Read bassa JƐRƐMIA 13 Bible Online

JƐRƐMIA 13 - bassa bible

JƐRƐMIA 13

¹AGWANGWAMA m mbishi, bɛɛ hiɛŋ, Zhaga sa tugwuno te embi ti ilinɛn maa rɛ ne embi bu; bɛɛ hiɛŋ kede mo lono maa ti timengeni meni o.

²Ngoo so ga tugwuno ta ata te embi nu gana na ta AGWANGWAMA n sokokono, Ngaa rɛ tụ ga ne embi mi.

³Nazhɛ AGWANGWAMA dumananɛ iwɛ ne mi na aka yebi, bɛɛ hiɛŋ,

⁴Shapa tugwuno ta ata obu so abɛ rɛ ne embi bu, maa zhe nu Urefu Yufretis[30] maa intanɛ tụ na tụbagwụ tu ko tu uparatayɛ.

⁵Ngee zhe ga Ngaa intanɛ tụ to dongonu Urefu ata Yufretis, nu gana na ta AGWANGWAMA m peni-unu.

⁶Na aba na ti yee ilegeji, nazhɛ AGWANGWAMA m mbishi, bɛɛ hiɛŋ, Gwulo ni Yufretis maa bwɛ tugwuno ta ata te embi Ngee bi peni la unu maa intanɛ apata.

⁷Ngee gwuri ga ni Yufretis, Ngɛɛ bwɛ tugwuno ta ata no olugwo ata Ngaa intanɛ tụ la, Ngaa kwụbɛ maa tu fwoshi, tɛ zhɛshɛ ya uhwara tɛnda o.

⁸Nazhɛ AGWANGWAMA m mbishi sasana, Bɛɛ hiɛŋ,

⁹Gana ga Ngɛɛ zhɛ me iricingo[31] unyangana u Juda keeni unyangana ụ'wụtụ wa atwa Jɛrusalɛm.

¹⁰Atwa ga awɛ a na lacɛ unu mu tuhwuga, ɛ zhɛ a sha gana tugwuno ta ata te embi tɛ njɛ ufwu hwɛ hwɛɛ. A nda iyi no tuhwotono ta shɛmɛ sha aba, aa zhɛba tuwa aa ndana tụ iyi.

¹¹AGWANGWAMA hiɛŋ, Gana na to tugwuno ta ata te embi ta sụlụpana embi dimi, gabata du Ngaa njɛ maa ga atwa Isrɛl kpaaŋ keeni atwa Juda a n sụlụpanɛ dimi. N njɛ ijɛ iwɛ maa a shɛ atwa mi a na zhɛ ne me sugeni ashɛtwa, nụ ụjɛrụma tumuna; ama a hwụjɛ shɛ kaa unu mu o.

¹²Nazhɛ AGWANGWAMA na shɛ Agwatana Isrɛl n hiɛŋ, Zhaga, mbiso atwa Isrɛl maa go ututu meni ma afwafwa we elele u shini ne meni ma afwafwa. Ɛ zhɛ mɛ bi jishijɛ, ɛ hiɛŋ, Ti ge mepi shi suu maa ututu meni maa afwafwa we elele ụ shɛ wo shino ne meni ma afwafwa?

¹³Nazhɛ ɛ bi zhɛ bo mbiso aŋ, bɛ hiɛŋ, Gamba AGWANGWAMA, N hiɛŋ, N zhɛ ma sụla atwa cɛnjɛ tu ga meni ma afwafwa uuwa i ci aka na maa ngba aŋ: ta shɛgwuma shɛ na shɛ jɛjɛ ni idwɛtwɛ Devid, to onongbo, te egesere keeni atwa elele na namɛ nu Jɛrusalɛm.

¹⁴AGWANGWAMA hiɛŋ, N zhɛ ma swananga bụtụ bụtụ na binya bwa, te eshi, ta miaụŋ-me-eyi hwɛɛ. N zha shɛ ma nda uwanyi kwo kaa inyɛmɛnyɛmɛ ya aba o, okwo iwɛ tumapa zasaba nɛ zhɛ ma n kapana aŋ tụkwụna o.

¹⁵Ahiɛba atwa Isrɛl, AGWANGWAMA dumwa iwɛ, bɛɛ hiɛŋ, To momo mungicingo ma o.

¹⁶Muna ma AGWANGWAMA na shɛ Agwatana hiŋ ụjɛrụma, tobwolo bi te keri shi tishi o, tobwolo hi ta twa sụ udukwutwa nu nshama o; tobwolo bi te sheyinji shi uhioko-uhwaŋna na ahiɛ ga shɛlanɛ maa ụ shɛ tishi ti tizhuuŋ o.

¹⁷Ama yaa shɛ ahiɛ shɛlajɛ shɛ iwɛ ubwa, asha N zhɛ ma twa-u'wo ne tusweci iwɛ unyangana hiŋ na ahia nda; N zhɛ kaa ma twa-u'wo gboo, maa malaba mi mi mu na fwunga, iwɛnɛ te e suji agwụdụ AGWANGWAMA e zhe na ti'ima.

¹⁸Ibɛ po AGWANGWAMA n hiɛŋ, Mbiso agwuma keeni bino bwa maa; pashangwụ ma nụ n-ndwụtwụ mi hiŋ, iwɛnɛ po adara hiŋ a na pilanụ pashangwawa no ohiuhiu hiŋ.

¹⁹O hwolwo ashɛpwụ na namɛ tuta tu Juda, i zasa bụtụ okwo bu ko na eri ba bana ya o; o sugwo atwa Juda kpaaŋ oo hwulwo na cɛnjɛ ti nya, i zasa bụtụ okwo bu ko ta vwɛ ya o.

²⁰Gabụ gɛ Jɛrɛmia, shapa eshe maa kwụbɛ, atwa i'ime hiŋ banɛ ba tuzuba ee ci! Cee agwụdụ ata ee bu utegeni maa 'imɛ u'ala namɛɛ? Agata aba busa iwɛ aba.

²¹Imbe ɛbi zhɛ bɛ hiɛŋ na aka na ta atwa na ebi ge heŋshi maa aba shɛ eyejilo bu, a bụ lasụ, aa shɛ ya a'yagajɛ bụụ? Bi zhɛ bu na hwuga ya ụngwụ gana te biyikwo na ụngwụ tumata to.

²²Yaa shɛ ebi meme heŋteni, ɛbi hiɛŋ, Iwembe kwuŋ po ijɛ kpaaŋ i n vwutengenii? Asha iwɛnɛ ti iwɛwɛ bu hwuleji ugombo. Iwɛbɛ po tugwuno tụ bụ tu dwatwagwụ, aa ma bụ nda ya u'ala-tuhwulo.

²³Bụtụ bi shi suu eri ba nda maa tu'waba tu bwa ti shenjemi? Kwo kaa ugebi suu eri wo sheyingo tubana tu bwa? Yaa shɛ ee eri a nda gana ata, asha nazhɛ ehi eri du hia nda iyi nɛ teni cɛŋ ahiɛba na hi nyiwonowuŋ ni iyi iwɛ tɛnda.

²⁴AGWANGWAMA zhɛ[32] ma hi garataga[33] gana na tu uvwugo na banɛ nụ ụshɛka wo sugo afụrɛkɛcɛ.

²⁵AGWANGWAMA hiɛŋ, Inɛ gɛ ibɛ zhɛ ya sha urobwo hiŋ. Inɛ gɛ ibɛ be heŋshi maa ma hi nda, iwɛnɛ ti isɛbwɛ ibwɛ ihi 'wi, ahiɛ tɛtanɛ kaa tuwa tu tukata rishe.

²⁶AGWANGWAMA hiɛŋ, N zhɛ mo bu tufwurungo tugwuno, maa mo bu shilo mohondo ne ezuye.

²⁷N hi kwụbwa ta ahia nda iyi nɛ Omo imo. N hi kwụbwa ta ahia 'watatagwụ tuwa ne tikpekwu keeni shihilo, gana bụtụ na ba nda ukwedeyi maa ba 'wa biyikwo bu uyebi ubwa kwo kaa gana uwɛwɛ nɛ yo yingono biyikwo. Oo ahiɛba atwa Jɛrusalɛm, hi zhɛ hia nda hwuŋ adangboo! Aka naa ɛhi zhɛ hia nama shɛshɛshɛɛ?