Read bassa IZIKƐL 23 Bible Online

IZIKƐL 23 - bassa bible

IZIKƐL 23

¹Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, miaụŋ mu ko mo o mi yebi mu namba mɛ shɛ atwa bino bu ko.

³A shɛ awɛle ni Ijipti, e kwuni tuwɛle tɛnda taa ta a waŋnɛ. Na cɛnjɛ ta ata aa fwɛŋ shosubo sha aba uuwa shaa 'waŋ.

⁴Go Ohola ubwa shɛ idɛwuŋ (ubwa shɛ ụsụbwa Samaria) buhongwu bwa ɛɛ hiɛŋ go Oholiba (ubwa shɛ ụsụbwa Jɛrusalɛm).[68] N zeni aŋ hwɛɛ aba ebe yebi, ee m metenji du miaụŋ-me-eyi keeni miaụŋ-mo-o.

⁵Okwo tu go Ohola shɛ biyikwo mi, ba nda waa tuwɛle, baa nda ukwedeyi wo olwo ubwa a na namɛ na Asiria.

⁶A shɛ ejeshi a na o urugono i'wɛŋnɛ ya aba ishenje, a shɛ ogwomina ụjɛrụma, aa shɛ du atwa na 'yajɛ shihwolu shɛ 'wụtụ 'wụtụ; hwɛɛ aba kaa a shɛ esemberi na pilanụ tebiye, ejeshi na a suka idɛkwɛ aa shɛ.

⁷Buwɛle be ejeshi Asiria a na 'yajɛ shihwolu baa shɛ. Ukwedeyi ubwa njɛ bu uuwa bee meme heshigeni baa zhɛba ya ntatanuwaŋ ma atwa Asiria elele na baa nda ukwedeyi wa aba.

⁸Bu to tuhwulo tɛ tuwɛle tu na bee kwune tɛnda taa ni Ijipti, no ofwo na etwenyi kwune buweci nu bwa tu baa ta waŋnɛ la. Taa na aka na tu baa ta shɛ usapa, ibɛ etwenyi kwuni buweci nu bwa, aa njɛ bu buwɛle.

⁹Iwɛbɛ po Ngee shepi bu Ngee utegeni etwenyi ata Asiria baa nda eshe iyi aba.

¹⁰E shiri bu mohondo, ee leshiji miaụŋ mu bwa me eyi ta mu na mo o, nazhɛ aa shɛrɛ bụ nu utokwobi. Baa shɛ ya iyi tutwa na ashashɛ eyikwo iwɛ ụshɛrɛya na jiteni bu.

¹¹Okwo to buhongwu bwa go Oholiba kwụbɛ ijɛ, bu wụmangwụ waa nɛ tuwɛle bee hwuri batagwụ bwa go Ohola.

¹²Bɛ njɛ du esheyi atwa ata Asiria a na beni urishi, a gata shɛ ejeshi a na untanganɛ shihwolu shɛ 'wụtụ 'wụtụ, a na o urogogono i'wɛŋnɛ ya aba ujasa kpaaŋ, keeni ejeshi ata shɛ asụcɛ idɛkwɛ, te esemberi ata pilanụ tebiye,

¹³Ngaa kwụbɛ maa masha mu bwa hwɛɛ mɛ zhɛshɛ o, buhongwu ata bwa wụmangwụ du gana batagwụ ata bwa.

¹⁴Ama ba ta tuhwulo nɛ tuwɛle tu bwa tɛnda. Aka na baa kwụbɛ ntatanuwaŋ me etwenyi na untanganɛ shihwolu shɛ 'wụtụ 'wụtụ nu Babulon mu na aa njɛ nụ ụdatụ ee urigeni mu tugwuno tu na ti shenjemi bere bere.

¹⁵E umpi mu amazhɛya ne shimbi, ee peri mu ereweni no ohiuhiu, hwɛɛ aba shɛ gana ejeshi Babulon a na shɛ asụcɛ idɛkwɛ.

¹⁶Gunu na tu baa kwụbɛ mụ, esheyi aba kwuni bu ti'insa, baa tumwananɛ mụ butumwa nu Babulon maa ga a zhajɛ.

¹⁷Nazhɛ atwa ata Babulon zhajɛ maa o woto nu bwa. Ee weci nu bwa uuwa baa shanɛ aŋ ya du iyi nɛ njɛ ufwu, bee meme sheyinji bee genji aŋ.

¹⁸Aka na bɛɛ mɛmɛ bɛcinjɛ ne eshe ufwugwo mohondo maa bụtụ be elele mepi maa buwɛle baa shɛ. Ngee sheyinji Ngee genji bu gana na Ngee meme sheyinji Ngee genji la batagwụ bwa.

¹⁹Bu wụmangwụ ya na tuwɛle tɛnda, i shɛ shɛ aa manga nu gana na tu baa nda la tu baa ta waŋnɛ ni Ijipti o.

²⁰Etwenyi ata aba baa nda esheyi aba, a gata teleyi ta aba tɛ shɛ gana teleyi ti izhinyɛci, a na o mungo eyikwo gana idɛkwɛ.

²¹Oholiba, asha ba jala maa to tuhwulo tɛ tuwɛle tu na ɛbi njɛ la ni Ijipti aka na abu ta shɛ la usapa, igɛtɛ etwenyi fwufwanganjɛ la osubo bu uuwa aa 'waŋ, ee weteji ya.

²²Oholiba, Gamba AGWANGWAMA Mokondo, N hiɛŋ, N zhɛ me suje etwenyi ata bu ebi genji la maa a 'yaga amɛ-tụhaŋtụ na bụ, N zhɛ me suje aŋ geri elele maa o bu gbodongonu.

²³N zhɛ me suje atwa Babulon, na atwa Kaldia hwɛɛ, te etwenyi Pikod, ta a na Shoa hwɛɛ, ta a na Koa ta atwa Asiria. N zhɛ me suje atwa ata a shɛ ogwomina hwɛɛ, ta atwa na zhɛmanjɛ esemberi tebiye a na untanganɛ shihwolu shɛ 'wụtụ 'wụtụ te ehiu ejeshi a na a suka idɛkwɛ mo sotulonu aŋ urubwo uko.

²⁴Ɛ zhɛ a 'waŋnɛ ejeshi ofwugwo ni ihɛŋtu ujasa hwɛɛ, ti ihɛŋtu nɛ ya 'waŋna i'wɛŋnɛ. A 'yajɛ shabula shɛ ujasa keeni akata ashɛmbɛrɛ a na aa mama jilaganɛ, ɛ zhɛ mo bu rugwutwonu, a ma bu sukakana. N zhɛ ma bu shapa mo utogono aŋ, aba zhɛ a duma ụshɛrɛya bụ gana na tu undwa wa aba namɛ.

²⁵N zhɛ mo lono maa a bɛ njɛ iyi iwɛ ni isɛbwɛ ya aba, iwɛnɛ tu Ngaa 'yajɛ isɛbwɛ keeni isɛbwɛngwɛ na bụ. Ɛ zhɛ a jaja inyɛnu bu, ta acɛbɛ bụ, ɛ zhɛ a kwụna atwa bụ a na ge benengeni nu utokwobi. Ɛ zhɛ o sugo miaụŋ mụ bụ me eyi ta mu na mo o, o hwoŋzhingo mu buumwa buumwa.

²⁶Ɛ zhɛ o tufworongo tugwuno tụ bụ, o sugo odworwo bu, ti ikwɛmbɛ bụ.

²⁷N zhɛ ma kwunanga esheyi ata aba nda la tɛ tuwɛle ta ata aba nda la te kwune taa ni Ijipti. Bi zha shɛ ba mbiyana ya ntatanuwaŋ ma ata okwo timbiyana o, okwo tu haŋsa bu zha shɛ du kaa ba haŋsa ya iwɛ Ijipti o.

²⁸Iyi AGWANGWAMA Mokondo hiɛŋ na, bi hiɛŋ, N zhɛ ma bu shapa ma pana atwa na go bu to ni i'ime keeni atwa na ebi sheyinji ebi genji la.

²⁹Ɛ zhɛ o sugo iyi elele nɛ abɛ njɛ la ugondu ibɛ nazhɛ abu 'yajɛ iŋ, nazhɛ a ma bu ganga ya mohondo, iwɛnɛ to o bu to ni i'ime, bi zhɛ bo shilo ya gana buwɛle. Esheyi bu keeni tuwɛle tụ bụ ibɛ

³⁰bụ shapɛrɛganɛ inɛ ɛtɛ. Bɛ shɛ buwɛle be edenji, ebi meme heshigeni nu ntatanuwaŋ ma aba.

³¹Gana na abu 'wa iyi nɛ batagwụ bụ ba nda, iwɛbɛ po Ngɛɛ zhɛ mo bu utogono ukwopi ubwa nu u'ala bụ.

³²AGWANGWAMA Mokondo hiɛŋ, Bi zhɛ ba swa ukwopi ata u batagwụ bụ; ụ shɛ du kaa ukwopi na gembi tebiye, na kaa iri. Bụtụ be elele zhɛ ma bu ngbaraka cwɛŋ, a na bu nda asada. Iwɛnɛ po ukwopi ata shini pwomu.

³³U zhɛ ma bu nda bụtụ bi tiriri u na bu ngba, ukwopi ata wa sha bụtụ inyɛsɛ, wo bibizo kaa bụtụ, ubwa shɛ ukwopi ata u batagwụ bụ ga Samaria.

³⁴Bi zhɛ ba swa uŋ nu bwa uuwa i ci uce, gabụ bi zhɛ ba bwarataga uŋ rukwu rukwu. Na tubwaratagwụ tu bwa ɛɛ zhɛ a jajaga osubo ata bụ. Gamba AGWANGWAMA Mokondo N dumwa.

³⁵Iwɛbɛ po Ngaa jɛmɛ Gamba AGWANGWAMA Mokondo, Ngɛɛ hiɛŋ, Bi zhɛ ba nda ụbaụta iwɛ esheyi ata bụ keeni iwɛ tuwɛle ta ata tụ bụ iwɛnɛ isɛbwɛ mi ibu 'wi, abu m panɛ aba.

³⁶Nazhɛ AGWANGWAMA n hiɛŋ, Ɛ-yɛu bụtụ, bu mama 'imɛ hŋ maa jɛmɛ ụshɛrɛya ata Ohola abana Oholiba? Ta aŋ iwɛ iyi-tupwaŋ nɛ aa ndanjɛ.

³⁷A njɛ tuwɛle, ee dudweji mehieŋ ma atwa, a njɛ tuwɛle nu ntatanuwaŋ, aa kwụnɛ miaụŋ-me-eyi mu na ee ge me metenji. Miaụŋ mi mi me eyi muba oo to ụrụpɛ nu ntatanuwaŋ ma aba.

³⁸Shɛ iyi nɛ kiri aa njɛ ta o. E heshigeni ohwolu mi tijilo, jita ata gbaa ibɛ ee bweji undwa Ijitɛ-ụhinjanụ mi na Ngee shikicinji.

³⁹Jita ata uko uko ee suji miaụŋ ma aba oo to ụrụpɛ nu ntatanuwaŋ, ibɛ du aa zhajɛ ee heshigeni ohwolu mi tijilo! Iyi nɛ aa njɛ nu umwono mu ta.

⁴⁰Ahiɛba hi tumwanɛ etwenyi ata namɛ taa dụlụ maa a hiɛ suyananɛ aŋ. Aka na etwenyi ata zhajɛ, abụ dụrɛ meni, ebi shiyegeni itezere ne eshe, abụ shanɛ odworwo ne embi, abụ shanɛ ikwɛmbɛ ni i'ilu.

⁴¹Nazhɛ abɛ jɛjɛ no ogodo ụjɛrụma, ebi shi uteburu nu umbe wa aba, ee petengeni ya iyi nɛ pilanụ nu bwa hwɛɛ, ti iturɛre keeni manɛbɛ ma buta mu na Ngee peni aŋ la.

⁴²Rundu re etwenyi ata tusashɛ ru namɛ na ashashɛ aba, aba shɛ atwa na ee suje taa nụ ụshɛka. Ee zweni eyikwo aba shi'umwo shi biye ni i'ɛlɛ, ee petengeni aŋ adara na pilanụ no ohiuhiu.

⁴³Nazhɛ Ngɛɛ mɛmɛ hiɛŋ, Biyikwo ga aa nduwa ufwu na tuwɛle, ubwa aa ta njɛ buwɛle ba aba. Ga a njɛ bụ gana na aa jala, iwɛnɛ po iyi du baa ga namanɛ ta.

⁴⁴A zhagana awɛle ata ɛgbɛ gbɛ oo woto na aba. A zhagana Ohola no Oholiba, aba shɛ eyikwo ata shɛ awɛle.

⁴⁵Etwenyi tiririri zhɛ a pana aŋ n-ndumwa-tụwụma iwɛ tuwɛle ta aba keeni iwɛ mehieŋ ma atwa ata na ee dudweji, iwɛnɛ ta a nda tuwɛle. Mehieŋ ma atwa na aa kwụnɛ kaa mu namɛ ni i'ɛlɛ ya aba.

⁴⁶Iyi AGWANGWAMA Mokondo hiɛŋ na, bi hiɛŋ, Suje unyama wa atwa oko maa a sukakanɛ aŋ, maa e zweni aŋ inyɛsɛ maa e leshiji aŋ iyi ni iji.

⁴⁷Ga unyama ata tegeni aŋ atayɛ maa a sukakanɛ aŋ no otokwobi, ga a kwụnɛ ta miaụŋ ma aba, maa e hwoŋzhenji to shimwono sha aba.

⁴⁸N zhɛ ma kwunanga ya iwɛ tusashɛ tɛnda na cɛnjɛ tu ga kpaaŋ, inɛ gɛ zhɛ ya sha unu-tɛtɛtagana no ofwo biyikwo be elele maa kede a njɛ ya iwɛ tusashɛ kwukwuŋ gana na aa nda la o.

⁴⁹Ahiɛba eyikwo ga eyebi a na shɛ atwa na batagwụ, N zhɛ ma hi pana ulwapɛ iwɛ tuwɛle ti hiŋ, keeni ntatanuwaŋ mi hiŋ tɛzhɛba. Nazhɛ ɛhi zhɛ hia mapa maa Gamba n shɛ AGWANGWAMA Mokondo.