Read bassa LIVAI 6 Bible Online

LIVAI 6 - bassa bible

LIVAI 6

¹Nazhɛ AGWANGWAMA hiɛŋ Moses.

²Yaa shɛ bụtụ be elele njɛ AGWANGWAMA iwɛwɛ iwɛnɛ baa lacɛ maa gwuricingono uyebi ubwa iyi nɛ uyebi ubwa ge peni bu la tungbaraka, okwo iwɛ iyi uyebi ubwa nɛ bee zunji, okwo iwɛ imwere nɛ baa yɛ bụ,

³okwo iwɛ tuwa tụ ụzagwụ tu na boo to iwɛ iyi nɛ ga 'inɛ bee gwushiji, bɛɛ hiɛŋ, ubwa kwụbɛ shɛ o.

⁴Aka na ta bụtụ njɛ iwɛwɛ ni ijɛ okwo ike, bɛ shɛ ba tụpa iŋ hwɛɛ iwɛ orugwusu ata baa ga njɛ.

⁵I shɛ tilɛɛ maa ga tụpa bụtụ ata ga 'yajɛ iŋ la hwɛɛ nụ ụjita ata oo to tụwụma tu bwa ugbe. Ga madanga du iyi itana ibɛ iwɛ tuwa ta ata tụ ụzagwụ boo go to.

⁶Ga 'waŋnɛ udagba ubwa kwo kaa biywoywo na zasa tụsụnyasụ no ofwo bunongbo maa pana AGWANGWAMA ụrụpɛ ubwa u tugworicingo, te teni cɛŋ nu gana na to bunongbo ata imanganjɛ ulumo ibɛ.

⁷Nazhɛ bunongbo ata zhɛ ba ta bụ ụrụpɛ na agba AGWANGWAMA iwɛ iwɛwɛ elele nɛ bụtụ ata ga njɛ, ɛ zhɛ kaa a gangana bụ.

⁸Nazhɛ AGWANGWAMA hiɛŋ Moses,

⁹Pana Aron keeni miaụŋ mu bwa me eyi unu maa, Undwa ụrụpɛ tuhwoŋzhingo na: Ga a na Patana iyi ụrụpɛ tuhwoŋzhingo nu utukwu-ụrụpɛ uuwa gi iyi yo holo, kede ulwa utukwu-ụrụpɛ kaa 'weji kwukwuŋ.

¹⁰Go bunongbo urugono i'wɛŋnɛ ilinɛn tuwururu, go hwuŋtono uwereci ubwa ilinɛn, nazhɛ sugo ma'alụ ma ata ulwa utukwu-ụrụpɛ hwoŋzhinji iyi ụrụpɛ tuhwoŋzhingo kwunduu, maa tulono mu na bụ'aŋbụ bu utukwu-ụrụpɛ.

¹¹Nazhɛ bɛɛ zhɛ bo hwucoko n-nduka ma ata mu bwa mu tuwururu, maa urugono i'wɛŋnɛ inyɛ, maa sugo ma'alụ ma ata maa bacɛnga mụ nu ugba tu'ulwa maa zha no ofwo ata hashɛganụ sụ.

¹²Ulwa ụ shɛ wa uranga tuhwoŋtu nu utukwu-ụrụpɛ aka elele maa kede u 'weji kwukwuŋ. Go bunongbo no hwoŋzhingo i'wɛ'wɛ nu bwa uvwungwa uvwungwa, ga bu na shamana iyi ụrụpɛ ata tuhwoŋzhingo na azuba ibɛ shiriri iwɛ maa hwoŋzhingo manɛbɛ ma ata mi iyi ụrụpɛ wa amɛ-olom na azuba ibɛ.

¹³Ulwa ata ụ shɛ wa uranga tuhwoŋtu nu utukwu-ụrụpɛ tutu; ụ shɛ shɛ kaa wo 'wogo kwukwuŋ.

¹⁴Undwa ụrụpɛ tiya na: Miaụŋ-me-eyi mu Aron muba mi zhɛ mu na shɛkana uŋ AGWANGWAMA nu utukwu-ụrụpɛ.

¹⁵Go bunongbo seri mihiuŋ mi tilee lee mụ ụrụpɛ ata tiya nu u'ala ubwa pwomuu, medenji manɛbɛ ma muba keeni iturɛre frankinsɛns na patanɛ nụ ụrụpɛ ata tiya kpaaŋ, maa hwoŋzhingo mu nu utukwu-ụrụpɛ maa i shɛ titeyinje tu bwa. I shanɛ AGWANGWAMA ụhiụŋ ụlatụ.

¹⁶Ga Aron, na miaụŋ mu bwa me eyi, aba zhɛ a ya tuvwa ti ibɛ. Ɛ zhɛ a ya iŋ uzawa Ifucingɛ no ohwolu tijilo, nu ukpogwu udulo tu'ulwatagwụ.

¹⁷Kede o to iŋ medenji Ifucingɛ o. M peni aŋ iyi ya arụpɛ mi a na dure nu ulwa maa i shɛ urobwo wa aba. I shɛ iyi tijilo me tijilo, i shɛ gana iyi ụrụpɛ iwɛwɛ keeni ụrụpɛ tụwụma.

¹⁸Butubwenyi be elele na ashashɛ miaụŋ mu Aron bɛ shɛ ba ya iŋ, i shɛ undwa unyizo-nom tutu ofwo elele na awaŋnɛ hiŋ teje. Bụtụ be elele na timengeni iyi nɛ banɛ na arụpɛ na ee peni AGWANGWAMA tedure nu ulwa, tijilo ti ibɛ ti zhɛ ta ima bụ.

¹⁹Nazhɛ AGWANGWAMA hiɛŋ Moses,

²⁰Iyi ụrụpɛ na ga Aron keeni miaụŋ mu bwa me eyi mi zhɛ ma pana AGWANGWAMA nụ ụjita na ee dudugeni bu manɛbɛ na: ibɛ shɛ iyi-u'umpwa bimenji bo mihiuŋ mi tilee lee bi ikwureni bugongo bu ko maa mɛ shɛ ụrụpɛ tiya aka elele. Tudwonu ta ashashɛ muba tu ko tɛ shɛ iwɛ uvwungwa, tudwonu ta ashashɛ muba ti nya tɛ shɛ iwɛ ụrụmɛ.

²¹Ɛ zhɛ a ta iŋ nu ujejebi,[4] medenji manɛbɛ. Ga shapɛ iŋ na aka na to o to iŋ, yee swe manɛbɛ tebiye, ibɛ shɛ owuŋzu ụrụpɛ tiya, maa peni AGWANGWAMA ụrụpɛ ụhiụŋ ụlatụ.

²²Ga shɛ bunongbo na banɛ na ashashɛ miaụŋ-me-eyi mu Aron, na ee dudugeni manɛbɛ, bunaa na kaa zhɛ bo tono hwuŋ ohwolu ubwa, ubwa zhɛ ba pana iŋ AGWANGWAMA, ụ shɛ undwa unyizo-nom. Ɛ zhɛ o hwoŋzhingo iŋ hwɛ hwɛɛ.

²³Ge hwoŋzhinji ụrụpɛ tiya we elele na bunongbo be elele 'waŋnɛ hwɛɛ, kede a yɛ uŋ o.

²⁴Nazhɛ AGWANGWAMA hiɛŋ Mosɛs,

²⁵Mbiso Aron na miaụŋ mu bwa me eyi maa, Undwa ụrụpɛ iwɛwɛ na: Ofwo na aa kwụna iyi ụrụpɛ tuhwoŋzhingo, apata du aa shɛ a kwụna iyi ụrụpɛ iwɛwɛ nu umbe AGWANGWAMA, i shɛ iyi tijilo me tijilo.

²⁶Bunongbo be elele na to ụrụpɛ ata iwɛwɛ, ubwa du zhɛ ba ya iŋ. No ofwo ohwolu tijilo ata namɛ nu ukpogwu udulo tu'ulwatagwụ kaa aa shɛ a ya iŋ.

²⁷Bụtụ be elele kwo kaa iyi elele nɛ kaa timengeni usunda ubwa, tijilo ti ibɛ ti zhɛ ta ima iŋ.[5] Yaa shɛ mehieŋ mu bwa mi tegeni i'wɛŋnɛ tu'urugono ike, bɛ shɛ ba nyashɛnga iŋ no ohwolu tijilo.

²⁸Ge bweji ikwɛshɛ ɛtɛ cɛnjɛ-ti-i'wɛŋnɛ[6] ee ge shiteji usunda ata. Ama yaa shɛ ni ikwɛshɛ ya ashɛmbɛrɛ ee ge shiteji uŋ, asha ga a nyashɛnjɛ iŋ shɛshɛshɛ maa a bwashɛlanɛ iŋ ne meni.

²⁹Butubwenyi be elele na ashashɛ onongbo zhɛ ba ya uŋ, i shɛ iyi tijilo me tijilo.

³⁰Ama a zha shɛ a ya iyi ụrụpɛ iwɛwɛ ye elele nɛ aa shapɛ mehieŋ mi ibɛ ee tecinji nu udulo tu'ulwatagwụ maa o to ụrụpɛ iwɛ iwɛwɛ tugangana o, ge hwoŋzhinji iŋ nu ulwa.