Read bassa IZIKƐL 14 Bible Online

IZIKƐL 14 - bassa bible

IZIKƐL 14

¹N-nyarɛ mi Isrɛl mu ko mu n zhaganɛ, maa gɛgajɛ na agba mi.

²Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

³Ɛ-yɛu bụtụ, atwa ga meme shikecengeni ntatanuwaŋ na shɛmɛ sha aba, ee leni maa ntatanuwaŋ ma ata mi zeriji aŋ maa e meme shileni utayɛ udukwutwa nu umbe wa aba maa a na nda iwɛwɛ. E heŋshi suu maa N zhɛ mɛ jishijɛ aŋ?

⁴Iwɛ ecilo ata duma n-ndumwa na aba hwuwayɛ go, mbiso aŋ iyi nɛ Gamba na n shɛ AGWANGWAMA Mokondo Ama njɛ na aba, N hiɛŋ, Bụtụ bi Isrɛl be elele meme shikecengeni ntatanuwaŋ na amɛ ubwa, bee meme shileni utayɛ udukwutwa nu umbe ubwa maa bu na nda iwɛwɛ, nazhɛ baa zhajɛ no ofwo bigesere, Gamba na n shɛ AGWANGWAMA Mokondo N zhɛ mɛ jishijɛ bu ni ikɛnyi mi, N zhɛ ma pana bụ ajɛshɛgwa na teni cɛŋ nu gana na tu ufwugwo ntatanuwaŋ mu bwa mu namɛ.

⁵Ntatanuwaŋ mu ga mi becinji atwa Isrɛl na agba mi hwɛɛ, ama de na ajɛshɛgwa na Ngɛɛ zhɛ ma pana aŋ, N 'yajɛ ashɛlatụ maa N zhɛ m meme gwuricingeni shɛmɛ sha aba maa shi zwe no ofwo mi.

⁶Hwuwayɛ go, mbiso ya atwa Isrɛl maa Gamba AGWANGWAMA Mokondo, N hiɛŋ, Jishirijɛ ma maa hi gwure, hi gɛnjɛ ntatanuwaŋ ma ata mi hiŋ mɛ shɛ iyi-tupwaŋ kpaaŋ.

⁷Aka elele ta bụtụ bi Isrɛl be elele, kwo kaa bugaiŋ na jɛjɛ na ashashɛ atwa Isrɛl n genji, baa zhɛba ntatanuwaŋ, bee meme shileni du utayɛ udukwutwa nu umbe ubwa, nazhɛ bee zhegeni bigesere bu ko maa hwoyigono iwe mi na aka oko, Gamba AGWANGWAMA N zhɛ mɛ jishijɛ bu ni ikɛnyi mi!

⁸N zhɛ ma sukakana bụ, ma nda bụ tusakana no ofwo atwa vwɛ, ubwa zhɛ ba sha iyi ushwa wa atwa vwɛ. N zhɛ kaa ma bacɛnga bụ na ashashɛ atwa mi. Nazhɛ ɛhi zhɛ hia mapa maa Gamba AGWANGWAMA na.

⁹Yaa shɛ kaa ee helekeci bigesere maa pana ajɛshɛgwa ne tigesere tụ ụzagwụ, asha iwɛnɛ ti yaa shɛ Gamba AGWANGWAMA N helekeci bu. N zhɛ kaa ma bacɛnga bụ na ashashɛ atwa mi Isrɛl.

¹⁰Te bigesere ata, ta bụtụ ata zhegeni bu, ɛ zhɛ a lashɛga ulwapɛ ata uko uko.

¹¹N zhɛ ma nda ijɛ iwɛ maa kede a na inzhɛnga ya atwa Isrɛl maa e n jineci o, maa kede a na mama hashɛgana ni iwɛwɛ ya aba ye elele nɛ aa nda o. Nazhɛ ɛɛ zhɛ a sha atwa mi, Ngɛɛ zhɛ ma sha Agwatana aba. Gamba AGWANGWAMA Mokondo N dumwa.

¹²Nazhɛ AGWANGWAMA jɛmɛ n-ndumwa ne mi, bɛɛ hiɛn,

¹³Ɛ-yɛu bụtụ, Yaa shɛ u'una uko n njɛ iwɛwɛ, waa n shanɛ shɛ atwa tɛcara, N zhɛ ma nda ofwo na iyimɛyɛ ya aba ya banɛ ufwu. N zhɛ ma karɛ imunɛ-tiya maa i na kwụna ta atwa, ti iyimabiga hwɛɛ.

¹⁴Okwo yaa shɛ atwa ga atatụ, ga Noa, na Daniɛl[42] keeni Job namɛ apata, tiririri ta aba kiri ti zhɛ to bicingo uriaŋ wa aba. AGWANGWAMA mokondo dumwa.

¹⁵Okwo yaa shɛ Ngaa tumwanɛ isundɛ mazhanga maa i kwụnɛ atwa u'una ata, Ngaa njɛ kaa maa ụ shɛ ofwo inyɛsɛ, waa shɛ du kaa osombo, yaa zasa bụtụ be elele ba kashɛka ya nu bwa okwo tɛkashɛka,

¹⁶yaa shɛ kaa atwa ga atatụ namɛ nu bwa, gana na tu Gamba AGWANGWAMA Mokondo shɛ buumwa, a zha shɛ a ala maa e bicinji okwo miaụŋ ma aba me eyi kwo kaa miaụŋ ma aba mo o. Uraiŋ wa aba kiri ɛɛ zhɛ a ala maa e bicinji, cɛnjɛ ta ata kaa ti zhɛ ta sha osombo.

¹⁷Okwo yaa shɛ Ngaa karɛ ujasa nu u'una ata, Ngee leni maa a kwụnɛ atwa, hwɛɛ ti iyimabiga nu utokwobi,

¹⁸yaa shɛ atwa ga atatụ namɛ apata, gana na Ngaa shɛ AGWANGWAMA Mokondo na shɛ Agwatana, a zha shɛ a ala maa e bicinji okwo miaụŋ ma aba me eyi kwo kaa miaụŋ ma aba mo o. Ama uraiŋ wa aba kiri ɛɛ zhɛ o bicingo.

¹⁹Yaa shɛ Ngaa karɛ ụngwụ uko ụwɛ nu u'una ata, Ngaa kwụnɛ atwa ofwugwo ni isɛbwɛ mi, Ngaa kwụnɛ ta atwa, ti iyimabiga,

²⁰okwo yaa shɛ ata Noa, na Daniɛl tu go Job namɛ apata, gana na tu Ngaa shɛ AGWANGWAMA Mokondo, na shɛ buumwa, a zha shɛ a ala maa e bicinji okwo yɛu-ye-eyi kwo kaa yɛu-yo-o. Semi uraiŋ wa aba ikɛnyi aba kiri tiririri ta aba ti zhɛ to bicingo.

²¹Iyi AGWANGWAMA Mokondo jɛmɛ na, bi hiɛŋ, N zhɛ ma pana atwa Jɛrusalɛm ulwapɛ mu na wumanjɛ uneshi, ujasa, ni imunɛ-tiya, ni isundɛ mazhanga keeni ụngwụ ụwɛ maa ụ kwụnɛ atwa, ti iyimabiga!

²²Yaa shɛ bụtụ be elele benengeni bee eri bee bicinji miaụŋ mu bwa me eyi kwo kaa miaụŋ ma aba mo o, ngbaraka aŋ aka na ta a zhajɛ no ofwo bu. Kwụba gana na ta a shɛ atwa ci'nyɛ, maa kwụbɛ maa ulwapɛ na Ama pana atwa Jɛrusalɛm teni cɛŋ;

²³Nazhɛ ɛbi zhɛ ba kwụba ugondu wa aba keeni iyi nɛ aa nda, nazhɛ ɛbi zhɛ ba kwụba maa iyi elele nɛ Ama nda 'yajɛ ecilo ebiye. AGWANGWAMA Mokondo ubwa dumwa.