Read bassa JƐRƐMIA 17 Bible Online

JƐRƐMIA 17 - bassa bible

JƐRƐMIA 17

¹AGWANGWAMA hiɛŋ, Ahiɛba atwa Juda, e 'nyeci iwɛwɛ hiŋ na bukwa bụ ụshɛmbɛrɛ; ee seberenji utayɛ Daimond ee 'nyeci na shɛmɛ shi hiŋ keeni mahiuaŋ mo otukwu-ụrụpɛ hiŋ.

²Okwo miaụŋ mi hiŋ me teyinje otukwu-ụrụpɛ keeni ụsụbwa tuwa ta ata ɛɛ hiɛŋ, Ashɛra, tu gata aa njɛ ee shikecenji ni ihiŋhiŋ tikpekwu, to dongonu i'wɛ'wɛ ɛtɛ turumo rumo,

³keeni ihiŋhiŋ nshama mu na mu namɛ na cɛnjɛ tu udadarɛ we ehilo. N zhɛ ma nda maa ga atwa i'ime hiŋ suji uduciya keeni uzhɛgba hiŋ gana ufwa ujasa iwɛ iwɛwɛ ye elele nɛ ahiɛ njɛ[35] na cɛnjɛ ti hiŋ kpaaŋ.

⁴Hi zhɛ hia pana atwa i'ime hiŋ ogwu cɛnjɛ tu ga Ngee hi peni, N zhɛ ma hi nda maa hi na ndana atwa i'ime hiŋ iyi na cɛnjɛ tu na ehi mepi shi kwukwuŋ, iwɛnɛ ti isɛbwɛ mi i shɛ gana ulwa, i zhɛ kaa no gorogo unyizo-nom.

⁵AGWANGWAMA hiɛŋ, N zhɛ ma kalana bụtụ na vwụrɛ n genji unu, na patanɛ ukpahiŋ butugwumwa na bo 'wo rishe.

⁶Bɛ shɛ gana ukokoto na namɛ nụ ụshɛka, na wa waŋna nụ ụshɛka uhwoo, na cɛnjɛ ta manɛ tu na iyi inyɛ ye elele ụnshɛ shɛ. I zasa iyi ibiye ye elele nɛ zhɛ ya zhaganɛ bụ kwukwuŋ.

⁷Ama N zhɛ ma pana bụtụ na ma n patana-rishe na kaa njɛ ohwulu ubwa oko ne mi uwebiye.

⁸Bɛ shɛ gana ụ'wụ'wụ na aa bɛrɛ ni ipɛlu meni, unaa na tini tu bwa tu zwi nu uhwulwo. Ụ njɛ shɛ inyɛsɛ ubata, ambɛ ubwa kaa namɛ yakwaa aka elele; Okwo eshilo ngbi shi i te shi uŋ o; u zhɛ na 'wala waa aka elele.

⁹Amɛ bụtụ 'yajɛ tuhalakaka ee hwuri iyi elele, ụngwụ wa aba wa sha bụtụ inyɛsɛ, ụ hwụjɛ shɛ unibi, gaaba kaa eri ba mapa aaŋ?

¹⁰Gamba AGWANGWAMA, ma dwalakaka iyi nɛ namɛ na shihaŋsa sha atwa, Ama manga kaa shɛmɛ sha atwa. Ma tụpa bụtụ bụtụ te teni cɛŋ nu uhwaŋna na baa namɛ, te teni cɛŋ kaa ni iyi nɛ baa nda.

¹¹Bụtụ na ba sha bɛzhɛgba nu uhwaŋna wo orugwusu, bụ sụbɛ ụnụnụ na wa hwakana anjɛ na ba 'wɛŋ shɛ. Bi zhɛ ba vwunga uduciya ata ubwa na ashashɛ uraiŋ ubwa tiya, bi zhɛ kaa ba sha alagwụ na aka ukwunanga ubwa.

¹²Ohwolu tijilo Agwatana tu a shɛ gana idwɛtwɛ ụjɛrụma, i shikeni ni ishɛmɛ nɛ zeci te kwuni nu umozhigo.

¹³Oo AGWANGWAMA, gabụ atwa Isrɛl shɛlanɛ; atwa elele na ubu jineci ezuye zhɛ a sha aŋ. Ɛ zhɛ o hwuwowu gana izeci nɛ ee 'nyeci nu upwupwutu,[36] iwɛnɛ te e bi jineci gabụ AGWANGWAMA na shɛ umɛzhinjɛ meni mu uumwa.

¹⁴Oo AGWANGWAMA, n nɛnjɛ maa Ma zhɛmanana hwɛɛ; m bicinji maa Mo bino gom. Gabụ kaa Ama shɛtana!

¹⁵Nazhɛ atwa ata n hiɛŋ, Cee n-ndumwa ma AGWANGWAMA mu namɛɛ? Ga zhajɛ na muba hwuwayɛ go!

¹⁶Ama AGWANGWAMA, M bu uranjɛ shɛ maa shapɛrɛganɛ aŋ iyi iwɛ kwukwuŋ;[37] i n kwụlanɛ shɛ du kaa maa i 'yaga aka na ɛbi zhɛ ba pana aŋ amɛ-tụhaŋtụ o. AGWANGWAMA, bi mepi ijɛ; iyi elele nɛ kaa banɛ nu unu mu ibu swakanɛ shɛ o.

¹⁷To no mo holono; gabụ bɛ shɛ ofwo mi tuswaka aka na ụbaụta zhajɛ.

¹⁸AGWANGWAMA, ga ụpụrụsa 'imɛ atwa na ma n shɛka, maa u n hebi tuba. Zwono aŋ ohwulu tuhoroko, ama kede tuba ohwulu no mo horoko. Shapɛrɛganɛ aŋ iyi iwɛ maa bwereteji aŋ wunzu wunzu.

¹⁹Nazhɛ AGWANGWAMA m mbishi, bɛɛ hiɛŋ, Zhaga shikono no odubo ata shɛgwuma[38] shu Juda sho tono, shaa bana. Na aba ibɛ zhaga shikono no odubo elele na namɛ nu Jɛrusalɛm.

²⁰Mbiso shɛgwuma keeni atwa Juda kpaaŋ keeni bụtụ be elele na namɛ nu Jɛrusalɛm a na o tono no shidubo sha ata, maa, Hwuga ma n-ndumwa ma AGWANGWAMA.

²¹AGWANGWAMA hiɛŋ, Yaa shɛ ohio lubo araiŋ hiŋ, asha ta 'waŋna ma i'wɛŋnɛ ye elele nụ Ụjita-ụhinjanụ maa hi duri shidubo sha ata shi Jɛrusalɛm kwukwuŋ.

²²Ta 'waŋna ma i'wɛŋnɛ ye elele maa hi beni no shimwono shi hiŋ nụ Ụjita-ụhinjanụ o. Ta nda ma kaa du ugondu we elele nụ Ụjita-ụhinjanụ kwukwuŋ. Ne teyinje uŋ ma maa ụ shɛ ụjita tijilo, gana na Ngee peni la eshi hiŋ unu.

²³Ama okwo ti yaa shɛ gana ata, eshi hiŋ shiri shi acɛbɛ ni iwe mi o, a shɛlajɛ shɛ kaa iwe mi o. Ama e hweteni; a hwụjɛ shɛ unu mu maa e seshi no olugwo mi o.

²⁴AGWANGWAMA hiɛŋ, Yaa shɛ ahia hwuga-unu mu tebiye, ahiɛ 'waŋnɛ shɛ i'wɛŋnɛ ye elele maa hi duri shidubo shɛ ụshɛpwụ ga nụ Ụjita-ụhinjanụ. Ehi shiyeni kaa Ụjita-ụhinjanụ eshe ne tijilo maa kede hiɛ njɛ ugondu we elele kwukwuŋ jita ata o.

²⁵Nazhɛ shɛgwuma[39] shɛ na shɛ jɛjɛ ni idwɛtwɛ Devid shi zhɛ sho tono shidubo shi Jɛrusalɛm, ne ehiu aba. Atwa Juda keeni atwa Jɛrusalɛm, ɛ zhɛ a suka ihɛŋtu ujasa keeni idɛkwɛ hwɛɛ aba, atwa kaa zhɛ no shino nu Jɛrusalɛm unyizo-nom.

²⁶Atwa zhɛ a bananjɛ na ashɛpwụ Juda, ɛɛ zhɛ a bananjɛ na shɛngwuwa shɛ na shi rungwutwonu Jɛrusalɛm; ɛɛ zhɛ a bananjɛ no tugwungwu ti Bɛnjamin, ɛɛ zhɛ a bananjɛ ne embi tikpekwu, ɛɛ zhɛ a bananjɛ na cɛnjɛ tu nshama, ɛɛ zhɛ a bananjɛ tuta tu Juda. Ɛ zhɛ a 'waŋnanɛ Umwono mu arụpɛ tuhwoŋzhingo keeni arụpɛ avwɛ, nụ ụrụpɛ tiya, ni iturɛre keeni apwaŋ a'walụ.

²⁷Ama yaa shɛ ahiɛ hwụjɛ shɛ unu mu maa hi shiyeni Ụjita-ụhinjanụ eshe ne tijilo, maa kede hi na 'waŋna i'wɛŋnɛ ye elele maa hi duri shidubo shi Jɛrusalɛm nụ ụjita ata kwukwuŋ. Asha N zhɛ ma sapa shidubo shi Jɛrusalɛm ulwa. Ulwa ata kaa zhɛ wo hwoŋzhingo ofwo ofwo nu Jɛrusalɛm, i zasa kaa bụtụ be elele zhɛ ba ala uŋ tu'woricingo.