Read bassa LIVAI 8 Bible Online

LIVAI 8 - bassa bible

LIVAI 8

¹Nazhɛ AGWANGWAMA hiɛŋ Moses,

²Shapa Aron, ta miaụŋ mu bwa me eyi, ti i'wɛŋnɛ tu'urugono yo onongbo, ta manɛbɛ ma ata mu tududugono, tu usemberi buna bụ ụrụpɛ iwɛwɛ, keeni adagba eyebi, ti igwumi ɛtɛ akara na zasa Ifucingɛ zweni.

³Sotulonu tu'ulwatagwụ ta ata kpaŋ kpaaŋ no odubo udulo ata ụ tu'ulwatagwụ.

⁴Go Moses njɛ ga gana na ta AGWANGWAMA peni bu unu. Ibɛ po tu'ulwatagwụ ta ata kpaŋ kpaaŋ tu sotulonu no odubo ata udulo tu'ulwatagwụ.

⁵Go Moses mbishi tu'ulwatagwụ ta ata hwɛɛ, bɛɛ hiɛŋ, Iyi nɛ AGWANGWAMA m peni-unu ibɛ maa i shɛ ya nda na.

⁶Go Moses shapɛ Aron keeni miaụŋ mu bwa me eyi, baa dụrɛ aŋ meni.

⁷Bee hwuŋteni Aron idikɛ, bee umpi bu umazhɛya ne embi, bee urigeni bu utogwo, bee ubeni bu idikɛ ɛtɛ i tikpɛngbɛ, ɛɛ hiɛŋ efod,[8] bee umpi bu akalagba idikɛ ɛtɛ i tikpɛngbɛ a na aa njɛ ne tugwoni, anaa na oo to ni iyi tu'ubono na agba.

⁸Bee ubeni bu ijɛ ɛtɛ tu'ubono na agba, bee peteni Urim keeni Tumim[9]

⁹Bee peri bu ureweni nu uhiuhiu, bee sweni ụpalụ wa azhɛnarɛya nu umbe ureweni ata, ibɛ shɛ useyida maa Agwatana ubwa teri bu, gana na ta AGWANGWAMA peni bu unu.

¹⁰Nazhɛ go Moses shepi manɛbɛ ma ata mu tududugono, bee dudugeni udulo ata wa AGWANGWAMA keeni iyi elele nɛ zweni nu bwa, baa njɛ uŋ tijilo.

¹¹Bee zhizhenji mu na mu ko nu utukwu-ụrụpɛ kpalụ cenje. Bee dudugeni du utukwu ata ụrụpɛ manɛbɛ, ti i'wɛŋni'wɛŋni ibwɛ hwɛɛ, tu ugbamgbam keeni ụkwụka ata waa patanɛ, maa nda iŋ tijilo.

¹²Bee zweni manɛbɛ ma ata mu tududugono mu ko nu uhiuhiu Aron maa nda bụ tijilo.

¹³Go Moses suje miaụŋ-me-eyi mu Aron, bee urigeni aŋ n-nduka, bee umpi aŋ amazhɛya ne shimbi, bee petengeni aŋ ofworo, gana na ta AGWANGWAMA peni bu unu.

¹⁴Nazhɛ go Moses shapɛ ya buna be eyi bụ ụrụpɛ iwɛwɛ, ga Aron, na miaụŋ mu bwa me eyi petengeni i'ɛlɛ ya aba nu uhiuhiu buna ata be eyi bụ ụrụpɛ iwɛwɛ.

¹⁵Nazhɛ go Moses kwụnɛ bụ, bee seri mehieŋ ma ata mu bwa na buvwa bwa, bee zweni mu na mahiuaŋ ma ata mu utukwu-ụrụpɛ tutu boo rungwutwonu, baa njɛ utukwu ata tijilo. Nazhɛ bee duduji mehieŋ ma ata mụ vwɛ nu uvwi utukwu-ụrụpɛ, baa njɛ uŋ tijilo. Bee shiri uŋ swooŋ.

¹⁶Go Moses suji manɛbɛ ma ata mu namɛ ni i'wɛŋnɛ ya amɛ buna ata kpaaŋ, tu ukosobu ubwa, ta asụbụ ubwa, tu nkpokpolo ma ata mi yebi medenji manɛbɛ ma muba, bee hwoŋzhinji iŋ hwɛɛ nu utukwu ata ụrụpɛ.

¹⁷Ama bu hwoŋzhinji tuba buna ata be eyi, tu u'waba ubwa, tu usunda ubwa, te tuwiŋ tu bwa hwɛɛ no tupohondo tu ugba tu'ulwa, gana na ta AGWANGWAMA peni bu unu.

¹⁸Nazhɛ baa shapɛ ya udagba ụrụpɛ tuhwoŋzhingo, ga Aron na miaụŋ mu bwa me eyi petengeni i'ɛlɛ ya aba nu uhiuhiu udagba ata.

¹⁹Nazhɛ go Moses kwụnɛ bụ, baa 'wɛŋ mehieŋ mu bwa nu utukwu-ụrụpɛ tutu rungwutwonu.

²⁰Aka na te e seshenji udagba ata hwɛɛ, go Moses hwoŋzhinji uhiuhiu ubwa, ta tusashanga tu bwa, medenji manɛbɛ mu bwa hwɛɛ.

²¹Aka na ta a nyashanjɛ evwi ubwa keeni akatakpa ubwa ne meni, nazhɛ go Moses hwoŋzhinji udagba ata hwɛ hwɛɛ nu utukwu ata, maa ụ shɛ ụrụpɛ tuhwoŋzhingo ụhiụŋ ụlatụ na ee peni AGWANGWAMA tedure nu ulwa, nu gana na ta AGWANGWAMA peni bu unu.

²²Nazhɛ go Moses shapɛ ya udagba unya, na shɛ udagba na maa e tileni onongbo swooŋ. Ga Aron, na miaụŋ mu bwa me eyi petengeni i'ɛlɛ ya aba nu uhiuhiu udagba ata.

²³Nazhɛ go Moses kwụnɛ bụ. Bee seri mehieŋ mu bwa boo to mu nu ukwunanga ụcɛbɛ u'ala ubiye Aron keeni buvwa bụ 'wụtụ bu u'ala ubwa ubiye, keeni buvwa bụ 'wụtụ bu avwuna ubwa u'ala ubiye.

²⁴Nazhɛ ee suje miaụŋ mu Aron, go Moses to mehieŋ ma ata mu ko nu ukwunaga shɛcɛbɛ sha aba shɛ u'ala ubiye keeni ivwɛ ya aba i'wɛtwɛ i'ɛlɛ ibiye keeni ivwɛ ya aba i'wɛtwɛ ivwunɛ i'ɛlɛ ibiye. Nazhɛ go Moses 'wɛŋ mehieŋ ma ata mụ vwɛ nu utukwu-ụrụpɛ tutu rungwutwonu.

²⁵Nazhɛ bee suji manɛbɛ mu udagba ata, ta mu na mo bungwu-bu-utwenyi, ta manɛbɛ me elele mu na mu namɛ ni i'wɛŋnɛ ibwɛ ya amɛ, tu ukosobu ubwa, ta asụbụ ubwa, tu nkpokpolo mu bwa mi yebi medenji manɛbɛ ma muba keeni i'unte ibwɛ u'ala ubiye.

²⁶Nazhɛ bɛɛ vwɛ ukara na zasa Ifucingɛ ni igwumi ɛtɛ ee ge zweni, igɛtɛ i shi nu umbe AGWANGWAMA keeni ukara uko na 'yajɛ manɛbɛ keeni ugbagbada uko, bee petengeni aŋ na manɛbɛ me ebe keeni i'unte ye ebe u'ala ubiye.

²⁷Bee zweni iŋ kpaaŋ ibɛ ni i'ɛlɛ Aron keeni i'ɛlɛ miaụŋ mu bwa me eyi, bee vwurenji iŋ maa ụ shɛ ụrụpɛ tuvwurongo nu umbe AGWANGWAMA.

²⁸Nazhɛ go Moses leshiji iŋ ni i'ɛlɛ ya aba, bee hwoŋzhinji iŋ nu utukwu-ụrụpɛ, medenji ụrụpɛ tuhwoŋzhingo, maa ụ shɛ ụrụpɛ tishilo swooŋ, ụ shɛ ụrụpɛ ụhiụŋ ụlatụ na ee peni AGWANGWAMA tedure nu ulwa.

²⁹Go Moses shepi ukosobu ata bee vwurenji uŋ maa ụ shɛ ụrụpɛ tuvwurongo nu umbe AGWANGWAMA. Inɛ ɛtɛ ibɛ shɛ urobwo Moses nu udagba ata tishilo swooŋ, gana na ta AGWANGWAMA peni bu unu.

³⁰Nazhɛ go Moses seri manɛbɛ ma ata mu tududugono, medenji mehieŋ ma ata mu namɛ nu utukwu, bee zhizhenji mu Aron keeni i'wɛŋnɛ ibwɛ i tu'urugono, keeni miaụŋ mu bwa du, ti i'wɛŋnɛ ya aba i tu'urugono. Gana baa njɛ Aron keeni i'wɛŋnɛ ibwɛ maa i shɛ tijilo ta, ta miaụŋ mu bwa me eyi, medenji i'wɛŋnɛ ya aba i tu'urugono du.

³¹Go Moses hiɛŋ Aron na miaụŋ mu bwa, Shitogo ma usunda ata no odubo udulo tu'ulwatagwụ. Ya uŋ ma apata keeni akara ata zweni ni igwumi, a na shɛ a na ụrụpɛ tishilo swooŋ, gana na ti Ngee hi peni-unu Ngɛɛ hiɛŋ, Ga Aron, na miaụŋ mu bwa, aba zhɛ a ya ụŋ.

³²Usunda we elele na vwɛ keeni akara ata, hwoŋzhingo ma inɛ ɛtɛ nu ulwa.

³³Hiɛ shɛ shɛ kaa hia bana no odubo ata udulo tu'ulwa tutu ijitɛ icenje, tutu ijitɛ ɛtɛ ee hi shiri swooŋ ulwa o, iwɛnɛ ti ijitɛ ɛtɛ icenje i shɛ tụ'ụrɛcɛnga te tishilo ti hiŋ swooŋ.

³⁴Gana AGWANGWAMA iti peni-unu maa ga a njɛ iŋ hwayɛ maa e hi to ụrụpɛ iwɛwɛ hiŋ tugangana ta.

³⁵Hiɛ shɛ hia nama no odubo ata udulo tu'ulwa ijitɛ ɛtɛ icenje tu uwaŋna tụ ụjita, maa hi untangana iyi nɛ AGWANGWAMA ihi peni-unu ibɛ, shibwonu hi zhɛ hio 'wo.

³⁶Ga Aron, na miaụŋ mu bwa mɛ njɛ iyi elele nɛ AGWANGWAMA peni aŋ unu ibɛ tedure no Moses.