Read bassa JƐRƐMIA 49 Bible Online

JƐRƐMIA 49 - bassa bible

JƐRƐMIA 49

¹Iyi nɛ AGWANGWAMA jɛmɛ iwɛ A'amon na, bi hiɛŋ, Ge Isrɛl suu zasa ya miaụŋ-me-eyi? I zasa suu bụtụ be elele na namba ya maa ya ogwu cɛnjɛ ta ata? Iwembe po ee leneni atwa na a zhɛba tuwa tu na ɛɛ hiɛŋ, Milkom maa e teni tugwungwu ta cɛnjɛ tụ ụlamụ Gad maa a gɛga na ashɛpwụ tubaa?

²Iwɛbɛ po AGWANGWAMA hiɛŋ, Aka e ci ba ti Ngɛɛ zhɛ ma nda maa atwa na jɛjɛ nụ ụshɛpwụ na shɛ uhiu na cɛnjɛ tu Raba, a hwụjɛ ukwuruwa ujasa, ɛ zhɛ kaa a nda uŋ osombo, ɛɛ zhɛ o hwoŋzhingo ozhibwu ubwa nu ulwa kwunduu. Na aka ata nazhɛ atwa Isrɛl zhɛ a lashɛga cɛnjɛ ta aba ni i'ɛlɛ ya atwa na leshiji tu la no olugwo aba, AGWANGWAMA dumwa.

³Oo ahiɛba atwa Hɛshbon, ugana ma! E iricingwo atwa na jɛjɛ nu Ai! Oo ahiɛba eyikwo atwa na jɛjɛ nu Raba, zhaga ta ma ụkwụla! La ma tugwuno tụ ụcɛnjɛ tɛnda ne shimbi. Gozhigo ma geri geri iwɛ tusukwutogwu tu na tu namɛ, tuwa ta ata ti hiŋ ɛɛ hiɛŋ Milkom ti zhɛ nu umwono-tishi, to onongbo tuba keeni ehiu tuba.

⁴Iwembe po ahia duma ishɛkɛ iwɛ olomu hiiŋ[94] ahiɛba na hiɛ shɛ shɛ atwa tɛcaraa? Ikɛnyi hiŋ kaa kwu. Iwembe po ahi ta patanɛ ukpahiŋ hiŋ rishe, ɛhi hiɛŋ, Gaaba zhɛ ba kara maa ma bụ sukakanaa?

⁵AGWANGWAMA hiɛŋ, N zhɛ mo hi holono geri geri. Hi zhɛ hio gozhogo hwɛɛ hiŋ. Bụtụ bụtụ zhɛ no gozhigo iwɛ uhiuhiu ubwa. I zasa bụtụ be elele na zhɛ bo sotulonu ya anyama asaza hiŋ kwukwuŋ.

⁶Ama na aba ibɛ N zhɛ ma nda maa i zhɛmanɛ A'amon sasana. Gamba AGWANGWAMA, N dumwa.

⁷Iyi nɛ AGWANGWAMA na Hwuri Kpaaŋ jɛmɛ iwɛ Idụm na, bi hiɛŋ, Atwa Idụm suu zasa ya ti'inta tụ ụshɛrɛya tụdụma? Atwa aba a na a pana aŋ shihaŋsa mbishi shi aŋ ya suu iyi nɛ maa a njɛ? A 'wɛŋ suu ti'inta ta aba hwɛɛ?

⁸Ahiɛba atwa Didan, jɛshɛrɛga ma hi gezhiji! Swaka ma na apangwụ na ileji! Iwɛnɛ po N zhɛ mo iricingo ajalalo Isụ, iwɛnɛ ta aka ci ya maa ma pana aŋ ulwapɛ.

⁹Yaa shɛ atwa na o two tụ'walụ ta afwafwa cwi tu, a zha shɛ suu a waŋpana a na tumwata nu ukparɛ ata? Yaa shɛ kaa ozundo zhajɛ nụ ụjita, shɛ gana na gembi aŋ suu ɛɛ zhɛ o sugo iyi nɛ aa jala?

¹⁰Ama N tuferenji ajalalo Isụ tugwuno hwɛ hwɛɛ, Ngee usheji ofwo ata aa ga swakacɛ, iwɛ maa kede a swakaka ya o. E iricingwo atwa Idụm hwɛɛ. I zasa bụtụ be elele vwɛ ya na amɛ aba o.

¹¹N tileneni miaụŋ mụ bụ me e'weteji, N zhɛ ma ngbaraka aŋ. Olulo bu kaa eri ma n datana.

¹²AGWANGWAMA hiɛŋ, Yaa shɛ atwa na ga lanɛ shɛ ulwapɛ tụpana swe ukwopi ulwapɛ ata tụpana, asha bi heŋshi suu maa bi zhɛ ba banangana ulwapɛ ata? Awo, bɛ shɛ ba lashɛga ulwapɛ ata tilɛɛ!

¹³AGWANGWAMA hiɛŋ, M momo to maa ụshɛpwụ ata ɛɛ hiɛŋ, Bozra zhɛ wa sha iyi uriri keeni ụshɛka; atwamwa zha hunga uŋ ilɛtu, ɛɛ zhɛ na suyana uŋ ni izeci tutwa. Ashɛpwụ na gwumwongonu nu bwa hwɛɛ zhɛ o hwuŋzotongwu, ɛɛ zhɛ a sha osombo unyizo-nom.

¹⁴M mbiswo Idụm, Ngɛɛ hiɛŋ, N loshigwo utumwa na banɛ no olugwo AGWANGWAMA. Bu tumwanua butumwa maa e mbishi edenji maa go o sotulonu ejeshi aba maa a mama 'imɛ maa a bụ sukakanɛ.

¹⁵AGWANGWAMA hiɛŋ, N zhɛ ma bu nda maa nama cwɛŋ na ashashɛ edenji, bụtụ be elele kaa zhɛ ma bu ngbaraka cwɛŋ bana.

¹⁶AGWANGWAMA hiɛŋ, Tumama sata tụ bụ ti bi helekeci. I zasa bụtụ be elele na zhɛ ba nda inyɛsɛ bu i ci gana na ebi ge heŋshi maa ɛ zhɛ ma bu sụma inyɛsɛ o. Bi meme shiyeni na tụbagwụ tu uparatayɛ, ni ihiŋhiŋ ishɛmɛ ɛtɛ zeci; ama kaa okwo abu namɛ no ofwo ata zeci nɛhwɛɛŋ gana ugbeji, N zhɛ kaa me bu zucinje waa.

¹⁷AGWANGWAMA hiɛŋ, Ti'ilono tu na ti zhɛ ta zhaganɛ Idụm ti zhɛ to hwulogo, ma tu na bụtụ be elele na ba kashɛka apata zhɛ bo zhingoto uhiuhiu ubwa, uriri kaa zhɛ wa ima aŋ.

¹⁸Iyi nɛ teneni Sụdụm nu Gụmụra keeni ashɛpwụ anya aba zhɛ yo vwutono du Idụm gbaa, na aka na tɛ ɛ zhɛ e iricingo aŋ medenji ashɛpwụ na gwumwongonu na aba. I zasa bụtụ be elele na zhɛ ba nama ya apata kwukwuŋ. Gamba AGWANGWAMA, N dumwa.

¹⁹Gana na te bizeci ba banɛ na tụ'wụ tu na ti inshi nụ ụpalanụ Urefu Jodan maa mungo na cɛnjɛ tu na ambɛ olom tiyaga namɛ, gabata du Ngɛɛ zhɛ ma zhajɛ maa mo unzo atwa Idụm eshigiri maa e beni nu u'una wa aba. Na aka ata nazhɛ buhwuri-bu-umbe na Ngee teri zhɛ ba untangana udenji ata. Gaaba shɛ gana mii? Gaaba zhɛ ba kara maa ma sukanaa? Agwuma naa zhɛ ba ala maa ma sukakanaa?

²⁰Iwɛ ecilo ata shɛlaga iyi nɛ Ama imangana atwa Idụm, keeni iyi nɛ Ngee heŋshi maa ma nda atwa na jɛjɛ ni Timan. Okwo yaa shɛ miaụŋ ma aba, ɛ zhɛ o kokwulo aŋ, uriri kaa zhɛ wa ima bụtụ be elele iwɛ iyi nɛ teneni aŋ.

²¹Rundu ra tu'waŋtatangwụ ta atwa Idụm ri zhɛ ro zhingitono cɛnjɛ hwɛ hwɛɛ. Ɛ zhɛ a hwuga kaa tɛlashajɛ ta rụhwụŋ ru n'ungwa ma aba tutu Itekwu Ishenje

²²Atwa i'ime zhɛ e suleni Bozra vwuuŋ gana na tu ugbeji wɛ bɛrishijɛ apiambɛ ubwa. Ohwulu zhɛ o horukono asaza Idụm gana biyikwo na ụngwụ tumata to.

²³Iyi nɛ AGWANGWAMA jɛmɛ iwɛ Damaskos na, bi hiɛn: Tuzuga keeni amɛ-tụhaŋtụ jiteni atwa na jɛjɛ nu Hamat keeni Apad, iwɛnɛ ta a hwụjɛ anabarɛ awɛ. Ohwulu tuhoroko zhɛ o ubo aŋ gana itekwu[95] nɛ 'wɛŋ shɛ ihwungwɛ kwukwuŋ.

²⁴Atwa Damaskos lwegeji, ee gezhiji iwɛnɛ to o holono aŋ. A namɛ nụ ụngwụ-tuhwuga keeni tiriri gana biyikwo na ụngwụ tumata to.

²⁵E iricinji[96] ụshɛpwụ urishi na 'yajɛ la amɛ-olom[97] hwɛ hwɛɛ.

²⁶AGWANGWAMA na Hwuri Kpaaŋ hiɛŋ, Ɛ zhɛ a kwụna esemberi ubwa ni ihwɛŋnɛ ụshɛpwụ, ɛɛ zhɛ kaa e iricingo asaza ubwa kpaaŋ jita ata.

²⁷N zhɛ ma sapa uba Damaskos ulwa, u zhɛ wo hwoŋno kwunduu tu umwamwa wa agwuma Bɛnhedad.

²⁸Iyi nɛ AGWANGWAMA jɛmɛ iwɛ ụlamụ Kida keeni cɛnjɛ cɛnjɛ-ta-tugwama tu na ga Hazo untanganɛ, tu na gɛ Nɛbukadnɛza agwuma Babulon lasụ na, bi hiɛŋ: Tafwulaga ma atwa Kida maa hi iricinji ụlamụ wa atwa na namɛ geri bu uwaŋna-banụ!

²⁹Sugo ma shimwono shi tugwuno keeni agwụdụ aba, to tugwuno ta tuswataga no shimwono keeni iyi elele nɛ zweni no shimwono sha aba. Sugo ma nruhondo ma aba, mbiso ma atwa ata maa, Tuholono ti hi rungwutwonu geri geri!

³⁰Gamba AGWANGWAMA mo hi mbiso ahiɛba atwa na jɛjɛ nu Hazo, N hiɛŋ, Gozhigo ma taa dụlụ maa hi swaka. Gɛ Nɛbukadnɛza agwuma Babulon ihi heŋsegeni iyi iwɛ tɛnda. Iyi nɛ baa jɛmɛ na, bi hiɛŋ,

³¹Hwure ma! Ti zhɛ tu ma tafwulaga atwa ata mama namanjɛ na amɛ-olom suu! Ụshɛpwụ wa aba zasa akpa kwo kaa imbele ya akpa tukapanga o, a zasa iyi elele nɛ jilanɛ uŋ kwukwuŋ.

³²Sugo ma nruhondo ma aba keeni inɛ ya aba hwɛɛ! N zhɛ ma garataga atwa ata hwajɛ tihiŋzhe ta aba geri geri, Ngɛɛ zhɛ kaa me sugeni aŋ abara-ne-ebe na zhɛ a banɛ geri elele mo ubo aŋ.

³³Ɛ zhɛ a nda Hazo maa ụ shɛ ụshɛka unyizo-nom, u zhɛ wa sha ofwo na aka zhɛ na nama. Za bụtụ be elele zhɛ ba nama ya apata kwukwuŋ. Gamba AGWANGWAMA, N dumwa.

³⁴Gunu na ti gɛ Zɛdɛkia yɛ tugwama tu Juda, nazhɛ AGWANGWAMA m mbishi iwɛ u'una Ilam.

³⁵Bɛɛ hiɛŋ, AGWANGWAMA na Hwuri Kpaaŋ hiɛŋ, N zhɛ ma kwụna etwenyi ata shɛ egwoni a'inla tukala a na shɛ ukpahiŋ ụ'wụtụ Ilam.

³⁶N zhɛ ma nda maa go ovwugo eneshi banɛ no orubwo aba u tunama eneshi maa u vwunji Ilam. N zhɛ ma garataga atwa na namɛ nu bwa no ofwo ata eneshi, i zasa u'una we elele zhɛ wa vwa, atwa ubwa zha shɛ o gozhigo maa a swakaka o.

³⁷N zhɛ ma nda maa ga atwa Ilam sụmɛ atwa i'ime ya aba a na a jala aŋ tụkwụna inyɛsɛ. N zhɛ me iricingo atwa Ilam ni isɛbwɛ mi, N zhɛ ma tumwananɛ aŋ ejeshi a na zhɛ o sugo aŋ hwɛɛ.

³⁸N zhɛ me iricingo shɛgwuma sha aba keeni ehiu aba, maa mo shikicingo idwɛtwɛ mi apata.

³⁹Ama na aba ibɛ, N zhɛ ma nda maa i zhɛmanɛ atwa Ilam sasana. Gamba AGWANGWAMA, N dumwa.