Read bassa JƐRƐMIA 42 Bible Online

JƐRƐMIA 42 - bassa bible

JƐRƐMIA 42

¹Nazhɛ eberezhe ejeshi hwɛɛ, tu go Johanan yɛu Karia keeni Azaria[74] yɛu Hoshia, zhajɛ, ta atwa na gwụmwatangwụ keeni atwa na gembenji,

²ɛɛ n hiɛŋ, Sukwu utu ndanɛ iyi nɛ ata bụ lụpa! Utu ndanɛ adua pa AGWANGWAMA na shɛ Agwatana bụ. Nda adua iwe tu na tu ta vwɛ hwɛɛ. Ti gembi la ufwugwo cala; ama tụ vwɛ ya cwɛŋ hwuwayɛ, gabụ du bụ kwụbɛ ne eshe bu.

³Nda adua iwɛ maa AGWANGWAMA na shɛ Agwatana bụ iti mbiseni uhwaŋna na maa to dulo keeni iyi nɛ shɛ maa ta nda.

⁴Ngɛɛ jishijɛ aŋ, Ngɛɛ hiɛŋ, Asha I zhɛmɛ tebiye. N zhɛ ma nda adua pa AGWANGWAMA na shɛ Agwatana tu, te teni cɛŋ nu gana na ahi lụpɛ gom, iyi elele nɛ baa jɛmɛ, N zhɛ mo hi mbiso. N zha shɛ ma hi swakana iyi elele o.

⁵Nazhɛ ɛɛ n hiɛŋ, Ga AGWANGWAMA shɛ useyida tu u tɛkana keeni una tɛcara, ti yaa shɛ atụ hwụjɛ shɛ unu iyi elele nɛ AGWANGWAMA na shɛ Agwatana bụ iti eni tɛnda.

⁶Okwo yaa tu kwụlanɛ kwo kaa yaa tụ kwụlanɛ shɛ, ti zhɛ ta hwuga-unu wa AGWANGWAMA na shɛ Agwatana tu, na atụ bụ lụpɛ maa njɛ adua pu bwa. Iyi elele zhɛ ma tɛ zhɛmana ti yaa shɛ atụ hwụjɛ-unu ubwa.

⁷Na aba na ti yaa namɛ ijitɛ umpwa, nazhɛ AGWANGWAMA m mbishi n-ndumwa mu bwa.

⁸Nazhɛ Ngaa suyanɛ Johanan yɛu Karia, te eberezhe ejeshi a na namɛ nu bwa hwɛɛ, keeni atwa ata kpaaŋ, ta atwa na gwụmwatangwụ, ta atwa na gembenji.

⁹Ngɛɛ hiɛŋ aŋ, AGWANGWAMA na shɛ Agwatana Isrɛl, bu gata ahiɛ n tumwanɛ ilupwɛ pu bwa, bi hiɛŋ,

¹⁰Yaa shɛ yaa hiɛ kwụlanɛ maa hi nama na cɛnjɛ tu ga, asha N zhɛ ma hi ma, N zha shɛ kaa mo hi hwuŋzo; N zhɛ ma hi bila, N zha shɛ kaa mo hi mushongo. Iwɛnɛ po ti'iricingo tu na Ngee hi iricingwo tu n gwumanɛ tebiye.

¹¹Ganga ma ya inyɛsɛ ya agwuma Babulon tɛnda. N namɛ ne hiŋ, Ngɛɛ zhɛ kaa mo hi bicingo maa ma hi lashɛga ni i'ɛlɛ ibwɛ.

¹²Iwɛnɛ po mo hioko inyɛmɛnyɛmɛ hiŋ, N zhɛ du mo lono maa ubwa ata hieci inyɛmɛnyɛmɛ hiŋ maa mo hi lonono maa hi ji na cɛnjɛ ti hiŋ. Gamba AGWANGWAMA N dumwa.

¹³I shɛ tilɛɛ maa hi hwụjɛ-unu wa AGWANGWAMA na shɛ Agwatana hiŋ ahiɛba atwa na ta vwɛ nu Juda maa hi nama na cɛnjɛ tu ga.

¹⁴Ta kara ma maa hi hiɛŋ, Awo, ti zhɛ ta zha ta nama ni Ijipti, no ofwo na atɛ zha shɛ ta twa ya eshe nu ujasa o, kwo kaa atɛ zha shɛ ta hwuga ya ụhiɛŋshɛ utiitidi maa hwure ma hi zhe ujasa kwo kaa imunɛ-tiya o.

¹⁵Oo ahiɛba na hi ta vwɛ nu Juda, yaa shɛ ɛhi hiɛŋ gana ata, asha AGWANGWAMA na Hwuri Kpaaŋ na shɛ Agwatana Isrɛl, hiɛŋ, Yaa shɛ ehi shikicinji shihaŋsa shi hiŋ maa hi zhe hi nama ni Ijipti,

¹⁶asha nazhɛ ujasa ata ahia nda inyɛsɛ ubwa zhɛ mo hi vwutono, keeni imunɛ ɛtɛ tiya ohwulu ibɛ ihi herikeni zhɛ ma hi 'wa apata, hi zhɛ kaa hio 'wo ni Ijipti.

¹⁷Atwa elele na shikicinji shihaŋsa sha aba maa e zhe a nama ni Ijipti, ɛ zhɛ o 'wo, nu ujasa kwo kaa ni imunɛ-tiya kwo kaa nụ ụngwụ ụwɛ. I zasa bụtụ be elele na zhɛ ba vwa na amɛ aba o, i zasa kaa bụtụ be elele na zhɛ ba banangana iyi iwɛ nɛ Ngɛɛ zhɛ me sugeni aŋ o.

¹⁸Nazhɛ AGWANGWAMA na Hwuri Kpaaŋ, na shɛ Agwatana Isrɛl hiɛŋ, Gana na Ama nda isɛbwɛ te gembi nu uhiuhiu wa atwa Jɛrusalɛm, gabata du Ngɛɛ zhɛ ma nda isɛbwɛ te gembi nu uhiuhiu hiŋ gom ti yaa shɛ ehi zhe ni Ijipti. Hi zhɛ hia sha iyi uriri; atwamwa zhɛ ma hi nda atwa tusashɛ, ɛ zhɛ na hi suyana ni izeci tutwa. Hi zha shɛ kaa hia kwụba ya cɛnjɛ tu ga kwukwuŋ.

¹⁹Nazhɛ Ngoo to tuhwulo, Ngɛɛ hiɛŋ, AGWANGWAMA ihi mbishi ahiɛba na hi ta vwɛ nu Juda, bɛɛ hiɛŋ, Ta zhaga ma ni Ijipti ya o. Gabata du kaa Ama hiɛ tɛtagana-unu hwuwayɛ go,

²⁰maa asha hi teni utegidi ụ'wụtụ. Iwɛnɛ po hi n tumwanɛ pa AGWANGWAMA na shɛ Agwatana hiŋ, ɛ hi hiɛŋ, Utu ndanɛ adua pa AGWANGWAMA na shɛ Agwatana tu, ehi shiri kaa unu maa hi zhɛ hia nda iyi elele nɛ bee hi peni-unu ibɛ.

²¹Ama hwuwayɛ go N hi mbiswo ya, ama hi hwụjɛ shɛ kaa unu iyi elele nɛ AGWANGWAMA na shɛ Agwatana tu n tumwanɛ maa mo hi mbiso.

²²Asha teyinje ma maa hi zhɛ hio 'wo nu ujasa, ni imunɛ-tiya, keeni nụ ụngwụ ụwɛ na cɛnjɛ ta ata ahia jala maa hi zhe maa hi nama tilɛɛ.