Read bassa IZIKƐL 28 Bible Online

IZIKƐL 28 - bassa bible

IZIKƐL 28

¹Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, mbiso uhiu Taya maa Gamba AGWANGWAMA Mokondo, N hiɛŋ, Iwɛ tubusa ta ata ti shini na amɛ bụ, ibɛ po ɛbi mɛmɛ hiɛŋ, N shɛ tuwa, Ngaa jɛjɛ du kaa ni idwɛtwɛ tuwa nɛ namɛ na ashashɛ ntokwu. Ama tuba bụtụ kaa abɛ shɛ, okwo te ebi meme mungicinji bata na ahaŋsa bụ gana tuwa, shɛ tuwa kaa abɛ shɛ o.

³Bɛ incɛ ga ebu hwuri Daniɛl,[82] i zasa tusweci te elele ee eri ma bu swakana o.

⁴Na ti'inta tụ bụ keeni iyi bu tumapa abɛ shɛ bɛzhɛgba, abu 'yajɛ azhɛnarɛya keeni azụrụfa.

⁵Na ti'inta tụ bụ tu na aba nda keeni tihinya tụ bụ ibɛ po aba kaana ugombo nu uduciya. Ibɛ po du ebu kwuni ya tubusa na ahaŋsa bụ iwɛnɛ abɛ shɛ bɛzhɛgba.

⁶Iwɛbɛ po Ngaa jɛmɛ, Gamba AGWANGWAMA Mokondo, Ngɛɛ hiɛŋ, Iwɛnɛ ebi heŋshi maa bɛ incɛ gana tuwa,

⁷iwɛ ecilo ata Ngɛɛ zhɛ me suje agaiŋ a na 'yajɛ shimiaụŋ maa a bu sukakanɛ. Ɛ zhɛ e hwuceci otokwobi aba maa a njɛ iyi elele nɛ abu 'yajɛ tedure ni iyi ɛtɛ bu tumapa keeni ti'inta ta ata tụ bụ ufwu.

⁸Ɛ zhɛ ma bu kala nu ushapa, nazhɛ ɛbi zhɛ bo 'wo gana atwa na aa shɛrɛ nu ntokwu.

⁹Aka na atwa ata zhajɛ maa a bụ kwụnɛ, bi tɛ zhɛ ree bɛ hiɛŋ maa bɛ shɛ tuwa? Bi zhɛ ba sha bụtụ bo ohondo ni i'ɛlɛ ya atwa ata zhɛ ma bụ kwụna, ama shɛ tuwa abɛ shɛ o.

¹⁰Bi zhɛ bo 'wo ni i'ɛlɛ ya agaiŋ ata gana bụtụ na jeji shi teleyi. Gamba AGWANGWAMA Mokondo N dumwa.

¹¹Nazhɛ AGWANGWAMA jɛmɛ n-ndumwa ne mi sasana, bɛɛ hiɛŋ,

¹²Ɛ-yɛu bụtụ, ugana u'wo-ụzhɛla iwɛ agwuma Taya maa mbishi bu maa, Gamba AGWANGWAMA Mokondo, N hiɛŋ, Gabụ la bɛ shɛ tusakana ta bụtụ ata ulwa, na 'yajɛ ti'inta duwa, na du ulwa nụ ụzhɛ.

¹³Bu namɛ la ni Idɛn, ni itimɛ ya Agwatana, obo urogono atayɛ ogwumishi iyiri yiri: nu rubi tu diamond; tu topaz, ti bɛral, ni ganelian, keeni jaspa; tu safiya,[83] tɛ ɛmɛrald keeni ganet. Bi 'yajɛ la odworo ni ikwɛmbɛ ya azhɛnarɛya, nụ ụjita na aa bu karɛ, aa njɛ aŋ.

¹⁴M bu shileni butumwa na Ngee dudugeni manɛbɛ maa bu na bu ngbaraka. Ta abu namɛ ni ishɛmɛ tijilo ya Agwatana, obo rungo na ashashɛ atayɛ ata 'yajɛ tubabazhɛ tu ulwa.

¹⁵Abɛ shɛ bụtụ na zasa unu-tusapa ni iyi nɛ aba nda te kwune na aka na aa bɛ njɛ, uuwa i ci aka na ebu kwuni ya iyi iwɛ tɛnda.

¹⁶Ebi meme shi na tihinya, abwagara kaa shini na amɛ bụ, ibɛ po abɛ njɛ iwɛwɛ. Iwɛbɛ po Ngee bi becinji gana iyi nɛ hashɛganụ maa genji ishɛmɛ mi tijilo, ibɛ po butumwa ata ga bu ngbaraka la ubu unzhe ni iji maa banɛ na atayɛ ata 'yajɛ tubabazhɛ tu ulwa.

¹⁷Tubusa ti shini na amɛ bụ iwɛ ụzhɛ bụ na abɛ zhɛmɛ, ibɛ po ebi meme tecinji ụdamụ iwɛ urishi na ebi beni iwɛ ti'inta tụ bụ. Iwɛbɛ po Ngaa bu kalagajɛ na cɛnjɛ maa shɛgwuma shɛ vwɛ shɛ bu zweni igbɛtɛtɛ.

¹⁸Iwɛwɛ bu gembi ufwugwo, iwɛ tihinya tu na abɛ njɛ shɛ ne tiririri, ibɛ po ebi heshigeni ohwolu bu tijilo; nazhɛ Ngɛɛ ɛmpicinjɛ ulwa na ashashɛ bụ maa ubu hwoŋzhinji, Ngaa bɛ njɛ ma'alụ ne eshe atwa elele na ụbụ kwụbɛ.

¹⁹Bu shanɛ edenji elele na ubu mepi la iyi tudama, ukwunanga bu ụ shɛ ya iyi uriri, bi zha shɛ kaa ba nama ya kwukwuŋ unyizo-nom.

²⁰Nazhɛ AGWANGWAMA n hiɛŋ,

²¹Ɛ-yɛu bụtụ, ngbaraka geri bu Saidụn, maa dumanganɛ uŋ tigesere tu na ti zhɛ ta wumana uŋ.

²²Mbiso atwa ata maa, Gamba AGWANGWAMA Mokondo, N hiɛŋ, Oo gabụ ga Saidụn, N shɛ bụtụ bụ bi i'ime; aka na Ngee bi peni ulwapɛ, Ngee bi mbiseni tijilo ti mi, nazhɛ ɛbi zhɛ ba mapa maa Gamba n shɛ AGWANGWAMA.

²³N zhɛ ma bu tumwananɛ ụngwụ ụwɛ, maa mehieŋ mụ fwụnjɛ ni ihwɛŋnɛ nɛ duleji na amɛ ụshɛpwụ bụ. Ɛ zhɛ ma bụ sukakana geri geri, ɛ zhɛ a kwụna atwa bụ nu utokwobi. Nazhɛ ɛbi zhɛ ba mapa maa Gamba n shɛ AGWANGWAMA.

²⁴AGWANGWAMA hiɛŋ, edenji elele na rungwutwonu atwa Isrɛl, a na njɛ aŋ la amiaụŋ, a zha shɛ a shana aŋ ya gana esepi keeni tɛka maa a na gwụcanga aŋ ya o. Nazhɛ ɛɛ zhɛ a mapa maa Gamba n shɛ AGWANGWAMA.

²⁵AGWANGWAMA Mokondo hiɛŋ, N zhɛ me jicenji atwa Isrɛl maa a bananjɛ no olugwo elele na Ngee gereteji aŋ la na ashashɛ edenji, N zhɛ mo mbisono aŋ tijilo ti mi na ashashɛ edenji ata. Nazhɛ ɛɛ zhɛ a nama na cɛnjɛ ta aba, ibɛ shɛ cɛnjɛ ta ata Ngee peni la yɛu mi ugondu ge Jekob.

²⁶Ɛ zhɛ a nama apata suu uzawa tuzuga te elele. Ɛ zhɛ a ma shimwono, ɛɛ zhɛ a hwaŋ ntuma ma shifwafwa. N zhɛ ma pana atwa na rungwutwonu aŋ ulwapɛ, iwɛnɛ aa njɛ aŋ la amiaụŋ, nazhɛ atwa Isrɛl zhɛ a nama ni ijilɛni. Nazhɛ ɛɛ zhɛ a mapa maa Gamba AGWANGWAMA na shɛ Agwatana aba na.