Read bassa JƐRƐMIA 52 Bible Online

JƐRƐMIA 52 - bassa bible

JƐRƐMIA 52

¹Gɛ Zɛdɛkia namɛ shiywa woshi-nu-boo-ko te e meci bu na aka na tu baa yɛ tugwama tu Juda. Baa yɛ tugwama tu Jɛrusalɛm shiywa umpwa-nu-boo-ko. Ɛ hiɛŋ izeci bino bwa ga Hamutal, na shɛ yɛu Jɛrɛmia ata namɛ la ni Libna.

²Agwuma gɛ Zɛdɛkia njɛ AGWANGWAMA iwɛwɛ nu uhwaŋna uko uko gana na agwuma Jɛhoiyakim njɛ la du gbaa.

³Ibɛ po AGWANGWAMA njɛ isɛbwɛ duwa na atwa Jɛrusalɛm keeni atwa Juda, baa 'wɛŋ aŋ maa e beni ne eshe ubwa. Gɛ Zɛdɛkia njɛ tigezhe na Nɛbukadnɛza agwuma Babulon,

⁴ibɛ po gɛ Nɛbukadnɛza zhajɛ te ejeshi ubwa hwɛɛ ee hweri Jɛrusalɛm, ti yaa ulwa shiywa shi cinjishi, ni ipiɛnɛ umpwa ni ijitɛ umpwa ti gɛ Zɛdɛkia yɛ tugwama. E jwe ugba wa aba no tupohondo tụ ụshɛpwụ ata, ee hweri uŋ uuwa oo rungwutwonu.

⁵Gabata aa uranjɛ ụshɛpwụ ata tuhwala tutu shiywa shi Zɛdɛkia umpwa-nu-boo-ko tu baa yɛ tugwama.

⁶Ti yaa ulwa ipiɛnɛ ineshi ni ijitɛ icinjishi nu uywa ata gbaa, ibɛ imunɛ-tiya i'wɛtwɛ layɛ, atwa ata kaa zasa ya iyi elele nɛ vwanɛ aŋ maa a yɛ o.

⁷Uba na rungwutwonu ụshɛpwụ ata kaa hwuŋzwotongwu hwɛɛ. Okwo ta atwa Babulon rungwutwonu ụshɛpwụ ata, ama asaza kaa benengeni nụ ụjita. E beni ee duri uhwaŋna itimɛ ya agwuma, ee duri uhwaŋna ata namɛ na ashashɛ uba ye nu uba na, ee gezhiji ee zhe geri bu ulomu Jodan.

⁸Ama ejeshi Babulon urigeni agwuma Zɛdɛkia, aa 'imɛ bụ nụ ụdadarɛ ata gwumwonu nu Jɛriko, ama asaza ubwa garatagwụ kpaaŋ ee genji bu.

⁹Ee shepi Zɛdɛkia no ofwo agwuma Nɛbukadnɛza, na namɛ ya nụ ụshɛpwụ ata ɛɛ hiɛŋ Ribla, no tugwungwu tu Hamat. Apata gɛ Nɛbukadnɛza jɛmɛ ụshɛrɛya ubwa.

¹⁰Ni Ribla ata baa kwụnɛ miaụŋ-me-eyi mu Zɛdɛkia ne eshe ubwa, aa kwụnɛ du atwa elele na 'yajɛ ụjɛrụma nu Juda hwɛɛ.

¹¹Na aba inɛ ɛtɛ bee hwuceci eshe Zɛdɛkia, boo to bu ashɛnjɛ maa e shepi bu e zhe Babulon. Gɛ Zɛdɛkia namɛ nu umwono-tishi nu Babulon tutu tu'wo tu bwa.

¹²Ti gɛ Nɛbukadnɛza agwuma Babulon ulwa shiywa umpwa-na-shɛba-shi-cinjishi ni ipiɛnɛ itɛ ni ijitɛ umpwa, tu baa yɛ tugwama, nazhɛ gɛ Nɛbuzaradan na ba pana agwuma ahaŋsa na shɛ du bungbaracɛ be ejeshi, teni Jɛrusalɛm.

¹³Bee hwoŋzhinji Umwono wa AGWANGWAMA hwɛɛ, tu umwamwa umwono wa agwuma, keeni shimwono sha atwa ụjɛrụma she elele kpaaŋ nu Jɛrusalɛm;

¹⁴asaza ubwa bwereteji uba hwɛɛ.

¹⁵Na aba ibɛ gɛ Nɛbuzaradan suji atwa na ga ta vwɛ nụ ụshɛpwụ ata bee hwuri Babulon,[105] te etwenyi na shɛ egwoni nu ugondu i'ɛlɛ, keeni atwa ata gezhiji la leyiteni agwuma Babulon.

¹⁶Ama gɛ Nɛbuzaradan genji atwa na shɛ okofwo uhwuri atwa vwɛ kpaaŋ a na zasa iyi elele kwukwuŋ, aba bee tileni maa a na nda ugondu nu ntuma ma shifwafwa keeni shihilo shi nya.

¹⁷Nazhɛ atwa Babulon bwereteji atukpa ɛtumburɛ keeni akwụka ɛtumburɛ keeni okwokwo ata ɛtumburɛ ge zweni nu Umwono wa AGWANGWAMA hwɛɛ rukwu rukwu. Ee suji ɛtumburɛ elele ee hwuri Babulon.

¹⁸Ee suji du nkwasha ma ata oo zwono ma'alụ ma ata oo sugo nu utukwu-ụrụpɛ, keeni n-ngowo, ti i'wɛŋnɛ ɛtɛ aa nda ugondu na asụtụla, ta agbamgbam ata ga sa mehieŋ ma ata ma 'waŋ na arụpɛ tuta, keeni apalụ ata oo go hwoŋzhingo iturɛre keeni i'wɛŋni'wɛŋni yɛ ɛtumburɛ ye elele nɛ aa ga nda ugondu ni ibɛ nu Umwono wa AGWANGWAMA.

¹⁹E suji iyi elele nɛ aa njɛ na azhɛnarɛya kwo kaa na azụrụfa; tu nkwodo ma ata mu gwụmwatangwụ, te ejejebi ata oo sugo akanga ulwa, tu nkwodo ma ata oo zwono mehieŋ ma arụpɛ, tu nkwasha ma ata oo zwono ma'alụ, te eteburu-asụtụla, te ejejebi iturɛre tuhwoŋzhingo, keeni nkwodo ma ata aa 'waŋ meni ma afwafwa ma arụpɛ.

²⁰Agwuma Sụlụmụn ndanjɛ la iyi nɛ ɛtumburɛ iwɛ Umwono ata wa AGWANGWAMA ibɛ shɛ atukpa eyebi, keeni okwokwo ata a'wụtụ, keeni miaụŋ mi inɛ me eyi mɛ ɛtumburɛ umpwa-na-muba-mi-yebi mu na mu namɛ tuta tụ ụkwụka ata, ijɛ hwɛɛ hwuleji maa e menji uzhinono ibɛ.

²¹Yaa shɛ iwɛ atukpa ata, uzoto ụtụkpa uko ụ shɛ bimenji bi imbele i'ɛlɛ umpwa-ni-bɛ-tindɛtu, ụnjɛswa uhwohwo tu'umpo tu bwa ụ shɛ bimenji bi imbele i'ɛlɛ umpwa-ni-bɛ-iyebi, bimenji bu unyomo ubwa bɛ shɛ madagazhɛ mi neshi, amɛ ubwa 'yajɛ a'ibwa.

²²Okwukwusu nkwodo mɛ ɛtumburɛ cimbengeni na azuba ubwa. Uzoto bimenji bu ukwukwusu uko ụ shɛ imbele i'ɛlɛ itɛ, agbahwụ tụpatakwụ tụpatakwụ keeni apomɛgranati a na shɛ ɛtumburɛ hwɛ hwɛɛ a patanganɛ no okwukwusu ata nkwodo uuwa rungwutwonu. Utukpa uyebi u 'yagananɛ apomɛgranati gana ata du.

²³Apomɛgranati dupu-na-buhanda-na-ba-ecihiŋ (96) a namɛ ni i'ɛŋbi ubwa; apomɛgranati a na swatajɛ na agbahwụ ata tụpatakwụ hwɛɛ a namɛ dipi-yebi (100) tutu rungwutwonu.

²⁴Gɛ Nɛbuzaradan na shɛ bungbaracɛ be ehiu anjɛ-ugondu, shepi du Sɛraya na shɛ uhiu wo onongbo, na Zɛfania na 'wa bụ nu ugondu u tunongbo, keeni anya atwa atatụ a na a ngbaraka idwɛtwɛ Umwono wa AGWANGWAMA.

²⁵Bee shepi ivwɛlɛ ike nɛ ga shɛ bungbaracɛ be ejeshi, na atwa ecenje a na shɛ ajɛmɛ-ushaura agwuma anaa na ga ta namɛ nu ụshɛpwụ ata, na bụtụ na ga shɛ uyebi uberezhe we ejeshi na ga shɛ bi'nyeci bu ugondu wa asaza, keeni anya atwa a tandụ dupu-ne-eshe-umpwa (60).

²⁶Gɛ Nɛbuzaradan suji aŋ no ofwo agwuma Babulon, na namɛ ni Ribla

²⁷na namɛ no tugwungwu tu Hamat. Apata agwuma kwuci aŋ baa kwụnɛ. Gana ee suji atwa Juda ee hwuri na ti'ima ta.

²⁸Ufwugwo wa atwa na gɛ Nɛbukadnɛza suji bee kepi nu umwono-tishi na: tu baa yɛ tugwama tu bwa ya namɛ shiywa shi cenje, bee suji Eju ugbaa-na-akpakwụ-a-ta-nu-woshi-na-ba-atatụ; (3,023)

²⁹tu baa namɛ shiywa umpwa-na-shɛba-shɛ-tụndatụ, bee suji atwa Jɛrusalɛm akpakwụ-eneshi-nu-talacɛ-na-ba-eyebi; (832)

³⁰Ti gɛ Nɛbukadnɛza namɛ shiywa woshi-na-shɛba-shɛ-tatụ na tugwama tu bwa, nazhɛ gɛ Nɛbuzaradan na shɛ uhiu wa anjɛ-ugondu suji Eju akpakwụ-atatụ-ni-dipi-yebi-na-buhanda-na-atwa-a-ta (745) bee zweni nu umwono-tishi. Atwa na ee suji kpaaŋ namɛ igbɛɛ-iyebi-na-akpakwụ-atatụ (4,600).

³¹Ti gɛ Jehoiyakin agwuma Juda ulwa shiywa talacɛ-na-shɛba-shi-cenje ni ipiɛnɛ umpwa-ni-bɛ-iyebi ni ijitɛ woshi-ni-bɛ-itɛ na ti'ima tu bwa, nazhɛ ge Ivil-mɛrodak yɛ tugwama tu Babulon. Ubwa hieci inyɛmɛnyɛmɛ Jɛhoiyakin agwuma Juda, bɛɛ bɛcinjɛ bụ nu umwono-tishi.

³²Ge Ivil-mɛrodak njɛ bụ tebiye, bee peni bu ohwolu ụjɛrụma a na hwuri anaa na bee peni shɛgwuma shɛ vwɛ shɛ na aa 'imɛ la du nu bwa nu Babulon.

³³Ibɛ po ee peni Jɛhoiyakin ụhwada maa kede bu no urugono ya tugwuno tu umwono-tishi o, ama ga bu na ya ya iyimɛyɛ abana na agwuma tutu ukwunanga uraiŋ ubwa.

³⁴Agwuma Babulon a pana bụ iyi ukekeshi ubwa iyi-heri iyi-heri tutu tu'wo tu bwa.