Read bassa JƐRƐMIA 2 Bible Online

JƐRƐMIA 2 - bassa bible

JƐRƐMIA 2

¹AGWANGWAMA m mbishi, bɛɛ hiɛŋ,

²Zhaga anangana bụtụ be elele na namɛ nu Jɛrusalɛm utumwa ga maa, N teyinje tɛcara tụ bụ na aka na abu ta shɛ la usemberi, gana na obu mo n lubo la na aka ihiiŋ na ta ata nda tụmbụla, bu n 'wa no tudulogo tụ ụshɛka, no tudulogo ta cɛnjɛ tu na aa bɛrɛ shɛ iyi.

³E-Isrɛl, Gamba Ngooko kiri m bu 'yajɛ; gabụ bɛ shɛ iyi mi tijilo nɛ Ngaa 'yajɛ. Bụtụ be elele na ibi timengeni, N zhɛ ma tumwananɛ bụ ụbaụta, n-ndumwa kaa mi zhɛ ma wụma bụ. Gamba AGWANGWAMA, N dumwa

⁴Oo ahiɛba ajalalo Jekob keeni alamụ Isrɛl,[1] shɛlaga ma n-ndumwa mu na AGWANGWAMA jɛmɛ.

⁵AGWANGWAMA hiɛŋ, Orugwusu imbe eshi hiŋ n kwụbɛtanɛ upo e n genji taa dụlụ, aa 'watatagwụ tuwa tu tusashɛ, maa aba du ni ikɛnyi aba a shɛ iyi tusashɛɛ?

⁶A hiaŋshɛ maa, Ce AGWANGWAMA na iti bɛcinjɛ la na cɛnjɛ ti Ijipti, na ti 'yagajɛ nụ ụshɛka, na cɛnjɛ tu uzhi, keeni a'ibwa, na cɛnjɛ tu ubata keeni tishi tu mo inswo, na cɛnjɛ tu na bụtụ be elele duri shi, tu na bụtụ be elele zasaba namɛɛ?

⁷N suje aŋ Ngee tecinji na cɛnjɛ tu na iyi barɛ, maa a yɛ tụ'walụ keeni iyi ibiye ye elele nɛ namɛ na tuba. Ama aka na te e teni na tuba, ee heshigeni cɛnjɛ ti mi, aa njɛ iyi-tupwaŋ ni iyi-yo-ogwu mi.

⁸Onongbo heŋteni shi maa, Ce kwuŋ AGWANGWAMA namɛɛ? Atwa na untanganɛ undwa, e m mepi shi; ehiu[2] bweji undwa mu; egesere a duma iwɛ ni izeci Beal, aa zhɛba tuwa tu tusashɛ.

⁹Iwɛbɛ po AGWANGWAMA jɛmɛ, bɛɛ hiɛŋ, N ta 'yajɛ udumanga ne hiŋ, N zhɛ mo 'wogo na miaụŋ mi hiŋ, keeni ajalụ hiŋ.

¹⁰Zhaga ma geri bu uwaŋna-banụ, na cɛnjɛ tụ ụdakwụ Urefu Saipros, maa hiɛ tumwanɛ bụtụ bu ko maa zha geri bu uwaŋna-twonuo na cɛnjɛ ti Kida. Hi zhɛ hia kwụba maa iyi gɛnɛ gɛ i ta njɛ shɛ la kwukwuŋ.

¹¹Edenji o sheyingo suu tuwa ta aba, okwo ti ta shɛ shɛ iyi tɛkana? Ama atwa mi o mo n sheyingo, Gamba Agwatana na m peteni aŋ ụjɛrụma, iwɛ tuwa tu na ti eri shi ta ndana aŋ iyi elele.

¹²Iwɛbɛ po Ama pana tụla unu, Gamba AGWANGWAMA, maa go ti zhingotu, maa tɛ njɛ iyi tudama keeni iyi nɛ yo horukono bụtụ ohwulu iwɛ ijɛ,

¹³iwɛnɛ ta atwa mi njɛ iyi iwɛ iyebi: e n jineci Gamba na n shɛ umɛzhinjɛ meni mu uraiŋ, ee meme hinenji a'ibwa meni, a'ibwa na bwaratagwụ, anaa na meni mi eri shi mo sho na aba kwukwuŋ.

¹⁴Ge Isrɛl suu shɛ bujama na oo so? Bɛ shɛ suu yɛu-ugondu nɛ ee meci ni ihwɛ? Asha iwembe po ya tuba atwa i'ime ibwɛ a shapa bụ gana ufwa ujasaa?

¹⁵O ngwulono bu gana izeci; aa njɛ cɛnjɛ tu bwa osombo, ee hwuŋzetenji ashɛpwụ ubwa hwɛ hwɛɛ, uzawa bụtụ tunama ya.

¹⁶Shɛ inɛ ɛtɛ kiri o, etwenyi Mɛfis keeni a na Tapanhis e bwereteji ukokolo uhiuhiu ubwa.

¹⁷Ahiɛba atwa Isrɛl, shɛ ahiɛba suu hi mɛmɛ kpɛnjɛ inɛ gɛ ni ikɛnyi hiŋ? No tijinoko tu na ehi n jineci Gamba AGWANGWAMA na shɛ Agwatana, na aka na ta Ama hi 'yagaga nu uhwaŋna ata.

¹⁸Hwuwayɛ go, imbe i shɛ ule na ahiɛ yɛ na tizha ti Ijipti maa, hi swe meni mu Urefu Nayɛl yaa? Kwo kaa imbe i shɛ ule na ahiɛ yɛ na tizha ta Asiria, maa hi swe suu meni mu Urefu Yufretis?

¹⁹Tugworozwo ti hiŋ, tuba ti zhɛ tu ma hi pana ulwapɛ, tugwulo ti hiŋ ne ekwunyi maa hi n genji, ti zhɛ to hi vwulo. Hi zhɛ hia mapa, ɛhi zhɛ hia kwụba maa i shɛ iyi iwɛ keeni iyi nɛ wumanjɛ maa hi n jineci Gamba AGWANGWAMA na shɛ Agwatana hiŋ, maa hi nama ya zawa tɛcara ne mi. Gamba AGWANGWAMA na Hwuri Kpaaŋ N dumwa.

²⁰AGWANGWAMA na Hwuri Kpaaŋ hiɛŋ, Ahiɛba atwa Isrɛl, hi lacɛ ụhwada mu cala, ehi jineci unu mu tuhwuga maa hi na ma zhɛba. Ahia zhɛba tuwa ni ihiŋhiŋ tikpekwu, keeni ecilo i'wɛ'wɛ turumo rumo ye elele.

²¹Gamba n hi bɛrɛ gana bụzagwụ bu ufwafwa bu umudu na Ngee teri, bu naa na zhɛmɛ tebiye. Ama mbiyana ma de iyi nɛ ahiɛ shɛ ya! Hiɛ shɛ ya gana ukparɛ ufwafwa we ehilo na fwoshi.

²²AGWANGWAMA na shɛ Agwatana hiɛŋ, Okwo ahiɛ dụrɛ meni nu ukwo we elele na 'yajɛ ikɛnyi uhwuri una vwɛ hwɛɛ, N tɛ zhɛ ma kwụba waa tiri ta tụwụma ti hiŋ.

²³Gana na ehi eri hiɛ hiɛŋ maa hi meme heshigeni shi, maa hi zhɛbɛ shɛ tuwa ti Beal kwukwuuŋ? Mbiyana ma iwɛwɛ nɛ ahiɛ njɛ nu ulomu ata, kwụba ma iyi nɛ ahiɛ njɛ. Hiɛ shɛ gana biywoywo bi irihende yo o nɛ yo gozhigo beye bana,

²⁴hiɛ shɛ gana izhinyɛci[3] ye ehilo yo o nɛ yo sumono mpiala mu ukwedeyi ubwa[4] nụ ụshɛka. Gaaba te eri bo ngwuricingo ukwedeyi ata ubwa na aka ataa? I zasa izhinyɛci ye eyi ye elele nɛ tɛ zhɛ ya nda ya ụbaụta maa dwalakaka bụ o, ɛ zhɛ a ta bu ugbe ta aka ci maa o woto nu bwa.

²⁵Ahiɛba atwa Isrɛl, ta buranga ma shivwɛvwɛjɛ shi hiŋ kwo kaa maa urworwo hiŋ hweteni ni i'uyɛ na tuwa tụ'watatagwụ o. Ama hi hiɛŋ, Awo! Ti eri shi te gwure ya o, iwɛnɛ oto lubo tuwa ta ata ta agaiŋ, tuba kaa ɛti zhɛ ta 'wa.

²⁶AGWANGWAMA hiɛŋ, Gana na te ezuye a sha buzundo na aka na ta a i'mɛ bụ; gabata du ezuye zhɛ a sha atwa Isrɛl elele, ta aba, ta shɛgwuma sha aba, te ehiu aba, to onongbo aba, te egesere aba.

²⁷Ụpụrụsa zhɛ ma hi ima kpaaŋ hiŋ, gabụ na bi hiɛŋ ụ'wụ'wụ, Gabụ bɛ shɛ bishi mi, Ɛbi hiɛŋ utayɛ, Gabụ bɛ shɛ bino mi. Iyi nɛ zhɛ mo hi vwutono iwɛnɛ ehi n genji, ehi gwuri shi pi mi na: Aka na ahiɛ namɛ na amɛ-tụhaŋtụ, hi zhɛ hi mɛ n hiɛŋ, Zhajɛ iti bicinji kaa!

²⁸Ce tuwa ta ata ahi mama ndanɛ ti tilenii? Aka na ahiɛ namɛ na amɛ-tụhaŋtụ, yaa shɛ tuwa ta ata ti eri, gɛ ti ishijɛ maa ti hi bicinji! Oo ahiɛba atwa Juda, tuwa ti hiŋ ti gembi ufwugwo i ci gana na ta ashɛpwụ hiŋ gembi ufwugwo.

²⁹AGWANGWAMA hiɛŋ, Iwembe po ahi ma n gagwụmanaa? Hi ma n tana kaa tigezhe hwɛɛ hiŋ.

³⁰Tɛgadaga Ama hi pana ulwapɛ, hi leni shi maa mo hi mbisogono iwɛ o. Hia kwụna egesere hiŋ nu utokwobi, gana na bizeci ba abwagara ba kwụna iyi.

³¹Ahiɛba atwa Isrɛl, shɛlaga ma iwɛnɛ Ngaa jɛmɛ. Ụshɛka suu Ngaa hiɛ shanɛ, okwo gana cɛnjɛ te tishi tu na ti inshi? Asha iwembe po ya atwa mi hiɛŋ, Tu mama 'yajɛ ya, ti zha shɛ te gwure ya pụ bụ kwukwuuŋ?

³²Isɛbwɛ suu eri yo 'wo yɛu-yo-o nɛ ta cɛnɛ shɛ iwɛ i'wɛŋnɛ ibwɛ i tisemberi? Kwo kaa isɛbwɛ suu eri yo 'wo biyikwo bu ufwo iwɛ i'wɛŋnɛ ibwɛ i tu'urugono no towo tu bwa? Ama kaa isɛbwɛ mi 'wi atwa mi aka na zasa ya tɛrɛta.

³³Hiɛ njɛ ti'imanganga ti hiŋ ta zhɛmɛ tebiye, iwɛ maa hi jelekeci tulubo, maa hi mbisogono du okwo eyikwo ɛ ci'nyɛ tugwoni ta ata ti hiŋ.

³⁴Okwo mehieŋ mo okofwo keeni atwa na i'ɛlɛ ya aba zasaba na tijama, o to mu ugbe no tugwuno ti hiŋ, okwo ta ahiɛ 'imɛ shɛ aŋ ta a bwada shimwono. Ama kaa okwo ta ahiɛ njɛ ijɛ hwɛɛ,

³⁵ɛbi hiɛŋ, I'ɛlɛ mi zasaba na tijama o, isɛbwɛ ya AGWANGWAMA zha shɛ ya zhajɛ pi mi kwukwuŋ. Ama Gamba AGWANGWAMA, N zhɛ ma bu pana ulwapɛ iwɛnɛ ebi teri ashamanjɛ, ɛbi hiɛŋ, N njɛ shɛ iwɛwɛ o.

³⁶I bu shanɛ iyi ticwɛŋ to bo sheyingongo uraiŋ bụ na tụ'watatagwụ ta-tuwa te edenji anya. Ezuye zhɛ ma bu sha ni Ijipti, gana na ta a bɛ shɛ la na Asiria.

³⁷Iwɛ ecilo ga ibɛ ɛbi zhɛ ba banɛ apata ni i'ɛlɛ tupatangana nu uhiuhiu,[5] iwɛnɛ po Gamba AGWANGWAMA, N jinokwo atwa ata a na abu ta patanɛ-rishe, tu'wa tu na abu 'wa tụ, ti eri shi ta nda maa ibu zhɛmanɛ o.