Read bassa LIVAI 23 Bible Online

LIVAI 23 - bassa bible

LIVAI 23

¹Nazhɛ AGWANGWAMA hiɛŋ Moses,

²Mbiso atwa Isrɛl maa, Aka nsono ma AGWANGWAMA mu na ɛhi zhɛ hia ananga maa a shɛ tu'ulwa te tijilo anaa na Ngee shiri iwɛ nsono mi mi na.

³Ijitɛ icihiŋ ɛhi zhɛ hia nda ugondu, ama ụjita ucenje ụ shɛ Ụjita-ụhinjanụ ụ tu'ulwa te tijilo. Hi zha shɛ hia nda ugondu o, ụ shɛ Ụjita-ụhinjanụ wa AGWANGWAMA no ofwo elele na ahi namanjɛ kpaaŋ.

⁴Aka na maa hi na nda nsono ma ata ma AGWANGWAMA mu na mɛ shɛ tu'ulwa te tijilo mu naa na ɛhi zhɛ hia ananga na aka ata na ee shiri iwɛ muba na:

⁵Aka na upiana uhiiŋ[23] namɛ ijitɛ umpwa-ni-bɛ-neshi nụ ụrụmɛ, ibɛ shɛ iyimɛyɛ tɛkashɛka ya AGWANGWAMA.

⁶Nụ ụjita-umpwa-ni-bɛ-tɛ i shɛ isene iyimɛyɛ ya AGWANGWAMA nɛ zasa Ifucingɛ. Ijitɛ icenje ibɛ ɛhi zhɛ hia ya iyimɛyɛ ɛtɛ zasa Ifucingɛ.

⁷Nụ ụjita uhiiŋ, hiɛ shɛ hia 'yaga tu'ulwa te tijilo, ta nda ma ugondu na 'yajɛ ikɛnyi o.

⁸Ama hiɛ shɛ hia shɛkana AGWANGWAMA ụrụpɛ na dure nu ulwa, ijitɛ icenje. Nụ ụjita ata ucenje ụ shɛ tu'ulwa te tijilo, ta nda ma ugondu na 'yajɛ ikɛnyi o.

⁹Nazhɛ AGWANGWAMA hiɛŋ Moses,

¹⁰Hiɛŋ atwa Isrɛl maa, Aka na ehi teni hwuŋ na cɛnjɛ ta ata Ngee hi peni, ehi jwe iyimɛyɛ na tuba, hiɛ shɛ hie sugeni bunongbo eshi tụ'walụ ti hiiŋ ti iyimɛyɛ hiŋ.

¹¹Bunongbo ata zhɛ ba shɛkana AGWANGWAMA ushi ata, iwɛ maa hi to ugbe maa e leshiji uŋ. Ni iyi tuholo Ụjita-ụhinjanụ, bunongbo ata zhɛ bo vwurongo uŋ.

¹²Shapa ma usemberi udagba na ta namɛ tizhɛla tu uywa uko te e meci bu, bu naa na zasa tụsụnyasụ maa hiɛ shɛkanɛ AGWANGWAMA, nụ ụrụpɛ tuhwoŋzhingo nụ ụjita ata ehi vwurenji ushi ata.

¹³Ụrụpɛ tiya na ahiɛ shɛ hia madanga uŋ ụ shɛ iyi-u'umpwa iyebi, ne bimenji bu nkwuronu mo tugongo mi yebi mo mihiuŋ mi tilee lee mu na mi hiŋtetenji na manɛbɛ ma buta, maa hi peni AGWANGWAMA tedure nu ulwa, ụ shɛ ụhiụŋ ụlatụ. Ụrụpɛ ibɛ tuswa zhɛ wa sha meni mụ tụ'walụ ta afwafwa, ne bimenji bu ubene uko nu ukangasu.

¹⁴Ta ya ma akara keeni iyi izɛgwu nɛ oo to, keeni a na nyɛshɛ, tobwolo hi te sugeni shi Agwatana apwaŋ hiŋ na amɛ ụjita ata gom o. I shɛ kaa okpogo unyizo-nom tutu rungwutwonu uce na awaŋnɛ hiŋ teje kpaaŋ.

¹⁵Kwuno ma tɛrɛta ti ibɛ ni iyi tuholo na 'wa Ụjita-ụhinjanụ, te kwuni nụ ụjita ata ehi suje eshi ụrụpɛ tuvwurongo; alade ecenje cam ɛɛ zhɛ a nama.

¹⁶Rɛta ma ijitɛ dupu na aba iyi tuholo Ụjita ata ụhinjanụ ucenje, nazhɛ ɛhi zhɛ hia pana AGWANGWAMA ụrụpɛ tiya izɛgwu ifwo.

¹⁷Banɛ ma no olugwo na ahiɛ namanjɛ, maa hiɛ 'wananjɛ tu'unto ta akara eyeyebi a na aa njɛ ni iyi-u'umpwa mihiuŋ mi tilee lee iyebi ne bimenji bu nkwuronu mo tugongo mi yebi maa e vwurenji aŋ, ɛ zhɛ a ta aŋ ni Ifucingɛ. Tụ'walụ ti hiiŋ tu na ee peni AGWANGWAMA ta.

¹⁸Shɛkana ma AGWANGWAMA akara ata, medenji miaụŋ-ma-agwụdụ mi cenje mu na mu ta namɛ uywa uko te e meci aŋ, mu na mu zasa tụsụnyasụ keeni usemberi buna uko, na adagba eyebi nụ ụrụpɛ tuhwoŋzhingo, medenji arụpɛ aba tiya na arụpɛ aba tuswa, tedure nu ulwa. I shanɛ AGWANGWAMA ụhiụŋ ụlatụ.

¹⁹Ta ma ụrụpɛ iwɛwɛ no biywoywo bu ko, hi to ụrụpɛ wa amɛ-olom na miaụŋ-ma-agwụdụ me eyi mi yebi mu na mu ta namɛ tizhɛla tu uywa uko te e meci aŋ.

²⁰Go bunongbo vwurenji aŋ, ta akara ata tụ'walụ ti hiiŋ, maa i shɛ upwaŋ na ee peni AGWANGWAMA no tuvwurongo, medenji agwụdụ ata eyi eyebi. Ɛ zhɛ a shana AGWANGWAMA ụrụpɛ tijilo iwɛ bunongbo ata.

²¹Ananga ma tu'ulwa te tijilo nụ ụjita ata gbaa. Ta nda ma ugondu na 'yajɛ ikɛnyi jita ata o. Inɛ ɛtɛ shɛ okpogo unyizo-nom no ofwo elele na ahiɛ namanjɛ tutu rungwutwonu awaŋnɛ hiŋ hwɛɛ.

²²Aka na ohio gwubo iyimɛyɛ cɛnjɛ ta ata ti hiŋ, to gwubo ma tutu ipɛlu itimɛ hiŋ o, ta nda ma ya kaa tumwata ti iyimɛyɛ nɛ ehi dwowo. Gangana ma okofwo keeni agaiŋ inɛ ɛtɛ: Gamba AGWANGWAMA na shɛ Agwatana hiŋ na.

²³Nazhɛ AGWANGWAMA hiɛŋ Moses,

²⁴Hiɛŋ atwa Isrɛl maa, Shiyono ma ụjita uhiiŋ nu upiana ucenje eshe maa ụ shɛ ụjita u ticinji iwɛ ụhinjanụ tuta iwɛ titeyinje ta tu'ananga tu ukakacɛ tuhwulo, ụ shɛ ụjita tu'ulwa te tijilo.

²⁵Ta nda ma ugondu na 'yajɛ ikɛnyi jita ata o. Ama pana ma AGWANGWAMA ụrụpɛ na dure nu ulwa.

²⁶Nazhɛ AGWANGWAMA hiɛŋ Moses

²⁷Yaa shɛ upiana ucenje namɛ ijitɛ umpwa, ga shɛ ụjita iwɛwɛ tugangana. U zhɛ ma hi shana ụjita tu'ulwa te tijilo, hiɛ shɛ kaa hia ganga iyimɛyɛ tiya maa hiɛ shɛkanɛ AGWANGWAMA ụrụpɛ na dure nu ulwa.

²⁸Hiɛ zha shɛ kaa hia nda ugondu jita ata o. Ụ shɛ ụjita iwɛwɛ tugangana, maa e hi gengeni iwɛwɛ hiŋ na agba AGWANGWAMA na shɛ Agwatana hiŋ.

²⁹Bụtụ be elele na yɛ iyimɛyɛ jita ata gbaa, ɛ zhɛ a bacɛnga bụ na atwa ubwa.

³⁰Bụtụ be elele na kaa njɛ ugondu jita ata gbaa, N zhɛ ma nda bụ ufwu na ashashɛ atwa ubwa.

³¹Ta nda ma ugondu we elele jita ata o. Inɛ ɛtɛ shɛ okpogo unyizo-nom tutu rungwutwonu ofwo elele na awaŋnɛ hiŋ teje hwɛɛ.

³²Ganga ma iyimɛyɛ tiya te kwuni nụ ụrụmɛ ụjita ucinjishi nu upiana ata maa ụ hiɛ shanɛ Ụjita-ụhinjanụ tijilo tutu i ci ụrụmɛ iyi tuholo ubwa, maa hi untangana Ụjita ata ụhinjanụ.

³³Nazhɛ AGWANGWAMA hiɛŋ Moses,

³⁴Hiɛŋ atwa Isrɛl maa, Yaa shɛ upiana ucenje namɛ ijitɛ umpwa-ni-bɛ-tɛ, ibɛ shɛ ụjita isene yo obodongom,[24] ijitɛ icenje ɛɛ zhɛ a ndana iŋ AGWANGWAMA.

³⁵Ụjita uhiiŋ ụ shɛ tu'ulwa te tijilo, hi zha shɛ hia nda ugondu na 'yajɛ ikɛnyi jita ata o.

³⁶Ijitɛ icenje, ɛhi zhɛ hia shɛkana AGWANGWAMA arụpɛ na dure nu ulwa. Nụ ụjita ụtụndatụ, ɛhi zhɛ hia nda tu'ulwa te tijilo maa hiɛ shikanɛ AGWANGWAMA ụrụpɛ na dure nu ulwa. I shɛ tusotulonu ti tɛzhɛba. Ta nda ma ugondu na 'yajɛ ikɛnyi jita ata o.

³⁷Inɛ ɛtɛ kpaaŋ i shɛ aka na ee shileji iwɛ nsono ma AGWANGWAMA mu naa na ɛhi zhɛ hi na ananga maa i shɛ tu'ulwa te tijilo, iwɛ maa hi na pana AGWANGWAMA arụpɛ na dure nu ulwa, ta arụpɛ tuhwoŋzhingo keeni arụpɛ tiya, ta arụpɛ elele keeni arụpɛ tuswa. Una una 'yajɛ ụjita ubwa u ticinji.

³⁸Nsono mu ga hwɛɛ mu namɛ swooŋ ni Ijitɛ-ụhinjanụ ya AGWANGWAMA. Arụpɛ ga kaa namɛ swooŋ na arụpɛ hiŋ a na shɛ tụ'ụrɛcɛnga to onu hiŋ tishilogo keeni apwaŋ hiŋ u tukwulangana a na ehi peni AGWANGWAMA.

³⁹Aka na ehi hwuwi iyimɛyɛ hiŋ tugwubo, nda ma titeyinje tu ga ijitɛ icenje, kwuno tu ma tu upiana ucenje namɛ ijitɛ umpwa-ni-bɛ-tɛ. Ụjita uhiiŋ ụ shɛ ụjita ihwungwɛ tu'waŋ ikɛnyi, ụjita ụtụndatụ kaa u shaananɛ ụjita ihwungwɛ tu'waŋ ikɛnyi.

⁴⁰Nụ ụjita uhiiŋ ɛhi zhɛ hie suje tụ'walụ ti i'wɛ'wɛ nɛ zhɛmanjɛ, na abaga ishiwɛ, keeni shi'wa'walụ shi i'wɛ'wɛ nɛ sebi tebiye maa hiɛ njɛ unyasa nu umbe AGWANGWAMA na shɛ Agwatana hiŋ ijitɛ icenje.

⁴¹Untangana ma ijitɛ ɛtɛ icenje maa i shɛ ijitɛ nsono ma AGWANGWAMA nu uywa. I shɛ okpogo unyizo-nom tutu ofwo elele na awaŋnɛ hiŋ teje kpaaŋ. Hiɛ shɛ hi na nda iŋ nu upiana ucenje we elele.

⁴²Hi zhɛ hi na nama no obodongom ijitɛ icenje. Atwa elele na shɛ amamata Isrɛl aba zhɛ a nama no obodongom ata ijitɛ ɛtɛ icenje,

⁴³iwɛ maa awaŋnɛ hiŋ kpaaŋ e mepi maa Gamba N njɛ la atwa Isrɛl maa a na nama no obodongom, na aka na ti Ngɛɛ bɛcinjɛ aŋ la na cɛnjɛ ti Ijipti: Gamba AGWANGWAMA na shɛ Agwatana hiŋ na.

⁴⁴Gabata go Moses mbishi ga atwa Isrɛl aka na shɛ aka nsono ma AGWANGWAMA hwɛɛ.