Read bassa U'WO-ỤZHƐLA 4 Bible Online

U'WO-ỤZHƐLA 4 - bassa bible

U'WO-ỤZHƐLA 4

¹Azhɛnarɛya tu a na ga ta ngere ngere 'imɛ ya tiri; atayɛ Umwono wa Agwatana garatagwụ ni ihwɛŋnɛ ya amɛ ụshɛpwụ.

²Esemberi Zayon a ti shanɛ iyi yo ogwumishi, gana azhɛnarɛya ụ tụrụmbɛɛ; ama hwuwayɛ go a nda aŋ ya gana nkwasha ma cɛnjɛ-ti'wɛŋnɛ mu na mu namɛ ni i'ɛlɛ bu-mo-bu-nkwasha.

³Okwo aka, e mepi ta a pana oywoywo aba mosubo, ama atwa mi 'yajɛ shimiaụŋ no oywoywo aba gana agbaanjɛ.

⁴E genji miaụŋ ma aba mee 'wi i'uyɛ; keeni imunɛ. Miaụŋ ma lụpa iyimɛyɛ, i zasa kaa bụtụ peni aŋ o.

⁵Atwa na a ya la iyimɛyɛ ibiye, aba o 'wo ya imunɛ ni ihwɛŋnɛ ya amɛ ụshɛpwụ; atwa na ɛɛ wɛnicinjɛ ni i'wɛŋnɛ ibiye tu'urugono, aba o wotogo ya nu ubizo ma'alụ.

⁶E peni atwa mi ulwapɛ na hwuri una wa atwa na namɛ nu Sụdụm a na Agwatana njɛ la ufwu eshigiri, nu uzawa timbiyono tu u'ala butugwumwa.

⁷Miaụŋ ma aba mu tugwama[12] mu namɛ rụmbɛɛ gana bizhe, aa cɛnjɛmɛ ee hwuri mosubo, ee bwengenji ni iyi tɛnda, aa 'yajɛ kaa ikɛnyi. Ulapiya wa ta nu u'waba wa aba gana atayɛ ata ɛɛ hiɛŋ, Safiya.

⁸Huwayɛ go e weteji ni ihwɛŋnɛ ya amɛ ụshɛpwụ; i zasa bụtụ mepi aŋ okwo tumapa o, tu'wo tụ kwụnɛ apɛshɛka aba ushi; gana nlulo; tu'waba ta aba tu hweteni taa swanɛ no o'umpwo aba.

⁹Atwa na 'wi la nu ujasa debeji hwuri atwa ga 'wi umɛwɛɛ ni imunɛ-tiya, uzawa iyimɛyɛ incɛnjɛ aŋ, ee 'wi tu'wo ti imunɛ.

¹⁰Abara-ne-ebe na jiteni atwa mi a 'waŋnɛ ụngwụ-tuhwuga; ibɛ po ono miaụŋ o shitogo miaụŋ ma aba mu na oo go lubo maa a yɛ.

¹¹AGWANGWAMA ishicinjɛ isɛbwɛ ibwɛ ta 'yajɛ ikɛnyi, ibɛ shɛ isɛbwɛ ɛtɛ ibwɛ i zasa tụkwụshɛ; bee sepi Zayon ulwa, wee hwoŋni to okoshilo ubwa hwɛɛ.

¹²I zasa atwa elele na namɛ no ofwo elele, okwo shɛgwuma she edenji a na ga tɛtanɛ-rishe maa atwa i'ime eri o tono odubo Jɛrusalɛm o.

¹³Ama atwa i'ime eri ee teni ya, iwɛnɛ te egesere ubwa njɛ iwɛwɛ, onongbo aba dudweji mehieŋ ma atwa tiririri.

¹⁴O rungo ni ihwɛŋnɛ ya amɛ ụshɛpwụ gbom gana sholubo, aa shɛ ge mehieŋ mu baba, iwɛbɛ po yaa zasa bụtụ eri bo tumongono otogwo aba.

¹⁵Atwa a uganana aŋ ɛɛ hiɛŋ, Hwulo ma beye! Hwulo ma beye! To tu tumongono[13] ma o, hi hashɛganụ![14] Gana ata oo rungo oo tonongo a'una edenji, i zasa kaa atwa leshiji aŋ o.

¹⁶Iwɛ aba teshi ya AGWANGWAMA o; ubwa gereteji aŋ ni ikɛnyi ibwɛ. Bu mụnɛ shɛ ya onongbo tu ụjɛrụma o, bi mepeni shi ya kaa n-nyarɛ mu tu iwɛ o.

¹⁷Tɛ shɛlanɛ maa e ti mbiyeni, eshe tu lukwumi ashɛlatụ i zasa kaa bụtụ ti mbiyeni o. Edenji ebe eri shi mo ti mbiyono, aba ya ata 'yaga ashɛlatụ aba maa e ti mbiyeni.

¹⁸Atwa i'ime tu e tu gwubeji; ti eri shi ta ta ihwɛŋnɛ ya amɛ ụshɛpwụ o, ukwunanga tu wo gwumwongonu ba; a rutwa ijitɛ tu. Aka ukwunanga tu ci ya.

¹⁹Atwa na utu urigeni a 'yajɛ izɛlɛgwu ee hwuri ugbeji na we sure vwuuŋ na tụla. E tu gwubegeji nu nshama; aa tɛ 'imɛ eshigiri nu ụshɛka.

²⁰A 'imɛ bụtụ na shɛ bizhiji bu uraiŋ tu, ubwa shɛ agwuma na AGWANGWAMA ge dudugeni manɛbɛ mu tugwama, ubwa shɛ bụtụ ata atu ga patanɛ rishe maa ma tu lashaga na atwa i'ime tu.

²¹Ahiɛba atwa Idụm keeni atwa Uz, ehi eri na hunga ma de ilɛtu; hi na bwada unyasa. Abara-ne-ebe ta me hi teni, maa hi tufworenji tugwuno ti hiŋ, maa hi no rungo mohondo gologolo gana atwa na mayaga ma ngba.

²²Atwa Zayon loshigwo ulwapɛ iwɛwɛ ya aba; AGWANGWAMA zha shɛ a uranga aŋ ya ti'ima tutu o. Ama gabụ ge Idụm, AGWANGWAMA zhɛ ma hi pana ulwapɛ; bi zhɛ mɛ hi vwɛ uvwi no tugworozwo ti hiŋ.