Read bassa IZIKƐL 12 Bible Online

IZIKƐL 12 - bassa bible

IZIKƐL 12

¹Nazhɛ AGWANGWAMA jɛmɛ n-ndumwa ne mi.

²Bɛɛ hiɛŋ, Ɛ-yɛu bụtụ, bu namɛ na ashashɛ atwa tigezhe. A 'yajɛ eshe ama a kwụbɛ shɛ uhwaŋna o, a 'yajɛ acɛbɛ, ama a hwụjɛ shɛ iwɛ o, iwɛnɛ aa shɛ atwa tigezhe.

³Iwɛbɛ po ɛ-yɛu bụtụ, Ishijɛ hwuwayɛ go maa sokono aŋ iyi, nekeshi a pana abashɛ, imanganga i'wɛŋnɛ bu gana bụtụ na zhɛ na ti'ima, kwuno tuhwulo tu uwaŋna ta namɛ. Ga bụtụ be elele ubu kwụbɛ tɛ ɛbi zhɛ gana bụtụ na zhɛ na ti'ima, te ebi beni ni ihwɛ bu ɛbi zhɛ nyapadụ. Nekeshi atwa ga tigezhe a mapa maa a shɛ ga atwa tigezhe.[33]

⁴Shapa i'wɛŋnɛ ɛtɛ bu abu imanganjɛ maa hwuri na ti'ima tu uwaŋna ta namɛ, iwɛ maa atwa ubu kwụbɛ, nda maa a bu ngbaraka tɛ ɛbi zhɛ na ti'ima nu uwaŋna ụrụmɛ.

⁵Iba ụdatụ umwono bu[34] ta a bu ngbaracɛ maa pushe nu ukpogwu, bɛcinjɛ i'wɛŋnɛ bu nu u'ibwa ata.[35]

⁶Nda maa a bu ngbaraka te ebi nice i'wɛŋnɛ ɛtɛ bu ebi peteni iŋ nu ututu, maa zhaga ne tishi maa urigeni te eshe bu, iwɛ maa kede eri ofwo na ɛbi zhɛ tụkwụba o. Ijɛ ɛtɛ abɛ njɛ zhɛ ya shana atwa Isrɛl unu-tɛtɛtagana.

⁷Ngaa njɛ ga gana na ta AGWANGWAMA mbishi maa ma nda. Ngaa imanjɛ i'wɛŋnɛ mi jita ata, Ngee umpi iŋ gana bụtụ na zhɛ na ti'ima, nụ ụrụmɛ ata, ti iyi ya jala turumono, Ngaa 'yɛbɛ ụdatụ mu ni i'ɛlɛ mi, Ngee beni ga nu u'ibwa ata. Ngee shepi i'wɛŋnɛ mi Ngee peteni nu ututu Ngee hwuri ta atwa kpaaŋ m ngbarakacɛ.

⁸Ti iyi heri nu uvwungwa AGWANGWAMA jɛmɛ n-ndumwa ne mi,

⁹Bɛɛ hiɛŋ, Ɛ-yɛu bụtụ, ta atwa ga tigezhe Isrɛl mo bu hoŋtono bana, ɛɛ hiɛŋ, Imbe nɛ kwuŋ aba ndaa?

¹⁰Mbiso aŋ maa, Gamba ga n shɛ AGWANGWAMA Mokondo Gamba ma njɛ na aba. Mbiso aŋ maa tigesere tu ga tɛ shɛ iwɛ yɛu-tugwama nɛ namɛ nu Jɛrusalɛm, ti iwɛ atwa na jɛjɛ apata hwɛɛ.[36]

¹¹Mbiso aŋ maa, Iyi nɛ abɛ njɛ i shɛ tusakana ti iyi nɛ zhɛ yo jitono aŋ. Ɛ zhɛ a ima aŋ maa a shɛ ajama na cɛnjɛ ti nya.

¹²Yɛu-tugwama nɛ untanganɛ aŋ zhɛ ya patana i'wɛŋnɛ ibwɛ nu ututu nụ ụjita ba bana nu u'ibwa[37] ata aa 'yɛbɛ nụ ụdatụ ubwa. Bi zhɛ bo urugono eshe ubwa, bi zha shɛ ba kwụba ofwo na bɛɛ zhɛ o.

¹³Ama N zhɛ mo tulonono bu igwune mi maa ma ima bụ ni ibɛ. N zhɛ ma shapɛ bu nu Babulon, apata bɛɛ zhɛ bo 'wo, asha bụ kwụbɛ shɛ uŋ okwo tụkwụba.

¹⁴N zhɛ ma garataga atwa vwɛ ubwa, mo mburusonu aŋ geri geri, ta atwa ubwa umwono-ụshɛrɛya,[38] ta atwa na a pana bụ ahaŋsa, ta atwa na a 'yaka bụ hwɛɛ, nazhɛ atwa zhɛ e hwuceci otokwobi o urugono aŋ maa a kwụnɛ.

¹⁵Aka na Ngee gereteji aŋ na ashashɛ anya edenji hwɛɛ, ta a'una anya, nazhɛ ɛɛ zhɛ a mapa maa Gamba n shɛ AGWANGWAMA.

¹⁶N zhɛ ma nda maa atwa aba oko ambana benengeni nu ujasa, ti imunɛ-tiya hwɛɛ, keeni ụngwụ ụwɛ, iwɛ maa a kwụbɛ gana na ti iyi-tupwaŋ nɛ aa njɛ apata shɛ keeni maa e mepi maa Gamba n shɛ AGWANGWAMA.

¹⁷Nazhɛ AGWANGWAMA dumananɛ n-ndumwa ne mi.

¹⁸Bɛɛ hiɛŋ, Ɛ-yɛu bụtụ, na zhɛgɛda ta aba ya iyimɛyɛ, bwɛ na tɛzhɛgɛda ti inyɛsɛ kpakpakpaa ta aba swa meni.

¹⁹Mbiso atwa ga kpaaŋ aba maa tigesere tu na AGWANGWAMA Mokondo tumwananɛ atwa Jɛrusalɛm a na ta namɛ na cɛnjɛ ta aba na, bi hiɛŋ, Ɛ zhɛ na zhɛgɛdaga aka na ta a ya iyimɛyɛ, ɛɛ zhɛ nɛ bwɛ na tɛzhɛgɛda ti inyɛsɛ kpakpakpaa ta a swa meni. Ɛ zhɛ a nda cɛnjɛ ta aba osombo, iwɛnɛ ta atwa elele na namɛ apata a shɛ atwa abwagara.

²⁰Ashɛpwụ a'wụtụ a na ta 'yajɛ hwuwayɛ ufwugwo ɛ zhɛ a nda ufwu, ɛɛ zhɛ a nda u'una ga osombo. Nazhɛ ɛɛ zhɛ a mapa maa Gamba n shɛ AGWANGWAMA.

²¹Nazhɛ AGWANGWAMA jɛmɛ n-ndumwa ne mi,

²²bɛɛ hiɛŋ, Ɛ-yɛu bụtụ, iwembe kwuŋ po atwa Isrɛl uranjɛ ushi ga tisho, ɛɛ hiɛŋ, Aka o hwulo ba, ozobu kaa lacɛ tisɛɛ?

²³Iwɛ ecilo ata mbiso aŋ iyi nɛ Gamba na n shɛ AGWANGWAMA Mokondo zhɛ a duma iwɛ ibɛ. N zhɛ ma kwunanga ushi ata. A zha shɛ no sho uŋ ya kwukwuŋ ni Isrɛl. Mbiso aŋ maa unaa na ɛɛ zhɛ no sho na ya maa: Aka ci ya, to ozobu elele zhɛ ɛ sɛ!

²⁴Shizobu shɛ tukata, ne tigesere tu na ta inzhɛnga atwa ti zha shɛta nama ya kwukwuŋ na ashashɛ atwa Isrɛl.

²⁵Ama Gamba AGWANGWAMA Mokondo N zhɛ mu na duma n-ndumwa na aba, iyi elele Ngaa jɛmɛ, ibɛ kaa zhɛ ya nda. I zha shɛ no ilogogo. Na aka ga ta ahi ta ya uraiŋ, ahiɛba atwa ga tigezhe, N zhɛ ma nda iyi nɛ Ngaa hi titwagwanua-unu ibɛ. Gamba AGWANGWAMA Mokondo N dumwa.

²⁶Nazhɛ AGWANGWAMA n hiɛŋ,

²⁷Ɛ-yɛu bụtụ, atwa Isrɛl hiɛŋ, Ozobu ata aba kwụba, a ta shɛ iwɛ shiywa shi ufwugwo, tigesere tụ bụ kaa tɛ ta shɛ iwɛ iyi nɛ ta dụlụmɛ.

²⁸Iwɛ ecilo ata mbiso aŋ maa, Gamba AGWANGWAMA Mokondo N jɛmɛ maa: I zha shɛ kwukwuŋ ye ilogogo ya. Iyi nɛ Ngaa jɛmɛ zhɛ yɛ sɛ. Gamba AGWANGWAMA Mokondo N dumwa.