Read bassa LIVAI 25 Bible Online

LIVAI 25 - bassa bible

LIVAI 25

¹Nazhɛ AGWANGWAMA mbishi Moses iwɛ ni Ishɛmɛ Sainai, bɛɛ hiɛŋ,

²Mbiso atwa Isrɛl maa, Aka na ehi ci hwuŋ cɛnjɛ ta ata Ngee hi peni, na pana ma cɛnjɛ ta ata ụhinjanụ iwɛ AGWANGWAMA.

³Shiywa shi cihiŋ ɛhi zhɛ hi na hwaŋ itimɛ, maa hi na bila iyi, maa hi cwi afwafwa hiŋ, maa hi suteni tụ'walụ ta aba.

⁴Ama uywa ucenje ụ shɛ uywa na maa cɛnjɛ ta ata tu to ụhinjanụ, uywa ee shileni AGWANGWAMA swooŋ ta. Ta hwaŋ ma ntuma mi hiŋ maa hiɛ bɛrɛ iyi o, to sutono ma kaa du tụ'walụ ta afwafwa hiŋ o.

⁵To gwubo ma iyi elele nɛ mɛmɛ unsɛnjɛ nu ntuma mi hiŋ o. To sutono ma kaa du tụ'walụ ti ikpɛri ya afwafwa hiŋ na ehi vweri shi o. Ga cɛnjɛ tu to ụhinjanụ nu uywa ata.

⁶Gana na tɛ ɛhi zhɛ hia pana cɛnjɛ ụhinjanụ nu uywa ata, cɛnjɛ ta ata ti zhɛ ta hi matanga iyimɛyɛ nɛ zhɛ ma hi waŋna tiya, ti iwɛ ikɛnyi hiŋ, ti iwɛ ajama hiŋ eyi keeni ajama hiŋ o o, ti iwɛ atwa na ma hi ndana ugondu ụgwụ keeni bụlashɛ na jɛjɛ na ashashɛ hiŋ,

⁷ti iwɛ iyimabiga hiŋ du keeni iwɛ isundɛ nɛ namɛ na cɛnjɛ ta ata. Iyi elele nɛ tɛ ɛ zhɛ ta mata, i zhɛ ma hi waŋna iyimɛyɛ hiŋ.

⁸Imanga ma shiywa shɛ ụhinjanụ shi cenje kpalụ cenje, shi zhɛ sha hi shana shiywa buhanda-na-shɛba-shi-cinjishi.

⁹Aka na tu upiana ata ucenje namɛ ijitɛ umpwa, na kaa shɛ ụjita na ahia ta ụrụpɛ iwɛwɛ tugangana, hwulo ma ukakacɛ ata taawụụ no ofwo elele na cɛnjɛ ti hiŋ ti teje.

¹⁰Nda ma uywa ata dupu uywa tijilo, maa hi enenji tumama 'yaga pa atwa elele na jɛjɛ na cɛnjɛ ta ata kpaaŋ. U zhɛ ma hi shana uywa unyasa tubwada. Gɛ i'wɛŋnɛ bụtụ bụtụ hiŋ gwuri no ofwo bụtụ na ga 'yajɛ iŋ la. Bụtụ be elele na kaa ee senji la maa sha bujama, go gwulo nu ukpogwu ubwa.

¹¹Uywa ata dupu zhɛ ma hi shana uywa unyasa tubwada, hi zha shɛ hia bila iyi nu bwa o, hi zha shɛ kaa du hio gwubo iyi nɛ mɛmɛ unsɛnjɛ ni ikɛnyi ibɛ o. To sutono ma kaa du tụ'walụ ta shifwafwa tu na ehi vweri shi ntuma ma shɛ ba o.

¹²Ụ shɛ uywa unyasa tubwada. U zhɛ ma hi shana uywa tijilo, maa hiɛ yɛ iyi elele nɛ meci ne shihilo shi hiŋ.

¹³Gɛ i'wɛŋnɛ bụtụ bụtụ hiŋ gwuri no ofwo bụtụ na ga 'yajɛ iŋ la na amɛ uywa ata unyasa tubwada.

¹⁴Yaa shɛ kaa ehi sengeni la uyebi hiŋ na shɛ bụtụ bi Isrɛl cɛnjɛ, kwo kaa ehi so la cɛnjɛ nu uyebi hiŋ, ta mama yanụ ma ule o.

¹⁵Nu gana na tu ufwugwo shiywa shɛ unyasa tubwada shɛ namɛ, ibɛ du ɛbi zhɛ ba imanga ulumo iyi nɛ ɛbi zhɛ ba sa nu uyebi bu, nu gana na kaa tu ufwugwo shiywa shi iyimɛyɛ shɛ namɛ, ibɛ du bɛɛ zhɛ ba imanga ulumo na bɛɛ zhɛ ma bụ sangana iŋ.

¹⁶Yaa shɛ shiywa sha ata shi gembi ufwugwo, asha bi zhɛ ba kaana ulumo ibɛ ugombo, yaa shɛ kaa shiywa sha ata shɛ twa sụ ufwugwo, asha bi zhɛ ba pashɛnga ulumo ibɛ. Iwɛnɛ po iyimɛyɛ nɛ cɛnjɛ ti bɛcinjɛ uywa uywa, ibɛ bɛɛ zhɛ ma bụ sangana.

¹⁷Ta mama yanụ ma imwere o, ama na sụma ma Agwatana hiŋ inyɛsɛ: Gamba AGWANGWAMA na shɛ Agwatana hiŋ na.

¹⁸Na untangana ma andwa keeni onu mi tụpana, iwɛ maa hi nama na cɛnjɛ ta ata lapiya.

¹⁹Cɛnjɛ ta ata ti zhɛ kaa ta mata iyimɛyɛ nɛ ɛhi zhɛ hia ya hio shigogo, maa hi nama na tuba lapiya.

²⁰Yaa shɛ kaa ɛhi hiɛŋ, Imbe tuba ɛti zhɛ ta ya hwuŋ ti yaa shɛ atɛ bɛrɛ shɛ iyimɛyɛ, kwo kaa etu jwe shi iyimɛyɛ tuu?

²¹Asha N zhɛ ma pana cɛnjɛ ta ata uwebiye mu, nu uywa ata ucihiŋ, iwɛ maa ti meci iyimɛyɛ nɛ zhɛ ma hi waŋna hwuŋ tiya shiywa shɛ tatụ.

²²Aka na ahiɛ bɛrɛ iyi ne shihilo shi hiŋ, nu uywa ata ụtụndatụ, hi zhɛ tuba hi na ya iyimɛyɛ ingwụshɛ nɛ ehi jwe la na shiywa shi cihiŋ, tutu uywa ucinjishi. Aka na ti iyimɛyɛ uywa ata ụtụndatụ zhɛ ya banɛ, asha hi ta ya waa inɛ ɛlɛ ingwụshɛ.

²³Kede e senji cɛnjɛ ta ata unyizo-nom, iwɛnɛ ta cɛnjɛ ta ata tɛ shɛ me ti mi. Ahiɛba kaa hiɛ shɛ agaiŋ keeni alashɛ pi mi.

²⁴Hiɛ shɛ hia pana cɛnjɛ te elele tu na ahiɛ 'yajɛ maa e seeneni tu.

²⁵Yaa shɛ tukofwo tɛ 'imɛ yɛu-bino bu, na shɛ bụtụ bi Isrɛl, bee senji cɛnjɛ tu bwa tu ko, asha ga bụtụ na 'yajɛ ụmatụ nu bwa kpɛmkpɛm zhajɛ maa saanana cɛnjɛ ta ata yɛu-bino bwa go songwo la.

²⁶Yaa shɛ bụtụ ata zasa bụtụ na maa saanana tụ, iyi kaa ya zhɛmana bụ ni ikɛnyi ibwɛ, baa 'yajɛ kaa iyi nɛ waŋnɛ maa saanana tụ,

²⁷asha ga imanga shiywa sha ata te kwune na aka ata ti bee sengeni la bụtụ ata, maa tụpa bụtụ ata bee sengeni la te hwuri ulumo ata bụtụ ata ga cɛpɛ la, maa gwuricingo tu no ofwo cɛnjɛ tu bwa.

²⁸Ama yaa shɛ baa zasa kaa iyi nɛ waŋnɛ maa meme gwuricingeni tu, asha cɛnjɛ ta ata bee ge sengeni la bụtụ ata, ti zhɛ ta nama ni i'ɛlɛ bụtụ ata go so tu la tutu i ci uywa unyasa tubwada. Nu uywa ata unyasa tubwada nazhɛ ɛɛ zhɛ a gangana bụ tụ maa gwuricingo tu no ofwo cɛnjɛ tu bwa.

²⁹Yaa shɛ bụtụ bu ko senji la umwono ubwa buweci, unaa na uba ụshɛpwụ kepi, bi eri ba saanana uŋ na amɛ uywa ata bee ge senji uŋ, iwɛnɛ tu baa 'yajɛ ụhwada u tusaanana tu bwa uywa mudu.

³⁰Yaa shɛ kaa ee seeneni shi uŋ, tobwolo uywa mudu ta ulwa su o, asha umwono ata na namɛ na amɛ uba ụshɛpwụ zhɛ wa sha una bụtụ ata go so uŋ la gom unyizo-nom tutu awaŋnɛ ubwa kpaaŋ, a zha shɛ kaa a ganga uŋ hwuŋ ya okwo nu uywa unyasa tubwada o.

³¹Ama shimwono shɛ na shɛ namɛ na ashɛpwụ na gwumatangwụ, shɛ na kaa uba rungwutwonu su, ɛ zhɛ a rɛta ma shɛta nu ntuma mu na mu namɛ ne shihilo. E eri a saanana shụ, ee eri kaa a ganga shụ hwuŋ nu uywa unyasa tubwada.

³²Okwo ti yaa shɛ gana ata, ashɛpwụ na shɛ a na Alivai, to shimwono shɛ na shɛ namɛ na amɛ ashɛpwụ na aa 'yajɛ, Alivai eri a saanana shụ na aka elele.

³³Yaa shɛ kaa Bulivai bu ko njɛ shɛ uhwara nụ ụhwada ubwa na baa 'yajɛ, maa saanana uŋ, asha umwono ata oo go songwo la nu ụshɛpwụ na aa 'yajɛ, ɛ zhɛ a ganga uŋ nu uywa unyasa tubwada. Shimwono shɛ na shɛ namɛ na amɛ ashɛpwụ Alivai shɛ ba shɛ shɛ ma shɛ na aa 'yajɛ na ashashɛ atwa Isrɛl.

³⁴Ama a zha shɛ a sanga shihilo shɛ na shɛ namɛ na cɛnjɛ ta ashɛpwụ aba, tu na tɛ shɛ cɛnjɛ ta tiyaga o, iwɛnɛ ta ma tuta tɛ shɛ ma tu na aa 'yajɛ unyizo-nom.

³⁵Yaa shɛ kaa tukofwo tɛ 'imɛ yɛu-bino bu nɛ namɛ na ashashɛ hiŋ, bee eri shi mama untangana, bɛ shɛ ba untangana bụ, maa nama na bụ, maa no mbiyono bu gana bugaiŋ keeni bụlashɛ.

³⁶Ta lashɛga ule kwo kaa titeni no olugwo ubwa o, ama na sụma Agwatana bụ inyɛsɛ, iwɛ maa gɛ yɛu-bino ata bụ nama na ashashɛ hiŋ.

³⁷Ta unanga bụ ukwuribi iwɛ tupatana o, ta pana bụ kaa iyimɛyɛ maa leshiji titeni ti ibɛ o.

³⁸Gamba AGWANGWAMA na shɛ Agwatana hiŋ, na ihi bɛcinjɛ na cɛnjɛ ti Ijipti, maa ma hi pana cɛnjɛ ti Kenan, maa ma sha Agwatana hiŋ na.

³⁹Yaa shɛ kaa tukofwo tɛ 'imɛ yɛu-bino bu nɛ namɛ na ashashɛ hiŋ, bee meme senji pụ bụ, ta nda bụ maa bụ na bụ ndana ugondu gana ta bujama na obu so.

⁴⁰Ga nama na bụ gana yɛu-ugondu nɛ aba tụpa utashɛ. Ga ma bụ ndana ugondu tutu uywa ata unyasa tubwada.

⁴¹Nu uywa ata nazhɛ bɛɛ zhɛ ba bana no olugwo bu, tu bwa, ta miaụŋ mu bwa na bee meci, maa gwulo nu ukpogwu ubwa keeni i'wɛŋnɛ nɛ eshi ubwa ga 'yajɛ.

⁴²Gamba m bɛcinjɛ aŋ la na cɛnjɛ ti Ijipti maa a shɛ miaụŋ mi mi mu ugondu. Kede e senji aŋ gana na aa sanga ajama o.

⁴³Ta untangana bụ tawɛ tawɛ o, ama na sụma Agwatana bụ inyɛsɛ.

⁴⁴Yaa shɛ ajama eyi, na ajama o o, aba jala maa 'yaga, bi eri ba sa ajama ata eyi keeni ajama ata o o na ashashɛ anya edenji a na ihi rungwutwonu.

⁴⁵Hi eri du hia sa ajama na ashashɛ agaiŋ a na a nda ụlashɛ no ofwo hiŋ keeni na amwamwa aba a na namɛ ne hiŋ anaa na ee meci na cɛnjɛ ti hiŋ, iwɛ maa hi 'yaga aŋ.

⁴⁶Hi eri hia nda aŋ ajama maa hi peni aŋ miaụŋ mi hiŋ me ekwunyi maa a shɛ iyi-yo-ogwu aba unyizo-nom. Ama ta mama ndanụ ma tawɛ tawɛ ahiɛba hiɛba miaụŋ-mo-bino, na shɛ atwa Isrɛl kwukwuŋ.

⁴⁷Yaa shɛ bugaiŋ, kwo kaa bụlashɛ na namɛ na ashashɛ hiŋ, shɛ bɛzhɛgba, yɛu-bino bu nɛ shɛ bụtụ bi Isrɛl nɛ ubu dongonu kaa shɛ bukofwo, bee meme sengeni bugaiŋ kwo kaa bụlashɛ ata namɛ na ashashɛ hiŋ, kwo kaa bụtụ bu ko nu ukpogwu bugaiŋ ata,

⁴⁸asha yɛu-bino ibwɛ ike eri ya saanana bụ na aba na to o go songwo bu la,

⁴⁹okwo bishi bwa bu ko, kwo kaa butatugwa bwa eri ba saanana bụ; kwo kaa bụtụ na baa 'yajɛ ụmatụ nu bwa kpɛmkpɛm nu umwamwa ubwa eri ba saanana bụ, kwo kaa yaa shɛ baa shɛ hwuŋ bɛzhɛgba ni ikɛnyi ibwɛ, bi eri mama saanana.

⁵⁰Ubwa, na bụtụ na so bu la, ɛ zhɛ a rɛta shiywa te kwune na aka na ti bee meme sengeni bu la tutu uywa unyasa tubwada, ulumo tɛganga tu bwa kaa zhɛ wa sha nu gana na tu ufwugwo shiywa shɛ na baa namɛ no ofwo agwuma ubwa shɛ namɛ. Ɛ zhɛ a rɛta aka ata gana na ta a rɛta aka yɛu-ugondu nɛ aa tụpa utashɛ.

⁵¹Yaa shɛ shiywa shi te gembi ufwugwo, asha bi zhɛ ba imanga ulumo shiywa sha ata gana na shaa namɛ, maa mama saanana nu ulumo ata oo go so bu la.

⁵²Yaa shɛ kaa shiywa shɛ unyasa tubwada shɛ vwɛ cwɛŋ, asha ɛ zhɛ a imanga gana na ta shiywa shɛ na baa ndwanua bụ la ugondu shɛ namɛ abana nu bwa, nazhɛ bɛɛ zhɛ ba tụpanana bụ ukwuribi u tusaanana tu bwa.

⁵³Gana na ti yɛu-ugondu nɛ aa tụpa alụbashɛ ya nama, gana ata du bɛɛ zhɛ ba nama nu bwa uywa uywa. Kede untangana bụ tawɛ tawɛ o.

⁵⁴Yaa shɛ kaa ee seeneni shi bu na shiywa shɛ ga, asha ɛ zhɛ a ganga bụ hwuŋ nu uywa unyasa tubwada, tu bwa keeni miaụŋ mu bwa mu na mu namɛ nu bwa maa mama 'yaga.

⁵⁵Iwɛnɛ po atwa Isrɛl aba shɛ miaụŋ mi mi mu ugondu, mu na Ngɛɛ bɛcinjɛ na cɛnjɛ ti Ijipti. Kede e senji aŋ maa a shɛ ajama unyizo-nom o: Gamba AGWANGWAMA na shɛ Agwatana hiŋ na.