋ maa, I zasa bụtụ be elele na amɛ aba i shɛ bu mama hashɛgana iwɛ bụtụ na 'wi na ashashɛ atwa ubwa o,

²semi bụtụ na boo gwumwongonu nu bwa uhwuri atwa vwɛ hwɛɛ. Ibɛ shɛ bino bwa, ne bishi bwa, ni yɛu ibwɛ ye eyi, ni yɛu ibwɛ yo o, na batagwụ bwa kwo kaa buhongwu bwa,

³kwo kaa bụngwụfwụ bwa na te mepi shi butubwenyi (na u gwumwongonu nu bwa, iwɛnɛ tu baa ta zasa bwolo. Bi eri mama hashɛgana iwɛ ubwa).

⁴Kede mama hashɛgana iwɛ tu'wo tụ ụmatụ tumbacɛ kwakwa na tụmbụla o.

⁵Onongbo shɛ shɛ a 'nyanga tukpala, kwo kaa apadụ tizholu tu nzhokwu ma aba o. Kede a mama shɛlanjɛ iyi-hwoo iwɛ ụkwụla-tuta iwɛ bụtụ na 'wi o.

⁶A shɛ a shana Agwatana aba atwa tijilo, maa kede e heshigeni izeci ya Agwatana aba o. Iwɛnɛ po aba shɛ a pana AGWANGWAMA arụpɛ na dure nu ulwa ibɛ shɛ iyimɛyɛ ya Agwatana aba. Iwɛbɛ po aa shɛ a sha atwa tijilo.

⁷Onongbo shɛ shɛ a zana buwɛle kwo kaa biyikwo na mwopwo butubwenyi o. A shɛ shɛ kaa du a zana biyikwo na beni bwolo bwa, kwo kaa bu naa na bwolo bwa keri o, iwɛnɛ to bunongbo shanɛ Agwatana ubwa bụtụ bi tijilo.

⁸Ga pana kaa abashɛ maa bɛ shɛ bụtụ bi tijilo. Iwɛnɛ po ubwa ba pana Agwatana bụ iyimɛyɛ; bɛ shɛ ma bụ shana bụtụ bi tijilo. Gamba AGWANGWAMA na mo hi shilo swooŋ na, N shɛ bụtụ bi tijilo.

⁹Yɛu-yo-o bunongbo be elele na kaa mama njɛ ufwu nɛ tuwɛle, bi heshigeni bishi bwa. Ge hwoŋzhinji bu nu ulwa.

¹⁰Kede bunongbo na shɛ uhiu na ashashɛ miaụŋ-mo-bino bwa, bu naa na oo dudugwonuo kaa manɛbɛ, bu naa na kaa aa nduwa tijilo maa bu no urugono i'wɛŋnɛ ɛtɛ tunongbo, to lono ya maa bu na waŋfwunga uhiuhiu ubwa o. Kede bu na dwatwaga ya du tugwuno tu bwa nụ ụkwụla-tuta o.

¹¹Bɛ shɛ shɛ bo tono no ofwo na ru'wo ru namɛ o, bɛ shɛ shɛ bu mama hashɛgana iwɛ tu'wo te bishi kwo kaa bino bwa o.

¹²Kede bana okwo no ohwolu ata tijilo, kede hashɛgana du ohwolu ata tijilo Agwatana ubwa o; iwɛnɛ ta manɛbɛ ma Agwatana ubwa mu na ee dudugeni bu maa mɛ njɛ bụ tijilo mu namɛ na tu'waba tu bwa. Gamba AGWANGWAMA na.

¹³Biyikwo na te mepi shi butubwenyi kiri baa shɛ ba zana.

¹⁴Bi zha shɛ ba zana okwo bululo, ta bu naa na ee keri, okwo biyikwo na mama nduwa ufwu, kwo kaa buwɛle o. Ama ga zana biyikwo na te mepi shi butubwenyi, no olugwo atwa ubwa ikɛnyi ibwɛ,

¹⁵iwɛ maa kede miaụŋ mu bwa mu hashɛganụ na ashashɛ atwa ubwa o. Gamba AGWANGWAMA na mo shilo bu swooŋ na.

¹⁶Nazhɛ AGWANGWAMA hiɛŋ Moses,

¹⁷Hiɛŋ Aron, Kede bụtụ be elele na amɛ awaŋnɛ hiŋ kpaaŋ, na tu'waba tu bwa tu ulwa sụ zhajɛ maa pana Agwatana ubwa iyimɛyɛ o.

¹⁸Kede bụtụ be elele na tu'waba tu bwa tu ulwa sụ zhajɛ maa gwumwongonu nu utukwu-ụrụpɛ o. Ibɛ shɛ butubwenyi na lubeni, okwo bo shikoto, okwo ụpɛshɛka ubwa munatangwụ, okwo uvwuna ubwa kwo kaa u'ala ubwa uko uhwuri unya,

¹⁹okwo bụtụ na uvwɛvwɛjɛ ubwa dwonu, kwo kaa u'ala ubwa dwonu,

²⁰okwo ikwuke, okwo ikezhere, okwo bụtụ na eshe ubwa a nda rogorogo, okwo bụtụ na 'yajɛ ukwuru, okwo bụtụ na tu'waba tu bwa tu namɛ shakwa shakwa, okwo bụtụ na abilwa ubwa bwadụ;

²¹kede bụtụ bu ukpogwu Aron na shɛ bunongbo na tu'waba tu bwa tɛ shɛ gana ata, zhajɛ ya maa gwumwonu maa pana AGWANGWAMA ụrụpɛ na dure nu ulwa o, gana na tu baa 'yajɛ tụsụnyasụ o. Bɛ shɛ shɛ ba zhajɛ ya maa gwumwonu maa pana Agwatana ubwa iyimɛyɛ o.

²²Bi zhɛ ba ya yibwa iyimɛyɛ ya Agwatana ubwa, hwɛɛ ti inɛɛ nɛ i shɛ inɛ tijilo me tijilo, keeni inɛɛ nɛ i shɛ inɛ tijilo kwakwa,

²³ama bɛ shɛ shɛ ba zhajɛ maa gwumwonu okwo ni ibɛgɛlɛ ɛtɛ jilanɛ odubo kwo kaa maa kaanɛ izhɛ no ofwo utukwu-ụrụpɛ o, iwɛnɛ tu baa 'yajɛ tụsụnyasụ, iwɛ maa kede hashɛgana shihwolu shi mi shi tijilo. Gamba AGWANGWAMA na mo shilo aŋ swooŋ na.

²⁴Gabata go Moses mbishi Aron, ta miaụŋ mu bwa me eyi keeni atwa Isrɛl ijɛ kpaaŋ.