Read bassa JƐRƐMIA 10 Bible Online

JƐRƐMIA 10 - bassa bible

JƐRƐMIA 10

¹Oo ahiɛba atwa ihwɛ Isrɛl, shɛlaga ma n-ndumwa mu na AGWANGWAMA mo hi mbiso,

²AGWANGWAMA hiɛŋ, Ta 'wa ma iyi nɛ edenji a ndangana o; kede shihaŋsa shi hiŋ shɛ garatagwụ tedure iwɛ eseyida na namɛ na tụla o, okwo te edenji a nda inyɛsɛ ibɛ.

³Edenji a zhɛba tuwa ti i'wɛ'wɛ nɛ ɛɛ jwɛ nu uwapa, ee shebi iŋ ni icele, ibɛ shɛ ugondu na i'ɛlɛ bụtụ njɛ.

⁴A njɛ iŋ tisemberi na azụrụfa keeni azhɛnarɛya; e cici iŋ no okoto iwɛ maa kede i leyegeji o.

⁵Tuwa ta ata ta aba tɛ shɛ gana uzhizhi ụ'wụ'wụ na ee shikicinji ne ehilo u'iywa maa u zweni shanụnụ inyɛsɛ kwakwa; i eri shi ya dumana kaa iwɛ o; tishapa aa shapa iŋ iwɛnɛ ti yee eri shi ya zha tahaŋnụ ni ikɛnyi ibɛ. Ta nda ma inyɛsɛ ibɛ o; i eri shi ma hi nda iyi iwɛ ye elele o, i eri shi kaa du ma hi ndana iyi ibiye ye elele o.

⁶Oo AGWANGWAMA, i zasa bụtụ na shɛ gana bụ o; gabụ bi gembi, ugondu ụ'wụtụ 'wụtụ na aba nda, wo mbisono ugombo bu ụ'wụtụ.

⁷Gaaba zha shɛ ma bu sụma inyɛsɛ, gabụ agwuma edenji kpaaaŋ? Gabụ bi teni cɛŋ maa a bụ mụnɛ ụjɛrụma. I zasa bụtụ be elele na namba ta shɛ gana bụ na ashashɛ atwa ti'inta ne edenji elele kwo kaa na ashashɛ shɛgwuma sha aba o.

⁸A lagwụmanjɛ hwɛɛ aba, e eshiciji shi kaa iyi elele o. Imbe kwuŋ ntatanuwaŋ ma ata ma aba mi i'wɛ'wɛ, mi eri mo mbisogono aaŋ?[22]

⁹E sweni tuwa ta ata ta aba azụrụfa na banɛ ni Tashish, keeni azhɛnarɛya na banɛ nu Ufaz. Kpaaŋ ibɛ i shɛ ugondu i'ɛlɛ bụtụ keeni ugondu bụlụma ba azhɛnarɛya; i'wɛŋnɛ nɛ ee urigeni iŋ, i shɛ uduhwa wa ababa keeni uduhwa ushenje; kpaaŋ ibɛ i shɛ ugondu we egwoni i'ɛlɛ.

¹⁰Ama AGWANGWAMA, gabụ bɛ shɛ Agwatana tugom, gabụ kaa bɛ shɛ Agwatana uumwa, keeni agwuma unyizo-nom. Aka na aba nda isɛbwɛ, unyizo kpaaŋ wa zhɛgɛda; edenji eri shi a ima-isɛbwɛ ti isɛbwɛ bu ishijɛ o.

¹¹Mbiso aŋ n-ndumwa mu ga maa: Tuwa ta ata ti keri shi cɛnjɛ tu unyizo keeni azuba, ti zhɛ ta nda ufwu kpaaŋ. Ti zha shɛ ta nama ya no ofwo elele kwukwuŋ na cɛnjɛ tu unyizo.

¹²AGWANGWAMA ubwa karɛ cɛnjɛ tu unyizo tedure nu ukpahiŋ ubwa; na ti'inta tu bwa kaa bee shiri okoshilo unyizo; ne ti'eshicigo tu bwa bee berishiji azuba.

¹³Aka na ti bee peni-unu, ibɛ po meni mu na mu namɛ na azuba mɛ njɛ rundu; bee suje odomu na ga namɛ na akwunanga cɛnjɛ tu unyizo. Ubwa ba nda maa ɛbɛrɛ na baga tụla ne eshilo; ubwa tumwanɛ uvwugo maa u banɛ no olugwo na i'wɛŋnɛ ibwɛ zweni.

¹⁴Atwa elele incɛ shɛ, e eshiciji shi du kaa iyi o; ezuye zhɛ a sha hwuŋ alụma tuwa ta azhɛnarɛya; iwɛnɛ tu ntatanuwaŋ ma ata aa njɛ mɛ shɛ ụzagwụ, mu zasa ihwungwɛ, uraiŋ kaa zaba na muba o.

¹⁵A shɛ iyi tɛgadaga, a zha shɛ a tatụlanụ bụtụ o; ɛ zhɛ a nda ufwu aka na ta AGWANGWAMA zhajɛ maa pana aŋ ulwapɛ.

¹⁶Agwatana na teri Jekob namɛ swooŋ na tuwa tu ga hwɛ hwɛɛ, iwɛnɛ po ubwa karɛ iyi elele, atwa Isrɛl aba shɛ ụlamụ ubwa u ticinji na baa 'yajɛ. Ɛ hiɛŋ i zeci ibwɛ AGWANGWAMA na Hwuri Kpaaŋ.

¹⁷Oo ahiɛba atwa Jɛrusalɛm, e hi hweri! Sutongono ma iyi nɛ ahiɛ 'yajɛ na cɛnjɛ tu ga.

¹⁸AGWANGWAMA zhɛ ma hi bacɛnga na cɛnjɛ tu ga; bi zhɛ mo hi bibizo tebiye uuwa i ci aka na bụtụ be elele zha shɛ ba vwa ya. Gana AGWANGWAMA dumwa ta.

¹⁹Atwa Jɛrusalɛm uganɛ, ɛɛ hiɛŋ, Adangboo, a tụ gwụcanjɛ tebiye! Tụgwụcanga tu tu kaa tu hwuleji tɛnɛnjɛ. Ti ge heŋshi kaa maa ti eri ta la-egiri tuba tu'waŋna!

²⁰O mushongwo shidulo shi tu, ihwehwe nɛ ge umpi shu dwatwagwawa. Miaụŋ mu tu mu tu gongwo hwɛɛ; i zasa ya bụtụ be elele na ta vwɛ maa shikocongo shidulo shi tu sasana o; i zasa ya kaa bụtụ be elele na ta namba maa swataga tugwuno to shidubo na shɛ ba o.

²¹Ngɛɛ hiɛŋ, A'yagajɛ tu lagwụmanjɛ; e dwelekeci shi kaa ahaŋsa tụpana no olugwo AGWANGWAMA o. Ecilo go po yaa zhɛmanɛ shɛ aŋ ta, ibɛ po agwụdụ aba garatagwụ.

²²Shɛlaga ma! Anabarɛ tuwo! Rundu re ejeshi a'wụtụ ru bonuo na cɛnjɛ tu tuzuba, ree ci ba; maa a njɛ ụshɛpwụ Juda osombo, maa a shɛ ofwo na aka[23] zhɛ na nama.

²³Oo AGWANGWAMA, M mepi maa ofwo na maa bụtụ no dulo zasa ni i'ɛlɛ ikɛnyi ibwɛ o, i zasa kaa bụtụ na eri ba untangana uraiŋ ubwa ni ikɛnyi ibwɛ o.

²⁴Oo AGWANGWAMA, nangangana kaa atwa bụ; ama ta nda iŋ maa i tu hwuleji ikɛnyi kwo kaa maa i ti peni ulwapɛ na aka na aba nda isɛbwɛ o; iwɛ aka na ɛbi zhɛ bu ma tu hwaŋzhɛnga ya.

²⁵Gɛ isɛbwɛ bu hwuri geri be edenji ata ubu mepi shi; keeni no ofwo atwa na ụbụ zhɛbɛ shɛ. Iwɛnɛ po a kwụnua atwa bụ; oo iricingwo kaa atwa bụ hwɛ hwɛɛ; a nduwa cɛnjɛ tu tu osombo.