Read bassa JƐRƐMIA 40 Bible Online

JƐRƐMIA 40 - bassa bible

JƐRƐMIA 40

¹Nazhɛ AGWANGWAMA m mbishi n-ndumwa, na aba na ti gɛ Nɛbuzaradan, na shɛ uhiu wa angbaracɛ, n tufwurinji nu Rama. O n to la ashɛnjɛ, ee n shepi apata medenji anya atwa elele na beni nu Jɛrusalɛm keeni Juda a na ee suji ee zweni nu umwono-tishi nu Babulon.

²Nazhɛ uhiu ata wa angbaracɛ, n suyanɛ nụ ụzalụ uko, bɛɛ hiɛŋ, AGWANGWAMA na shɛ Agwatana bụ, dumwa la iwɛ ti'iricingo tụ ụshɛpwụ ga,

³Hwuwayɛ go, bu nduwa kaa iyi nɛ baa ga jɛmɛ la maa bi zhɛ ba nda. Ijɛ kpaaŋ teni iwɛnɛ ta atwa njɛ AGWANGWAMA iwɛwɛ, aa lacɛ unu ubwa tuhwuga.

⁴Hwuwayɛ go mo bu tufwurungo ashɛnjɛ ga oo go bu to ni i'ɛlɛ maa mama 'yaga ya. Yaa shɛ yaa bụ kwụlanɛ maa zhagaga ne mi maa ti zhe Babulon, bi eri ba zha, N zhɛ kaa ma bu ima u'ala apata tebiye. Yaa shɛ kaa yaa bụ kwụlanɛ shɛ maa zhe, asha ganga tizha. Cɛnjɛ tu ta ti bi tileneni, tala ofwo elele na ụbụ kwụlanɛ maa zhe.

⁵Gana na tu Ngaa ta jɛshɛjɛ shɛ bụ, gɛ Nɛbuzaradan hiɛŋ, Zhaga gwulo no ofwo Gɛdalia yɛu Ahikam, bụjalụ Shafan, na agwuma Babulon njɛ ugwomina ashɛpwụ Juda. Bi eri ba gɛga no ofwo ubwa na ashashɛ atwa ata, shibwonu bi eri kaa ba zha ofwo elele na ebi heŋshi maa bi zhɛ ba zha. Na aba ibɛ bee m peni apwaŋ, ti iyimɛyɛ ike maa ma 'waŋna. Bee n genji Ngee hwuri.

⁶Ngee zhe Ngaa jɛjɛ no ofwo Gɛdalia ni Mizpa, Ngaa namɛ na ashashɛ atwa ata ta vwɛ na cɛnjɛ ta ata.

⁷Aka na ehiu keeni asaza Juda oko meme peni shi atwa Babulon. Aka na ta a hwụjɛ maa agwuma Babulon njɛ Gɛdalia yɛu Ahikam ugwomina cɛnjɛ ta ata, bee shiri bu maa sha bungbaracɛ be etwenyi, ne eyikwo, aba shɛ atwa ata na shɛ okofwo na hwuri atwa vwɛ kpaaŋ na cɛnjɛ ta ata, a na ee suji shi la nu Babulon.

⁸Ibɛ po gɛ Ishmɛl yɛu Nɛtania, no Johanan yɛu Karia, nɛ Sɛraya yɛu Tanhumɛt, miaụŋ mi Ifai a na banɛ nu Nɛtofa, nɛ Jɛzania a na banɛ ni Me-akat, ee zhe no ofwo Gɛdalia medenji atwa aba ni Mizpa.

⁹Gɛ Gɛdalia hiɛŋ aŋ, Ma hi pana-unu mu maa ta nda ma inyɛsɛ tumama gangana atwa Babulon. Gɛga ma na cɛnjɛ tu ga, na ndana ma agwuma Babulon iyi, nazhɛ iyi elele zhe ma hiɛ zhɛmana.

¹⁰N zhɛ tuba ma gɛga ni Mizpa maa ma sha ụlụkpashɛ hiŋ na aka na ta atwa Babulon zhajɛ epe. Ama hi eri hia mwata meni ma afwafwa, keeni tụ'walụ keeni manɛbɛ ma buta, maa hi nama na ashɛpwụ na ehi eri hia nama.

¹¹Na aka ata nazhɛ atwa Isrɛl elele a na namɛ nu Moab, na Amon, ni Idụm, keeni cɛnjɛ ti nya, hwụjɛ maa bwonu agwuma Babulon leneni atwa Isrɛl oko maa a gɛga nu Juda, maa bwonu du baa njɛ Gɛdalia ugwomina wa aba.

¹²Ibɛ po Eju gɛnjɛ ofwo ofwo na aa ga garatagwụ la ee gwuleji nu Juda. Ee zhe no ofwo Gɛdalia ni Mizpa, apata ee suje meni ma afwafwa keeni tụ'walụ tụ 'wụtụ.

¹³Na aba inɛ gɛ, go Johanan keeni eberezhe asaza a na meme gengeni shi la atwa Babulon zhajɛ no ofwo Gɛdalia ni Mizpa,

¹⁴ɛɛ hiɛŋ bụ, Bi mepi shi suu maa ga Bealis agwuma A'amon ubwa tumwanɛ Ishmɛl maa ma bụ kwụna? Ama gɛ Gɛdalia tɛtanɛ shɛ iwɛ ɛtɛ rishe o.

¹⁵Nazhɛ go Johanan hiɛŋ bụ swɛɛ, Lono maa ma zha ma kwụna Ishmɛl, i zasa bụtụ be elele zhɛ ba mapa bụtụ na njɛ iŋ o. Iwembe po bee leni maa a bụ kwụnɛɛ? Iwɛ maa Eju elele na ubu rungwutwonu garatagwụ, maa iyi iwɛ jiteni atwa elele na ta vwɛ nu Juda?

¹⁶Ama gɛ Gɛdalia yɛu Ahikam jishijɛ Johanan yɛu Karia, bɛɛ hiɛŋ, Ta nda gana ata o! Iyi nɛ abɛ jɛmɛ iwɛ Ishmɛl shɛ shɛ iwɛ-tɛkana o.