Read bassa LIVAI 24 Bible Online

LIVAI 24 - bassa bible

LIVAI 24

¹Nazhɛ AGWANGWAMA hiɛŋ Moses,

²Pana atwa Isrɛl unu maa ga a bụ panɛ manɛbɛ ma buta mu tụrụmbɛɛ mu na oo to iwɛ asụtụla ata, iwɛ maa uhioko-uhwaŋna na ta nu udulo ata tutu.

³Ga ga Aron na shamana aŋ nu umbe AGWANGWAMA no tupohondo ti ibɛgɛlɛ ɛtɛ tugwuno ta ata ti jilanɛ umbe Ikpɛtɛ ɛtɛ Unu-tutwa nɛ shi na amɛ udulo tu'ulwa, te kwuni nu ụrụmɛ tutu uvwungwa. I zhɛ ya sha okpogo unyizo-nom tutu ofwo na awaŋnɛ hiŋ elele teje hwɛɛ.

⁴Ga ga Aron shemeni asụtụla ata nu uteburu ata ụsụtụla aa njɛ na azhɛnarɛya tụrụmbɛɛ nu umbe AGWANGWAMA tutu.

⁵Sala mihiuŋ mi tilee lee ne bimenji bu nkwuronu mo tugongo umpwa-na-muba-mi-yebi maa njɛ akara umpwa-na-ba-eyebi na muba.

⁶Gabụ bi zhɛ ba shamana aŋ na azuba uteburu ata wa azhɛnarɛya ụ tụrụmbɛɛ iwɛlɛ iyebi, ecihiŋ zhɛ a nama nu uwala uwala.

⁷Gabụ kaa bi zhɛ ba patana iturɛre frankinsɛns i tụrụmbɛɛ ni iwɛlɛ ɛtɛ una una, iwɛ maa i togwu ni iyimɛyɛ ɛtɛ i shɛ inɛ titeyinje maa e peni iŋ AGWANGWAMA tedure nu ulwa.

⁸Ga Aron ubwa zhɛ na shamana aŋ nu umama 'wanụ nu umbe AGWANGWAMA tụlụkpashɛ ta atwa Isrɛl, nụ Ụjita-ụhinjanụ we elele tutu. I shɛ unu-tutwa unyizo-nom.

⁹Akara ata zhɛ a sha a na Aron keeni miaụŋ mu bwa me eyi, aba zhɛ a ya aŋ no ofwo ata tijilo, iwɛnɛ ti yaa shɛ inɛ ya aba. I shɛ urobwo tijilo me tijilo na banɛ na arụpɛ na ee peni AGWANGWAMA tedure nu ulwa; okpogo unyizo-nom aa shɛ.

¹⁰Yɛu-ye-eyi ike namba la biyikwo bi Isrɛl meci ne butubwenyi bi Ijipti. Ibɛ yɛu ɛtɛ beni na ashashɛ atwa Isrɛl, boo 'wogo ne butubwenyi bi Isrɛl bu ko, na amɛ ugba tu'ulwa.

¹¹Ibɛ yɛu ɛtɛ nɛ biyikwo bi Isrɛl meci twajɛ tutwa tu na ti gbezhiji Izeci ya Agwatana. Ibɛ po aa shapɛ bụ pu Moses. Ɛ hiɛŋ izeci bino bi yɛu ɛtɛ ge Shilomit, yɛu Dibri, nụ ụlamụ Dan.

¹²Ee kepi bu uuwa i ci aka na AGWANGWAMA zhɛ o mbiso aŋ iyi nɛ lanɛ maa a njɛ bụ.

¹³Nazhɛ AGWANGWAMA hiɛŋ Moses,

¹⁴Bɛcinjɛ ma bụtụ ata ga twajɛ tutwa no tupohondo tu ugba tu'ulwa maa atwa elele na ga hwụjɛ tu baa twajɛ tutwa ta ata, e petengeni i'ɛlɛ ya aba nu uhiuhiu ubwa, maa tu'ulwatagwụ kpaŋ kpaaŋ ti tegeni bu atayɛ.

¹⁵Hiɛŋ atwa Isrɛl maa, Bụtụ be elele na kaa twajɛ Agwatana ubwa, ɛ zhɛ a pana bụ ulwapɛ iwɛwɛ ibwɛ.

¹⁶Bụtụ na kaa dumanganɛ AGWANGWAMA n-ndumwa mụ wɛ, ɛ zhɛ a kwụna bụ; tu'ulwatagwụ kpaŋ kpaaŋ ti zhɛ ta tagana bụ atayɛ. Gana na ɛɛ zhɛ a nda umamata, gabata du ɛɛ zhɛ a nda bụlashɛ, aka na tu baa twajɛ AGWANGWAMA, ga kwụnɛ bụ tilɛɛ.

¹⁷Bụtụ na kwụnɛ bụtụ, ga kwụnɛ bụ du.

¹⁸Bụtụ na kwụnɛ iyimabiga, ga tụpa, ga uraiŋ cɛpɛ uraiŋ.

¹⁹Aka na bụtụ bu ko tecinji binya bwa ụdamụ, ɛ zhɛ a nda bụ du gana ata tu baa njɛ bụtụ ata.

²⁰Ga a hiinjɛ bụtụ na hiinjɛ bụtụ, ge lubicinji bụtụ na lubicinji bụtụ. Gana na ti bee tecinji bụtụ ụdamụ, gabata du ɛɛ zhɛ a nda bụ.

²¹Bụtụ na kwụnɛ iyimabiga, bi zhɛ ba tụpa tụlụkpashɛ ti ibɛ. Ama bụtụ na kwụnɛ bụtụ, ɛ zhɛ a kwụna bụ du.

²²Undwa hiŋ shɛ uko, ti iwɛ bụlashɛ keeni iwɛ umamata. Gamba AGWANGWAMA hiŋ na.

²³Aka na tu go Moses mbishi atwa Isrɛl iwɛ ɛtɛ, ɛɛ bɛcinjɛ bụtụ ata ga twajɛ tutwa no tupohondo tu ugba tu'ulwa, ee tegeni bu atayɛ. Miaụŋ mi Isrɛl mɛ njɛ gana na ta AGWANGWAMA peni Moses unu hwɛɛ.