Read bassa U'WO-ỤZHƐLA 5 Bible Online

U'WO-ỤZHƐLA 5 - bassa bible

U'WO-ỤZHƐLA 5

¹Oo AGWANGWAMA, teyinje iyi nɛ iti jiteni. Utu mbiyanɛ maa kwụbɛ ụpụrụsa na iti jiteni.

²I'wɛŋnɛ tu namɛ ni i'ɛlɛ ya agaiŋ; agaiŋ aba zweni ya nu nhwaŋ mu tu.

³Atwa i'ime tu kwụnɛ eshi tu, ibɛ po ono tu shɛ ya olulo.

⁴Ta tụpa utashɛ meni mu na etu swe; tusa ata sa i'wɛ'wɛ nɛ ata shana ulwa.

⁵A ma tu suka gana[15] nzhinyacɛ kwo kaa nruhondo, tu lukwumi, ama e leni shi kaa maa ta ta ụhinjanụ o.

⁶Ti meme gengeni atwa Ijipti keeni atwa Asiria, iwɛ maa ta 'yaga iyimɛyɛ nɛ iti gembi maa ta ya maa ta nama uraiŋ.

⁷Ogwunukwoshi tu njɛ la iwɛwɛ, hwuwayɛ go, o uwo ya, ibɛ gɛ ata nda ya ụbaụta iwɛ iwɛwɛ ya aba.

⁸Atwa na shɛ ajama, aba utu untanganɛ ya, i zasa kaa bụtụ eri mo ti bicingo ni i'ɛlɛ ya aba o.

⁹Ashɛrɛ o rungo nu u'una; tu'wo oto tono ta ata bana maa te rinje iyimɛyɛ.

¹⁰Imunɛ-tiya njɛ maa uyarangbawụ ụ tɛ 'imɛ, Ibɛ po u'waba tu vwengenji gana apitwa na patanɛ nu ulwa.

¹¹Ni Ishɛmɛ Zayon gom gom ee weci ne eyikwo tu ni iji; a nda miaụŋ mu tu mo o mu na mu ta shɛ asapa maa e leni aŋ ni iji nụ ụshɛpwụ we elele na namɛ nu Juda.

¹²E suji ehiu tu ee sweci ni i'wɛ'wɛ; a mụnɛ shɛ kaa n-nyarɛ mu tu ụjɛrụma o.

¹³A njɛ esemberi tu ni iji maa a na naka inɛkɛ ni izhɛrɛ gana ajama. Miaụŋ-me-eyi ma 'waŋnɛ iri aŋ, i'wɛ'wɛ nɛ, aa nda gologolo.

¹⁴N-nyarɛ mɛ jɛjɛ shɛ ya no shidubo shɛ ụshɛpwụ o, atwa na ta waŋnɛ kaa du 'nyemi shi ya i'nyemi 'nyemi o.

¹⁵Unyasa bonuo na shɛmɛ shi tu; ụkwụla-tuta leshiji ya ohwolu tɛhiɛba tu tu.

¹⁶Ụjɛrụma tu pashɛngwawa no ohiuhiu tu, tɛ njɛ iwɛwɛ, iwɛbɛ po ata nda ya adangboo!

¹⁷Ta gwumanga taa na shɛmɛ shi tu, ibɛ po malaba mi kepi eshe tu, ti eri shi ta kwụba ya uhwaŋna o.

¹⁸Iwɛnɛ ti Ishɛmɛ Zayon zasa ya bụtụ be elele, iwɛbɛ po aka a swa ya ogwu ni ibɛ.

¹⁹Oo AGWANGWAMA, gabụ bɛ shɛ agwuma unyizo-nom, idwɛtwɛ tugwama tụ bụ kaa namɛ tutu awaŋnɛ elele.

²⁰Iwembe po isɛbwɛ tu ibu 'wi te ilegeji i ci gana gaa? Iwembe po ebi ti jineci unyizo-nomm?

²¹Oo AGWANGWAMA, utu gwuricinje no ofwo bu ikɛnyi bu, maa te gwure! Utu gwuricingeni ụjɛrụma ala tu u cala maa u shaananɛ ufwo!

²²Okwo bi ti jineci suu unyizo-nom? Isɛbwɛ bu suu zasa ya ukwunanga?