Read bassa U'WO-ỤZHƐLA 2 Bible Online

U'WO-ỤZHƐLA 2 - bassa bible

U'WO-ỤZHƐLA 2

¹AGWANGWAMA ubi Zayon tishi tedure ni isɛbwɛ ibwɛ! Bɛɛ bizhirinjɛ ụjɛrụma Isrɛl taa na azuba baa kalagajɛ na cɛnjɛ. Bi teyinji shi ya iwɛ umwono ubwa nụ ụjita na baa njɛ isɛbwɛ o.

²AGWANGWAMA irecenji ụshɛpwụ we elele na namɛ nu Juda uzawa inyɛmɛnyɛmɛ tihioko. Bee hwuŋzetenji ti ijilɛni nɛ ga lashaga cɛnjɛ ta ata. Bɛ njɛ cɛnjɛ-ta-tugwama ta ata ụpụrụsa ta shɛgwuma sha tuba hwɛɛ.

³Ubwa bwereteji ikɛnyi nɛ atwa Isrɛl ga 'yajɛ la tedure ni isɛbwɛ ibwɛ i'wɛtwɛ ti'ishijɛ; baa lacɛ maa mo tu mbiyono na aka na ta atwa i'ime tu zhajɛ. Isɛbwɛ ibwɛ yo gorogo gana na ulwa wo gorogo woo hwoŋzhingo iyi elele nɛ rungwutwonu uŋ.

⁴Ubwa utu karɛ a'inla ubwa gana atwa tu i'ime; baa kwụnɛ atwa na atu ga 'yajɛ amɛ-olom keeni unyasa na aba. Ubwa utu dudugeni isɛbwɛ ibwɛ nu Jɛrusalɛm gana ulwa.

⁵AGWANGWAMA iricinji atwa Isrɛl gana atwa ubwa i'ime; bee hwuŋzetenji ijilɛni ibwɛ hwɛɛ, tu nhwaŋ ma shɛgwuma shɛ bwa hwɛɛ. Ubwa peni atwa Juda ụkwụla-tuta keeni u'wo-ụzhɛla tutwa tutuu.

⁶Ubwa bwereteji umwono ata ubwa ata zhɛba bu la rukwu rukwu; bee hwuŋzetenji ofwo ata bee ge teri la iwɛ nsono mu bwa tɛnda. AGWANGWAMA ubwa kwunanjɛ ijitɛ tijilo, ti Ijitɛ-ụhinjanụ tu Zayon hwɛɛ. Ta shɛgwuma, to onongbo hwɛɛ, a hwụjɛ ukpahiŋ na isɛbwɛ ibwɛ 'yajɛ.

⁷AGWANGWAMA jineci utukwu ubwa ụrụpɛ, bee genji umwono ubwa u tijilo. Ubwa leneni atwa i'ime maa e dwetweji ụdatụ ubwa. Ee keri n'ungwa ma tụlasụ no ofwo ata ata zhɛba bụ la nu unyasa.

⁸AGWANGWAMA ubwa heŋshi maa ga adatụ Zayon hwuŋzwo; bee mengenji uŋ maa go u hwuŋzwo hwɛɛ ubwa. Hwuwayɛ go, ta shɛshɛkpa, ta adatụ hwuŋzwotongwu hwɛɛ.

⁹Akpa ubwa nengeni no obukoto, abatana ubwa bwaratagwụ rukwu rukwu. Agwuma, ta miaụŋ-ma-tugwama namɛ na ti'ima hwɛɛ aba. E mbisegeni shi ya undwa o, AGWANGWAMA du kaa peni shi ya egesere ozobu elele o.

¹⁰N-nyarɛ mu Jɛrusalɛm mu gɛgajɛ saiŋ saiŋ na cɛnjɛ, aa dula upwupwutu no ohiuhiu aba, ee uregegeni tugwuno tụ ụcɛnjɛ tɛnda. Miaụŋ-mo-o mu na mu ta waŋnɛ mu to ezhiri na cɛnjɛ.

¹¹Eshe mi lukwumi u'wo-tutwa;[5] ohwulu mi namɛ nụ ụngwụ-tuhwuga. N lukwumi amɛ-tụhaŋtụ iwɛ atwa mi na aa kwụnɛ. Miaụŋ mu tuweewee, na miaụŋ mi shenje mo 'wogono izhilwe ni ihwɛŋnɛ ya amɛ ụshɛpwụ.

¹²A uganana ono aba, ɛɛ hiɛŋ, Imunɛ keeni i'uyɛ i tu gwụmɛ, aa 'waŋtangwụ ni ihwɛŋnɛ ya amɛ ụshɛpwụ gana gwụcanjɛ, atwa na aa gana ata uuwa oo 'wo ni i'ɛlɛ yo ono aba.

¹³Oo gabu Jɛrusalɛm, Jɛrusalɛm na Omo lubo, imbe kwuŋ Ngee eri mɛ hiɛɛŋ? Gana na kwuŋ Ngee eri ma bu ingatangaa? I zasa kwukwuŋ bụtụ nduwa ụbaụta gana ga. Iyi iwɛ nɛ ibi jiteni gembi gana itekwu; ashɛlatụ elele zasaba ya o.

¹⁴I zasa iyi elele egesere bu 'yajɛ maa e bi mbishi o, semi ụzagwụ kiri; I'enenji ɛtɛ ya aba becinji shi iwɛwɛ hiŋ uvwi o, ama e hi helekeci. Aa njɛ maa hi heŋshi maa ukekeshi ahaŋsa-tɛjɛshɛrɛga u hi te shi o.

¹⁵Atwa na a hanika ụshɛpwụ ata, a hi nda asada, oo zhingoto ohiuhiu aba nazhɛ a laya Jɛrusalɛm ni ilɛtu, iwɛnɛ tu woo hwuŋzwo. Ụshɛpwụ ala atwa o lubo na hŋ? Ụshɛpwụ ala unyizo hwɛ hwɛɛ wa ndana unyasa na hŋ?

¹⁶Atwa i'ime bu a bu nda asada hwɛɛ aba, aa bu ngbaracɛ igbɛtɛtɛ i'ime, oo puso ya apalatụ, ɛɛ hiɛŋ, Tɛ njɛ uŋ kaa ufwu. Ụjita ga atu ga jala la na.

¹⁷AGWANGWAMA njɛ ga iyi nɛ bee heŋshi maa nda: Bu tu kwụnɛ uzawa inyɛmɛnyɛmɛ tihioko, gana na tu baa jɛmɛ la cala cala. Ubwa njɛ maa atwa i'ime tu a tụ lasụ, bee peni aŋ unyasa nu ulayɛ na eti leyi.

¹⁸Oo gabu Jɛrusalɛm, ga uba hiŋ keleni AGWANGWAMA ụhiɛŋshɛ![6] Ga malaba mi hiŋ mu na fwunga gana Urefu, tụ ụjita tu uwaŋna. Meme lukwucinji ma na amɛ-tụhaŋtụ keeni u'wo-tutwa!

¹⁹Ishijɛ nụ ụjita, na twa-u'wo, na uganana AGWANGWAMA. Lụpa bụ na amɛ bụ kpaaŋ maa hiokono inyɛmɛnyɛmɛ miaụŋ mụ bụ. Muba mɛ shɛ miaụŋ ma ata mo 'wo imunɛ na tuvwulaga ti ihwɛŋnɛ ya amɛ ụshɛpwụ kpaaŋ.

²⁰Oo AGWANGWAMA, mbiyana de maa kwụbɛ; atwa ga aba pana ụbaụta! Eyikwo a ya usunda miaụŋ ma aba mu na oo lubo! Aa kwụnɛ onongbo ne egesere na amɛ ohwolu tijilo Agwangwama!

²¹Ta atwa na ta waŋnɛ, ta atwa na inganjɛ, e 'wegeni ni ihwɛŋnɛ ya amɛ ụshɛpwụ. Atwa i'ime kwụnɛ esemberi no showo no otokwobi aba. Gabụ bụ kwụnɛ aŋ uzawa inyɛmɛnyɛmɛ tihioko, nụ ụjita ata abɛ njɛ la isɛbwɛ.

²²Gabụ bu suyaganɛ atwa i'ime mi maa o n rungwutwonu ni isene maa ono mo holono geri geri, i zasa kaa bụtụ be elele eri ba banangana nụ ụjita ata abɛ njɛ isɛbwɛ o. A kwụnɛ miaụŋ mi mi mu na Ngaa bɛjɛ mu na du kaa Omo lubo.