Read bassa IZIKƐL 17 Bible Online

IZIKƐL 17 - bassa bible

IZIKƐL 17

¹Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, manganganɛ atwa Isrɛl n-ndumwa.

³Mbiso aŋ maa, AGWANGWAMA Mokondo hiɛŋ, Ụgbandụ ugbeji uko namba, na 'yajɛ apiambɛ na gembi duwa, tɛhiɛŋzhɛ ta apiambɛ ubwa ti gembi, taa pilanụ tebiye, bee berishiji apiambɛ ata ubwa te heri. Baa hiɛrɛ bee zhe ni ihiŋhiŋ nshama mu Lebanon, bɛɛ kwushɛ bungwuzhɛ be bilibe bụ ụ'wụ'wụ usobu,

⁴bee shepi bu na cɛnjɛ ta tihinya, bee shiri bu nụ ụshɛpwụ wa ahinya.

⁵Nazhɛ bee suji izɛgwu na cɛnjɛ ti Isrɛl, bee zhe baa bɛrɛ iŋ ne ehilo na ta 'yajɛ ugwungwu. Bɛ bɛrɛ iŋ gana bụtụ bɛrɛ ụ'wụ'wụ na ɛɛ hiɛŋ wilo nu udapa na 'yajɛ meni tebiye maa u na waŋna.

⁶Ụ'wụ'wụ ata sabɛ waa namɛ ruwɛ ruwɛ, waa bubajɛ gana ikpɛri ya afwafwa. A'walụ ubwa a saba, ɛɛ zhɛ geri bu ugbeji ata, tini tu bwa ta kaana ti'ilo na cɛnjɛ. A'wa'walụ keeni ambɛ urigeni ukparɛ ata.

⁷I 'yajɛ ụgbandụ ugbeji unya na namba, bu 'yajɛ du apiambɛ a na helenji ta tɛhiɛŋzhɛ tu na ti gembi. Ibɛ ukparɛ ata 'wɛnjɛ bụ tini tu bwa ta ambɛ ubwa hwɛɛ maa lashɛga meni mu na mu hwuri mu naa na mu ga namɛ ni itimɛ ɛtɛ ukparɛ ata shikeni waa waŋna.

⁸Ama ukparɛ ata kaa go shikonowoŋ na cɛnjɛ ti biye tu na tɛ 'yajɛ meni mu na mu waŋnɛ maa u sebi maa u 'weri du tụ'walụ ta afwafwa tụ 'wụtụ.

⁹Nazhɛ Gamba AGWANGWAMA Mokondo, Ngee heŋteni, Ngɛɛ hiɛŋ: Ukparɛ ga tuba zhɛ wa nama ga maa u waŋnɛ hŋ? Ugbeji ga uhiiŋ tuba zha shɛ wo mwo uŋ taa ne tini, maa togwu ta tụ'walụ[50] tu bwa maa cwushanga, maa sashanga ta a'wa'walụ ubwa hwɛɛ maa e hweteni hŋ? I zha shɛ ya sha iwɛ i'ɛlɛ nɛ 'yajɛ ikɛnyi kwo kaa iwɛ atwa ofwugwo iwɛ maa e mushinji uŋ o.

¹⁰Yaa shɛ ee mushinji uŋ, aa shɛrɛ uŋ nyapadụ, u tɛ zhɛ tuba wa nama maa u na saba hŋ? Yaa shɛ oholobwo uwaŋna-banụ to uŋ, u zha shɛ wo 'wo kaa? U zha shɛ wo hwotono hwɛ hwɛɛ no ofwo ata waa waŋna hŋ?

¹¹Nazhɛ AGWANGWAMA n hiɛŋ,

¹²Hoŋtono de atwa ga tigezhe, maa, Hi mepi ecilo n-ndumwa mu ga aa manganjɛ hŋ? Mbiso aŋ maa, Agwuma Babulon zhajɛ Jɛrusalɛm, baa 'imɛ agwuma te ehiu ubwa ugondu hwɛɛ bee hwuri Babulon na aba.

¹³Baa 'imɛ bụtụ bu ko nu ukpogwu wa agwuma, baa twa-unu nu bwa, baa njɛ bụ maa ta-tuwa maa bi zhɛ na hwuga-unu ubwa. Bee suji atwa na ga shɛ atwa tandụ tandụ bee hwuri,

¹⁴maa kede udenji ata ishijɛ ya sasana o, keeni maa a kwụbɛ maa a untanganɛ ga unu na aa ga twa.

¹⁵Ama agwuma Juda teni bu tigezhe, baa tumwanɛ atwa ni Ijipti maa e suje idɛkwɛ ne ejeshi ofwugwo. I zhɛ ya 'yagana bu ga eshe hŋ? Bi eri ba banangana ga hŋ? Bi eri shi ba bwada unu ga tutwa maa banangana ulwapɛ ata o!

¹⁶AGWANGWAMA Mokondo hiɛŋ; Gana na tu Ngaa shɛ buumwa, agwuma ga zhɛ o 'wo nu Babulon, iwɛnɛ ti bee bweji unu na bee ge shiri la keeni unu na baa ga twa la na agwuma Babulon, na mungicinji bu ni idwɛtwɛ i tugwama.

¹⁷Ejeshi agwuma Ijipti a na 'yajɛ ukpahiŋ duwa a na kaa gembi ufwugwo duwa, zha shɛ a ala ujasa tujasa maa e mbiyeni bu ti yaa shɛ agwuma Babulon sherecenji ihwɛŋnɛ nu udwodwo, bee hiŋnenji ashapa iwɛ maa kwụna atwa ofwugwo.

¹⁸Bu bweji tuwa tu na boo go to, tu unu na bee ge shiri hwɛɛ. Bu nduwa ya ijɛ hwɛɛ, ama kaa bu zha shɛ ba banangana o.

¹⁹AGWANGWAMA Mokondo hiɛŋ, Gana na tu Ngaa shɛ buumwa, N zhɛ ma pana bụ ulwapɛ, iwɛnɛ ti bee bweji unu na baa twa la, boo to du tuwa ni izeci mi maa bi zhɛ ba untangana uŋ.

²⁰N zhɛ mo tulonono bu igwune mi, maa ma ima bu ni ibɛ. N zhɛ ma shapa bụ nu Babulon maa ma pana bụ ulwapɛ apata, iwɛnɛ tu baa n shanɛ shɛ bụtụ bi tɛcara.

²¹Ɛ zhɛ a kwụna ejeshi ubwa a na ge ngezengeni ne teleyi[51] tɛnda nu ujasa, atwa na benengeni zhɛ a garatagwụ geri geri. Nazhɛ ɛhi zhɛ hia mapa maa Gamba AGWANGWAMA N dumwa.

²²AGWANGWAMA Mokondo jɛmɛ, bɛɛ hiɛŋ: N zhɛ ma shapa bilibe bu ụ'wụ'wụ usobu ata njɛshɛ ma kwusa tusaba tu bwa; Ma zha ma shɛla uŋ ni ishɛmɛ nɛ zeci duwa.

²³Ni ishɛmɛ ɛtɛ zeci uhwuri mu na mu vwɛ hwɛɛ ni Isrɛl, u zhɛ wa bubaga tebiye wa 'wala tụ'walụ u zhɛ wa sha ụ'wụ'wụ usobu na gembi tebiye. Iyiri shanụnụ she elele[52] shi zhɛ sha nama apata, shɛɛ zhɛ sha 'yaga ofwo tuswaka nu uhwuŋnu ubwa maa shɛ na ta tuhwurugwo.

²⁴I'wɛ'wɛ ye elele nɛ namɛ na cɛnjɛ ta ata zhɛ ya mapa maa Gamba n shɛ AGWANGWAMA, N leji i'wɛ'wɛ nɛ njɛsanjɛ, Ngaa njɛ maa i'wɛ'wɛ turuwɛ ruwɛ na waŋna ta njɛsanjɛ. N hwecinji i'wɛ'wɛ nɛ ga saba, Ngaa njɛ i'wɛ'wɛ hwoo maa i sebi. Gamba AGWANGWAMA N dumwa. N zhɛ kaa ma nda iyi nɛ Ngaa jɛmɛ maa N zhɛ ma nda.