Read bassa IZIKƐL 10 Bible Online

IZIKƐL 10 - bassa bible

IZIKƐL 10

¹Ngaa mbiyanɛ azuba iyi-uumwa ɛtɛ 'yajɛ apiambɛ, Ngaa kwụbɛ iyi ike sụbɛ idwɛtwɛ nɛ aa njɛ nu utayɛ ata ɛɛ hiɛŋ Safiya.

²Nazhɛ Agwatana hiɛŋ bụtụ ata urigeni tugwuno ti ilinɛn, Zhaga tono ni ikɛgbɛ ya akwụka ata yo rungo kiri kiri tuta ti iyi-uumwa ɛtɛ maa tarɛ akanga ulwa ni i'ɛlɛ bu pwomu. Zhizhongo akanga ata nu ụshɛpwụ ga. Ngaa ngbaracɛ bụ ga ti bɛɛ zhɛ.

³Iyi-uumwa ɛtɛ 'yajɛ apiambɛ shikeni tuta tu umwono wa Agwatana na aka na ti bee teni, nazhɛ udomu urigeni ukpogwu ata namɛ na amɛ umwono wa Agwatana.

⁴Nazhɛ ụjɛrụma wa AGWANGWAMA pashɛngwa na azuba iyi-uumwa ɛtɛ, wee zhe waa patanɛ ni idwɛtwɛ yo odubo umwono wa Agwatana. Nazhɛ udomu ata shini nu umwono ata wa Agwatana, ibɛ ụjɛrụma wa AGWANGWAMA wa ta nu ukpogwu ata raawụụ.

⁵Nazhɛ aa hwụjɛ rundu ru na apiambɛ iyi-uumwa ɛtɛ ya nda taa nu ukpogwu tupohondo. Rɛ shɛ gana rụhwụŋ ra Agwatana na Hwuri Kpaaŋ tu baa njɛ n-ndumwa.

⁶Aka na ta AGWANGWAMA peni bụtụ ata urigeni tugwuno ta ata ti ilinɛn unu, bɛɛ hiɛŋ bụ, Tala akanga ulwa ata namɛ na ashashɛ ikɛgbɛ ɛtɛ namɛ tuta ti iyi-uumwa ɛtɛ. Bụtụ ata teni ga bee shikeni to dongonu bukagba ata bu ko.

⁷Nazhɛ iyi-uumwa ɛtɛ ike keri u'ala yaa tarɛ akanga ulwa ata namɛ no ofwo aba, yee zweni aŋ ni i'ɛlɛ bụtụ ata urigeni tugwuno ti ilinɛn. Aka na ta bụtụ ata leshiji akanga ata ulwa bee hwuri ụbanụ.

⁸Ngaa kwụbɛ gana maa iyi-uumwa ɛtɛ inɛ inɛ 'yajɛ iyi nɛ sụbɛ u'ala butugwumwa tuta ta apiambɛ aba.

⁹Ngaa mbiyanɛ Ngaa kwụbɛ du gana maa ikɛgbɛ ineshi namba mama sụbanụ, inɛ inɛ namɛ na bụ'aŋbụ bi iyi-uumwa ike. Abụ ngbaracɛ ikɛgbɛ ɛtɛ, i shɛ gana atayɛ kuresoleti.

¹⁰Ikɛgbɛ ɛtɛ ya ta gana ɛtumburɛ, inɛ inɛ 'yajɛ bukagba bi nya na shiyeni na bụ'aŋbụ bu bwa.

¹¹Aka elele ti iyi-uumwa ɛtɛ zhɛ tahaŋnụ, e eri o hwulo ụpadụ we elele na ɛɛ zhɛ uzawa tɛjɛshɛrɛga. Geri elele na ikɛgbɛ ɛtɛ peni eshe, inɛ vwɛ ya 'wa iŋ uzawa tɛjɛshɛrɛga.

¹²Tu'waba ta aba tu ulwa eshe hwɛɛ ta aba, ti i'ɛlɛ, ta apiambɛ hwɛɛ.

¹³Ngaa hwụjɛ ta a suyana ikɛgbɛ ɛtɛ yo rungo kiri kiri.

¹⁴Iyi-uumwa ɛtɛ ye elele 'yajɛ apɛshɛka eneshi. Inɛ ihiiŋ 'yajɛ ụpɛshɛka buna-be-eyi, inɛ iyebi 'yajɛ ụpɛshɛka butugwumwa, inɛ itatụ 'yajɛ ụpɛshɛka bizeci inɛ ineshi 'yajɛ ụpɛshɛka ugbeji.

¹⁵Iyi-uumwa gɛnɛnɛ la Ngɛɛ kwubɛ nụ ụpalanụ Urefu Kiba, aka na ti yaa hiɛrɛ na azuba.

¹⁶Aka na ti iyi-uumwa ɛtɛ mwo tahaŋnụ, ikɛgbɛ ɛtɛ du ya hila na aba. Aka elele ee berishiji apiambɛ aba maa a hiɛrɛ na cɛnjɛ, ikɛgbɛ ɛtɛ ya 'wa aŋ nu uzawa tɛjɛshɛrɛga.

¹⁷Yaa shɛ iyi-uumwa ɛtɛ shikeni, ikɛgbɛ ɛtɛ du yo shikono; ofwo elele kaa iyi-uumwa ɛtɛ hiɛrɛ ikɛgbɛ ɛtɛ du ya hila na aba, iwɛnɛ po iyi-uumwa ɛtɛ aba 'yagajɛ iŋ.[29]

¹⁸Nazhɛ ụjɛrụma wa AGWANGWAMA pashɛngwa ni idwɛtwɛ ɛtɛ yo odubo umwono ata wa Agwatana waa patanɛ na azuba iyi-uumwa ɛtɛ.

¹⁹Ngaa ngbaracɛ ti iyi-uumwa ɛtɛ berishiji apiambɛ aba aa hiɛrɛ ee genji cɛnjɛ tu unyizo, nazhɛ ikɛgbɛ ɛtɛ 'wa aŋ. Aa njɛ zhiiŋ no odubo umwono wa AGWANGWAMA na namɛ nu uwaŋna-banụ, ibɛ po ụjɛrụma wa Agwatana Isrɛl patanɛ na azuba aba.

²⁰M mepi maa aba shɛ iyi-uumwa ɛtɛ ike ike Ngaa kwụbɛ la tuta ta Agwatana Isrɛl nụ ụpalanụ Urefu Kiba.

²¹Buna buna 'yajɛ apɛshɛka eneshi, na apiambɛ eneshi, keeni iyi nɛ sụbɛ i'ɛlɛ butugwumwa nɛ namɛ tuta ta apiambɛ aba.

²²Apɛshɛka aba namɛ oko oko na apɛshɛka na Ngaa kwụbɛ la nu ụpalanụ Urefu Kiba. Iyi-uumwa ɛtɛ inɛ inɛ ya zhaga ririri nu umbe ibɛ.