Read bassa JƐRƐMIA 11 Bible Online

JƐRƐMIA 11 - bassa bible

JƐRƐMIA 11

¹N-ndumwa mu na AGWANGWAMA m mbishi Gamba gɛ Jɛrɛmia na, bi hiɛŋ,

²Shɛlaga n-ndumwa mu unu-tutwa ga. Mbiso atwa Juda keeni atwa na jɛjɛ nu Jɛrusalɛm,

³hiɛŋ aŋ, Gamba AGWANGWAMA na shɛ Agwatana Isrɛl, N hiɛŋ, Unu-tukalana zhɛ wa ima bụtụ be elele na hwụjɛ shɛ unu unu ga tutwa.

⁴Ubwa shɛ unu ata Ngaa twa la no ogwunukwoshi hiŋ na aka na ti Ngɛɛ bɛcinjɛ aŋ na cɛnjɛ ti Ijipti, tu na tɛ shanɛ aŋ la gana ụshɛmbɛrɛ na vwengenji. Ngɛɛ hiɛŋ aŋ, Na hwuga ma unu mu maa hi na nda iyi elele nɛ Ngee hi peni-unu ibɛ. Ngee mbishi aŋ, Ngɛɛ hiɛŋ, Yaa shɛ ahia hwuga-unu mu, asha hi zhɛ hia sha atwa mi, Ngɛɛ zhɛ ma sha du Agwatana hiŋ.

⁵Nazhɛ Ngɛɛ zhɛ ma nda iyi nɛ Ngee shileni la ogwunukwoshi hiŋ unu, maa N zhɛ ma hi pana cɛnjɛ ta ata tuwebiye tu barɛ keeni ugwungwu; tuba tɛ shɛ cɛnjɛ tu ga ahiɛ 'yajɛ ya hwuwayɛ. Ngɛɛ jishijɛ, Ngɛɛ hiɛŋ: AGWANGWAMA, ga i shɛ gana ata.

⁶Nazhɛ AGWANGWAMA m mbishi, bɛɛ hiɛŋ, Zhaga na ashɛpwụ Juda keeni ihwɛŋnɛ ụshɛpwụ Jɛrusalɛm. Ananga utumwa ga mu apata. Hiɛŋ aŋ, Shɛlaga ma n-ndumwa mu unu ata tutwa maa hiɛ hwụjɛ kaa unu muba.

⁷Aka na Ngɛɛ bɛcinjɛ la ogwunukwoshi hiŋ ni Ijipti, N tɛtaganɛ aŋ unu tebiye tebiye, Ngɛɛ hiɛŋ, Na hwuga ma unu mu, Ngaa uranjɛ aŋ kaa unu ata tɛtɛtagana tutu i ci taa hwayɛ.

⁸Ama e shiri shi acɛbɛ maa a hwụjɛ-unu o, bụtụ bụtụ uranjɛ tuhwotono ta amɛ ubwa keeni iyi iwɛ ibwɛ tɛnda gana ala ta a namɛ cala. M peni aŋ unu maa ga a untangana unu ata tutwa, ama a lacɛ. Ibɛ po Ngee sugeni aŋ alwapɛ we elele na 'nyeci nu unu ata tụpana.

⁹Nazhɛ AGWANGWAMA m mbishi sasana, bɛɛ hiɛŋ, Atwa Juda keeni atwa na jɛjɛ nu Jɛrusalɛm ma n twatwaganu-unu.

¹⁰E gwuleneni ni iwɛwɛ yo ogwunukwoshi aba a na lacɛ la unu mu tuhwuga; aa zhɛbɛ tuwa. Ta atwa Isrɛl, ta atwa Juda e bweji unu na Ngaa twa la no ogwunukwoshi aba.

¹¹Iwɛbɛ po Ngɛɛ hiɛŋ Gamba AGWANGWAMA, N zhɛ ma shapɛrɛganɛ aŋ ufwu tɛnda, na ee eri shi a banangana. Aka na kaa a n suyanɛ maa mo mbiyono aŋ, N zha shɛ ma shɛlaga iwɛ ya aba o.

¹²Nazhɛ atwa Juda keeni atwa na jɛjɛ nu Jɛrusalɛm zhɛ a zhagana tuwa ta ata aa shana a ta arụpɛ na tuba, ɛɛ zhɛ a uganana tụ iwɛ maa ti mbiyeni aŋ. Ama tuwa ta ata kaa ti zha shɛ ta ala maa ti mbiyeni aŋ na aka na tu ufwu ata tɛnda zhajɛ o.

¹³Atwa Juda 'yajɛ tuwa tu ufwugwo nu gana na du ta ashɛpwụ aba gembi ufwugwo, atwa na jɛjɛ nu Jɛrusalɛm shikecenji otukwu-ụrụpɛ ufwugwo iwɛ Beal, nu gana na tu ufwugwo ihwɛŋnɛ ụshɛpwụ ya aba namɛ.

¹⁴Gabụ gɛ Jɛrɛmia, ta ma tabwa ya na adua bụ iwɛ atwa ga o. Aka na aa namɛ nụ ụbaụta, okwo a n suyanɛ maa mo mbiyono aŋ, N zha shɛ ma hwuga iwɛ ya aba o.

¹⁵AGWANGWAMA hiɛŋ, Atwa na Omo lubo, a nduwa iyi iwɛ nɛ gembi ufwugwo. Tutono cɛŋ ti imbe aa ta 'yajɛ maa a nama nu Umwono muu? E heŋshi suu maa e eri o ngwuricingo ufwu tɛnda na we teni aŋ tedure no onu aba tishilogo keeni isundɛ ya arụpɛ aba? Inɛ ɛtɛ suu eri ya pana aŋ amɛ-olom?

¹⁶M po aŋ la izeci na aka oko maa ụ'wụ'wụ buta na 'yajɛ ambɛ olom zhiuuŋ, unaa na kaa 'weri tụ'walụ tu na tu pilanụ duwa; ama hwuwayɛ, N zhɛ ma sapa ambɛ ubwa ulwa gana to rundu ru uto maa ma kwụsataga a'wa'walụ ubwa.

¹⁷Gamba AGWANGWAMA na Hwuri Kpaaŋ, M bɛrɛ la Isrɛl keeni Juda, ama hwuwayɛ Ma duma iwɛ ufwu wa aba tɛnda. Ama aba ni ikɛnyi aba kaa meme sugeni ijɛ, iwɛnɛ ta a njɛ iyi nɛ 'wanjɛ; a njɛ maa ma 'yaga isɛbwɛ na aba tedure na arụpɛ na aa pana Beal.

¹⁸AGWANGWAMA m mbiseni maa ma mapa unu na atwa i'ime mi ma n twatwaganụ, M mepi iŋ kaa. Ubwa kaa m mbiseni iyi nɛ aa nda hwɛɛ.

¹⁹N shɛ gana yɛu-ụgwụdụ nɛ namɛ suu, nɛ ee becinji maa e zhe no ofwo tụkwụna, M mepi shi kaa maa iwe mi aa twatwagwụ-unu iwɛ maa e mepi iyi iwɛ nɛ maa a n njɛ o. Ɛɛ hiɛŋ, Mizha ti jeji ma ụ'wụ'wụ ata na aka na tu waa ta 'yajɛ tụ'walụ;[24] mizha ti becinji bu ma na cɛnjɛ ta atwa na a ya uraiŋ.

²⁰Nazhɛ Ngɛɛ hiɛŋ, Oo AGWANGWAMA na Hwuri Kpaaŋ, gabụ na ba duma ụshɛrɛya na namɛ shiriri gabụ kaa ba manga shɛmɛ sha atwa keeni shihaŋsa sha aba. Ni i'ɛlɛ bu Ngee shiyeni iwe mi; N ngbaracɛ ya gana na ɛbi zhɛ ba nda itɛpwɛ mi no ofwo atwa ata.

²¹Iwɛbɛ po AGWANGWAMA jɛmɛ iwɛ ne etwenyi Anatot[25] a na a jalakaka maa a n kwụnɛ, bɛɛ hiɛŋ, ɛ hiɛŋ, Ta tu dumangana ya tigesere ni izeci ya AGWANGWAMA o, shibwonu ti zhɛ ta bu kwụna ni ikɛnyi tu.

²²Ibɛ po AGWANGWAMA na Hwuri Kpaaŋ jɛmɛ, bɛɛ hiɛŋ, N zhɛ ma pana aŋ ulwapɛ! Esemberi aba zhɛ o 'wo nu utokwobi ujasa; imunɛ-tiya zhɛ ya kwụna miaụŋ ma aba me eyi na mu na mo o.

²³N shilwo uywa na maa ma shapɛrɛganɛ atwa Anatot ufwu wa aba tɛnda, aka na aka ata ci, i zasa bụtụ aba be elele zhɛ ba vwa ya o.