Read bassa JƐRƐMIA 30 Bible Online

JƐRƐMIA 30 - bassa bible

JƐRƐMIA 30

¹Ibɛ po AGWANGWAMA na shɛ Agwatana Isrɛl,

²m mbishi, bɛɛ hiɛŋ: 'Nyata n-ndumwa me elele na Ngee bi mbishi nu utakada.

³Aka zhɛ o to, Gamba AGWANGWAMA N jɛmɛ. Ti Ngɛɛ zhɛ me gwuricingeni atwa mi Isrɛl keeni atwa Juda ugwoje wa aba, N zhɛ du me gwuricinje aŋ na cɛnjɛ tu ga Ngee peni la eshi aba, ɛ zhɛ kaa a lashɛganana tụ maa a 'yaga. Gamba AGWANGWAMA N dumwa.

⁴Nazhɛ AGWANGWAMA mbishi atwa Isrɛl keeni atwa Juda, bɛɛ hiɛŋ,

⁵N hwụjɛ n'ungwa mu tuholono, n'ungwa mi inyɛsɛ, shɛ mu na ma amɛ-olom o.

⁶Hwuwayɛ go nda tugwo zhiiŋ maa heŋshi! Butubwenyi eri bo kwuzo suu maa mata yɛu? Asha iwembe po Ngaa kwụbɛ te butubwenyi be elele ba ta i'ɛlɛ ne embi gana biyikwo na kwuzhi maa mata yɛuu? Iwembe po bụtụ be elele hwuceci eshee?

⁷Ụjita na wumanjɛ we ci ba; i zasa ụjita unya na ɛɛ zhɛ a manga nu bwa o; u zhɛ wa sha aka tiriri ta atwa mi, ama kaa ɛ zhɛ a vwa waa.

⁸AGWANGWAMA na Hwuri Kpaaŋ hiɛŋ: Aka na aka ata ci hwuŋ, N zhɛ ma kwusataga ụ'wụ'wụ-i'ilu ata rongonu n'ilu ma aba[61] maa mo tufwurungo ashɛnjɛ ata oo to aŋ, a zha shɛ a sha ya ajama cɛnjɛ cɛnjɛ ti nya[62] kwukwuŋ.

⁹Ama ɛ zhɛ na ma ndana ya iyi, Gamba AGWANGWAMA na shɛ Agwatana aba, keeni bujalalo Devid na Ngɛɛ zhɛ ma gɛgɛcɛnga ni idwɛtwɛ ibwɛ maa sha agwuma.

¹⁰Oo ahiɛba atwa Jekob na shɛ yɛu mi ugondu, ta nda ma inyɛsɛ o; Oo ahiɛba atwa Isrɛl, kede ohwulu ihi horukono. N zhɛ mɛ hi lɛshijɛ na cɛnjɛ tu na tụ dụlụmɛ, na cɛnjɛ ta ata aa ga hiɛ 'imɛ la. Hi zhɛ hie jiye hia nama na amɛ-olom; hi zhɛ hia nama suu, i zasa bụtụ be elele zhɛ me hi zwono ya inyɛsɛ o.

¹¹N zhɛ ma zhajɛ maa mo hi bicingo. N zhɛ me iricingo edenji elele na Ngee hi gereteji la no ofwo aba, ama N zha shɛ tuba me hi iricingo. N zha shɛ kaa mo hi lonono maa hi hwuri uzawa ulwapɛ tụpana o; ama na aba na Ngee hi peni ulwapɛ, i zhɛ mo n tonono ya cɛŋ. Gamba AGWANGWAMA, N dumwa.

¹²Ibɛ po AGWANGWAMA hiɛŋ atwa ubwa, Andala hiŋ zha shɛ a hwuga unibi o, tụgwụcɛnga ti hiŋ kaa ti zha shɛ ta zhɛmanana o.

¹³I zasa bụtụ be elele zhɛ ba 'wa iwɛ hiŋ o,[63] i zasa unibi na zhɛ wa nɛnga andala hiŋ o, ashɛlatụ zasaba ya iwɛ tɛnɛnjɛ tụ bụ o.

¹⁴Isɛbwɛ bu 'wi atwa bụ tulubo hwɛɛ; a 'wa sụ ya iwɛ bụ o. Ma bụ kapangana gana bụtụ bi i'ime mi; ulwapɛ bụ wumanjɛ iwɛnɛ ti iwɛwɛ bu gembi ufwugwo, tugworozwo tụ bụ kaa tu hwuleji.

¹⁵Ta gagwumanga ya iwɛ ụngwụ bụ tu'ala o; bi zha shɛ ba zhɛmanana ya o. Gamba m bi peni ulwapɛ gana ata, iwɛnɛ ti iwɛwɛ bu gembi ufwugwo tugworozwo tụ bụ kaa tu hwuleji.

¹⁶Ama hwuwayɛ, atwa elele na yɛ iyi bu, ɛ zhɛ a ya du inɛ ya aba, atwa elele na ubu to ni i'ime, ɛ zhɛ a ima aŋ maa a shɛ ajama, Atwa elele na ma bu nda orugwusu ɛ zhɛ a nda aŋ du orugwusu, Atwa elele na kaa o sugo i'wɛŋnɛ bu a ya, ɛ zhɛ o sugo du i'wɛŋnɛ ya aba maa a yɛ.

¹⁷N zhɛ ma bu nɛnga sasana; N zhɛ kaa ma kwụna andala bụ, okwo atwa i'ime bu hiɛŋ, E keri Zayon; i zasa bụtụ be elele na 'wa ya iwɛ ubwa o. Gamba AGWANGWAMA, N dumwa.

¹⁸AGWANGWAMA hiɛŋ, N zhɛ mo gwuricingono Jekob ugwoje shimwono shɛ bwa, N zhɛ mo hioko inyɛmɛnyɛmɛ umwamwa we elele; ɛ zhɛ a maanana Jɛrusalɛm nu uluji ubwa, ɛ zhɛ a maanana umwamwa wa agwuma ubwa no ofwo na waa namɛ la.

¹⁹Atwa na namɛ apata zhɛ a zunga azunga ashɛtwa; ɛɛ zhɛ a kala n'ungwa mu unyasa. Uwebiye mu zhɛ na kaana aŋ ufwugwo tugombo; uwebiye mu kaa zhɛ wa patana aŋ ụjɛrụma.

²⁰N zhɛ me gwuricingeni udenji ata ukpahiŋ wa aba ụngwụshɛ, ɛ zhɛ o shikicingo uŋ sasana dimi; N zhɛ ma pana atwa elele na a nda aŋ umungwuta ulwapɛ.

²¹Udenji wa aba ubwa zhɛ wa sha bi'yagajɛ ba aba, uhiu wa aba ubwa zhɛ wa sha bụtụ bi ikɛnyi aba. Bi zhɛ mo n dongonu na aka na Ngaa suyanɛ bụ, gaaba 'yajɛ eshe-hwoo maa zhajɛ ta a suyanɛ shɛ bụụ?

²²Ɛ zhɛ a sha atwa mi, N zhɛ kaa ma sha Agwatana aba. Gamba AGWANGWAMA N dumwa.

²³Hioko, isɛbwɛ ya AGWANGWAMA shɛ uvwugo ụ'wụtụ, uvwugo na u vwengenji zhɛ wo puswo no ohiuhiu ogworozwo.

²⁴Isɛbwɛ ɛtɛ ya AGWANGWAMA i movwo zha shɛ ya kwunanga o, semi aka na yaa njɛ iyi nɛ bee heŋshi kpaaŋ. Na aka na yee ci, nazhɛ atwa ubwa zhɛ o eshicigo ijɛ kpataa.