Read bassa JƐRƐMIA 3 Bible Online

JƐRƐMIA 3 - bassa bible

JƐRƐMIA 3

¹AGWANGWAMA hiɛŋ, Yaa shɛ[6] bụtụ becinji biyikwo bwa, biyikwo ata beni no olugwo ubwa baa cɛnɛ binya bụtụ. Bi tɛ zhɛ suu be jicinje bu sasana? Inɛ ɛtɛ suu zha shɛ ya hashɛgana cɛnjɛ hwɛ hwɛɛ? Ama ahiɛba atwa Isrɛl, hiɛ cɛnɛ olwo ofwugwo, hwuwayɛ go hia jala kaa maa hi gwure no ofwo mi.

²Shapa ma eshe maa hi mbiyanɛ ihiŋhiŋ tikpekwu! Cee ee weci shi ne hiiŋ? Hi ubegeni nụ ụzalụ uhwaŋna ahiɛ 'yacɛ atwa hiŋ tulubo gana Bu'arab[7] na ba nda ashɛlatụ maa pana atwa ụbaụta nụ ụshɛka. Hi heshigeni cɛnjɛ tu ga na tuwɛle ti hiŋ.

³Iwɛbɛ po eshilo ngbi shi, okwo ɛgbɛrɛshɛ kaa njɛ shɛ o. Okwo ti yaa shɛ gana ata, bụtụ be elele na ihiɛ kwụbɛ, hiɛ shɛ gana buwɛle, hiɛ lacɛ kaa maa hiɛ njɛ ezuye.

⁴Hwuwayɛ hi mɛ n hiɛŋ, Bishi tu, gabụ bu mo tu lubo cala cala, taa nɛ tiyɛu tu tu.

⁵Atwa Isrɛl, hi mo n hoŋtono, ɛhi hiɛŋ, Ba nda suu isɛbwɛ tutu? Ba untangana suu iwɛ unyizo-nom? Ama ahiɛba kaa hia nda iyi iwɛ gana elele na ehi eri hia nda.

⁶Na aka na go Josia shɛ agwuma, AGWANGWAMA m mbishi, bɛɛ hiɛŋ, Bu kwụbɛ iyi nɛ atwa Isrɛl a na shɛ shɛ biyikwo bi tɛcara njɛ hŋ? E n genji ee zhe ne bikpekwu be elele na zeci keeni ucilo ụ'wụ'wụ we elele na namɛ rumo rumo, aa mama njɛ gana biyikwo na meme sengeni etwenyi.

⁷N nge heŋshi maa na aba na ta a njɛ ijɛ kpaaŋ, ɛ zhɛ e gwure pi mi tilɛɛ, ama e gwuri shi o. Bụngwụfwụ bwa go Juda na shɛ shɛ biyikwo bɛ tɛcara bụ kwụbɛ iŋ.

⁸Go Juda du kaa kwụbɛ ti Ngee 'nyeteni atwa Isrɛl utakada u tubacɛnga, Ngee unzhi aŋ iwɛnɛ ee n genji aa nda tuwɛle. Ama go Juda bụngwụfwụ Isrɛl na shɛ shɛ du biyikwo bɛ tɛcara, bɛ njɛ shɛ waa inyɛsɛ o. Baa shɛ du bɛnjɛ-bu-tuwɛle.

⁹Tuwɛle tu bwa kaa tɛ shanɛ bụ iyi ticwɛŋ, bee heshigeni cɛnjɛ na tuwɛle tu bwa tedure na tɛzhɛba ta atayɛ keeni ma ti ti i'wɛ'wɛ.

¹⁰Gamba AGWANGWAMA N dumwa, Ngɛɛ hiɛŋ, Okwo ti ijɛ shɛ gana ga kpaaŋ, go Juda, bụngwụfwụ Isrɛl, na shɛ shɛ biyikwo bɛ tɛcara, ubwa kiri gwure pi mi na tɛnda te eshe, shɛ no tukpororo.

¹¹Ibɛ po AGWANGWAMA n hiɛŋ, Okwo ti ge Isrɛl n genji, bu mbiseni tudobogo ta tụwụma tu bwa bee hwuri Juda na shɛ shɛ bụtụ bɛ tɛcara.

¹²AGWANGWAMA hiɛŋ, Zhaga mbiso Isrɛl maa, Gabụ ge Isrɛl na zasa cara, gwure pi mi. Iwɛnɛ po Mo hioko inyɛmɛnyɛmɛ, N zha shɛ ma nda isɛbwɛ o. N zha shɛ kaa ma uranga isɛbwɛ tɛnda na bụ tutu unyizo-nom o.

¹³Gamba AGWANGWAMA N dumwa, Ngɛɛ hiɛŋ, Lono tụwụma te tigezhe tu na abɛ njɛ no ofwo mi na shɛ AGWANGWAMA na shɛ Agwatana bụ. Iwɛnɛ po ecilo i'wɛ'wɛ turumo rumo elele aba obo lubo keeni tuwa ta agaiŋ, ama bụ hwụjɛ shɛ unu mu o.

¹⁴Ahiɛba atwa na shɛ shɛ atwa tɛcara, gwure ma pi mi; Gamba n hi 'yajɛ. N zhɛ ma shapa bụtụ hiŋ bu ko nụ ụshɛpwụ ụshɛpwụ keeni atwa hiŋ eyebi yebi nu umwamwa umwamwa; maa mo hi gwuricingo ni Ishɛmɛ Zayon.

¹⁵N zhɛ ma hi pana angbaracɛ a na kwụlanɛ ahaŋsa mi, ɛ zhɛ kaa ma hi ngbaraka na ti'inta keeni ti'eshicigo.

¹⁶Nazhɛ aka na ta ahia kaana ufwugwo na cɛnjɛ ta ata atwa zha shɛ na dumanga ya iwɛ Ikpɛtɛ mi Unu Tutwa o. Iwɛ ibɛ kaa du zha shɛ ye teni ya na shihaŋsa sha aba o, a zha shɛ kaa du e teyinje ya iwɛ ibɛ o, ukekeshi ibɛ kaa du zha shɛ wa ta aŋ o, a zha shɛ kaa a ndaanana ya inyɛ o.

¹⁷Aka na ta aka ata ci hwuŋ, ɛ zhɛ nɛ hiɛŋ, Jɛrusalɛm, ubwa shɛ Idwɛtwɛ ya AGWANGWAMA, edenji elele zhɛ o sotulonu apata maa a na ma n zhɛba. A zha shɛ na nda ya iyi iwɛ nɛ shɛmɛ sha aba shɛ na shi hweteni sha ana aŋ tɛnda o.

¹⁸Aka ata ci hwuŋ, atwa Isrɛl zhɛ a zhagaga na atwa Juda, hwɛɛ aba zhɛ a banɛ na ti'ima nụ ụzalụ tuzuba, ɛɛ zhɛ e gwure na cɛnjɛ tu na Ngee peni la eshi aba maa tɛ shɛ iyi-yo-ogwu ya aba umɛwɛɛ.

¹⁹AGWANGWAMA hiɛŋ, Ahiɛba atwa Isrɛl, Ma jala maa ma hi lashɛga gana miaụŋ-me-eyi, maa ma hi pana cɛnjɛ tu unyasa ụ'wụtụ, cɛnjɛ tu na tu pilanụ tu hwuri cɛnjɛ te elele tu na tu namɛ nu unyizo ga kpaaŋ. Ma jala maa hi nɛ mɛ hiɛŋ, Bishi tu, maa kede hi n genji ya kwukwuŋ.

²⁰Oo ahiɛba atwa Isrɛl, gana na te biyikwo na shɛ shɛ biyikwo bɛ tɛcara ba bana bwolo bwa, gobwonu du ahiɛ n shanɛ shɛ atwa tɛcara. Gamba AGWANGWAMA, N dumwa.

²¹A hwụjɛ rụhwụŋ keeni u'wo wo orogwu tɛnda wa atwa Isrɛl ni ihiŋhiŋ tikpekwu, iwɛnɛ ta a namɛ nu uraiŋ iwɛwɛ tɛnda, isɛbwɛ ya AGWANGWAMA na shɛ Agwatana aba kaa 'wi aŋ.

²²Oo ahiɛba miaụŋ mi mi me eyi, gwure ma, N zhɛ ma hiɛ nɛnga uzawa tɛcara ti hiŋ. Ɛhi hiɛŋ, Iiŋ, ti zhɛ te gwure ga pa AGWANGWAMA, iwɛnɛ po ubwa shɛ Agwatana tu.

²³Iwɛ-tɛkana, tɛzhɛba tu tu ta-tuwa ni ihiŋhiŋ tikpekwu, ti ti mbiyeni shi kwukwuŋ. Semi AGWANGWAMA na shɛ Agwatana tu, ubwa kiri bo mbiyono atwa Isrɛl.

²⁴Ama tɛzhɛba ti Beal, na shɛ tuwa te ezuye, tụ tụ vwụngɛcɛnjɛ agwụdụ, ti inɛ, ta miaụŋ-me-eyi, ta miaụŋ-mo-o keeni iyi elele nɛ eshi tu njɛ la ugondu iwɛ ibɛ te kwuni taa na aka na atɛ ta shɛ la miaụŋ mu gwụmwatangwụ.

²⁵Go to woto na ezuye tu, maa ga ụpụrụsa ụ tɛ 'imɛ. Iwɛnɛ ta atɛ njɛ AGWANGWAMA na shɛ Agwatana tu iwɛwɛ, ta atuba te eshi tu, te kwuni na cɛnɛnɛ tu tu uuwa i ci aka ga; tụ hwụjɛ shɛ kaa unu wa AGWANGWAMA tu kwukwuŋ.