Read bassa IZIKƐL 19 Bible Online

IZIKƐL 19 - bassa bible

IZIKƐL 19

¹Nazhɛ AGWANGWAMA n hiɛŋ, Twana ehiu atwa Isrɛl u'wo ga ụzhɛla:

²Hiɛŋ, Go nobu shɛ gana bizeci bo o! Bu wɛŋnicinjɛ miaụŋ mu bwa na ashashɛ izeci ye eyi nɛ zhanjɛ tebiye.

³Bu wɛŋnicinjɛ yɛu ibwɛ ike, yaa shɛ bizeci na 'yajɛ ikɛnyi na ba ima atwa.

⁴Anya edenji hwụjɛ unabarɛ ubwa aa 'imɛ bụ nu ushapa wa aba. Ee mbembiri bu na shɛkama ee hwuri Ijipti nu bwa.

⁵Bi 'yacɛ uuwa baa kwụbɛ maa ashɛlatụ elele zasaba ya o. Nazhɛ bɛɛ wɛŋnicinjɛ biywoywo bwa binya, baa waŋnɛ baa shɛ bizeci na 'yajɛ ikɛnyi.

⁶Aka na tu baa waŋnɛ hwɛɛ, boo rungo ya ni izeci ivwɛ. Bi seshi iyi ti'ima, baa shɛ ya bɛ'imɛ ba atwa.

⁷Bu bweji ijilɛni,[56] bee hwuŋzetenji ashɛpwụ. Aka elele bee ngwuleni, uriri ubwa wa ima atwa cɛnjɛ ta ata hwɛɛ.

⁸Edenji ụlwatagwụ maa a sukakanɛ bụ; atwa bananjɛ no olugwo elele, ee beresheji n-ngwuno ma aba mi tijala, aa 'imɛ bụ nu ugwuru[57] wa aba.

⁹Ee mbembiri bu na shɛkama, ee shiyeni bu ni ikeji, ee shepi bu pa agwuma atwa Babulon. Ee kepi bu, aa 'yaka bụ, iwɛ maa kede a hwụjɛ ya ti bee ngwuleni nu nshama mi Isrɛl kwukwuŋ.

¹⁰Go nobu shɛ la gana ukparɛ ufwafwa na namɛ ni itimɛ bu ya afwafwa[58] na aa bɛrɛ nụ ụpalanụ uhwulwo, iwɛnɛ te meni mu barɛ apata. Ukparɛ ata sebi waa bubajɛ tebiye wee 'weri tụ'walụ.

¹¹A'wa'walụ ubwa 'yajɛ ikɛnyi, aa waŋnɛ maa e shebi shekwute sha shɛgwuma. Ukparɛ ata bubajɛ ta njɛshɛ, waa waŋnɛ uuwa wee ce tụla, bụtụ be elele kwụbɛ gana na tu waa bubajɛ wee sebi ta njɛshɛ.

¹²Ama e mushinji uŋ ni isɛbwɛ taa ne tini ee keri na cɛnjɛ. Ibɛ po mpiala mu uwaŋna-banụ mu hwecinji tụ'walụ tu bwa. A kwusatajɛ a'wa'walụ ubwa; ee hweteni nazhɛ ee hwoŋzhinji aŋ.

¹³Nụ ụshɛka ya aa shɛrɛ uŋ, na cɛnjɛ tu na tu hweteni, tu na tu zasa meni.

¹⁴Uzhibi ukparɛ ata 'imɛ ulwa; ulwa hwoŋzhinji a'wa'walụ ubwa hwɛɛ ta tụ'walụ[59] tu bwa. A'wa'walụ ubwa zha shɛ a 'yaga ya ikɛnyi kwukwuŋ, a zha shɛ du kaa a shaba ya shekwute sha shɛgwuma nu bwa o. U'wo-ụzhɛla ta, a tuwa uŋ, aa twaananɛ.