Read bassa JƐRƐMIA 48 Bible Online

JƐRƐMIA 48 - bassa bible

JƐRƐMIA 48

¹Iyi nɛ AGWANGWAMA na Hwuri Kpaaŋ, na shɛ Agwatana Isrɛl jɛmɛ iwɛ Moab na, bi hiɛŋ, Atwa ụshɛpwụ ata ɛɛ hiɛŋ, Nebo zhɛ a nda hwuŋ adangboo, iwɛnɛ te e iricinji ashɛpwụ ubwa kpaaŋ! E leshiji Kiriataim, ikepi ibwɛ i'wɛtwɛ hwuŋzwotongwu, ibɛ po ezuye shɛ ya atwa na zweni nu bwa;

²tipilanụ tu Moab tu hwuwowu. Atwa i'ime kaa loshigwo Hɛshbon oo hoŋswogwonuo kaa udenji Moab maa e iricinji uŋ. Ụshɛpwụ Madmɛn zhɛ wa ima ilɛmɛ; Ejeshi zhɛ e suleni uŋ maa a sukakanɛ uŋ.

³Atwa Horonaim uganɛ, ɛɛ hiɛŋ, E ti iricinji, aa tɛ njɛ osombo!

⁴E iricingwo Moab hwɛɛ; a hwụjɛ n'ungwa mu miaụŋ mi tidice dice.[87]

⁵Hwuga rụhwụŋ rụ ụngwụ wa aba tuhwuga nu uhwaŋna ata munji u zhe Luhit, n'ungwa me tiriri[88] mu namɛ nu uhwaŋna ata zwi nu Horonaim.

⁶Ɛɛ hiɛŋ, Gozhigo ma kakayɛ iwɛ uhiuhiu hiŋ. Gozhigo ma gana izhinyɛci ụshɛka![89]

⁷Gabụ go Moab, bu patanɛ ukpahiŋ[90] bụ keeni uduciya bụ rishe, ama kaa ɛ zhɛ ma bụ lasụ; tuwa ta ata tụ bụ ɛɛ hiɛŋ Kimosh ti zhɛ nu umwono-tishi medenji ehiu tuba keeni onongbo tuba.

⁸Ti'ilono ti zhɛ ta zhaganɛ ụshɛpwụ we elele eshigiri, i zasa ụshɛpwụ okwo uko zhɛ wa banangana o, ta atwa na jɛjɛ no olomu zhɛ a nda ufwu, atwa na kaa jɛjɛ nụ ụdadarɛ zhɛ e ilono hwɛɛ. Gamba AGWANGWAMA, N dumwa.

⁹Hinongo ma atwa Moab u'uye iwɛnɛ tɛ ɛ zhɛ e iricingo aŋ hwuwayɛ hwuwayɛ. Ashɛpwụ ubwa zhɛ a sha shisombo, i zha shɛ ya 'yaga bụtụ be elele zhɛ ba nama ya apata o.

¹⁰Go unu-tukalana 'imɛ bụtụ na njɛ shɛ ugondu wa AGWANGWAMA na ahaŋsa ubwa oko hwɛɛ! Go unu-tukalana 'imɛ bụtụ na dudweji shi mehieŋ nu utokwobi ubwa!

¹¹Nazhɛ AGWANGWAMA hiɛŋ, Atwa Moab a ta ụhinjanụ suu aka elele, a ta 'imɛ shɛ aŋ maa e zhe nu umwono-tishi kwukwuŋ. Moab shɛ gana meni ma afwafwa mu na mi zhi mu vwundwotongwu su, e te zweji shi bu ni ihiulwe ike maa e zweni ni inyɛ kwukwuŋ. Ụlatụ ubwa u ta njɛ shɛ ufwu kwukwuŋ, abu hunganɛ, bu ta shɛ gana ala baa shɛ cala.

¹²Hioko, aka e ci ba ti Ngɛɛ zhɛ maa tumwanɛ atwa maa e zweji Moab gana meni ma afwafwa. Nhilwo mu bwa[91] mi zhɛ ma sha bohondo, ɛ zhɛ kaa a bwarataga mụ hwɛɛ.

¹³Na aka ata nazhɛ ezuye zhɛ a sha atwa Moab na tuwa ti Kimosh, gana na du te ezuye shɛ atwa Isrɛl ni Bɛtɛl, na shɛ gana Agwatana na aa ga patanɛ-rishe.

¹⁴Ahiɛba etwenyi Moab, iwembe po ahi mama nda atwa urishi, gana asaza na 'yajɛ eshe-hwoo a na 'yebi ujasaa?

¹⁵E iricinji atwa Moab keeni ashɛpwụ ubwa; aa kwụnua esemberi ubwa a na pilanụ. Gamba Agwuma, na shɛ AGWANGWAMA na Hwuri Kpaaŋ, N dumwa.

¹⁶Tulaya tu Moab tu gwumwonu; tuhwuŋzwo tu bwa kaa te e ci ba ni izɛlɛgwu kakayɛ.

¹⁷Ahiɛba na hi gwumwonu nu udenji ata, ta ma ụkwụla iwɛ ubwa, ibɛ shɛ ahiɛba atwa elele na hi mepi urishi ubwa. Hiɛŋ ma, Adooyi! Hioko ma te bidingbengbere bu uberezhe dwonu; hioko ma to bukwuto bụ ụjɛrụma dwonu!

¹⁸Ahiɛba na hi namɛ ni Dibon, kezhe ma maa hi gɛnjɛ ohwolu hiŋ ụjɛrụma tumuna maa hi gɛga na cɛnjɛ nu upwupwutu; iwɛnɛ ta atwa na zhɛ e iricingo Moab e ci ba maa a hiɛ sukakanɛ, ɛ zhɛ kaa o hwuŋzotongo ikepi ibwɛ nɛ 'yajɛ ikɛnyi.

¹⁹Ahiɛba na hiɛ jɛjɛ na Aroe, shikokono ma nu uhwaŋna maa hi ngbaraka; hoŋtono ma atwa ata e gezhije, maa, Imbe tenii?

²⁰Ɛ zhɛ mɛ hi jishijɛ, ɛ hiɛŋ, Moab hwuŋzwowo, twana ma ụpụrụsa ubwa u'wo. Ananga iŋ ma nụ ụpalanụ Urefu Anon, maa e iricingwo Moab hwɛɛ!

²¹Ụshɛrɛya jiteni ashɛpwụ na namɛ tuzuba geri bụ ụdadarɛ: aba shɛ Holon, nu Jaza, keeni Maf-at,

²²ti Dibon, ti Nibo, keeni Bɛt-diblataim,

²³ti Kiriataim, ti Bɛt-gamul, keeni Bɛt-mion,

²⁴ti Kiriot, keeni Bozra. Ụshɛrɛya ata kaa jiteni ashɛpwụ Moab elele, ta anaa na dụlụmanjɛ keeni anaa na gwumwongonu.

²⁵E mushinji mahiuaŋ mu Moab, ee bwereteji ụragbamụ ubwa. Gamba AGWANGWAMA, N dumwa.

²⁶Nazhɛ AGWANGWAMA hiɛŋ, Nda maa mayaga mɛ 'imɛ Moab, iwɛnɛ tu boo momo mungicingo no ofwo mi. Go Moab zhɛ no jirongono na tụgba tu bwa, atwa kaa zhɛ na hinga bụ ilɛtu.

²⁷A-Moab, ge Isrɛl suu ubu shanɛ shɛ la iyi ya asada? Bu namɛ la suu na ashashɛ unyama wa ashɛrɛ, upo obo zhingoto uhiuhiu bu na aka elele na aba duma iwɛ ubwa?

²⁸Ahiɛba atwa na jɛjɛ nu Moab, ganga ma ashɛpwụ hiŋ! Zhaga nama ma na ashashɛ aparatayɛ! Sha ma gana ikwucime nɛ to tuhwurugwo tu bwa nụ ụpangwụ na namɛ nu ulomu.

²⁹Go Moab ta ba nda unyangana tebiye! N hwụjɛ kaa unyangana na baa nda, na tumama sata tu bwa keeni atwa tumomo mungicingo na aa shɛ, gana na aa haŋsa iwɛ ikɛnyi aba kiri.

³⁰Gamba AGWANGWAMA, N hiɛŋ, M mepi tumama sata ta aba. Ishɛkɛ ya aba kaa i shɛ iyi tɛgadaga, iyi nɛ kaa aa nda zha shɛ ye ilogogo.

³¹Iwɛbɛ po Ama twa-u'wo iwɛ bụtụ be elele na namɛ nu Moab, Ama ta-ụkwụla iwɛ atwa Ki-hɛrɛs.

³²Ma ugaga iwɛ atwa Sibma, uhwuri u'una wa atwa Jazɛ. Gabụ ụshɛpwụ Sibma, bɛ shɛ ukparɛ ufwafwa na shɛ'walụ shɛ bwa shi keshi Itekwu Tu'wo, yee zhe tutu Jazɛ.[92] Ama a nduwa tụ'walụ tụ bụ tu uvwaza keeni okoko tụ'walụ ta afwafwa bụ ufwu.

³³O bocingwo amɛ-olom keeni unyasa na cɛnjɛ ti biye tu Moab. N lacɛ maa meni ma afwafwa mụ fwụnjɛ no shonunu shɛ na oo pilo meni ma afwafwa. I zasa bụtụ be elele na zhɛ ba nda ya meni ma afwafwa maa e keri n'ungwa mu unyasa o.

³⁴Atwa Hɛshbon keeni atwa Eleɛlɛ uganɛ[93] e eri kaa a hwuga n'ungwa ma aba tutu Jahaz. Atwa na namɛ nu Zoa eri a hwuga mụ, a hwụjɛ mụ kaa tutu i ci Horonaim keeni Iglat-shilishaya. Iwɛnɛ po meni mi isese Nimrim mụ hwɛŋ.

³⁵N zhɛ mo ngwuricingo atwa Moab iturɛre ya aba tuhwoŋzhingo no ofwo ata aa nda tɛzhɛba swoswoswo keeni arụpɛ tuta no ofwo tuwa ta aba. Gamba AGWANGWAMA, N dumwa.

³⁶Iwɛbɛ po Ama ta-ụkwụla na amɛ mi iwɛ Moab keeni iwɛ atwa Ki-hɛrɛs, gana bụtụ na ba zungangana ru'wo ru na ɛɛ zhɛ o no azunga nu ukpasana, iwɛnɛ ta a vwungwa iyi elele nɛ aa 'yajɛ la.

³⁷A 'nyanjɛ ohiuhiu aba tukpala hwɛɛ aba, aa hwajɛ tuzholu ta aba. E kekebi i'ɛlɛ ya aba hwɛɛ, bụtụ bụtụ rɛ tugwuno tụ ụcɛnjɛ tɛnda ne embi ubwa.

³⁸Ụkwụla-tuta ubaba kiri namɛ no shisokwu keeni amwamwa Moab hwɛɛ, iwɛnɛ ti Ngee bweji Moab gana ikwɛshɛ nɛ bụtụ be elele jeri shi ya.

³⁹Hioko tu Moab bwaratagwụ! Hioko ta a ugaga gboo! Ụpụrụsa 'imɛ Moab. U hwuŋzwotongwu, ibɛ po edenji elele na rungwutwonu uŋ a hunga uŋ ilɛtu ya asada, waa shɛ iyi uriri. Gamba AGWANGWAMA, N dumwa.

⁴⁰AGWANGWAMA hiɛŋ, Udenji uko zhɛ we suleni Moab vwuuŋ gana ugbeji na berishiji apiambɛ ubwa.

⁴¹Ɛ zhɛ kaa a lashaga ashɛpwụ aba na 'yajɛ tukapanga. Jita ata ohwulu zhɛ o horukono asaza Moab gana te biyikwo na tumata tu to.

⁴²Ɛ zhɛ e iricingo Moab hwɛɛ maa kede ụ shɛ ya udenji kwukwuŋ, iwɛnɛ tu woo momo mungicingo no ofwo mi.

⁴³Tuholono, na ashapa, keeni ogwuru aba zhɛ ma hi ima ahiɛba atwa Moab. AGWANGWAMA dumwa.

⁴⁴Bụtụ be elele na mekeni maa banangana tuholono ta ata, bi zhɛ ba laya nu ushapa, bụtụ be elele na kaa banɛ nu ushapa, ugwuru zhɛ wa ima bụ, iwɛnɛ ta AGWANGWAMA dwowo aka ti'ilono tu Moab.

⁴⁵Atwa na o rungo gbom shikekeni nu uhwunu Hɛshbon, a zasa ya kaa ikɛnyi, iwɛnɛ tu ulwa bonuo ni Hɛshbon, bụratụ bu ulwa kaa bo gorogo nu umwono Sihon, woo hwoŋzhingwo itune Moab keeni ukokolo uhiuhiu bụtụ na ba nda rundu ri ishɛkɛ.

⁴⁶A-Moab, bi zhɛ ba nda hwuŋ adangboo! Iwɛnɛ po atwa na a zhɛba tuwa ta ata ɛɛ hiɛŋ Kimosh o ilwonuo hwɛɛ, aa imwa miaụŋ ma aba me eyi na mu na mo o ee zweni nu umwono-tishi.

⁴⁷AGWANGWAMA hiɛŋ, N tɛ zhɛ me gwuricingeni Moab ugwoje ubwa sasana na aka na te e ci. Ijɛ AGWANGWAMA jɛmɛ bana hwɛɛ i zhɛ yo vwutono Moab.