Read bassa IZIKƐL 24 Bible Online

IZIKƐL 24 - bassa bible

IZIKƐL 24

¹Ta atu ulwa shiywa shi cinjishi ni ipiɛnɛ umpwa ni ijitɛ umpwa na ti'ima, nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, 'nyata ụjita ga uhwayɛ ga gom gom, iwɛnɛ po nụ ụjita ga ubwa agwuma Babulon zhɛ o kwuno Jɛrusalɛm tuhwala.

³Manganganɛ atwa ga mi tigezhe n-ndumwa mu ga, hiɛŋ aŋ Gamba AGWANGWAMA Mokondo N hiɛŋ, Zwono ma meni ni ikwɛshɛ, hi peteni iŋ nu ulwa.

⁴Tanga ma usunda ubiye hi zweni ni ibɛ, ibɛ shɛ otutu keeni n'unto zanga ma o'umpwo na zhɛmanjɛ hi zweni ni ibɛ.

⁵Ga shɛ usunda ụgwụdụ na zhɛmɛ, ta ma itulu i'wɛ'wɛ[69] nu uvwi ikwɛshɛ ɛtɛ. Ge meni ma ata mu gwuzhajɛ; shitogo ma o'umpwo ata hwɛɛ, tu usunda ata maa a nɛ.

⁶AGWANGWAMA Mokondo hiɛŋ, Atwa ebe ụshɛpwụ ata a na o dudwogo mehieŋ ma atwa, ɛ zhɛ a nda hwuŋ adangboo! Ụ shɛ gana ikwɛshɛ ɛtɛ ya gbaga nɛ zasa aka na yaa nama shɛshɛshɛ kwukwuŋ. Bwaga usunda ata uko uko zawa icɛcɛ tu'waŋ[70] uuwa i ci aka na woo hwuwowu.

⁷O dudwogo mehieŋ ma atwa nụ ụshɛpwụ ata, ama i zasa ofwo na mehieŋ mu 'waŋ na cɛnjɛ tu na upwupwutu eri wo urogogono mu o; semi nu utayɛ tubala na shiri nu ukpogwu aa 'waŋ mụ.

⁸N gɛnjɛ mehieŋ ma ata apata, nu utayɛ ata tubala namɛ kpataa no ofwo na ee eri shi o urogono mu, iwɛ maa mi ishicinjɛ isɛbwɛ mi maa ma nda itɛpwɛ.

⁹Iwɛbɛ po AGWANGWAMA Mokondo hiɛŋ, Ụshɛpwụ ga wo dudwogo mehieŋ zhɛ wa nda hwuŋ adangboo! Gamba ni ikɛnyi mi n zhɛ ma ta i'wɛ'wɛ ɛtɛ itulu te zeci.

¹⁰Ta itulu ni i'wɛ'wɛ ɛtɛ! Shana ulwa maa u gereji! Shitogo usunda ubwa maa ụ nɛ tebiye! Maa kede urombwo nama ya o![71] Hwoŋzhingo o'umpwo ata kwunduu!

¹¹Nazhɛ ma patana ikwɛshɛ ɛtɛ itumburɛ yo ohondo na akanga ulwa, ganga iŋ maa i hwoŋni maa i shenjemi ywaa. Nazhɛ ikwɛshɛ ɛtɛ zhɛ ya nama rụmbɛɛ, na aka na tugbaga ta ata ti ibɛ tu hwoŋni tee beni,

¹²Tɛgadaga Ngaa mama zuga,[72] tukwocikwolo tu na ikwɛshɛ gɛ 'yajɛ tu hwoŋni shi nu ulwa ata hwɛɛ o.

¹³Tukwocikwolo tụ bụ, tu ba tɛ shɛ iwɛ bụ tusashɛ nɛ abɛ njɛ. Okwo ti Ngee mekeni maa ma bu nyashɛnga, bu ta hashɛganụ waa. Bu zha shɛ ba nama ya rụmbɛɛ o, semi aka na abụ hwụjɛ-ụngwụ ni isɛbwɛ mi tutu uce.

¹⁴Aka ci ya ti Ngɛɛ zhɛ ma nda iyi. Gamba AGWANGWAMA Mokondo N dumwa. N zha shɛ ma ngbaraka iwɛwɛ hiŋ cwɛŋ bana o, okwo inyɛmɛnyɛmɛ hiŋ N zha shɛ ma kwụba o. N zhɛ ma hi pana ulwapɛ te teni cɛŋ ni iyi nɛ ahiɛ njɛ. Gamba AGWANGWAMA Mokondo N dumwa.

¹⁵Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

¹⁶Ɛ-yɛu bụtụ, N zhɛ ma shapa bụtụ ata ebu lubi uhwuri atwa elele eshigiri. Bɛ shɛ shɛ kaa ba twa-u'wo, okwo n'ungwa ta ugana o,[73] okwo malaba mụ bụ kede mu banɛ o.

¹⁷To lono maa a hwụjɛ to obo ngwulo. Ta pashɛnga ureweni bu o, to hwucoko okwo abida bu o, kede abu kwụbɛtɛnɛ useyida ụkwụla-tuta kwukwuŋ. To urugono ụpɛshɛka bụ iyi elele o, ta ya okwo iyimɛyɛ nɛ atwa na a ta-ụkwụla a ya o.

¹⁸Tu Ngaa dumanjɛ n-ndumwa na atwa ata nu uvwungwa dididi. Ụrụmɛ shɛ biyikwo mi 'wi, ti iyi heri nu uvwungwa, Ngaa njɛ ga gana na te e ge me peni-unu.

¹⁹Ibɛ po atwa ata n heŋteni, ɛɛ hiɛŋ, Iwembe po aba nda iyi gana gaa?

²⁰Ngɛɛ jishijɛ aŋ, Ngɛɛ hiɛŋ aŋ, AGWANGWAMA ubwa jɛmɛ n-ndumwa ne mi.

²¹Mbiso atwa Isrɛl maa: AGWANGWAMA Mokondo hiɛŋ, Hia busa iwɛ ikɛnyi nɛ umwono wa Atwatana 'yajɛ. Yaa ma hi kwulana maa hi na zha hi nɛ kwubɛ uŋ, ama AGWANGWAMA zhɛ a hashɛgana uŋ kaa. Ɛ zhɛ kaa a kwụna miaụŋ mi hiŋ me eyi na mu na mo o, mụ na ɛhi gɛnjɛ na amwamwa hiŋ nu Jɛrusalɛm nu ujasa.

²²Nazhɛ ɛhi zhɛ hia nda gana ga Ngaa njɛ. Hi zha shɛ hio urugono apɛshɛka hiŋ o, hi zha shɛ hia ya iyimɛyɛ nɛ atwa na a ta-ụkwụla a ya o.

²³Hiɛ shɛ shɛ hio rungo nu uzawa ereweni no ohiuhiu hiŋ o, okwo uzawa abida ni ivwunɛ hiŋ o, hiɛ shɛ shɛ kaa hia ta-ụkwụla kwo kaa u'wo, hiɛ shɛ shɛ hia twa o. Ama hi zhɛ hia 'nyangana iwɛ iwɛwɛ hiŋ, ibɛ po ɛhi zhɛ hi no ngwulo.

²⁴Gamba ge Izikɛl, N zhɛ ma hi shana useyida; hi zhɛ hia nda iyi elele nɛ Ngaa njɛ kpaaŋ gom. AGWANGWAMA hiɛŋ, Aka na ti ijɛ njɛ, nazhɛ ɛhi zhɛ hia mapa maa ubwa shɛ AGWANGWAMA Mokondo.

²⁵Nazhɛ AGWANGWAMA hiɛŋ, Ɛ-yɛu bụtụ, jita na Ngee shepi ikepi yaa aba, nɛ 'yajɛ ikɛnyi, tu unyasa wa aba keeni ụjɛrụma wa aba; ti iyi nɛ ya dwa aŋ shishe, ni iyi nɛ kwụlanɛ shɛmɛ sha aba. Ngee becinji du ta miaụŋ ma aba me eyi ta mu na mo o.

²⁶Jita na Ngaa njɛ ijɛ, bụtụ bu ko na zhɛ ba bananganɛ ufwu ata tɛnda zhɛ ba zhajɛ maa mo bu mbiso unabarɛ ibɛ.

²⁷Nụ ụjita ata du nazhɛ unu bu zhɛ wa kapɛshɛngwa, ɛbi zhɛ ba ala n-ndumwa tụdụmanga sasana. Gana ɛbi zhɛ ba shana atwa ga useyida ta, nazhɛ ɛɛ zhɛ a mapa maa Gamba n shɛ AGWANGWAMA.