Read bassa IZIKƐL 25 Bible Online

IZIKƐL 25 - bassa bible

IZIKƐL 25

¹Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, ngbaraka geri bu u'una wa A'amon maa dumanganɛ aŋ tigesere tu na ti zhɛ ta wumana aŋ.

³Mbiso aŋ maa, Shɛlaga ma iyi nɛ Gamba AGWANGWAMA Mokondo a njɛ, bi hiɛŋ, Ihiiŋ! I hiɛ kwụlanɛ maa hiɛ kwụbɛ to ohwolu mi tijilo hashɛganụ, ta cɛnjɛ ti Isrɛl tɛ shɛ osombo na aka na ta atwa Juda namɛ na ti'ima.

⁴Iwɛbɛ po Ngɛɛ zhɛ ma nda maa edenji na banɛ geri bu uwaŋna-banụ a hi lasụ. Ɛ zhɛ a ta shidulo sha aba na ashashɛ hiŋ. Ɛ zhɛ a ya tụ'walụ ti hiŋ, ɛɛ zhɛ a swa mosubo mu na mu ga shɛ ma sha mi nee hiŋ.

⁵N zhɛ ma nda Raba na shɛ ụshɛpwụ ata ụ'wụtụ[74] ofwo na maa nruhondo ma aba mu na yaga, u'una wa A'amon tuba zhɛ wa sha ofwo na maa a na kapa agwụdụ aba, iwɛ maa hi mepi maa Gamba n shɛ AGWANGWAMA.

⁶AGWANGWAMA Mokondo hiɛŋ, Hi pushi i'ɛlɛ hiŋ, ahia ta ivwunɛ na cɛnjɛ nu unyasa tubwada. Hi ngbaracɛ cɛnjɛ ti Isrɛl cwɛŋ.

⁷Iwɛbɛ po Ngɛɛ zhɛ mo hi sugo mo utogono edenji a na zhɛ ma hi lashaga iyi ni iji, ɛ zhɛ o sugo ti i'wɛŋnɛ hiŋ. N zhɛ ma hi kwụna hwɛɛ, iwɛ maa kede hiɛ shɛ ya udenji na zhɛ wa waŋna u'una ti'yaga kwukwuŋ. Nazhɛ ɛhi zhɛ hia mapa maa Gamba n shɛ AGWANGWAMA.

⁸AGWANGWAMA Mokondo hiɛŋ, Iwɛnɛ ta atwa Moab[75] hiɛŋ, Cɛnjɛ tu Juda tɛ shɛ ya du gana edenji na vwɛ,

⁹iwɛbɛ po Ngɛɛ zhɛ mo lono maa a sukakanɛ ashɛpwụ aba a'wụtụ[76] a na jɛlanɛ tungwungwu tu Moab hwɛɛ, ta ashɛpwụ aba ebiye a na ngezengeni nụ ụzhɛ hwɛɛ, aba shɛ Bɛt-jɛshmot, ni Beal-mion keeni Kiriataim.

¹⁰N zhɛ mo lono maa edenji na namɛ nụ ụshɛka geri bu uwaŋna-banụ lasụ Moab hwɛɛ, ta A'amon, iwɛ maa kede edenji na vwɛ teyinje ya Moab kwukwuŋ o.

¹¹N zhɛ ma pana Moab ulwapɛ, nazhɛ ɛɛ zhɛ a mapa maa Gamba n shɛ AGWANGWAMA.

¹²AGWANGWAMA Mokondo hiɛŋ, Atwa Idụm njɛ itɛpwɛ nu Juda na mazhanga, itɛpwɛ ɛtɛ aa njɛ ibɛ peni aŋ n-ndumwa-tụwụma umɛwɛɛ.

¹³Iwɛbɛ po Gamba AGWANGWAMA Mokondo, Ngɛɛ hiɛŋ, N zhɛ ma pana Idụm ulwapɛ maa ma kwụna ta atwa, ti iyimabiga nɛ namɛ apata hwɛɛ. N zhɛ ma nda uŋ osombo te kwune ni Timan uuwa i ci Didan, nazhɛ atwa ata zhɛ o 'wo nu ujasa.

¹⁴Atwa mi Isrɛl zhɛ ma n tupanana atwa Idụm itɛpwɛ nɛ banɛ ni isɛbwɛ mi nɛ ishijɛ. Atwa Idụm zhɛ a mapa iyi nɛ itɛpwɛ mi shɛ. AGWANGWAMA Mokondo ubwa dumwa.

¹⁵AGWANGWAMA Mokondo hiɛŋ, Afilistia tupanɛ atwa na aa 'yajɛ la i'ime ingwụshɛ na aba itɛpwɛ ya amiaụŋ ni i'ime ya aba nɛ zasa uce.

¹⁶Iwɛbɛ po Ngɛɛ zhɛ ma ndarɛshɛngana Afilistia u'ala mu maa ma sukakana aŋ maa ma inzhɛnga aŋ hwɛɛ aba. N zhɛ ma kwụna atwa kɛrɛt, N zhɛ mo iricingo atwa elele na ta vwɛ nụ ụpalanụ Urefu hwɛɛ.

¹⁷N zhɛ ma pana aŋ ulwapɛ gom, ma tụpana aŋ te teni cɛŋ. Ɛ zhɛ a hwuga-ụngwụ ni isɛbwɛ nɛ Ngaa 'yajɛ na aba. Nazhɛ ɛɛ zhɛ a mapa maa Gamba AGWANGWAMA ma nda itɛpwɛ ɛtɛ na aba.