Read bassa JƐRƐMIA 33 Bible Online

JƐRƐMIA 33 - bassa bible

JƐRƐMIA 33

¹Aka na tu Ngaa ta kapɛ nu ukpogwu ata umwono-ụshɛrɛya, ibɛ AGWANGWAMA dumananɛ n-ndumwa mu bwa ne mi na aka yebi.

²Ibɛ AGWANGWAMA na karɛ cɛnjɛ, na njɛ tụ na kaa shikicinji tu no ofwo na taa namɛ, jɛmɛ n-ndumwa ne mi. Ubwa na ɛɛ hiɛŋ izeci ibwɛ AGWANGWAMA, bɛɛ hiɛŋ,

³N suyanɛ, N zhɛ kaa mɛ bi jishijɛ; N zhɛ kaa mo bu mbiso iyi tusweci i'wɛtwɛ nɛ ebi mepi shi.

⁴Gamba AGWANGWAMA na shɛ Agwatana Isrɛl, N hiɛŋ, I zasa ule maa beni maa sukakanɛ atwa Babulon a na meme sutengeni otukwu otukwu a na hweri shimwono shi Jɛrusalɛm keeni shimwono sha shɛgwuma shɛ Juda maa e hwuŋzetenji shu ni ifelu o.

⁵Asha inɛ ɛtɛ zhɛ ya sha maa ụshɛpwụ ata kwakwa ɛɛ zhɛ e shidingo nu n'wo ma atwa ata a na Ngɛɛ zhɛ ma kwụna ni isɛbwɛ mi ti'ishijɛ. M pwonuo ụshɛpwụ ga aba, iwɛ iyi iwɛ nɛ atwa na zweni nu bwa njɛ.

⁶Ama tuba N zhɛ ma nɛnga ụshɛpwụ ga keeni atwa na zweni nu bwa maa me gwuricinje ulapiya wa aba. N tɛ zhɛ mo mbisono aŋ amɛ-olom a'wụtụ 'wụtụ keeni tishikono ti tidimi.

⁷N zhɛ me gwuricingeni atwa Juda keeni atwa Isrɛl ugwoje wa aba tebiye, N zhɛ kaa ma maanana aŋ maa a shɛ gana ala aa namɛ cala.

⁸N zhɛ ma nyashɛnga aŋ shɛshɛshɛ maa e beni ni iwɛwɛ ɛtɛ aa n njɛ la. N zhɛ kaa ma gangana aŋ iwɛwɛ ya aba nɛ aa ndanjɛ keeni tigezhe ta aba.

⁹Nu Jɛrusalɛm ibɛ zhɛ ya sha olugwo na unyasa, nụ ụjɛrụma tumuna keeni tubusa ti mi ti zhɛ ti nɛ zhinjɛ; nazhɛ edenji elele na namɛ nu unyizo ga zhɛ a nda inyɛsɛ mi, ɛɛ zhɛ a zhɛgɛdaga aka na ta a hwụjɛ iwɛ iyi ibiye nɛ Ngaa ndanɛ atwa Jɛrusalɛm keeni iwɛ tɛzhɛmana tu na Ngaa shapɛrɛganɛ ụshɛpwụ ga.

¹⁰AGWANGWAMA hiɛŋ, Atwamwa a duma, ɛɛ hiɛŋ, Ofwo ga a shɛ gana ụshɛka, i zasa atwa kwo kaa isundɛ elele nɛ namba nu bwa o. E teni kaa cɛŋ. Ashɛpwụ Juda keeni ihwɛŋnɛ ụshɛpwụ Jɛrusalɛm i shɛ bohondo; ta atwa ti isundɛ zasaba ni ibɛ o. Ama kaa hi tɛ zhɛ hia hwuganana

¹¹n'ungwa mu unyasa keeni rụhwụŋ ru unyasa wa amɛ-olom ni iyimɛyɛ towo no ofwo ga hwɛɛ. Hi tɛ zhɛ hia hwuga ta atwa a zunga azunga ta a 'waŋnanɛ Umwono mu apwaŋ ugwoje; ɛɛ zhɛ ɛ hiɛŋ, 'Walụ ma AGWANGWAMA na Hwuri Kpaaŋ, iwɛnɛ po ubwa zhɛmɛ, tulubo tu bwa tụ 'wụtụ kaa tɛ shɛ unyizo-nom. N tɛ zhɛ me gwuricingeni cɛnjɛ tu ga ugwoje u tuba tebiye gana na ti yaa namanɛ tụ la cala. Gamba AGWANGWAMA, N dumwa.

¹²AGWANGWAMA na Hwuri Kpaaŋ hiɛŋ, Cɛnjɛ tu ga tɛ shɛ gana ụshɛka, tu na atwa keeni isundɛ zasaba, tiyaga ti zhɛ ta namanana na tuba, ɛ zhɛ a sha ofwo na a'iywa-agwụdụ eri no sugo agwụdụ aba.

¹³Ta ashɛpwụ cɛnjɛ ti ishɛmɛ, te embi ishɛmɛ, ta tuta tu Juda, no tugwungwu ti Bɛnjamin, ta ashɛpwụ ticwɛŋ cwɛŋ na rungwutwonu Jɛrusalɛm keeni ashɛpwụ Juda, a'iywa-agwụdụ tɛ zhɛ a rɛtanana hwuŋ agwụdụ aba apata aka oko. Gamba AGWANGWAMA, N dumwa.

¹⁴Nazhɛ AGWANGWAMA hiɛŋ, Aka e ci ba ti Ngɛɛ zhɛ ma ụrɛcɛnga unu na Ngee shileni la atwa Isrɛl keeni atwa Juda.

¹⁵Na aka ata N zhɛ ma tala bụtụ na zhɛ ba sha agwuma tiririri na ajalalo Devid. Agwuma ata zhɛ na nda iyi nɛ teni cɛŋ keeni iyi nɛ namɛ ririri na cɛnjɛ ta ata kpaaŋ.

¹⁶Ɛ zhɛ a lashɛga atwa Juda keeni atwa Jɛrusalɛm maa a nama nu ulapiya suu. Ɛ zhɛ ɛ hiɛŋ izeci ụshɛpwụ ata, AGWANGWAMA ubwa shɛ Tiririri tu tu.

¹⁷Gamba AGWANGWAMA n hiɛŋ, Ge Devid zha shɛ ba vwunga bụtụ na zhɛ ba gɛga ni idwɛtwɛ maa ya tugwama ta atwa Isrɛl kwukwuŋ.

¹⁸Aka elele onongbo zhɛ na banɛ nụ ụlamụ Livai maa a n ndanɛ iyi maa a na ma pana arụpɛ tuhwoŋzhingo, na arụpɛ tiya keeni arụpɛ avwɛ.

¹⁹Ibɛ AGWANGWAMA m mbishi, bɛɛ hiɛŋ,

²⁰N twawa-unu atubana na aka bu uwaŋna keeni ụjita, iwɛ maa a nama na aka aba na teni cɛŋ; unu ata tutwa kaa eri shi wa bwadụ kwukwuŋ.

²¹Nu uhwaŋna ata du uko uko Ngaa twa-unu ni yɛu mi ugondu ge Devid maa bi zhɛ ba 'yaga ajalalo na zhɛ na ya tugwama aka elele, Ngaa twa du unu no onongbo a na shɛ ụlamụ Livai, maa ɛ zhɛ na ma n ndana iyi aka elele; onu ata tutwa kaa eri shi wa bwadụ kwukwuŋ.

²²N zhɛ kaa mu na kaana ufwugwo wa ajalalo yɛu mi ugondu ge Devid ugombo keeni ufwugwo wo onongbo a na banɛ nụ ụlamụ Livai ugombo, iwɛ maa kede bụtụ eri aŋ tɛrɛta gana na ta bụtụ eri shi ba rɛta mkpasu ma tụla keeni ahwayɛ ukwoswo itekwu o.

²³Nazhɛ AGWANGWAMA m mbishi, bɛɛ hiɛŋ,

²⁴Bi shiyeni yibwa eshe gana na atwamwa a duma hŋ, ɛɛ hiɛŋ, AGWANGWAMA jineci atwa Isrɛl keeni atwa Juda, a na shɛ amwamwa eyebi a na bee ge teri? Ibɛ po atwamwa ngbaracɛ ya atwa mi fwufwurɛnjɛ, a 'wa sụ ya iwɛ aba maa a ta shɛ udenji ụ tandụ o.

²⁵Ama Gamba AGWANGWAMA, n hiɛŋ, Yaa shɛ Ngaa nga twa sụ unu na aka bu uwaŋna keeni ụjita, keeni shikpogo sha tụla na cɛnjɛ,

²⁶asha nazhɛ yebe Ngɛɛ zhɛ ma laka ajalalo Jekob keeni a na Devid yɛu mi ugondu, N nga zha shɛ du ma tala bụtụ bu ko na ajalalo Devid maa ya tugwama ta ajalalo Abraham, na Azik, keeni Jekob. N zhɛ mo hioko inyɛmɛnyɛmɛ ya atwa mi, maa me gwuricingeni aŋ sasana ugwoje wa aba duwa duwa.